Choose Language
Old Testament Books
New Testament Books
view with a second Bible
1 ”Ам сяр мāк виноград пил яныгман йӣв, ос Āсюм – виноград янмалтан хум.2 Пилыл ат тэ̄лнэ кāсыӈ тагум Āсюмн хот-яктапаве; ос пилыӈ йӣв сāв таганум хот-сы̄стамтытэ, тāн сāвнув пилын вос яныгмавет.3 Нāн ос Ам лāвыглам лāтӈум хосыт хот-сы̄стамтахтым ōлэ̄гын.4 Āнумт ōлэ̄н, Ам ос нāнант ōлэ̄гум. Пил яныгман тагыт хумус йӣветāл пилын ат яныгмаве; нāн ōс аквтох, Ам сымумт ат ке патэгы̄н ōлуӈкве.5 Ам пил яныгман йӣвыг ōлэ̄гум, нāн ос тагōвлыт; Āнумт ōлнэ хōтпа ос тавēтт Ам ōлэ̄гум, таи ты тах сāв пōрт вāри; Ам тāлум нāн нэ̄матыр вāруӈкве ат вēрмегы̄н.6 Āнумт ат ōлнэ хōтпа похан-паты, йӣв тагōвыл хольт тув-тōсы, тамле тагыт акван-āтавēт ос нāйин пāхвтāвет, тāн нāйин та тэ̄вēт.7 Āнумт ке ōлэгы̄н, ос Ам лāтӈанум нāн сыманын ёхтэ̄гыт, тōнт мāныр тахмаегы̄н, вōвēн, ос нāнан ēмты тах.8 Нāн сāв пōртыӈ пил тотэгы̄н ке, ос Āнумныл ханисьтахтэгы̄н ке, таил ты Ам Āсюм янытлылы̄н.9 Ам Āсюмн хумус э̄руптавем, ос тох Ам нāнан э̄руптия̄нум; Ам нāнан э̄руптан сымумт ōлэ̄н.10 Ам Тōрум сāкконанум хунтлэгы̄н ке, тōнт Ам нāнан э̄руптан сымумт ōньсиянум, Ам ос Амки Āсюм сāкконанэ̄н хӯнтласум ос Тав Āнум э̄руптан сымēт та ōньсӣтэ.11 Ам ся̄гтылум нāн палттылын вос ōлы ос нāн ся̄гтылы̄н тāглыӈы̄г вос ōлы, таимāгыс Ам тох ты лāвсум.12 Ам нāн мāгсылы̄н тамле Тōрум сāккон ты ōньсēгум, нāнти халынт сымыӈысь, э̄руптахтым ōлэ̄н, Ам нāнан хумус сымыӈысь ты э̄руптыя̄нум.13 Хоты хōтпа такви лы̄лытэ юртхумитэ мāгыс пины̄тэ ке ос тувыл сāвнув э̄рупса ат ōлы̄глы.14 Нāн Ам лāвнэ лāтӈанумн хӯнтлэгы̄н ке, тōнт нāн Ам юртхумиянум ты.15 Ам нāнан воссыг рабыг ат лāвия̄нум, раб ат вāгтэ, тав кӯсяе мāныр вāри; Ам Амки Āсюмныл мāныр хӯлыглāсум пуссын нāнанн ты лāвсанум, таимāгыс нāнанн юртхумы̄г ты лāвсанум.16 Нāн хунь Āнум пēрияслы̄н, Ам нāнанн пēриясāнум ос пōртыӈ пилмōри тотуӈкве тӯсьтысāнум, пōртыӈ пилмōрин*а акваг вос тōвылхаты, тōнт мāныр пыл вōвегы̄н, Ам Āсюмн акваг мивēн тах.17 Ты Тōрум сāккон нāнāн ты хӯлтэ̄гум, нāнти халынт э̄руптахтым ōлэ̄н.
18 Мирын лавыл ке нэ̄главēн, вāелы̄н, нāн э̄лы-пāлынт Ам лāвыл нэ̄глувēсум.19 Нāн мир халт ке ōлсы̄н, тōнт та кос нāн э̄руптанувēн; нāн та мир ōлнэ мāт ат ōлэ̄гын, Ам нāнан та мир халныл пēриясāнум, таимāгыс нāн мирн лавыл та нэ̄главēн.20 Ам нāнан лāвум лāтӈум номелы̄н: ‘рабыг ōлнэ̄ хōтпа такви кӯсяēныл яныгнувēг ōлуӈкве ат вēрми’. Ам ты ня̄влувēсум, нāн ос тах ня̄влуӈкве патавēн; Тāн Ам лāтӈум ке хунтлысаныл, нāн лāтӈын тāн тах ос хӯнтлуӈкве патыяныл.21 Тāн Āнум кēтум Āсюм ат вāгнэ̄ныл мāгыс таи пуссын нāнан Ам намум мāгыс вāрияныл.22 Ам тāн палттаныл ат ке ёхтысум, ос тāн кāреканыл урыл ат ке лāвыглалсум, тōнт тāн сиранылт кāрек тāл та ōлнувыт: ань ос тāнаныл кāреканыл мāгыс сāлитāӈкве ат э̄рēгыт.23 Āнум лавыл нэ̄гылттāн хōтпа Ам Āсюм ōс лавыл нэ̄гылтты̄тэ.24 Ам тāн халанылт ты э̄лы-пāлыт нэ̄мхотъютн ат вāрыглым сāвсыр ōлыглаттāл вāрмаль ат ке вāрсум, тōнт кāрек ат ōсьнувыт; ань ос тāн кāсалалсāныл ос Āнум ос Ам Āсюм лавыл нэ̄гылттыяныл.25 Ос тāн сāкконанылт хансым лāтыӈ сирыл вос э̄лаль тах ēмты: ‘Āнум сяр наскассы̄г лавыл нэ̄гылттасаныл’.26 Ам нāн палттын, Āсюмныл йинэ ос Ам кēтум нāнан торамтан вēськат Лылы хунь ёхты, тав Ам урумт ӯлтахумыг ēмты.27 Нāн ос тах Ам урумт ӯлтахумиӣг ēмтэ̄гы̄н, нāн сяр ōвылт пāсыл Ам ётум ōлсы̄н”.
*а 16 15:16 пилмōри – ты русь лāтӈыл плод
Глава 15
