Выбрать язык
Книги Ветхого Завета
Книги Нового Завета
с русским текстом1Моро. Кореень буенть псалмась. Моравтомань ветицянтень. «Махалаф»*а морамолувонть коряс. Еман Езрахитэнь тонавтомазо.
2Азором, монь идиця Пазом!
Чить ды веть энялдан-ранган Тонь икеле.
3Пачкодезэ Тонеть озномам.
Марик монь рангомам-лайшемам.
4Монь оймем пешксе пиштемадо.
Мон малав пачкодинь тоначинтень.
5Монь ловить калмос валгицятнень ютксо.
Мон кода вийтеме кадовозь ломань.
6Мон теке ёртозь кулозтнень юткс.
Мон, кода маштозтне, калмос путозтне,
конатнеде Тон уш а ледстнят
ды конатненень Тонь кедесь а лезды.
7Тон нолдымик монь
куломань домка латконть потмаксос,
чоподас, отьмас.
8Тонь ацирьгадомат монь лангсо стакадояк стака.
Весе Тонь кежтне, теке ведьвелявкст,
човиязь кеверькшнить [монь ланга].
9Тон саить эйстэнь весе малавикс ломанень,
теимик нулгодьксэкс сынст туртов.
Мон прок пекстазян ды кодаяк а лисеван.
10Монь сельмень потмургадсть мелявкстонть.
Чинь-чоп энялдан-ранган Тонеть, Азоро,
венстнян Тонеть кедень.
11Арази кулозтненень Тон теят дивань тевть?
Арази кулозтне стить ды кармить Тонь шнамо?
12Нать, калмосо кармить ёвтнеме Тонь седеймарямодот
ды наксадомань таркасо – Тонь видечидеть?
13Арази тунь чоподасонть
кармить содамо Тонь тамашатнеде?
Модасонть, косо мезеськак мельсэ а кирдеви,
кармить содамо Тонь видечидеть?
14А вана мон, Азоро, Тонеть энялдан-ранган.
Валскень чоподава Тонеть пачкоди озномам.
15Азоро, мекс безардят*б оймедень?
Мекс кекшат Эсь чачот монь эйстэ?
16Мон пайстоман, ды куломась маласон од шкастон саезь.
Пиштян-майсян Тонь тандавкстнэде.
Сынь теить монь вийтемекс.
17Монь ланга а весть ютась Тонь пултыця кежеть.
Монь пес пачтясамизь Тонь тандавтнематне.
18Чинь-чоп, теке ведь, монь пирить тандавтнематне.
Сынь карксыть монь эрьва ёндо!
19Тон кадымик монь ялгавтомо ды малавикстэме.
Кинь содылинь, сеть а неявить.
Шнамо
*а 87:1 Махалаф – евреень келень вал, конань смустезэ апак панжо.
*б 87:15 безардемс – пренебрегать, отворачиваться, отказываться
Глава 87