Choose Language
Old Testament Books
New Testament Books
view with a second Bible
1 Пасха ялпыӈ хōталныл хōт хōтал э̄лы-пāлт Ӣсус Вифаниян ёхтыс. Тот сорумн патыглам ос Тав нōх-ялтуптам Лāсар хум ōлыс.2 Тав мāгсылэ тэ̄нэ-айнэ пасан вāрвес, Марфа пасан вāрыс, Ӣсус ёт тэ̄пьялам хумит ёт Лāсар ōс ōлыс.3 Мария фунт*а сāвит мира нампа тыныӈ вōй вис, Ӣсус лāглагē та вōйил сāртласаге, тувыл āтанэ̄тыл Ӣсус лāглаге хот-сэ̄гсаласаге; мира атыӈ атыл кол янытыл пасматас.4 Тōнт Тав ханисьтам хумиянэ халт ōлнэ акв Иуда Симон Искариот нампа хум, ётыл Ӣсус тах «тыналым» ут, лāвыс:5 ”Ты мира хурумсāт динарий мāгыс мāнрыг ат рōви тыналаӈкве ос та олнэ нӯса мирын лāкква уртуӈкве?”6 Тав нӯса мирн нё̄тнэ мāгыс сыме ат ся̄ргыс, тав нас тох лāвыс, тав тулмахыг ōлыс. Ханисьтахтын хумит олн ōсьнэ тōтапаныл тав палттэ ōлыс, тав тувыл олн тӯлмантāлыс.7 Тōнт Ӣсус лāвыс: ”Мария ул нагēлы̄н, тав ты мира Āнум ёл-сё̄питан хōтал мāгыс хӯлистэ.8 Нуса мир акваг нāн ётын ōлэ̄гыт, Ам нāн ётын акваг хунь ōлэ̄гум”.9 Евреитныл сав мир Тав тот ōлнэтэ хӯлсаныл, Тав кāсалаӈкве ос сорумн патыглам ос Ӣсусн нōх-ялтуптим Лāсар аквторыг кāсалан мāгыс тув-атхатасыт,10 Сяр яныг пӯп-ōйкат Лāсар алуӈкве ōс кусыглахтысыт,11 та Лāсар ялтуптыматэ ос сāв еврей мāхум Ӣсусын агтуӈкве патсыт.
12 Ёты хōтал ялпыӈ хōталн атхатам сāв мир Ӣсус Иерусалим ӯсын йинэ̄тэ урыл хӯлсаныл,13 пальма нампа тагыӈ йӣвыт висыт, Тав йинэ лё̄ӈхēн лю̄льсыт ос рōӈхувлāлсыт: ”Осанна*б! Тōрум-Кӯсяй, Наӈ ёхтынэн мāгыс, Израиль хōн, Наӈын янытлылӯв!”14 Тōнт Ӣсус мāньлат осёл нампа ӯй хōнтыгпас, осёл тармыл тāлыс, ялпыӈ нэ̄пакыт хансым сирыл:15 ”Сиона*в ӯсыӈ мир, ул пилэ̄н, нāн Хōнын мāньлат осёл тармыл ӯнлым тах ёхты”.
16 Тав ханисьтахтын хумиянэ сāртын ты вāрмаль урыл нэ̄матыр ат торгамтāлсыт, ос ялпыӈ нэ̄пакт Тав урēт хансым вāрмаль номылматсаныл хунь Тав янытлаӈкве патвес, ос Тав ётэ ты юи-пāлт мāныр тах ēмты ōс номылматсаныл.17 Сāртын тāгыл Тав ётэ ōлум мире потырталсыт, Тав Лāсар ахвтас сопамēныл хумус кон-вōвыстэ ос нōх-ялтуптастэ.18 Тамле ōлыглаттāл нак вāрме мāгыс Тав мир ёт таиимāгыс ты хōнтхатас.19 Фарисейт тāнки халанылт потыртасыт: ”Танай сунсэ̄н, нāн нэ̄матыр ат ты алымегы̄н вāруӈкве? Мир пуссын Тав юи-пāлэ̄т ты минэ̄гыт”.
20 Ялпыӈ хōталыт пуӈк пӣннэ мāгыс тōва грекыт ōлсыт.21 Тāн Галилея мāт Вивсаид ӯсныл ōлум Филипп палт йисыт ос таве китыгласаныл: ”Мāн Ӣсус кāсалаӈкве кос таӈхēв”.22 Филипп минас ос ты урыл Андреин лāвыс; тувыл Андрей ос Филипп ты урыл Ӣсусын лāвсы̄г.23 Ос Ӣсус тэ̄натэ̄н ювле-лāвыс: ”Э̄лумхōлас Пы̄г янытлан сё̄с ты ёхтыс.24 Мāк, сяр мāк нāнанн ты лāвēгум: колассам мāн хунь рāгаты, ат ке порсси, тōнт акв колассам тӯп хульты; ос порсси ке, тōнт сāв колассам ēмты.25 Такви лы̄лытэ э̄руптан хōтпа тах лы̄лытэ ты̄пылты̄тэ; ос такви лы̄лытэ ты ōлнэ тōрумт лавыл нэ̄гылттан хōтпа тах лы̄лытэ акваг э̄лаль ōлнэ хōтал мāгыс ōньситэ.26 Āнумн нё̄тнэ хōтпа Ам сирумт Ам ōлуӈкве патнэ мāм Ам юи-пāлумт мины, тав тот тах Āнумн мēтхумыг ēмты. Ос Āнумн нё̄тнэ хōтпа Ам Āсюмн янытлым э̄руптаве.27 Ам лы̄лым ань сяр ат рōвнэ хурипаг ēмтыс; ос мāныр ань лāвуӈкве? Āсюм, ты сё̄с Āнумныл паратэ̄лын! Ос Ам ты сё̄с ēмтум мāгыс ты ёхтысум!
28 Āсюм! Наӈти намын янытлэ̄лын!” Тōнт тōрумныл суй ёхтыс: ”Янытлылум, ос э̄лаль тах усьпылнэ̄г янытлаӈкве паты̄лум”.29 Тыт лю̄люм ос тыи хӯнтлам мир потыртасыт: ”Тый сяхыл кургыс”; ос мōтаныт лāвсыт: ”Тый Ангел Тав ётэ потыртас”.30 Ӣсус ты урыл лāвыс: ”Ты суй Ам мāгсылум хунь суйтыс, мир мāгыс ōлыс.31 Тый сутыӈ хōтал мир палт ты ёхтыс, ты мир канась тах хот ня̄влаве.32 Хунь тах Ам ты мāныл āлмāвем, мир пуссын Амки палтум выгāнум”.33 Тысирыл Тав хӯлтхāтнэ мāгыс потыртас: манхурип сормыл Тав тах холы.34 Мир Тавēн ювле-лāвсыт: ”Мāн саккон сирыл хӯлыгласлӯв, Кристос тōрум нот палыт акваг э̄лаль ōлы, Наӈ ос лāвēгын, Э̄лумхōлас Пы̄г тōрумн нōх-āлмаве? Та Э̄лумхōлас Пы̄г хотъют?”35 Тōнт Ӣсус тāнаны̄лн лāвыс: ”Нāн ётын мось ōс тах пос посты; пос ōлнэтэ сыс мось ё̄мыгтэ̄н, турманын лап ул вос тотавēн: турман мāт ё̄мнэ хōтпа ат вāгтэ, хоталь нупыл ё̄ми.36 Хота мус пос нāн ётын ōлы, та посы̄н агтэ̄н, пос тотнэ пы̄гыты̄г нāн ōлэ̄н”. Ты лāтӈанэ лāвме юи-пāлт, Ӣсус пōхан-минас ос хотталь та пāтырас.
37 Тāн сунсыманыл тасāвит ōлыглаттāл вāрмалит Тав вāрыглас, ос тāн Тавēн ат агтсыт.38 Тōрум лāтыӈ тотнэ хум Исая лāтӈанэ сирыл сōль та ēмты тах: ”Тōрум-Кӯсяй! Мāнавныл йим потырн хотъют агтыс? Ос Тōрум-Кӯсяй ё̄р тāрсэ хотъютын сусылтахтас?”39 Тāн май таимāгыс ос ат агтсыт, ань Исаия май ос тох лāвыглас:40 ”Ты мир саманыл сампыльтталы̄г паттысаныл, сыманыл āхвтас хольт сурлысаныл, саманылт ат кāсалэ̄гыт, сыманылт ат хулыяныл, ос тāнаныл пусмалтаӈкве Āнум ат вōвия̄ныл”.41 Тысирыл Исая потырталыс, Таве янытлан вāрмаль хунь кāсаластэ ос Тав урет потыртас.42 Кӯсяитныл сāв хōтпа Тавēн ōс агтуӈкве патсыт кос; ос фарисейтныл пилнэ̄ныл мāгыс ос синагоганыл похан нēвлынэ̄ныл мāгыс тāн нэ̄матыр ат потыртасыт.43 тāн ань э̄лумхōлас янытлан вāрмалит янгысьнув э̄руптасаныл, Тōрум янытлан вāрмаль тāн ат ōсьсыт.44 Ӣсус тāкысь лāвыс: ”Āнумн агтнэ хōтпа Āнумн хунь агты, тав Āнум кēтум Āсюмн агты.45 Āнум кāсалан хōтпа Āнум кēтум Āсюм ōс кāсалытэ.46 Ам мир хāлн посы̄г ёхтысум, Āнумн агтнэ хōтпа турман мāт ул вос ōлы.47 Ос Ам лāтӈанум хӯлнэ хōтпа Āнумн ат ке агты, Ам таве ат сутытылум, Ам мир сутытан мāгыс хунь ты̄г-ёхтысум, Ам мир вēстхатыглалнэ мāгыс ты̄г-ёхтысум.48 Āнум пōхан-паттын хōтпа, Ам лāтӈанум пōхан ӯрнэ хōтпа такви мāгсылэ сутитан ут ōньси: Ам лāвыглам лāтӈумн тах тав юи-ōвыл хōталэ̄т сутытаве.49 Ам та лāтӈыт Амкинāнӯмныл хунь лāвиянум; таи Āнум кēтум Āсюм Тав лāтӈанэ, Тав Āнум потыр мис, мāныр лāвуӈкве ос мāныр потыртаӈкве.50 Ос Ам вāглум, Тав мим Тōрум сāкконе акваг э̄лаль ōлнэ ноты̄г ōлы. Ам мāнырпыл потыртэ̄гум, тай пуссын Āсюм лāвум сирыл та потыртэ̄гум”.
*а 3 12:3 фунт – хӯрумсāткем грамм яныт мōртмил
*б 13 12:13 осанна – ты еврей лāтӈыл: ”Вēстэн, нё̄тэн! Ургалэн!”
*в 15 12:15 Сиона – тыи Иерусалим ӯс тох лāввес
Глава 12
