Выбрать язык
Книги Ветхого Завета
Книги Нового Завета
с русским текстомДавидэнь псалмась.
1Азоро, пелькстак каршон пелькстыцятнень марто,
тюрть каршон тюрицятнень марто.
2Саик ваксарот*а ды кшнинь оршамот
ды сак монень лездамо.
3Таргик торот*б ды пирик кинть мельган пансицятненень.
Мерть монь ойментень: «Мон тонь идицят».
4Кадык визделгалить ды совить визьксчамас
монь оймень вешницятне!
Кадык потыть визьксчамасо
монень зыянонь арсицятне.
5Кадык улить сынь теке вармасо сюва.
Азоронть ангелэзэ кадык пансесынзе сынст.
6Улезэ кист чоподакс ды нолажакс.
Азоронть ангелэзэ кадык панси мельгаст.
7Эдь сынь тувталтомо кекшсть монь туртов кундсемка*в,
тувталтомо чувизь эсь латкост монь ойменть туртов.
8Кадык апак учо пры душманонть лангс кулома-ёмамо,
кадык кундасы сонзэ эсензэ кундсемкась,
конань сон кекшизе монь туртов,
кадык сонсь понги эйзэнзэ куломас-ёмамос.
9А вана монь оймем карми кенярдомо Азоронть кисэ,
карми эрьгелеме идеманть кисэ, кона сы Сонзэ пельде.
10Монь эрьва ловажась ёвты:
«Азоро! Тонь кондямо арась кияк,
кона идевель лавшонть виевенть эйстэ,
кажовонть ды пурныцянть – салыцянзо-нельгицянзо эйстэ».
11Стясть монь каршо авиде неицят-яволявтыцят.
Сынь кевкстнить монь седе, мезде мон а содан.
12Сынь пандыть монень зыянсо паронть кисэ,
мон кадовинь допрок ськамон.
13Зярдо сынь сэредсть,
мон оршнилинь ризнэмань оршамопель,
эсь оймем майсевтинь постсо,
ансяк монь озноматне велявтыльть мекев каршо валтомо.
14Мон тейнинь истя,
кода эрявсь тейнемс эсень ялган, лелян-ялаксон марто.
Мон яксинь ризнэзь-мелявтозь, прянь нолдазь,
кода авань кисэ лайшиця-авардиця.
15Ансяк зярдо пупордилинь,
сынь кеняркшныльть ды пурнавильть вейс.
Неть душмантнэ пурнавильть монь каршо.
А содан, мезень кисэ сынь сёвныльть-пазильть монь апак лотксе.
16Кавто чачосотне згилязь нарьгасть монь лангсо
ды чикордсть пейсэст лангозон.
17Азоро, кувать а кувать кармат ваномо тень лангс?
Менстемак монь сынст зыянов тевтнеде,
идик монь вейкине эрямом левтнень кургосто.
18Мон карман ёвтамо сюкпря Тонеть ине промкссо,
карман шнамо Тонь ламо ломань ютксо.
19Кадык тувталтомо каршон молицятне а пеедькшнить монь лангсо.
Кадык а кончтнить сельмесэст вейкест-вейкест туртов
монь, чумовтомонть, авечкицятне.
20Эдь аволь сэтьмечисэ эрямодо кортыть сынь,
мекевланг, модалангсо сэтьместэ эрицятнень каршо
кодыть-поныть ёжов арсемат.
21Сынь автнить лангозон кургост, кортыть:
«Паро! Паро! Истя теть эрявияк!
Весе тень минь неинек эсенек сельмесэ».
22Азоро, Тон тень неик, иля чатьмоне.
Азоро! Иля аште васоло монь эйстэ.
23Монь Пазом ды Азором!
Сыргозть ды стяк монень виде судонь тееме,
ульть монь кисэ аштицякс.
24Азоро, монь Пазом!
Судямак Эсь видечить коряс,
ды кадык душманон а пеедькшнить монь лангсо.
25Кадык сынь а кортыть эсь пачкаст:
«Паро, [паро,] те се, мезе миненек вечкеви!»
Кадык а шныть пряст: «Минь нилинек сонзэ».
26Кадык визделгадыть ды совить визьксчамас весе,
кить кенярдыть монь кажонтень!
Кадык визьксэсь ды покордамось вельтясызь сетнень,
кить покшкавтнить пряст монь икеле.
27Кадык кеняркшныть ды эрьгелить весе,
кить мелявтыть монь видечинть кисэ
ды кадык кортыть апак лотксе:
«Улезэ инелгавтозь Азорось,
Эсь уренстэнь сэтьмечинь арсицясь».
28Мон карман пачтямо Тонь видечидеть
ды карман шнамо Тонь эрьва чистэ.
*а 34:2 ваксар – щит
*б 34:3 торо – меч
*в 34:7 кундсемка – ловушка
Глава 34