Выбрать язык
Книги Ветхого Завета
Книги Нового Завета
с русским текстом1Давидэнь псалмась, зярдо сон невтизе прянзо превстэ лисезекс Авимелехень икеле, ды тона панизе сонзэ – истя Давид туевсь эйстэнзэ.
2Мон свал инелгавтнян Азоронть.
Апак лотксе мон шнан Сонзэ.
3Азорось – монь ойменть шнамопелезэ.
Марясызь тень сэтьметне ды кармить эрьгелеме.
4Шнадо Азоронть монь марто.
Вейсэ тейсынек Сонзэ лементь инекс.
5Мон вешнинь Азоронть, Сон маримим монь
ды идимим монь весе пелематнеде.
6Кить ваныть Сонзэ лангс, сетне сияждыть кенярдомасо,
сынь а прыть визьксчамас.
7Мон, пиштякась, тердия Азоронть.
Сон маримим монь ды идимим весе зыянтнэнь эйстэ.
8Азоронть ангелэсь вансты сетнень,
кить пелить Азордонть, ды иди эйсэст.
9Варчинк ды несынк, кодамо паронь кандыця Азорось!
Уцяскав се, кие кеми-нежеди Сонзэ лангс!
10[Весе] Сонзэ иневанькстнэ, пеледе Азордонть.
Сондензэ пелицятнень а ули кодамояк арасьчист.
11Од левтне пиштить ды кирдить вачочи,
а вана Азоронть вешницятне мезеньгак кувалма а пиштить.
12Эйкакшт, садо, кунсоломизь монь:
тонавттадызь тынк пелеме Азордонть.
13Кие бажи эрямс кувака пинге
ды учи эрямонть пельде вадря,
14кадык кирди келензэ апаро валдо
ды кургонзо кенгелемадо.
15Кадык туи веёнов зыяндонть, теи паро,
вешни ладямо-оймамо ды бажи тенень.
16Азоронть сельмензэ неить видечисэтнень,
пилензэ марить сынст авардемаст-рангомаст.
17Азорось саи чачонзо зыянонь теицятнень эйстэ
ды истя нарды сындест ледстнеманть моданть лангсто.
18Зярдо тердить видечисэтне, Азорось мари эйсэст
ды идесынзе весе ризксэст-мелявксост эйстэ.
19Азорось ашти маласо синдезь седейтненень
ды иди томбазь ойметнень.
20Ламо ризкст-мелявкст пракшныть видечисэнть лангс,
ансяк Азорось идесы сонзэ весе сынст эйстэ.
21Сон ванстасынзе весе сонзэ ловажанзо:
вейкеяк эйстэст а ули синдезь.
22Пежетевенть маштсы эсензэ зыянось.
Ды кить а вечксызь видечинь ломаненть,
сетнень чумост кисэ ули пандозь.
23Азорось идесынзе Эсь урензэ оймест,
ды кияк Сонзэ лангс кемицятнень-нежедицятнень эйстэ
а ули чумондозь.
Шнамо
Глава 33