Choose Language
Old Testament Books
New Testament Books
view with a second Bible
1 Ос ань миныматэ сампыльтāл хōтпа кāсалас. Тав самын патме пāсыл сампыльталы̄г ōлыс.2 Ханисьтахтын хумиянэ Таве кӣтапасаныл: ”Равви! Манры̄г тав сампыльтāл самын патыс? Такви ман ос ся̄няге-āсяге, хотъютаныл кāрек ōньсис?”3 Ӣсус лāвыс: ”Тав ся̄няге-āсяге кāрек ат ōсьсы̄г, тав палтэ Тōрум накыт хӯлтхатэгыт тах, таимāгыс тав сампыльтāлы̄г ōлы.4 Хōтыл торыг Āнумн э̄ри тыг Кēтым Āсюм вāрмалянэ вāруӈкве; э̄тииг ēмтнэ порат нэ̄мхотъют нэ̄матыр вāруӈкве ат вēрми.5 Мир халт ōлнэ̄м сыс Ам мир мāгыс Тōрум посы̄г ōлэ̄гум”.6 Хунь ты лāтӈыт лāвыс, Тав мā тāрмыл полх-луньсь салямас, тувыл порс ёт лусе равтлыгтастэ, та равтум утэ̄ныл сампыльтāл хум самаге Такви та сартлыгтасаге,7 ос тавēн тымус лāвыс: ”Силоам пувлын мāн минэн, тот хот-лōвтхатэн”. (Силоам – таи «кēтым» нампа пувлын мā.) Тав минас, хот-лōвтхатас, ювле посыӈ сампа хōтпāг ёхтыс.8 Тав пōхатэ̄т ӯнлум ос таве ты э̄лы-пāлт сампыльтāлыг васинтам мāхум потрамасыт: ”Тыт ёмыгтан мāхумныл олн вōвим ӯнлын хōтпа улпыл тав”.9 Тōват лāвсāсыт: ”Сōль, тав ты”, ос тōват лāвсасыт: ”Нас тав хурипатэ хōтпа”. Тав тай такви лāвыс: ”Тыи ам ты ōлэ̄гум”.10 Тōнт тав китыглавес: ”Наӈ самагын хумус кāсалаӈкве патсы̄г?”11 Тав ювле-лāвыс: ”Ӣсус нампа Э̄лумхōлас такви полханэ-луньсянэ порс ёт равтсанэ, та утыл ам самагум сартумтасаге, тувыл лāвыс: ‘Силоам нампа пувлын мāн мӣнэн, хот-ловтхатэн’. Ам минасум, хот-ловтхатасум, ань самагум кāсалаӈкве та патсы̄г”.12 Тōнт тāн таве китыгласаныл: ”Тав хōт ōлы?” Тав лāвыс: ”Ат вāглум”.
13 Ань сампыльтāлыг ōлум хōтпа фарисейт палт тотвес.14 Ӣсус полхе-луньсе ёт порс равтме ос сампыльтāл хум самаге пāлыг пӯсме порат сабат-хōтал ōлыс.
15 Фарисейтн хум ос китыглавес, тав хумус кāсалаӈкве патыс. Тав лāвыс: ”Тав полхе-луньсе ёт равтым утыл самагум тармыл пинумтасаге, тувыл ам хот-ловтхатсум, ос ань ты кāсалэ̄гум”.16 Тōнт това фарисейт лāвсыт: ”Ты Э̄лумхōлас Тōрумныл ат ōлы, тав сабат-хōталыт ат рōвнэ вāрмаль вāри”. Мōтаныт лāвыглāсыт: ”Карекыӈ э̄лумхōлас хумус вēрми тамле ōлыглаттāл вāрмалит вāрыглаӈкве?” Ос тāн халанылт хāлмалтахтāсыт.17 Ос сампыльтāлыг ōлум хум нупыл лāвēгыт: ”Наӈ самагын пусмалтым юи-пāлт Тав урет мāныр вēрмēгын лāвуӈкве?” Тав лāвыс: ”Тав Тōрум лāтыӈ тотнэ хумыг ōлы”.18 Тōнт еврейт тавēн ат āгтсыт: хумус тав сампыльтāлыг ōлыс ос пусмыс, таимāгыс ты хум ся̄няге-āсяге тув вōввесы̄г19 ос китыглавēсы̄г: ”Ты сōль нэ̄н пы̄гы̄н, тав урēтыл нэ̄н май лāвегы̄н, э̄рттэ̄м тав сампыльтāл самын патыс? Хумус тав ань кāсалы?”20 Тав ся̄няге-āсяге ювле-лāвсыг: ”Мēн вāглумēн, ты мēн пы̄гмēн ты, тав сампыльтāл самын ты патыс,21 ос хумус ань кāсалаӈкве патыс та урыл мēн нэ̄матыр ат вāгмēн, э̄рыӈ тав самаге хотъютын пāлыг-пусвесы̄г, мēн ат вāглумēн. Такви ань янгы̄г ēмтыс, таквинāтэ китыглэ̄лы̄н, та урыл такви вос лāви”.22 Тох тав ся̄няге-āсяге таимāгыс лāвсы̄г, тэ̄н еврейтныл пӣлсы̄г; еврейт потыртахтасыт, Таве Кристосыг ловиньтан хōтпа синагоганыл пōхан ня̄влаве.23 Таимāгыс ся̄няге-āсяге ты лāвсыг: ”Тав тāланэ янгы̄г ēмтсыт, таквинатэ китыглэ̄лы̄н”.24 Ань сампыльтāлыг ōлум хум китынтыг ōс вōввес, ос тавēн лāвсыт: ”Тōрум янытлым сяр мāк лāвен, мāн вāглув, Та Э̄лумхōлас карекыӈ хōтпаг ōлы”.25 Тав тāн нупыланыл ювле-лāвыс: ”Карекыӈ ман āти Тав, таи аре вāглум; топ вāглум – ам сампыльтāлыг ōлсум, ань ос ам кāсалаӈкве патсум”.26 Ōс йильпиыг хум китыглаве: ”Тав наӈ ётын мāныр вāрыс? Хумус самагын пӯссаге?”27 Тāнаны̄лн лāвыглас: ”Ам нāнанн ты кос потырталсум ос нāн ат хӯнтласы̄н; ос нāн мāныр хӯлуӈкве таӈхегы̄н? Э̄рыӈ нāн Тавēныл ханисьтахтын хумииг ēмтуӈкве таӈхегы̄н?”28 Тāн таве кантлысаныл ос лāвсыт: ”Наӈ Тав ханисьтахтын хумитэ, мāн тай Моисей тав ханисьтахтын хумиянэ.29 Мāн вāглув, Моисей ёт Тōрум потырталыс; Тыи тай ат вāглув, хотыл Тав ōлы”.30 Самаге посыӈыг ēмтум хум тāн нупыланыл лāвыс: ”Тыи ты хасьтāл, хумус нāн ат вāглы̄н, хотыл Тав ōлы, ос Тав ты самагум пāлыг-пӯнсысаге.31 Мāн вāглув, карекыӈ мāхум Тōрумн ат хӯнтлавет, Тōрум янытлан хōтпа, Тав вāрмале э̄лаль тотнэ хōтпа Тōрумн хӯнтлаве.32 Йис тāгыл ат хулыглалсув, сампыльтāлыг самын патум хōтпа хотъютн вēрмувес самаге пӯнсуӈкве.33 Тав Тōрумныл ат ке ōлыс, тōнт ат вēрмынув ōлыглаттāл пӣсь вāруӈкве”.34 Тавēн ювле-лāвсыт: ”Наӈ, карек тāра самын патум ут, наӈ мāнав ман ханисьтаӈкве патылы̄н?” Ос хум похан-ня̄влувес.35 Хум хот-ня̄влыматэ Ӣсусн хӯлвес. Таве хōнтумēт, китыгластэ: ”Наӈ ос Тōрум Пы̄гын агтэ̄гын?*а”36 Тав ювле-лāвыглас: ”Ос Тавēн агтнувум кос, Тав хотъют, Кӯсяй?”37 Ӣсус тавēн лāвыс: ”Ос наӈ Таве вāсинтаслын, ос Тав наӈ ётын ты потырты”.38 Тав ос лāвыс: ”Агтэ̄гум, Тōрум-Кӯсяй!” Ос Тав нупылэ пуӈк хӯтылтас.
39 Ӣсус лāвыс: ”Ам ты мāн сут вāруӈкве ёхтысум, хотъют сампыльтāлыг ōлыс самыӈыг вос ēмты, хотъют самыӈ ōлыс, сампыльтāлыг вос ēмтэ̄гыт”.40 Тыи хӯнтамламаныл порат, тōва Тав ётэ ōлум фарисейт Тавēн лāвсыт: ”Мāн ōс сампыльтāлыт?”41 Ӣсус тāнаны̄лн лāвыс: ”Нāн сампыльтāлыг ке ōлсы̄н, аре кат ōсьнувы̄н; ос нāн лāвнэ̄н сирыл кāсалэ̄гы̄н ке, кареканын нāн палтын ōлэ̄гыт”.
*а 35 9:35 агтуӈкве – ты русь лāтӈыл верить, поверить
Глава 9
