Choose Language
Old Testament Books
New Testament Books
view with a second Bible
1 Ӣсус ōс Елеон нампа урн минас.2 Āлпыл ос ялпыӈ колн ёхтыс, ōс сāв мир тав палтэ йисыт. Тав ёл-ӯнтыс ос тāнаныл ханисьтасанэ.3 Ты Моисей сāккон ханисьтан хумит ос фарисейт Тав палтылэ акв э̄ква вāнттысаныл, ты нэ̄ мōт хум ёт э̄руптахтым хōнтсаныл, таве мир э̄лы-пāлн тӯсьтысаныл.4 Ос Тавēн лāвсыт: ”Ханисьтан хум! Ты нэ̄ мōт хум ёт э̄руптахтым хōнтыслув;5 Моисей сāккон хосыт тамле хōтпа э̄ри āхвтасыл пāхвтуӈкве: Наӈ мāныр лāвēгын?”6 Тāн Тав нупылэ намыл, нēрхатнэ мāгыс тох лāвсыт, тымус матыр лю̄ль нак Тавēныл киснэ мāгыс тох кāпыртасыт. Ӣсус тай, хоми хӯтым, тулё̄влыл мā тāрмыл матыр хансыс, тāн нупыланыл атпыл аӈкватāлыс.7 Тав ōс китыглаӈкве патыматэ порат Тав нōх-лю̄лис ос тāнанылн лāвыс: ”Нāн халынт хотъютн кāректāл хōтпа, тав вос ōвылтэт нэ̄ нупыл āхвтас вуськасы”.8 Тувыл ōс та, хоми хӯтым, мā тāрмыл матаре хансуӈкве патыс.
9 Тав лāтӈанэ хӯлманылт э̄сырман патвēсыт, яныг хōтпатныл ōвылтахтым мāньлат мир мус, акв юи-пāлт пуссын лāкква миныглаӈкве патсыт; ос Ӣсус, ос пāвылкан котильт лю̄льнэ нэ̄ тэ̄нкетэ̄н хультсы̄г.10 Ӣсус нōх-лю̄лис, нэ̄ коны-пал вōссыг нэ̄мхотъют ат кāсалас, тувыл нэ̄ нупыл лāвыс: ”Нэ̄ хōтпа! Наӈын лю̄камтам мāхум ань хōт ōлэ̄гыт? Наӈ нэ̄мхотъютн атпыл сутытавēсын?”11 Тав ювле-лāвыс: ”Нэ̄мхотъютн, Кӯсяй!” Ӣсус тавēн лāвыс: ”Ам наӈын ōс ат лю̄камты̄лум; мӣнэн, воссыг лю̄ль кāрек ул вāрен”.
12 Ōс Ӣсус мир ёт потыртас ос тāнаны̄лн лāвыс: ”Ам мир мāгыс посыг ōлэ̄гум; Ам юи-пāлумт йинэ хōтпа турман мāт ат ё̄ми тах, ōлупса пос тав тах акваг ōньсюӈкве паты”.13 Тōнт фарисейт Тавēн лāвсыт: ”Наӈ Наӈтинāныл лāвēгын, Наӈ лāтӈын мāкыг ат ōлы”.14 Ӣсус тāнанылн ювле-лāвыс: ”Сōль ке Ам Амкинāнумныл лāтыӈ тотэ̄гум, лāтӈум таимāгыс сяр мāк ты; Ам вāглум хотыл ёхтысум, хоталь минэ̄гум; ос нāн ат вāглын, хотыл Ам ōлэ̄гум, хоталь минэ̄гум.15 Нāн кāсыӈ хōтпа нёвле-сāме сирыл сутытылы̄н; Ам нэ̄мхотъют ат сутытэ̄гум.16 Ос Ам ке сутытэ̄гум, Ам сутум сяр мāк ты, Ам амккем хунь, Ам ос Āнум кēтум Āсюм ёт сутытымēн.17 Кит хōтпа вāнэ вāрмалēн сяр мāк ты, нāн сāкконынт тох иӈ хансым ōлы.18 Ам Амки урумт Амки ты лāвēгум, ос Ам урумт Āнум кēтум Āсюм лāви”.19 Тōнт Таве китыгласаныл: ”Хōт ōлы Наӈ Āсин?” Ӣсус лāвыс: ”Нāн Āнум ат вāглы̄н, Ам āсюм ōс ат вāглы̄н; нāн Āнум ке вāслы̄н, тōнт Ам Āсюм ос вāнувлы̄н”.20 Ты лāтӈыт Ӣсус ялпыӈ кол кӣвырт йир пиннэ хусап пōхат лāвыс, хунь мир ханисьтас; ос нэ̄мхотъютын тōнт Тав таимāгыс ёл ат пуввес, Тав сё̄сэ тōнт иӈыт ёхтыс.
21 Ос Ӣсус тāн нупыланыл лāвыс: ”Ам нāнанныл пōхан минэ̄гум, ос Āнум кинсуӈкве патылы̄н тах, лю̄ль кāреканы̄н ёт тах нāн хотталь та сялтэгы̄н. Хоталь Ам минэ̄гум, тув ёхтуӈкве нāн ат вēрмēгын”.
22 Ань еврей мāхум лāвыглāсыт: ”Тав аман таквинатэ тах алытэ, тох ты лāви: ‘Хоталь Ам минэ̄гум, нāн тув ёхтуӈкве ат вēрмēгын’?”23 Тав тāнаны̄лн лāвыс: ”Нāн тыгыл ты, ёлыл, Ам нумыл; нāн ты мāт ōлэгы̄н, Ам ты мāт ат ōлэ̄гум.24 Таимāгыс Ам нāнанн ты лāвсум, нāн лю̄ль кāреканы̄н ёт хотталь сялтэгы̄н; Āнумн ат ке агтэгы̄н, Ам солиг ты ōлэ̄гум, тōнт лю̄ль кареканы̄н ёт хотталь та сялтэгы̄н”.25 Тōнт ань тāн Тавēн лāвсыт: ”Ос Наӈ хотъют?” Ӣсус тāнанылн лāвыс: ”Ам мā ӯнтхатам пāсыл ōлэ̄гум, тох ам нāнан лāвыгласум.26 Нāн сāв вāрмаляны̄н нāн урыл потыртаӈкве ос сӯтытаӈквке вēрмēгум, ос Āнум кēтум Āсюм сяр мāкы̄г ōлы, Ам Тавēныл мāныр хӯлыгласум, та урыл мирын та потыртэ̄гум”.27 Тав Тōрум Āсе урыл потыртанэтэ тāн атпыл торгамтасаныл.28 Ань Ӣсус тāнанылн лāвыс: ”Э̄лумхōлас Пы̄г хунь нōх-āлмуӈкве патылы̄н, тōнт тах усьта торгамтылы̄н, тый насати Ам ты ōлнэм ос нэ̄матыр Амтинāмныл ат вāрēгум, ос хумус Ам Āсюмн ханисьтавēсум, тасирыл та потыртэ̄гум.29 Āнум кēтум Āсюм Ам ётум ōлы; Āсюмн Ам амккем хунь хульвēсум. Мāныр Тавēн э̄ри, Ам акваг таи вāрēгум”.30 Тав тамле лāтӈыт потыртаме юи-пāлыт сāв мир Тавēн агтуӈкве патсыт.
31 Тōнт Ӣсус Тавēн агтум еврей мāхумн лāвыс: ”Ам лāтӈум сирыл ке ōлнувы̄н, тōнт сяр мāк Ам ханисьтахтын хумиянумыг та ōлнувы̄н,32 ос мāк вāрмаль вāӈкве патнувы̄н, та мāк вāрмаль нāнан лыпась тāратытэ”.33 Тāн Тавēн лāвыгласыт: ”Мāн Аврам рут ня̄врамытныл минам мāхум ос нэ̄мхуньт нэ̄мхотъют мāгыс рабы̄г ат ōлсув; хумус Наӈ тох лāвēгын: ‘нāн лыпась патэ̄гын’?”
34 Ӣсус тāнанылн лāвыс: ”Сяр мāк, сяр мāк нāнанн лāвēгум: кāсыӈ лю̄ль кāрек вāрнэ хōтпа, лю̄ль кāрек рабы̄г та ōлы.35 Ос раб кусяе колт акваг хунь ōлы; āсе пы̄г акваг та колт ōлы.36 Пы̄г нāнан лыпась ке тāратытэ, тōнт нāн сōль лыпась патэгы̄н.37 Ам вāглум, нāн сōль Аврам рӯтныл минам мāхум; Ам лāтӈум нāн кӣврын сялтуӈкве ат вēрмынэ̄т мāгыс нāн Āнум алуӈкве таӈхилын.38 Амки Āсюм палт мāныр вāсум, Ам таи та потыртэ̄гум ос нāн нāнти āсӣн палт мāныр вāсинтасы̄н, таи та вāрегы̄н”.39 Тāн тавēн ювле-лāвсыт: ”Мāн āсюв Аврам”. Ӣсус тāнанылн лāвыс: ”Нāн Аврам ня̄враманэ ке ōлнувын, тōнт нāн Аврам вāрмалянэ тотнуваны̄н.40 Ос ань нāн Āнум алуӈкве таӈхилы̄н, нāнан мāк лāтыӈ лāвум Э̄лумхōлас, Тав ты лāтыӈ Тōрумныл хӯлыгластэ: Аврам тох ат вāрыглалыс.41 Нāн нāнти āсяны̄н вāрмаляныл вāрияны̄н”. Ты урыл тāн лāвсыт: ”Мāн мори э̄руптахтым ся̄нь-āсьныл самын хунь патсӯв; мāн акв Āсь ōньсēв, Тōрум Тав мāн Āсюв”.42 Ӣсус тāнанылн лāвыс: ”Тōрум нāн Āсин сōль ке ōлнув, нāн Āнум э̄руптанувлы̄н, Ам Тōрумныл йисум ос ёхты̄сум; Ам мат Амки хунь ёхты̄сум, Тав Āнум кēтыстэ.43 Нāн Ам потрум манры̄г ат торгамтылы̄н? Нāн Ам лāтӈум хӯнтлуӈкве ат вēрмынэ̄н мāгыс.44 Нāн āсин я̄вол; нāн ос тав лю̄ль писянэ сирыл ōлуӈкве тāӈхегы̄н. Тав тōрум мā ӯнтум пāсыл э̄лумхōлас порслāн утыг ōлыс, тав мāк вāрмаль нупыл ат сунсыс, тав такви палтэ мāк вāрмаль ат иӈ ōньсис. Хунь тав потырты, тав тōнт уркки, тав урккыӈ хум, мāк урккāсиг тав ты ōлы.45 Ос хунь Ам мāк вāрмаль урыл лāвēгум, нāн Āнумн ат агтэгы̄н.46 Хотъют нāн халынт Āнумныл урккыӈ лāтыӈ хӯлыглас? Ам мāк лāтыӈ нāнанн лāвēгум, ос манры̄г нāн Āнумн ат агтэгы̄н?47 Тōрумныл ōлнэ хōтпа Тōрум лāтӈыт хӯнтамлыянэ. Нāн Тōрумныл ат ōлнэ̄н мāгыс Нāн таимāгыс ат хӯнтлэгы̄н”.
48 Ты урыл еврей мāхум ювле-лāвсыт ос потыртасыт: ”Мāк мāн мāкы̄г ман ат лāвēв-а, Наӈ Самаряныл ōлнэ ут ос Наӈ кӣврынт куль ōлы?”49 Ӣсус лāвыс: ”Ам кӣврумт куль āтим; Ам Амки Āсюм янытлэ̄гум, нāн тай Āнум лю̄камтылы̄н.50 Ам Амкинам янытлан лāтыӈ хунь кинсэ̄гум: Кисхатнэ ос Сутытан ут ōлы: Ам Āсюм.51 Мāк, сяр мāк нāнанн ты лāвēгум: Ам лāтӈум сирыл ōлнэ хōтпа сорум ат васиньты, нэ̄мхуньт сорумн ат паты”.52 Еврей мāхум Тавēн лāвсыт: ”Мāн ань тāра-паттыслӯв, Наӈ кӣврынт куль ōлнэ̄тэ. Аврам ос Тōрум лāтыӈ тотнэ хумит сорумн патсыт, Наӈ тай лāвēгын: ‘Хотъют Ам лāтӈум сирыл ōлы ке, тав сорум ат вāсиньтытэ тах’.53 Сорумн патум Аврам āсювныл наӈ ман сōль яныгнуве? Тōрум лāтыӈ тотнэ хумит ос сорумн патсыт: наӈтинāнын хōӈхаг ловиньты̄лын?”54 Ӣсус ювле-лāвыглас: ”Ам Амкинам янытлан лāтӈум Āнум нэ̄матары̄г ат хōйхаты. Āнум Āсюм Тав янытлытэ. Нāн тай ты лāвегы̄н, Тав нāн Тōрмын.55 Ос нāн Таве ат вāглы̄н, Ам Таве вāглум; ань лāвēгум ке – Таве ат вāглум, тōнт Ам ōс нāн хольтын урккыӈ Хōтпаг патэ̄гум. Ам Таве вāглум, Ам Тав лāтӈе сирыл ты ōлэ̄гум.56 Нāн āсин Аврам хот-ся̄гтым ōлыс Ам хōталум кāсалан мāгыс, хунь кāсалас – хот-ся̄гтыс”.57 Ты лāтӈанэ урыл еврей мāхум Тавēн ювле-лāвсыт: ”Наӈ атпан тāлын иӈыт пыл тōвлы, – ос Наӈ Аврам ман вāсинтāслын?”58 Ӣсус тāнаны̄лн лāвыс: ”Мāк, сяр мāк нāнанн лāвēгум, Ам сāртын, Аврам ōлнэ э̄лы-пāлт Ам тōнт ōлсум”.59 Тувыл тāн, Тав нупылэ пāхвтын мāгыс āхвтасыт āлмаясаныл; ос Ӣсус хотталь сōймыгпас ос ялпыӈ колныл кон-квāлыс, тувыл э̄лаль та минмыгтас.
Глава 8
