Выбрать язык
Книги Ветхого Завета
Книги Нового Завета
с русским текстом1Моисеень, Пазонь ломаненть, озномазо.
2Азоро! Буестэ буес Тон минек кекшема тарканок.
3Пандотнень чачомадост икелеяк,
Тонь вийсэ моданть ды менельтнень-мастортнэнь теемадост икелеяк
свал ульнить Тон ды пингеде пингес улят Тон, Паз.
4Тон теят ломаненть мекев модакс ды кортат:
«Велявтодо мекев модачелькекс, ломанть!».
5Тонь сельметь икеле тёжа иетне теке исень чись, кона ютась,
ды теке ниле частнэ вень ванстыцянтень*а.
6Тон теке чадыведьсэ салат эрямостонть ломантнень.
Сынь теке он, теке тикше, кона валске лиси,
мейле касы, панжи, чокшне пры ды коськи.
7Минь ёматано Тонь кежеть эйстэ.
минь сорнотано Тонь виев ацирьгадомат эйстэ.
8Минек нулгодькс тевтнень-валтнэнь Тон путыть икелеть
ды минек салавань пежетенек – Эсеть чачо валдот икелев.
9Весе минек читне ютыть Тонь кежеть ало.
Минек иетне ёмить-ютыть, кода шожда кувсема.
10Минек эрямо шканок – сизьгеменьшка иеть,
седе виевтнень – кавксоньгемень иеть.
Весе неть иетнень перть
ломаненть лангс прыть важодема ды стакачить.
Сынь ютыть куроксто, ды минь ливтятано тестэ.
11Кие варчизе Тонь кежеть виензэ, ды кие соды,
кодамо покш тандадома канды Тонь ине кежесь?
12Тонавтомизь минек мельсэ кирдеме,
кодамо нурькине эрямонок
миненек превейчинь пурнамга.
13Азоро, велявтт минек ёнов! Зярс таргасак шканть?
Ульть седеймарицякс Тонь уретненень!
14Валске марто пештямизь минек эсь седеймарямосот,
ды минь карматано кеняркшномо
ды эрьгелеме весе минек читнень перть.
15Казть тенек кеняркс зняро чис,
зяро чить Тон минек пиштевтить-майсевтить,
ды зняро иес, зяро иеть минь кирдинек кажо.
16Кадык несызь Тонь уретне покш теветь,
сынст эйкакштне – Тонь инексчить!
17Улезэ тенек Азоронть, минек Пазонть, паро мелезэ!
Баславить минек кедьсэ теевть тевенек,
лездак тевсэнек!
*а 89:5 Кезэрень еврейтне явилизь вень шканть колмов, ды эрьва ванстыцясь ванстыль ниле часонь перть.
Глава 89