Choose Language
Old Testament Books
New Testament Books
view with a second Bible
1 ”Сыманын кāстāл ул вос ōлэ̄гыт, Тōрумн агтэ̄н, ос Āнумн агтэ̄н.2 Ам Āсюм колэ̄т сāв мā ōлы. Тох ат ке ōлнув, Ам нāнанн лāвнувум: Ам нāн мāгсылы̄н мā сё̄питаӈкве минэ̄гум.3 Ос миннэм юи-пāлт нāн мāгсылын мā сё̄питэ̄гум, ос нāнан Амки палтум виӈкве тах ёхтэ̄гум, Ам ōлнэ мāмт нāн ос тот вос ōлэ̄гы̄н.4 Ос Ам хоталь минэ̄гум, нāн вāглы̄н, лё̄ӈхе ōс вāглы̄н”.5 Фома Таве китыгластэ: ”Кӯсяй! Ат вāглув, Наӈ хоталь минэ̄гын, ос лё̄ӈх хумус вēрмилув вāӈкве?”6 Ӣсус тавēн лāвыс: ”Ам лё̄ӈхыг ос мāк вāрмалӣг ос ōлупсаг ты ōлэ̄гум; Āсюм палт нэ̄мхотъют нас ат ёхты, Ам тāрам Āсюм палт усь вēрми ёхтуӈкве.7 Нāн Āнум сōль ке вāнувлы̄н, тōнт Ам Āсюм ōс та вāнувлы̄н”.8 Филипп Тавēн лāвыс: ”Кӯсяй! Āсин мāнавн хӯлтэ̄лын, мāнавн воссыг нэ̄матыр ат э̄ри”.9 Ӣсус тавēн лāвыс: ”Филипп, Ам та палыт нāн ётын ōлсум, ос наӈ Āнум ат вāглын? Āнум кāсалалум хōтпа Āсюм ōс кāсалāлыстэ, наӈ манры̄г тох лāвēгын: ‘Āсин мāнавн хӯлтылын?’10 Наӈ ман ат агтэ̄гын, Ам Āсюмт ōлэ̄гум ос Āсюм Āнумт ōлы? Нāнан лāвнэ лāтӈанум Амкинāмныл хунь лāвиянум, Āнумт ōлнэ Āсюм, Тав ты вāрмалит вāриянэ.11 Āнум агтэ̄н, Ам Āсюмт, Āсюм Āнумт ōлы, ос лāтӈанум ке ат агтэгы̄н, Ам вāрмалянум хосыт агтэ̄н.12 Мāк, сяр мāк нāнанн ты лāвēгум: Āнумн агтнэ хōтпа, Ам вāрнэ вāрмалянум ōс вēрмиянэ вāруӈкве. Ам Āсюм палт миннэ̄м мāгыс ос Āнумныл тав сāвнув вēрми вāруӈкве тах.13 Ос Ам Намум мāгыс Āсю̄мныл матыр вōвегы̄н ке, пуссын вāриянум. Āсюм Пы̄ге хосыт вос янытлаве!14 Ос Ам Намум мāгыс матыр ке вовēгы̄н, Ам таи вāрилум.
15 Āнум сōль ке э̄руптылы̄н, Ам ханисьтапанум сирыл ōлэ̄н.16 Ос Ам Āсюм тах пōйкилум, нāн мāгсылын нāнан Торамтан мōт хумил вос мыгтэ, нāн ётын тав тōрум нот палыт вос ōлы, тай мāк вēськат Лы̄лы.17 Тав мирн ля̄пан иӈыт вӣве, Тав мирн иӈ ат кāсалаве, Тав иӈ ат вāве; нāн тай Таве вāглы̄н, алам Тав ань нāн ётын ōлы, нāн сыманынт ēмты.18 Нāнан савалапы̄г ат хӯлия̄нум; нāн палттын тах ōс ёхтэ̄гум.19 Ōс мось тӯп хультыс, тах мир Āнум воссыг кāсалаӈкве ат патыя̄ныл, нāн ос Āнум тах кāсалылы̄н, Ам ōлнэм мāгыс нāн ос тах ōлуӈкве патэгы̄н.20 Та хōтал тах нāн тāра-паттылы̄н, Ам Āсюмт ōлэ̄гум, нāн Āнумт ōлэ̄гы̄н, ос Ам нāнант ōлэ̄гум.21 Ам лāтӈанум сымēн винэ ос тасирыл вāрнэ хōтпа – Āнум э̄руптытэ. Āнум э̄руптан хōтпа, Āсюмн ōс э̄руптаве, ос та хōтпа Ам таи ōс э̄руптылум ос тав палтэ Амки ёхтэ̄гум”.22 Иуда – Искариотыг ōлнэ ут āт – Тавēн лāви: ”Кӯсяй! Тыи Наӈ Наӈтинāн манрыг мāнавн тāӈхылын хӯлтуӈкве, ос мирын āт хӯлты̄лын?”23 Ӣсус тавēн ювле-лāвыс: ”Āнум э̄руптан хōтпа Ам лāтӈумн хӯнтлы; ос Ам Āсюмн тав э̄руптаӈкве патаве; тōнт Мēн тав палтэ ёхтымēн ос тав ётэ ōлуӈкве патымēн.24 Āнум ат э̄руптан хōтпа, Ам лāтӈумн ат хӯнтлытэ; ань нāн хӯлнэ лāтӈум, ты Ам лāтӈум āти, тый Āнум кēтум Āсюм тав лāтӈе.25 Тыи Ам, нāн ётын ōлнэ сыс нāнан лāвсум.26 Ам Намум мāгыс Āсюмн кēтнэ нāнан торамтан Ялпыӈ Лылы нāнан Ам мāныр лавыглāлсум пуссын номылмаптыянэ ос пуссын вāрмалитн нāнан ханисьтыянэ тах.27 Роттыг ōлнэ ōлупса нāнан та хультуптылум, роттыг ōлнэ ōлупсам нāнан та мы̄глум; хумус ты мир мы̄г, Ам нāнан тох ат мы̄глум. Нāн сыманын ул вос минэ̄гыт, ул вос рохтэ̄гыт.28 Нāн хӯлыслын, Ам нāнан мāныр лāвсум: нāнанылныл минэ̄гум, нāн палтын ёхтэ̄гум. Нāн Āнум сōль ке э̄руптаслы̄н, тōнт Ам лāвум лāтӈумн хот-ся̄гтнувы̄н: Āсюм Āнумныл яныгнувег ōлнэ̄тэ мāгыс Āсюм палт минэ̄гум.29 Ам ань нāнан та урыл сāртыннув, та нак ēмтнэ э̄лы-пāлт, та лāвсум, та нак ēмтнэ̄тэ порат нāн вос агтэгы̄н.30 Ос ань мось тӯп Ам нāн ётын потрамēгум; ты мир тāн канасиг ōсьнэ утаныл ты ёхты, Ам нумпāлумт тав нэ̄матыр ё̄р ат ōньси.31 Тыт ōлнэ мир вос вāганыл, Ам Āсюм хумус э̄руптылум, ос Āсюмн хумус лāввēсум, тасирыл та вāрēгум: нōх-лю̄лēн, ты̄гыл сысы-минэ̄в”.
Глава 14
