Choose Language
Old Testament Books
New Testament Books
view with a second Bible
1 Пасха ялпыӈ хōтал э̄лы-пāлт Ӣсус вāстэ тав ты мирыӈ тōрумныл Āсе палт миннэ сё̄сэ ты ёхтыс. Таимāгыс тав тыт хӯльтнэ Тавēн э̄рнэ мире мāгыс хултхатас, хумус Тав тāнāны̄л акваг э̄руптым сы̄мыт ōньсюӈкве патыянэ тах.2 Ос э̄типāлаг тэ̄нэ пасан ватат Иуда Искариот Симон пыге сы̄мен я̄вол Ӣсус ты̄налан лю̄ль номт пиныс,3 Ӣсус пуссын вāстэ – Āсе вāрмалянэ пуссын Пы̄ге кāтн мисанэ, ос Тав Тōрумныл ёхтыс, Тōрум палт ты сё̄питахты,4 ос таимāгыс э̄типāлаг вāрим пасан вāтаныл нōх-лю̄лис, Такви коны маснутанэ хот-āхвсанэ, ос вильтсэ̄гнэ тōрыл э̄нтхатас.5 Тувыл ловтхатнэ āны вӣтыл пиныстэ, ханисьтам хумиянэ лāгланыл ловтуӈкве патсанэ ос э̄нтапыг нэ̄гум вильтсэ̄гнэ тōрыл лāгланыл хот-сэ̄гсаласанэ.6 Симон Пēтыр палт йис, таи Тавēн лāви: ”Кӯсяй! Наӈын ман ам лāглагум хунь э̄ри ловтуӈкве?”*а7 Ӣсус тавēн ювле-лāвыс: ”Ам мāныр ань вāрēгум наӈ иӈ ат вāглын, ётыл тах усь торгамты̄лын”.8 Пēтыр Тавēн лāвыс: ”Ам лāглагум нэ̄мхуньт ат ловтыя̄гын”. Ӣсус тавēн лāвыс: ”Наӈ лāглагын ат ке лōвтыягум, тōнт наӈ Ам ётум нэ̄матыр лōмт ат ōньсēгын”.9 Симон Пēтыр Тавēн лāви: ”Кусяй! Тасирыл ке, лāглагум коны-пāл ос кāтагум, пуӈкум хот-лōвтэ̄н”.10 Ӣсус тавēн лāви: ”Сыстам хōтпан лāглаге туп э̄ри ловтуӈкве, тав тох янытэ̄т сыстамы̄г ōлы; нāн сыстамыт ос пуссын сыстамыт āтимыт”.11 Тав Таве ты̄налан хум сāртын вāстэ, таимāгыс тох ты лāвыс: ”Пуссын сыстамыт āтимыт”.12 Хунь тāн лāгланыл ловтысанэ, Такви маснутанэ массанэ, пасан вāтан ӯнтыс, лāвыс: ”Нāн торгамтаслы̄н ман āти, Ам нāн ётын мāныр вāрсум?13 Нāн Āнум Ханисьтан хумы̄г ос Кӯсяиг лāвилы̄н, Ам урумт мāк та лāвегы̄н, Ам сōль таи ты.14 Сōль ке Ам Кӯсяй ос Ханисьтан хум, нāн лāгланы̄н хот-ловтсанум, нāнāн ос нāнти халынт лāгланы̄н э̄ри ловтуӈкве.15 Ам нāнан ты хӯлтсанум, нāн ос тасирыл вāрēн, хумус Ам нāнан ань вāрсум.16 Мāк, сяр мāк нāнан ты лāвēгум, мēтхум такви кӯсяēныл яныгнув хунь, кēтым хōтпа ос кēтнэ хōтпатэ̄ныл яныгнув хунь.17 Ты урыл ке вāгы̄н, тōнт нāн тамле вāрмаль вāрнэ̄н порат сōль та сōтыӈы̄г ōлэгы̄н.18 Пуссын тыт атхатам хумит урыл Ам хунь лāвēгум; Ам вāглум хотъютыт Ам пēриясанум. Ялпыӈ нэ̄пак лāтыӈ сирыл вāрмаль вос э̄лаль мины: ‘Ам ётум тэ̄нут тэ̄нэ ут Ам нупылум тах лāгыл юнгатэ āлмитэ’.19 Ам таимāгыс сāртын ты нак ēмтне э̄лы-пāлт нāнанн ты лāвēгум, хунь тах нак ēмты, нāн усьта агтэгы̄н, ты сōль Ам ты ōлэгум.20 Мāк, сяр мāк нāнанн ты лāвēгум: Ам кēтум хумим нāн ля̄пан ке вы̄глы̄н, тōнт нāн Āнум ля̄пан вы̄глы̄н; ос хотъют Āнум ля̄пан вы̄гтэ, тōнт тав Āнум кēтум Āсюм ля̄пан вы̄гтэ”.
21 Ты лāтӈанэ лāвум юи-пāлт Ӣсус руталӣг, кāсталы̄г ēмтыс, хот-тōргуӈкве патыс, ос тāн нупыланыл сяр ля̄льт та лāвыс: ”Мāк, сяр мāк нāнанн ты лāвēгум, нāн халынтныл акван тах Āнум ты̄налытэ”.22 Тōнт ханисьтахтын хумиянэ халанылт такос сунсыглахтасыт, ат торгамтасаныл, хотъют урыл Тав тох лāвыс.23 Акв сака э̄руптам ханисьтахтын хумитэ Ӣсус мāглэ пōхат ӯнлыс.24 Тавēн Симон Пēтыр вӣльтэ̄т пōс сусылтас, ань таитэ вос китыглахты, хотъютаныл урыл Ӣсус тох потыртас.25 Тав Ӣсус мāгыл пōхатэ̄н хоми-хӯтыс, Тав китыглахтас: ”Кӯсяй! Тыи хотъют?”26 Ӣсус ювле-лāвыс: ”Ам ань тах ня̄нь лōмт айнутн мāгумтāлнэм юи-пāлыт хōӈхан мы̄глум, тав таиӣг ōлы”. Та ня̄нь лōмт мāгумтāлме юи-пāлт Иуда Искариот Симон пыгēн мистэ.27 Ос ты ня̄нь лōмт тактыматэ юи-пāлтыт тав кӣврēн куль та ся̄лтыс. Тōнт Ӣсус тавēн лāвыс: ”Мāныр вāруӈкве кусыглахтэ̄гын, моляхнув вāрēлын”.28 Нэ̄мхотъютаныл атпыл торгамтастэ, Тав тох манрыг таи тавēн лāвыс.29 Ос ань Иуда тōтап ōньсис, таимāгыс пуссын тох номсысыт, Ӣсус лāвыс: ”Ялпыӈ хōтал кастыл матыр мāнавн ёвтэн”, ман ос нуса мирн мāтыр вос мыг.30 Тав пӯллōмт вистэ, тāра та кон-квāлыс; э̄тииг ōлыс.
31 Хунь тав кон-квāлыс, Ӣсус лāвыс: ”Ань Э̄лумхōлас Пы̄г янытлан вāрмальн ты патыс, ос Тōрум Тав тāратэ янытлаве.32 Ос Тōрум Тав тāратэ янытлаве ке, Тōрумн Тав Таквинāтэ̄т ос янытлаве, ос мосертын Таве янытлаӈкве паты тах.33 Ня̄враманум! Нāн ётын воссыг хоса ат ōлэ̄гум. Нāн Āнум кинсуӈкве патылы̄н, ос Ам еврей мāхумн лāвнэм сирыл ‘хōталь Ам минэ̄гум, нāн тув минуӈкве ат вēрмегы̄н’, ань ос нāнанн Ам тох ты лāвēгум.34 Йильпи Тōрум сāккон нāнан мы̄гум: нāнки халынт э̄руптахтым ōлэ̄н, Ам нāнāн хумус э̄руптасанум, ахвтох нāн ōс нāнки халынт э̄руптахтым ōлэ̄н.35 Нāн Āнумныл ханисьтахтам хумит, нāнти халынт э̄руптахтын вāрмаль ōньсегы̄н ке, тōнт та хосыт нāн тах ханьсявēн”.36 Симон Пēтыр Тавēн лāвыс: ”Кӯсяй! Наӈ хоталь минэ̄гын?” Ӣсус ювле-лāвыглас: ”Хоталь Ам минэ̄гум, наӈ ань Ам юи-пāлумт ат вēрмēгын минуӈкве, ётыл тах усь Ам юи-пāлумт минэ̄гын”.37 Пēтыр Тавēн лāвыс: ”Кӯсяй! Ам ань манрыг ат вēрмēгум Наӈ юи-пāлынт минуӈкве. Ам амки лы̄лым Наӈ мāгсылын пины̄лум”.38 Ӣсус ювле-лāвыглас: ”Наӈ наӈти лы̄лын Ам мāгсылум пины̄лын? Мāк, сяр мāк наӈын ты лāвēгум: сиськурек рōӈхалтахтынэ̄тэ э̄лы-палыт наӈ хурумсёс Āнумныл пōхан-воратэ̄гын тах”.
*а 6 13:6 Лāглыт ловтуӈкве – ты мēтхумн ловтнэ вāрмаль ōлыс
Глава 13
