Choose Language
Old Testament Books
New Testament Books
view with a second Bible
1 Вифаният ōлнэ аквмат Лāсар нампа ōйка āгмыӈ ōлыс. Тав Мария ос Марфа увситэ̄нт ōлнэ пāвы̄лныл ōлыс.2 Мария – āгмыӈ Лāсар-ōйка увситэ ōлыс. Тав Кӯсяй лāглаге мира нампа атыӈ вōйил сартум ос Тав лāглагэ āтанэ̄тыл хот-сэ̄гсалам нэ̄г ōлыс.3 Лāсар ягāгияге лāтыӈ Тавēн кēтсыг: ”Кусяй хум! Наӈ э̄руптан хумин āгмыӈ”.4 Ӣсус та ля̄ххал хӯлмēт лāвыс: ”Ты āгмыл тав сорумн ат паты, ты āгметыл тах Тōрум янытлаве, Тōрум Пы̄г янытлан мāгыс ты āгме ōлы”.5 Марфа увситэ̄нтыл ос Лāсар Ӣсусын пуссын э̄руптавēсыт.6 Та хум āгме урыл хӯлмēт Тав аквта ōлнэ мāт кит хōтал ōлыс.7 Та юи-пāлт ханисьтахтын хумиянэ̄н лāвыс: ”Ōс Юдея мāн минэ̄в”.8 Ханисьтан хумиянэ Тавēн лāвсыт: ”Равви! Наӈ мось мōлалнув еврей мāхумн āхвтасыл рāтуӈкве ман ат кинсыглавēсын, ōс ты Наӈ тув-минуӈкве кусыглахтэ̄гын?”9 Ӣсус ювле-лāвыс: ”Хōтал палытэ̄т китхуйплов сё̄с ман āти? Хōталэ̄т ё̄мыгтан хōтпа ат вāӈлатāнты, тав хōтыл ōлнэ пос кāсалытэ;10 э̄ти ё̄мыгтан хōтпа вāӈлатāнты, тав ётэ хōтал пос āтим”.11 Тох лāвме юи-пāлт ос лāвыс: ”Лāсар, мāн юртув ёл-оима, Ам таве нōх-сāйкатан мāгыс минэ̄гум”.12 Ханисьтахтын хумиянэ ля̄галасыт: ”Кӯсяй! Тав нас ке ёл-оилматвес тах пусми”.13 Ӣсус тāнанылн сорум ӯрыл кос лāвыглас, тāн номсысыт – тав нас ӯлум урыл лāвыс.14 Тōнт Ӣсус тāн нупыланыл сяр ля̄льт ля̄галас: ”Лāсар сорумн патыс.15 Ам та торыг тот ат ōлмум мāгыс ань нāн мāгсылы̄н хот-ся̄гтсум, нāн тах ань усьта Āнумн агтуӈкве патэ̄гы̄н; ань тав палтылэ минэ̄в”.16 Тōнт Фома нампа хум, мōтсирыл тав Юртыӈ пы̄гыг лāввес, ханисьтахтын хумит нупыл лāвыс: ”Минэ̄в, мāн ос Тав ётэ тах сорумн патэ̄в”.17 Ӣсус тув ёхтумēт хōнтыстэ, насати Лāсар нила хōтал āхвтас курсипе кӣвырт хуйнэ̄тэ.18 Вифания нампа мā Иерусалим пōхат атхуйплов стадия*а палытыт ōлыс;19 ос холам ягпыгēн мāгыс савын патум Марфа ос Мария торамтаӈкве сāв хōтпа Юдея мāныл ёхтысыт.20 Марфа Ӣсус йинэтэ хӯлмēт, Тав палтылэ ля̄льт минас; Мария ос юн-ӯнлыс.21 Тōнт Марфа Ӣсусн лāвыс: ”Кусяй хум! Наӈ та торыг тыт ке ōлсын, ам ягпыгум сорумн ат патнув.22 Ам сōль вāглум, Наӈ Тōрумныл мāныр вōвēгын, Тōрумын таил та мӣвен”.23 Ӣсус тавēн лāви: ”Наӈ ягпыгын нōх-ялты”.24 Марфа ювле-лāвыс: ”Ам вāглум, тав тах юи-ōвыл хōтал нōх-я̄лты, мāхум нōх-я̄лтнэ хōтал тах ялты”.25 Ӣсус лāвыс: ”Ам нōх-я̄лтпылыг ос ōлупсаг ты ōлэ̄гум, Āнумн агтнэ хōтпа сорумн патнэтэ юи-пāлт ос тах нōх-я̄лты.26 Кāсыӈ ōлнэ хōтпа ос Āнумн агтнэ хōтпа ōлнэтэ нот пāлыт сорумн ат паты. Тамле накын наӈ агтэ̄гын?”27 Тав ювле-лāвыс: ”Вāим, Кӯсяй! Ам агтэ̄гум, Наӈ Кристос, Наӈ ты мир халн ёхтум Тōрум Пы̄г”.28 Ты лāтӈанэ лāвме юи-пāлыт сытам сыс Мария увситэ ляпан-вōвыстэ, тымус тавēн потырты: ”Ханисьтан хум тыт ōлы, наӈын вōвитэ”.29 Ань ты урыл хӯлмēт, молях нōх-лю̄люмтас ос Тав палтылэ минмыгтас.30 Ӣсус пāвылн иӈыт ёхтыс, Тав Марфан ля̄льт-хōнтыматэ мāт ōлыс.31 Мария торамтан мāгыс тав колэ̄т ōлум еврей мāхум, Мария молях нōх-лю̄люмтаме ос кон-квалме кāсаламанылт тав юи-пāлэ̄т минмыгтасыт. Тāн номсысыт, тав лю̄сьнэ мāгыс āхвтас сопам*б палт минас.32 Ос Мария Ӣсус ōлум мāн ёхтумēт, Таве кāсаластэ ос Тав лāглаге тытын рāгатас ос Тав нупылэ лāвыс: ”Кӯсяй! Наӈ тыт ōлсын ке, ягпыгум сорумн хунь патнув”.33 Ӣсус таве лю̄ньсим кāсаламēт ос тав ётэ ёхтум еврей мāхум ōс лю̄ньсим кāсаласанэ, номтэ хот-сакыс.34 Ос китыгласанэ: ”Нāн таве хōт сё̄питаслы̄н?” Тāн ювле-лāвсыт: ”Кӯсяй! Ялэн ос Наӈти сунсэ̄лын”.35 Ӣсус самвитанэ кон-нэ̄глысыт.36 Тōнт еврей мāхум лāвыглāлсыт: ”Сунсэ̄н, Тав сорумн патум ут хумус э̄руптамтэ”.37 Ос тōва мāхум лāвсыт: ”Сампильттāл ут сам-посыл миӈкве хāснэ Хōтпа холам утув āтимы̄г ат ēмтнэ̄тэ аман вāрнувтэ?”38 Ос Ӣсус кāстāл ōлым āхвтас сопам ляпан ё̄мантас. Тай кēраскол сопам ōлыс, сопам āхвтасыл лап-пиныма.39 Ӣсус лāвыс: ”Āхвтас хот-вуелы̄н”. Сорумн патум хум йигтēтэ Марфа Тавēн лāвыс: ”Кӯсяй! Тав алам тōпмуӈкве патыс, āхвтас курсипēт хуйнэ̄тэ нила хōталыг ты ēмтыс”.40 Ӣсус тав нупылэ лāви: ”Ам ман наӈын ат лāвсасум, агтуӈкве ке патэ̄гын, Тōрум янытлан вāрмаль кāсалэ̄гын тах”.41 Сорумн патум хум хуям кēраскол лап-пантым āхвтасэ пōхан-лаквтысаныл. Ос Ӣсус тōрум нупыл нōӈхаль сунсым лāвыс: ”Āсюм! Āнум хӯлмын мāгыс, Наӈы̄н яныг пӯмасипа лāвēгум.42 Ам вāслум, Наӈ Āнум акваг хӯлы̄лын; тох Ам тыт атхатам мир мāгыс лāвсум, тāн вос агтэ̄гыт, Наӈ Āнум тыг кēты̄слын”.43 Ты лāтӈанэ юи-пāлт Тав тāкысь ля̄галас: ”Лāсар! Кон-квāлэн”.44 Ос кāтанэ-лāгланэ пēсыл тōрыл пēрсалим, вӣльтэ тōрыл нэ̄гсалым сорумн патум ут кēрасколныл кон-нэ̄глыс. Ӣсус лāвыс: ”Таве хот-пēсталэлы̄н, вос мины”.
45 Мария палт сāв ёхталам еврей мāхум ōс Ӣсус вāрмалянэ кāсаламанылт юи-пāлыт Тавēн агтуӈкве патсыт.46 Тōваныл фарисейт палт минасыт ос Ӣсус вāрыглан наканэ урыл фарисейтн потыртасыт.
47 Тōнт сяр яныг пӯп ōйкат ос фарисейт акван-āтхатасыт ос лāвсыт: ”Мāныр мāнавн вāруӈкве? Ты Э̄лумхōлас сāв ōлыглаттāл вāрмалит вāри.48 Ты вāрмаль тох ке хӯльтуптылув, тах мир пуссын Тавēн агтуӈкве патэ̄гыт, тōнт Рим мāхум ёхтэ̄гыт, мāн мāв тāн вы̄ганыл ос мирув пуссын āлысьлыяныл тах”.49 Та тāл сяр яныг пӯп-ōйкаг ōлум Каифа нампа хум тāнаны̄лн лāвыс: ”Нāн нэ̄матыр ат вāгы̄н;50 нāн ат номсэ̄гы̄н, мāнавн ёмаснуве мирув пуссын ат холтнэ̄ мāгыс акв хōтпан сорум патуӈкве”.
51 Тав такви номте хосыт хунь тох лāвыс, сяр яныг пӯп-ōйкаг ōлме порат э̄лаль ōлнэ накыл хӯлтвес, Ӣсус мир мāгыс тах сорумн паты,52 ос акв ты мир мāгыс хунь, Тōрум Āсь мā янытыл ōлнэ ня̄враманэ акван āтнэ мāгыс тах.
53 Та хōтал пасыл тāн Тавē порслаӈкве та сё̄питахтасыт.54 Таимāгыс Ӣсус еврей мāхум халт сытамыл яласас, та мāныл сēиӈ мā ляпат ōлнэ Ефраим нампа ӯсын минас, ос тот Такви ханисьтахтын хумиянэ ёт хультыс.
55 Юдея мāт Пасха нампа ялпыӈ хōтал ляпамас, сāв мир Пасха э̄лы-пāлт Иерусалим ӯсын кареканылныл хот-сы̄стамтахтын мāгыс ёхты̄сыт.56 Тōнт Ӣсус кисвес, ялпыӈ колт лю̄лнэ мир халанылт потрамасыт: ”Нāн хумус номсэгы̄н? Тав ялпыӈ хōталн ёхты ман āти?”57 Сяр яныг пӯп-ōйкат ос фарисейт мирын лāвсыт, Тав хотъютын ханьсяве ке, тāра вос лāвēгыт, Таве тах тōнт пувияныл.
*а 18 11:18 атхуйплов стадия – хӯрмахкем километра палыт
*б 31 11:31 сопам – ты русь лāтӈыл могила
Глава 11
