Выбрать язык
Книги Ветхого Завета
Книги Нового Завета
с русским текстом(Цёрась:)
1– Ялгинем-одирьвам, мон сынь умарьпирезэнь,
пурнан миррам ды тантей качадомапелем,
витнян седеем медь керяздон ды улаздон,
симан винадон ды ловсодон.
(Иерусалимень тейтертне:)
– Оят, ярсадо ды симеде!
Пешкедемазонк ярсадо-симеде, вечкицят!
(Тейтересь:)
2Монсь удынь,
а вана седеезэнь удома эзь педя.
Марян: вечкевиксэм сась!
Сон чаки-вачкои ды корты:
– Панжт тень, ялгинем, седейпелькскем,
гулькинем, монь ванькскем!
Эдь черень вельтявсть ведьбайгесэ,
селякан*а начксть вень летькеденть!
3– Мон уш кенеринь кайсеме –
мезе, таго тень оршнема?
Мон уш кенеринь пильгень шлямо –
мезе, таго сынст рудаскавтомат?
4Вечкевиксэм ёвкстызе кедензэ эйзэнь кенкшварява –
потмом-рунгом венстявсть ёнонзо.
5Мон стинь вечкевиксэнь туртов панжомо,
кедьстэнь петнясь мирра,
сурстон петнясь (м:чудиця?) мирра
кенкшкундамонть лангс.
6Мон панжинь вечкевиксэнь туртов –
ансяк сон уш арасель – велявтсь эйстэнь ды тусь.
Эль эзь машто монь оймем,
зярдо эйстэнь ёматотсь.*б
Мон пек вешнинь эйсэнзэ – ды эзия муе,
тердинь эйсэнзэ – каршон вал сон эзь кая.
7Монь вастымизь ошонть ванстыцятне,
монь редимизь ошонть ютыцятне.
Пек чавимизь, рунгован кадсть аржот,
ноцковтызь лангстон вельтявксонть
ошонь пирявксонть ванстыцянзо!
8– Иерусалимень тейтерть!
Максан тенк кемедеяк кеме кармавтома:
зярдо мусынк-вастасынк вечкевиксэм, мезе мертядо тензэ?
Мереде: мон майсян сонензэ вечкемадонть!
(Иерусалимень тейтертне:)
9– Ёвтык миненек, тейтертнестэ сехте мазыесь,
мейсэ лиятнеде седе паро вечкевиксэть?
Мейсэ лиятнеде седе вадря вечкевиксэть –
мекс тон тенек максат
истямо кемедеяк кеме кармавтома?
(Тейтересь:)
10– Монь вечкевиксэм валдыне-мазыйне, якстердиця чамаумарь марто,
кемень тёжатнень ютксояк сонзэ кондямо арась.
11Прязо-чамазо теке ванькс сырне,
черензэ сурксонь суркс менчевезь,
раужот, варакань тюссот.
12Сельмензэ – теке гулькинеть
чудикерькс чиресэ:
ловсосо экшелямодо мейле
ойсить сёлт чирева.*в
13Чамаумарензэ-сакалонзо – тантей чине цецяпиреть, –
кода тантейстэ сынь качадыть!
Турванзо – теке лилият,
лангстост петни мирра.
14Кедензэ – питней кевсэ мазылгавтозь
сырнень цётмарнэть.
Мештезэ-пекезэ – сапфирсэ сюпалгавтозь
слононь ловажасто теевкст.
15Пильгензэ – мраморонь палманть
ванькс сырнень неже лангсо.
Сон (м:лангс ваномс/ Сонзэ чачозо?), кода Ливанонь пандотне,
сэрей-ёлганя, теке Ливанонь кедратне!
16Кургозо – сонсь тантейчи,
весе сонськак – седейспедиця.
Оно кодамо монь вечкевиксэм,
оно кодамо монь малавиксэм,
Иерусалимень тейтерть!
*а 5.2 селяка – менчевиця черь, кудря.
*б 5.6 Эли: Оймем таргавсь ёнонзо, зярдо сон кортась монень.
*в 5.12 Эли: аштить пешксечинть чиресэ.
Глава 5