Choose Language
Old Testament Books
New Testament Books
view with a second Bible
1 Ты вāрмалит юи-пāлт Ӣсус Галилея мā хосыт яласас, Юдея мā хосыт таимāгыс ат таӈхыс яласаӈкве, Тав Юдея мāт алнэ мāгыс кисвес.
2 Мосертын тах еврей ялпыӈ хōтал ты ēмты – кущи ӯнтыл хōтал.3 Тōнт ты ягпыганэ Тавēн лāвсыт: ”Ты мāныл Юдея мāн мӣнэн, ханисьтахтын хумиянын Наӈ вāрмалянын вос кāсалыяныл, вос вāганыл, мāныр Наӈ хāсэ̄гын вāруӈкве.4 Нэ̄мхотъют хотты вāрмаль ёл-туйтым ат вāри. Мирын вāнэн мāгыс наӈтинанын тāнанылн хултэ̄лын”.5 Ань Такви ягпыганэ Тавēн ат агтсыт.6 Ӣсус тāнанылн ювле-лāвыс: ”Ам порам иӈыт ёхты, нāн мāгсылы̄н тай акваг пора ōлы.7 Нāн мирын лавыл ат нэ̄главēн, Ам ос мирын акваг тāн карек вāрмаляныл урыл лāтыӈ тотэ̄гум, таимāгыс Āнум мир лавыл нэ̄глыяныл.8 Нāн ты ялпыӈ хōтал ёнгилн ялэ̄н; Ам порам иӈыт ёхты, таимāгыс Ам ты ялпыӈ хōтал канын ат минэ̄гум”.9 Тамле лāтыӈ лāвме юи-пāлт, Галилея мāт та хультыс.
10 Ос хунь Тав ягпыганэ ёнгил канын ёхтысыт, Тав ōс ёхтыс. Тав тӯйтхатым ёхтыс.11 Евреитн та ялпыӈ хōтал каныт Тав такос кисвес, тымус ля̄гантасыт: ”Тав аман хōт ōлы?”12 Мир хāлт Тав ōвылтытэ сāвсыр потыр ōлыс: тōват лāвыгласыт: ”Тав ёмас хум”; мōтаныт лāвыгласыт: ”Āти, тōват Таве мир лāпалан хумыг лāвылтасаныл”.13 Тымус нэ̄мхотъют сохтыл ат лāвыглāлыс, тāн пуссын еврейтныл пилсыт.14 Ялпыӈ хōтал котильт Ӣсус ялпыӈ колн сялтыс ос мир ханисьтаӈкве патыс.15 Ос еврейт ōсятахтыглалуӈкве патсыт, тымус ля̄гантасыт: ”Тав ханисьтахттāл Тōрум нэ̄пакт хансым вāрмалит хумус вāганэ?”16 Ӣсус тāн нупыланыл ювле-лāвыс: ”Ам ханисьтан вāрмалянум – Ам вāрмалянум āтимыт, ты Āнум кēтум Āсюм Тав ханисьтан вāрмалянэ;17 Тав сирет ōлуӈкве тахмаян хōтпа мāк тāра-паттытэ, хотъютныл ты лāтӈыт ювыт: Тōрумныл ман ос Ам Амки сирумтыл тох потыртэ̄гум.18 Таквинатэ̄ныл потыртан хōтпа таквинатэ мирын сусылтанэтэ мāгыс тох вāри; ос Таве кēтум хōтпатэ мāгыс мирын суйтнэ лāтыӈ киснэ хōтпа вēськатыг ōлы, ос Тав урык ат ōньси.19 Нāн Моисейн сакконыл ман ат майвесы̄н-а? Ос нāн нэ̄мхотъюты̄н та сāккон хосыт ат ты ōлы. Мāныр мāгыс Āнум алуӈкве кинсылы̄н?”20 Мāхум ювле-лāвсыт: ”Наӈ кӣврынт э̄рыӈ куль*б ōлы? Хōӈхан Наӈ алуӈкве кинсāвен?”21 Ӣсус э̄лаль-потрамим, тāнанылн лāвыс: ”Ам акв вāрмаль туп вāрсум, ос нāн пуссын та ōсятахтыглэ̄гы̄н.22 Моисей нāнанн, хум няврамытн, яктапан вāрмаль*в мис [та вāрмаль Мосейныл āт кос юв, таи āсянув ōлум пāсыл йинэ нак], ос сабат-хōталт нāн хум хōтпа яктапан нак вāрегы̄н.23 Моисей сāккон тотнэ мāгыс, сабат-хōталт хум хōтпа ёт яктапан нак вāраве ке, – ос Ам сабат-хōталт э̄лумхōлас ялтуптамум мāгыс, Ам нуплум манрыг тох кантлэгы̄н?24 Коны-пāлыл ул сутытэ̄н, мāк мӯсхалыг сутытэ̄н”.
25 Ань тōва Иерусалимт ōлнэ мāхум лāвыгласыт: ”Тыи аман та хōтпаг ōлы, тав алнэтэ мāгыс ты кинсаве?26 Танай, Тав тӯйтхаттāл потырты, ос Тавēн нэ̄мхотъют нэ̄матыр ат лāви: Тав соль ты Кристос, ты урыл кӯсяит э̄рыӈ мāк вāганыл?27 Мāн тай Таве вāглув, хотыл Тав ōлы; хунь Кристос ёхты, тонт нэ̄мхотъютн тах ат вāве, хотыл Тав ōлы”.28 Тōнт Кристос ялпыӈ колт ханисьтан лāтыӈ потыртым тох суиӈысь ля̄галас: ”Нāн Āнум вāглы̄н, ос нāн вāглын хотыл Ам ōлэ̄гум, ос Ам Амки хунь ёхтысум, Āнум кēтум Āсюм Тав ты вēськат, Таве нāн ат вāглы̄н.29 Ам Таве вāглум, Ам Тавēныл ёхтысум, Тав Āнум тыг ты кēтыстэ”.30 Тāн Таве пувумтаӈкве ēмталасаныл, ос нэ̄мхотъют Тав палтэ ат вēрмыс пӯхвтуӈкве, Тав сё̄сэ тōнт иӈыт ёхтыс.31 Ōс сāв мāхум мир халныл Тавēн агтсыт ос лавыглāсыт: ”Аман тах сōль хунь Кристос ёхты, тыгыл сāвнув ōлыглаттāл нак вāри, мансāвит Тав вāрыглāлыс?”32 Фарисейт хӯлсаныл, мāхум тāнки халанылт Тав урēт восгысыт, ань фарисейт ос сяр яныг пӯп-ōйкат*г лусытан хумияныл кēтсаныл – Таве пувуӈкве.33 Ос Ӣсус тāн нупыланыл лāвыс: ”Ам нāн ётын хоса ат ōлэ̄гум, ос тах Āнум Кēтум Āсюм палт та минэ̄гум;34 Āнум кинсуӈкве патылы̄н, топ ат хōнтылы̄н; ос хōт Ам ōлуӈкве патэ̄гум, тув тах нāн ат вēрмегы̄н ёхтуӈкве”.35 Тымус еврейт тāнки халанылт потрамасыт: ”Аман хоталь Тав минуӈкве таӈхи, мāн Таве тōнт ат хōнтылув? Тав э̄рыӈ Еллин нампа мāн минуӈкве таӈхи, хот мāн мирув грекыт халт ōлэ̄гыт ос тот тах тāнал ханисьтаӈкве паты?36 Тав лāвум лāтӈанэ хумус торгамтаӈкве э̄рēгыт: ‘Āнум кинсуӈкве патылы̄н, ос ат хōнтылы̄н тах; ос хōт Ам ōлуӈкве патэ̄гум, тув тах нāн ат вēрмегы̄н ёхтуӈкве’”.
37 Ялпыӈ хōталыт юи-ōвыл яныг хōталэ порат Ӣсус лю̄ляхōлыс, ос мāхум ханисьтым тымус тāкысь ля̄галас: ”Хотъют аюӈкве таӈхи, Ам палтум йиēн ос аēн.38 Хотъют Āнумн ке агты, Тōрум нэ̄пакт хансым хольт тав сымēныл лы̄лыӈ витыӈ я̄т ōвумтэ̄гыт тах”.39 Тамле лāтӈыт Тав Ялпыӈ Лы̄лы урыл лāвыс, Хотъют Тавēн агтнэ мир сымы̄н висāныл: Ӣсус мирын иӈыт янытлавес, тагимāгыс Ялпыӈ Лылы тāн палтыланыл иӈыт нэ̄глалас.40 Ты лāтӈыт хӯнтамлам сāв мир халт сāв мāхум потрамасыт: ”Тав Тōрум лāтыӈ тотнэ хумы̄г сōльпыл та ōлнэ̄тэ”.41 Мōтаныт лавыглāлсыт: ”Тыи Кристос”. Ос товат тай тох лāвыгласыт: ”Ман Галилея мāныл Кристос ёхты̄?42 Тōрум нэ̄пакт тох хансым ман āт ōлы, Кристос Давид-хōн рутныл ёхты, Вифлеем ēрныл ёхты, Тав Давид ōлум мāныл ёхты?”43 Тав мāгсылэ мир ворāсьлахтуӈкве патсыт.44 Това мāхум Таве пувумтаӈкве ēмталасаныл кос; ос нэ̄мхотъют ат вēрмыс Тав палтэ пӯхвтуӈкве.45 Ос ань лӯсытан хумит яныг пӯп-ōйканыл ос фарисейт палт ювле ёхтысыт, тāн ань китыглавēсыт: ”Нāн Таве ты̄г манры̄г ат тотыслы̄н?”46 Ань лусытан хумит ювле-лāвсыт: ”Ты Э̄лумхōлас хольт нэ̄мхуньт мōт э̄лумхōлас тох ат потыртāлыс”.47 Фарисейт тāн нупыланыл лāвсыт: ”Аман нāн ос лāплувēсы̄н?48 Кӯсяитныл ос фарисейтныл Тавēн ос хотъютаныл агтуӈкве патыс?49 Та мир сāккон вāтāл утыт, тāн сыманыл Тōрум тāл мāхум”.50 Никодим, э̄ти Тав палтылэ ёхталам хум, тāн халанылт ōлыс, лāви:51 ”Мāн сāкконув, э̄лумхōласэ хӯнтлаттāл ос тав вāрмалянэ вāтал, ман вēрми хōтпа сутытаӈкве?”52 Тавēн тāн ювле тох ты лāвсыт: ”Наӈ ман ōс Галилея мāныл ōлэ̄гын? Ялпыӈ Нэ̄пакт ёмсяквēг сунсэ̄лын Галилеяныл Тōрум лāтыӈ тотнэ хум ат ōлы̄глы”.53 Ос пуссын лāкква юв та мӣнгаласыт.
*а 0 7:0 кущи – еврей мāхум ялпыӈ хōталаныл
*б 20 7:20 куль – ты русь лāтӈыл бес
*в 22 7:22 Хум няврамыт утаныл яктапан вāрмаль – ты русь лāтӈыл обрезание
*г 32 7:32 сяр яныг пӯп-ōйка – ты русь лāтӈыл первосвященник
Глава 7
