Выбрать язык
Книги Ветхого Завета
Книги Нового Завета
с русским текстом1Ефан Езрахитэнь тонавтомазо.
2Тонь седеймарямот, Азоро,
карман моравтомо пингеде пингес,
Тонь видечидеть карман ёвтнеме буестэ буес.
3Секс кортан: Тонь седеймарямот пингеде пингес,
Тонь видечить истямо кеме, кода менелесь.
4Тон мерить: «Мон теинь-сюлминь вейсэньлув Монь кочказенть марто.
Давиднэнь, Монь урентень, максынь алтамо вал:
5”Пингеде пингес а ёми тонь буеть,
тонь инеэземеть лангсо свал
карми улеме тонь раськень ломань”».
6Менельтне инелгавтсызь Тонь дивань теветь, Азоро.
Тонь видечить ули шназь иневанькстнэнь промкссо.
7Кие менельсэ аравтови Азоронть ваксс?
Кие Пазонь цёратнень ютксто Азоронть кондямо?
8Пек сорныть Пазонть икеле иневанькстнэнь промкссонть,
пек тандалить Сондензэ перьканзо аштицятне.
9Азоро, менелень вийтнень Паз!
Кие Тонь кондямо виев, Азоро?
Тонь видечить Тонь перька.
10Тон азорат кежей иневеденть лангсо.
Зярдо кепсевить сонзэ виев толкунтнэ,
Тон сынст мадстят.
11Тон чавик Раавонть*а куломазонзо.
Виев кедьсэть сравтыть Тонь душмантнэнь.
12Менелесь – Тонь ды модась – Тонь.
Тон теить менельтнень-мастортнэнь
ды мезе сынст пешти.
13Пелевенть ды обедъёнксонть теить Тон.
Фавор ды Ермон*б шныть Тонь леметь.
14Виев Тонь кедеть, кеметь Тонь кедь санот,
сэрейстэ кепедезь Тонь вить кедесь!
15Видестэ судямось ды виде тевтне – Тонь инеэзементь юрось.
Седеймарямось ды видечись молить Тондеть икеле.
16Уцяскав раськесь, кона верьга вайгельть шны Тонь!
Сынь эрить се валдосонть, кона моли Тонь чачот эйстэ, Азоро.
17Тонь леметь кенярдовты сынст чинь перть,
Тонь видечить кепеди сынст верев.
18Тон кастат-мазылгавтат сынст виест
ды Тонь вечкемат теи сынст нардевекс.
19Азоронть пельде – минек ваксарось*в,
Израилень Иневаньксэнть пельде – минек инязоронок.
20Зярдо-бути Тон неявкссо*г ёвтыть
Тонь кемевикс важонтень:
«Мон лездынь виевентень, кепедия раськестэнть кочказенть.
21Мон муия Давидэнь, Монь уренть,
вадия сонзэ иневанькс елейсэнь.
22Монь кедем кемекстасы сонзэ.
Монь вием ули тензэ нежекс.
23Душман а изнясы сонзэ,
нулгодькс тевень теиця а лепштясы сонзэ.
24Мон тапасынь икелензэ сонзэ душмантнэнь,
правтсынь-маштнесынь сонзэ авечкицятнень.
25Монь видечись ды Монь седеймарямось мартонзо.
Монь марто сон карми улеме виев ды ине.
26Мон путса иневеденть лангс сонзэ кедензэ
ды лейтнень лангс – сонзэ виев вить кедензэ.
27Сон карми Монь тердеме: ”Тон монь Тетям, монь Пазом
ды монь кемекстазь кекшема таркам!”
28Мон аравтса сонзэ Эстень васень цёракс,
модалангонь инязортнэде сехте покшокс.
29Пингеде пингес Мон ванстаса сонензэ Эсь седеймарямом
ды вейсэньлувонть мартонзо а коласа.
30Свалшкас Мон ванстаса сонзэ буенть
ды сонзэ инеэзементь путса знярс,
зярс улемс менелентень.
31Бути сонзэ эйкакшонзо-нуцьканзо кадсызь Монь коем
ды а кармить тееме Монь кармавтовкстнэнь коряс,
32бути коласызь Монь аравтовкстнэнь
ды а топавтсызь Монь мерематнень,
33сестэ невтьса тенст мандосо*д зыянов тевест кисэ,
пандса кажосо авидечист кисэ.
34Ансяк Давидэнь эйстэ седеймарямом а сайса
ды кирдьсынь сонензэ Эсь алтамотнень.
35А коласа Монь вейсэньлувом ды а полавтса сень,
мезе лиссь Монь кургосто.
36Мон божинь-пежедькстынь Эсь иневаньксчисэнь.
Кода маняса Давидэнь?
37Сонзэ раськесь-буесь карми улеме пингеде пингес,
ды сонзэ инеэземезэ ули Монь икеле свал, кода чипаесь.
38Пингеде пингес кеместэ карми аштеме сон,
кода ковось, менельсэ кемевикс неицясь».
39Ансяк ней Тон кадык Эсеть вадевтеть
ды мезекскак а путат сонзэ,
кежиявтыть лангозонзо.
40Мезекскак эзик путо вейсэньлувот Тонь уренть марто,
ёртык модалангс сонзэ прясто каштазонть.
41Тон калавтыть весе сонзэ сэрей пирявкстнэнь,
лондавтыть сонзэ кевень кородовкстнэнь*е.
42Ваксканзо весе ютыцятне салыть сонзэ.
Сон теевсь пейдема таркакс эсензэ шабратнень туртов.
43Тон теить виевекс каршонзо аштицятнень,
кенярдовтыть весе сонзэ душмантнэнь.
44Тон ношкалгавтык сонзэ пшти торонть
ды эзить лезда сонензэ тюремстэ.
45Тон путыть пе сонзэ касома-кемекстамо шкантень
ды инеэземензэяк правтык модалангс.
46Тон киртить сонзэ од шкань чинзэ
ды вельтик сонзэ визьксчамасо.
47Зярс, Азоро? Ней свалшкас Тон кекшить?
Зярс карми паломо толокс Тонь кежеть?
48Ледстик, кодамо нурькине монь пингем. –
Кодамо стяконь эрямос теить Тон ломантнень?
49Кие ломантнень эйстэ эрясь ды эзь кулокшно?
Кие менстизе оймензэ тоначинь коморосто?
50Косо икелень Тонь седеймарямось, Азоро?
Косо Тонь алтамотне,
конатнень Тон Эсь видечисэть максыть Давиднэнь?
51Ледстить, Азоро, Тонь уретнень лангсо нарьгамотнень,
конатнень мон кандтнян потмосон ламо раськетнень пельде.
52Тонь душмантнэ, Азоро, згилить минек лангсо,
Тонь вадевтенть эрьва эскельксэнзэ лангсо ракить.
Шнамо
*а 88:11 Раав – тесэ: Египет
*б 88:13 Фавор ды Ермон – пандотне
*в 88:19 ваксар – щит
*г 88:20 неявкс – видение
*д 88:33 мандо – тесэ: палка
*е 88:41 кевень кородовкс – крепость
Глава 88