Выбрать язык
Книги Ветхого Завета
Книги Нового Завета
с русским текстомАсафонь псалмась.
1Пазось арси паро Израилентень,
паро сетненень, кинь ванькс седеезэ!
2Ансяк вана мон аламодо эзинь нолажто,
эль-эль кирдевинь пильге лангсо.
3Мон сельмем сявадстыя пряст верьга кандыцятнень лангс,
зярдо неия неть зыяновтнень паро эрямост.
4Сынст арасть кодаткак пиштемаст куломазост,
сынь шумбрат ды виевть.
5Ломанень стака важодемадонть сынь олякстомтозь,
сынст арасть кодаткак стакачист, кода лиятнень.
6Секскак каштанчинть сынь кандтнить, кода кирьгашатнень*а,
ды кежейчинть, кода оршамонть.
7Сынст сельмест лиссть лангс куялгадомадонть,
седейсэст азгондить зыянов мельть-арсемат.
8Весементь лангсо нарьгить-пеедькшнить
ды тандавтнить кежень пандомасо.
Кортыть прянь верьга кандозь.
9Сынь эсест кургосост пачкодсть уш менельс,
келест каштансто якси модаланга.
10Секскак мельгаст таргавить Сонзэ раськень ломантнеяк
ды симить койтемечинть, теке покш кечесэ ведь.
11Сынь кортыть: «Кода соды тень эйстэ Пазось?
Арази ули Верепазонть содамочизэ?»
12Ды вана неть зыяновтне свал эрить парсте,
ламолгавтыть сюпавчист.
13[Мон меринь:] паряк, стяко мон кирдинь седеем ваньксстэ
ды ванстынь кедень чумовтомочисэ?
14Чинь-чоп муцясть монь
ды эрьва валске пандсть тень чумо.
15Меревлиньгак: «Карман кортамо сынст ладсо», –
улевлинь чумо Тонь раськенть икеле.
16Мон арсинь, кода саемс тень превс.
Ансяк смустенть стака ульнесь тень неемс.
17Сестэ мон совинь Пазонь иневанькс эрямо таркантень
ды чарькодинь, кодамо пе учи сынст.
18Алкукс! Тон путыть сынст нолажа килангс
ды ёртат эйсэст ёмамос.
19Кода куроксто сынь улить маштнезь-ёмавтнезь
ды покш тандадомасо пачкодить сынь эсест ёмамонь пес!
20Кода ононь неемась стувтови сыргоземадо мейле,
истя Тон, Азоро, стувтат мик чамасткак стямодот мейле.
21Зярдо лакась монь седеем
ды палсь весе потмом,
22ёмавтокшнынь мон превень
ды мезеяк эзинь чарькоде.
Теке ракша мон ульнинь Тонь икеле.
23Ялатеке мон свал Тонь марто.
Тон кирдят монь вить кедте.
24Тон ветят монь Эсеть превс путомасот,
ды мейле совавтсамак иневалдозот.
25Менель лангсо Тон монь марто.
Мода лангсояк Тондеть башка монень мезеяк лия а эряви.
26Кадык рунгом ды седеем лавшомить,
Пазось ули монь седеем кемекстыцякс.
Сон монь туртов весе уцяскам пингеде пингес.
27Сеть, конат Тонь эйстэ туить, кулыть.
Тон маштат-ёмавтат эрьванть, кона манчи эйсэть.
28Монень вана ансяк вейке парось:
Пазонтень маласо улемась!
Азоро Пазонть лангс мон кеман-нежедян,
ды карман ёвтнеме Тонь весе тевтнеде
[Сиононь ортатнень лангсо].
*а 72:6 кирьгашат – бусы
Глава 72