Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 82
Пазонтень энялдома Израилень душмантнэнь правтомадо
1Моро. Асафонь псалмась.
2Пазом, иля чатьмоне!
Иля каштмоле
ды иля кадново, Пазом, вайгельтемекс!
3Вант, кода Тонь душмантнэ шалныть-азаргалить,
Тонь авечкицятне кепедизь пряст.
4Сынь салава понасть зыянов тевть Тонь раськеть каршо
ды арсить зыян Тонь ванстовтнэнь каршо.
5Сынь мерсть: «Мольтяно ды маштнесынек сынст раськетнень ютксто,
кадык седе тов а карми ледстневеме Израиленть лемезэ».
6Душмантнэ прасть вейсэнь мельс,
вейсэндявсть Тонь каршо:
7Едомонь таркатне ды измаилэнсетне,
Моав ды агаренсетне,
8Гевал, Аммон ды Амалик,
филистиянсетне Тирэнь эрицятнень марто.
9Ды Ассуроськак педясь сыненст,
эсь вийсэнзэ виевгавтынзе Лотонь цёратнень.
10Азором, теик сыненст секень, мезе теить Мадианнень,
мезе Сисаранень ды Иавиннэнь
Киссон чудикерьксэнть вакссо.*а
11Сынь маштнезь Аендорсо
ды теевсть модантень назёмокс*б.
12Тейть сынст чинязтнэнь марто истя,
кода Оривень ды Зивень марто,
ды сынст весе ветицяст марто,
кода Зевеень ды Салманонь марто.*в
13Сынь кортасть: «Сайсынек эсенек кедь алов Пазонь моданть».
14Монь Пазом! Теить сынст даволонь челькекс,
вармасо кандтневиця сювакс.
15Кода толось пулты виренть,
ды кода толкелесь кирты пандотнень,
16истя Тонгак пансек сынст Эсь кежей вармасот ды даволсот
ды куломазост тандавтыть.
17Правтыть сынст визьксчамас,
зярс а кармить мельс путомо Тонь азорксчить, Азоро!
18Кадык сынь свал эрить виздезь ды пелезь
ды кулыть апаро куломасо.
19Ды кадык содыть: ансяк Тонь леметь – Азоро,
Тон весе моданть лангсо Верепаз.
*а 82:10 Вант: Изр.суд.6-8; 4:7
*б 82:11 назём – навоз
*в 82:12 Вант: Изр.суд.7:25; 8:12,21
Глава 82
