Choose Language
Old Testament Books
New Testament Books
view with a second Bible
1 ”Мāк, сяр мāк нāнанн ты лāвēгум: хотъют пāля колн кāрта āви тāра ат ке ся̄лты ос мōтсирыл тув вораты, та хōтпа тӯлмантан утыг ос хōрахсииг ōлы;2 кāрта āви сӯнтыл ся̄лтнэ хōтпа – тав пāлят ӯргалан хумыг ōлы.3 Кāрвальтан хōтпа тавēн кāрта āви пӯнсытэ, пāлят тав турсуēн хӯнтамлэ̄гыт, ос тав пāлянэ тāнки наманыл хосыт акван-вōвиянэ ос кональ-вāнттыянэ.4 Ос хунь пāлянэ кон-пōсыянэ, такви тāн э̄лы-пāланылт ёми; ос пāлянэ тав юй-пāлэ̄т ю̄выт, тāн тав турсуе вāганыл.5 Мōт хум юй-пāлыт ат минэ̄гыт, тавēныл тāн пōхан-оегыт, тāн мōтхум турсуе ат вāганыл”.6 Тамле ханисьтап ты Ӣсус тāнаны̄лн потыртас; тāн тай атпыл торгамтасаныл, тамле ханисьтап Тав тāнаны̄лн манрыг потыртас.7 Ōс Ӣсус тāнаны̄лн лāвыс: ”Мāк, сяр мāк нāнанн ты лāвēгум, Ам пāля кол кāрта āвииг ты ōлэ̄гум.8 Ам э̄лы-пāлумт ёхталам хōтпат, тāн пуссын тулмантан утыт ос хōрахсит; пāлятын тāн атпыл хӯнтлавēсыт.9 Ам āвииг ты ōлэ̄гум: Ам тāрам ся̄лтнэ хōтпа вēстхаты тах, тав юв-сялты, кон-квāлы, маныр кинсы, таи та хōнты.10 Тулмантан ут матыр тулмантан мāгыс, алнэ мāгыс, вӣтыг тотнэ мāгыс ёхталы. Ам таимāгыс ты ёхтысум, ёмас ōлупса вос ōньсегы̄н, ōс сыманын усьпылнэ̄г сёлыӈнувēг вос патэ̄гыт.11 Ам пāля ӯрнэ ёмас хум: пāля ӯрнэ ёмас хум пāлянэ мāгыс лылытэ мы̄гтэ.12 Нас мēталым хум пāля ӯрнэ хумы̄г ат хōйхаты, тав такви пāлянэ хунь ӯриянэ. Хāйтнут ёхтынэ̄тэ кāсалытэ ос пāлянэ та оссувлыянэ, хотталь та хāйты; ос хāйтнутын тай пāлят та āлысьлāвет, лāкква та ня̄влāвет.13 Мēталым хум сысы хайты, тав мēтхум, тав пāлят палт тэ̄латэ āтим.14 Ам пāля ӯрнэ ёмас хум; ос Амки утанум вāганум, ос Амки утанум Āнум вāганыл.15 Хумус Ам Āсюмн вāвем, аквтох Ам ōс Āсюм вāглум; лы̄лым пāлянум мāгыс мы̄глум.16 Ам ōс мōт пāлят ōньсēгум, тāн мōт ōсь кӣврыт ōлэ̄гыт, тāн Āнумн ōс э̄рēгыт ты̄гле тотуӈкве: тāн ōс тах Ам турсуюм хӯлыяныл, тōнт тах тāн акв пāля пӯӈыг ēмтэ̄гыт ос Пāля ӯрнэ акв хум ōньсюӈкве патэгыт.17 Таимāгыс Ам Āсюмн ты э̄руптавем, Амти ōлупсам мы̄глум, тувыл тах ос таве ювле-виӈкве. Ам ōлнэ лылым мы̄глум.18 Нэ̄мхотъютын лылым Āнумныл хот ат кос вӣве, Ам Амки таве мы̄глум. Ам таве э̄ла-минэ мāгыс ё̄р ōньсēгум ос таве ювле-винэ мāгыс ōс ё̄р ōньсēгум. Тамле накыл Ам Амки Āсюмн хултвēсум”.19 Ты лāтӈыт юи-пāлт еврей мāхум халт ос ворасьлахтын пӣсь ēмтыс.20 Сāв мир тāнти хāланылт потыртасыт: ”Тав кулин ёхтувес, ос тэ̄ласты, манры̄г Таве хунтлылы̄н?”21 Мōтаныт лāвыглāсыт: ”Ты лāтӈанэ тэ̄ластан хōтпа лāтыӈыт хурипат āтимыт; куль ман хунь вēрми сампыльтāл хōтпа самаге посыл миӈкве?”
22 Иерусалимыт йильпииг ялпыӈ кол ялпыӈыг вāрнэ хōтал ёхтыс, тонт тэ̄лы пора ōлыс.23 Ōс Ӣсус ялпыӈ кол кӣвырт, Соломон*а притвор пōхат ё̄мыгтас.24 Тыт еврей мāхум Тав мувлахитэт атхатасыт, китыглахтасыт: ”Наӈ мāнав хоса тох нэ̄матыр вāтал ōньсӣлын? Наӈ Кристосыг ке ōлэ̄гын, мāнавн ань тāра лāвен”.25 Ӣсус тāнаны̄лн лāвыс: ”Ам нāнанн ты лāвсум, нāн ат агтэгы̄н; Ам вāрнэ вāрмалянум Амки Āсюм наме мāгыс ты вāриянум, тāн Ам урумт ты ōлэ̄гыт.26 Ос нāн тай ат āгтэгы̄н, нāн Ам пāлянум āтимыт, хумус Ам нāнан ты лāвыглалсум.27 Ам пāлянум Ам турсуюмн хӯнтлэ̄гыт, ос Ам тāнāныл вāганум; ос тāн Ам юи-пāлумт ю̄выт.28 Ос Ам тāнаны̄лн акваг э̄лаль ōлнэ ōлупсал мыгāнум, ос тōрум нот пāлыт тāн ат порсэ̄гыт; ос Ам кāтумныл тāн нэ̄мхотъютын ат тӯлмантāвет.29 Тāнаныл Āнумн мим Āсюм сяр янгыг ты ōлы; ос Ам Āсюм кāтныл тāн сяр нэ̄мхотъютын тӯлмантаӈкве ат вēрмавет.30 Ам ос Āсюм – мēн сас аква”.31 Ты торыг, Таве рāтнэ мāгыс, юдеит ōс āхвтасыт āлмаясыт.32 Ӣсус тāнанылн лāвыс: ”Сāв ёмас вāрмалит Ам Амки Āсюмныл нāнан хӯлтсум кос; хоты вāрмаль мāгыс нāн Āнум āхвтасыл рāтуӈкве таӈхилы̄н?”33 Еврей мāхум Тавēн ювле-лāвсыт: ”Ёмас вāрмалянын мāгыс Наӈын хунь āхвтасыл рāтылув, Тōрумыл кайнэн мāгыс, Наӈ э̄лумхоласы̄г ōлэ̄гын, Наӈтинāнын Тōрмыг ловиньтылын, таимāгыс ты Наӈын рāтылув тах”.34 Ӣсус тāнаны̄лн лāвыс: ”Нāн сāкконынт тох хансым āти: ‘Ам лāвсум: нāн тōрмыт’.35 Тав таит, хотъютыт мāгсыл Тōрум нэ̄пак кēтыс, тōрмыг лāвсанэ, ос Тōрум нэ̄пак ты юи-пāлыт лю̄лиг ат ēмты, –36 Таин ман, Хотъют Āсь ялпыӈыг вāрыстэ ос мир халн кēтыстэ, нāн лāвēгы̄н, Ам Тōрум лю̄камтылум, таимāгыс ты Ам лāвэ̄гум: ‘Ам Тōрум Пы̄г?’37 Ам Āсюм вāрмалянэ ат ке вāрэ̄гум, тōнт Āнумн ул агтэ̄н;38 ос хунь Āнум ат агтнэ порант, ам вāрнэ вāрмалянумн агтэ̄н, тувыл тах нāн хōнтылын Āсюм Ам кӣврумт ōлы ос Ам Тавēтт ōлэ̄гум”.39 Тōнт тāн ōс Таве пувуӈкве ēмталасāныл; ос Тав тāн кāтаныныл пōхан патыс,40 ос Иордан я̄ та пāлн минас, та мāн, хōт Иоан витыл пēрна ты пиныс, ос тот та хультыс.41 Сав мир Тав палтэ ёхтысыт ос лāвсыт, э̄рттэ̄м Иоан нэ̄матыр ōлыглаттāл нак атпыл вāрыглас, ос мāныр Иоан Тав урēт лāвыс, таи пуссын сяр мāк ты ōлум.42 Ōс сāв мир тот Тавēн агтуӈкве патсыт.
*а 23 10:23 Соломон хōн – тыи Израиль хōн ōйка Давид тав пы̄ге ты. Āсе юи-пāлт 961 тāлныл 922 тāл мус йӣльпи эра э̄лы-пāлт хōныг ōлыс.
Глава 10
