Выбрать язык
Книги Ветхого Завета
Книги Нового Завета
с русским текстом(Цёрась:)
1– Кодамо тон мазыят, монь седейпелькскем,
вай, мазыйдеяк мазыят!
Сельметь – теке вечкениця гулькинеть
неявить пряват каязь вельтявксонть пачк,
череть – теке Галаадонь пандопрясто
ардыця раужо сеянь куро.
2Пееть – теке экшелямодо мейле ведьстэ лисиця
наразь ашо реветь,
теке кавтаське левкскеть, кавтонь-кавтонь –
эйстэст вейкеяк эзь ёма.
3Турват – теке валдо-якстере парсейнеть,
кургот вельть мазыйне!
Чамаумареть – теке пель гранатт
неявить пряват каязь вельтявксонть пачк.
4Кирьгат – теке Давидэнь башня,
ёроковсто вачказь пирявтконякс,*а
мазылгавтозь тёжа ушмолазсо –
весе сынь маралянь ваксарт.*б
5Мештеть – теке кавто од ланть,
теке газелень левкст-кавтаськеть,
конат якить-ярснить лилиятнень юткова.
6Зярс чись лекси экше ялткесэ
ды зярс эзть срадо сулейтне,
молян миррань пандот пряс,
фимиамонь пандот пряс.
7Тон весемева мазыят, седейпелькскем,
эйсэть арась кодамояк асатыкс!
8– Сак монень Ливансто, одирьвам!
Сак монень васоло Ливансто!
Тутано! Валгт Аманонь тёкшосто,
Сенирэнь ды Ермононь тёкшотнестэ.*в
Валгт тосто, косот левень пизэтне,
косот барстнэнь эрямонь пандотне!
9Монь ялгинем-одирьвам,*г
тон полонс саик монь седеем!
Тон полонс саик монь седеем
сельмень вейкине варштавкссот,
кирьгашань вейкине эрьгесэть!
10– Вай, ялгинем-одирьвам!
Кода мельс тукшны тонь вечкемат!
Вай, тонь палсемат-кутморямот вадря винадояк тантейть!
Весе тантей чинень ойтнеде тантейстэ
качадыть тонь ваднемапелеть!
11Одирьвам, турват лангсто петни ансяк таргавт медь,
кель алот – улаз*д ды ловсо.
Оршамопелеть качадыть тантейстэ
кода Ливанонь вирень кедратне!
12Монь ялгинем-одирьвам,
тон – панжома экшсэ умарьпире,
сёлгозь лисьмапря,
тешкссэ пекстазь лисьма.
13Тон – умарьпире, конань
ведень чудевтема латконзо кувалма
касыть гранатонь ды лия чувтот
пародояк паро умарь марто,
тосо кипер марто нард.
14Тосо касыть нард ды шафран,
тантей чине сандей ды корица,
весе тантейстэ качадыця чувтотне,
мирра ды алоэ*е –
эрьва кодамо сехте тантей качадомапельтне.
15Тон – умарьпире куншкасо лисьмапря,
чуди ванькс ведь марто лисьма –
Ливан пандопрясто чудиця ведтнень лисема тарка.
(Тейтересь:)
16– Якшамо ёндонь варма, сыргозть!
Лембе ёндонь варма, пачкодть!
Пувадо умарьпирем лангс –
кадык чудезевить сонзэ тантей чинензэ!
Кадык вечкевиксэм сы умарьпирезэнзэ
ды витни седеензэ умарьпиренть пародояк паро умарьсэнзэ!
*а 4:4 пирявтконякс – башня.
*б 4:4 ушмолаз, ваксар – щит.
*в 4:8 Сенир ды Ермон – неть вейке пандонь кавто лемть. Вант Второзак. 3.9. Аман – Ливанонь пандотнестэ оштё вейкесь.
*г 4:9 Валдо-валс тесэ евр. кельсэ "сазорнэм-одирьвам" – кода чевтестэ, вечкезь пшкадема.
*д 4:11 улаз – нектар.
*е 4:14 алоэ – вант Валв. 7:17.
Глава 4