Choose Language
Old Testament Books
New Testament Books
view with a second Bible
1 Ты юи-пāлт Ӣсус Галилея ся̄рсь тапāлн Тивериада ӯс пōхан минас.2 Сāв мир пуссын вāсинтасаныл хумус Тав ōлыглаттāл накыт āгмыӈ хōтпат ёт вāрыглāлыс, таимāгыс тāн ос Тав юи-пāлэ̄т минасыт.3 Ӣсус ур āлан хāӈхыс ос тот Такви ханисьтан хумиянэ ёт ӯнлахōлыс.4 Еврейт Пасха нампа ялпыӈ хōталаныл ляпамас.5 Ӣсус ань тасāвит мир Тав палтэ йинэ̄ныл кāсаламēт, Филипп хум нупыл лāвыс: ”Ты мир тыттуӈкве тах ня̄нь хōт ёвтэ̄в?”6 Ӣсус вāстэ кос мāныр вāруӈкве, Тав ань нас āрталан мāгыс таве тох китыгластэ.7 Филипп лāвыс: ”Тāнаныл алам китсāт тинар ты̄нпа ня̄нь тах мосься, ат тōвлавет, мāнь ломтыл ке миӈкве, ос ат тōвлавет”.8 Акв Тав ханисьтахтын Симон Пēтыр āпситэ Андрей нампа хум Тавēн лāви:9 ”Ячменьныл вāрим ат ня̄нь ос кит мāнь хӯл акв пы̄грись ōньси, тасāвит мир мāгыс ты̄и мосься?”10 Исус лāвыс: ”Лāвēн, тāн мā тāрмыл вос ӯнтэ̄гыт”. Та мā ня̄рпумыӈ ōлыс. Ань атахкем сōтыра хōтпа ёл та ӯнтсыт.11 Ӣсус ня̄нит кāтын висанэ, таимāгыс пумасипа лāтыӈ лāвыс, та ня̄нит ханисьтахтын хумиянэ̄н мисанэ, ос ханисьтахтын хумиянэ ӯнлын мāхумытн мисаныл, ос аквтох хӯлыл уртвēсыт, хотъютн мансāвит э̄рыс.12 Хунь мир тэ̄ӈкв āстысыт, Такви ханисьтахтын хумиянэ̄н лāвыс: хультум лōмтыт акван-āтэ̄н, нэ̄матыр порсыг ул вос мины.13 Ос китхуйпулув хусап тāгыл тāйм атсыт, тэ̄нут тэ̄м мирныл ат ня̄ньныл тасāвит та хӯльтыс.14 Тōнт Ӣсус вāрум ōлыглаттāл ты вāрмале сунсум мир лāвсыт: ”Ты сōль Тōрум лāтыӈ тотнэ хум ōлнэтэ, Тавēн ты э̄ри мир халт кӯсяйлахтуӈкве”.15 Ӣсус та урыл вāнэ̄тэ мāгыс мир тармыл хōныг вāруӈкве кусыглахтынэ̄ныл хӯлмēт, ōс та тактēтэ ур алан минас.
16 Хунь э̄типалāг ēмтыс, Тав ханисьтахтын хумиянэ ся̄рсь вāтан минасыт,17 хāпын тāлсыт, ся̄рсь та пāлн, Капернаум ӯсн мӣнмыгтасыт. Турманлаӈкве патыс, ос Ӣсус тай тāн палтаныл иӈ ат ёхтыглāлыс.18 Яныг вōтасы̄г ēмтыс, ся̄рсь хумпыӈыг ēмтыс.19 Вāтнупыл атахкем ман ос вāтахкем стадий*а товсыт, Ӣсус кāсаласаныл, Тав ся̄рсь вит тармыл ё̄мыс, хāп пōхан ты ляпами, ос тāн хот-рохтысыт.20 Тав тāнаны̄лн лāвыс: ”Ты Ам; ул пӣлэ̄н”.21 Тāн Таве хāпын тāлттуӈкве кос ēмталасаныл, ос хāпаныл тāнанылн э̄рум ся̄рсь вāтан тув та пāг-пӯхты.
22 Ёты хōтал ся̄рсь та пāлт лю̄люм мир кāсаласаныл, тот Тав ханисьтахтын хумиянэ хāп коны-пāл воссыг мōт хāп пāг ат пыл пӯхвтыглāлыс, ос Ӣсус ханисьтахтын хумиянэ ёт хāпын ат тāлыглалыс.23 Та халт Тивериата ӯсныл Тōрумн мāим ня̄нь тэ̄маныл мā ляпан мōт хāпыт пӯхвтысыт.24 Ань мир кāсаласаныл, насати Ӣсус ос Тав ханисьтахтын хумиянэ ёт āтимыт. Тāн хāпанылн тāлсыт, ос Ӣсус киснэ мāгыс Капернаум ӯс нупыл минмыгтасыт.25 Ся̄рсь та палт Таве кāсаламанылт Таве китыгласаныл: ”Равви! Ос хунь Наӈ ты̄г ёхтыгпасын?”26 Ӣсус тāнанылн ювле-лāвыс: ”Мāк, сяр мāк нāнанн ты лāвēгум: Āнум ōлыглаттāл вāрмалянум мāгыс хунь кинсылы̄н, нāн ня̄нь пōйтнэ̄г тэ̄мын мāгыс Āнум кинсылы̄н.27 Аквсёс тэ̄нэ тāим урыл ул номсэ̄н, ос э̄лаль ōлнэ ōлупса тāим урыл номсэ̄н, тамле тāймыл Э̄лмхōлас Пы̄гын тах мивēн, Тōрум Āсь Тавēн Такви кāтпōсэ та пӣныстэ”.28 Тāн Таве китыгласаныл: ”Тōрум вāрмаль вāрнэ мāгыс мāнавн мāныр э̄ри вāруӈкве?”29 Ӣсус тāнанылн ювле-лāвыс: ”Тыттыя Тōрум вāрмале: Тōрум Āсь кēтум утын агтуӈкве вос патэгы̄н.30 Ты урыл тāн Таве китыгласаныл: манахурип пōс Наӈ мāнавн хултэ̄гын, мāн таи вос кāсаланувлув, тōнт тах Наӈын агтуӈкве патэ̄в? Мāныр Наӈ вāрēгын?31 Мāн āсянув май манна*б рēгыӈ сэ̄гиӈ мāт тэ̄синьтасыт, тох хансым ōлы: ‘Ня̄нь тэ̄нэ мāгыс тōрумныл ёла мис’”.32 Ӣсус тāнанылн лāвыс: ”Мāк, сяр мāк нāнанн ты лāвēгум: нуми тōрумныл ня̄нь нāнанн Моисей хунь мисинтāлыс, Ам Āсюмн тах нуми тōрумныл сяр мāк ня̄нил мивēн.33 Алам Тōрум ня̄нь таи ты, Тав нуми тōрумныл ёл-вāглы ос тōрум ōлнэ нот мирын мы̄гтэ”.34 Ты урыл тāн Тавēн лāвсыт: ”Кӯсяй! Мāнавн акваг тамле ня̄нь вос минувын”.35 Тōнт Ӣсус тāнаны̄лн тох ты лāвыс: ”Ам ōлупса ня̄ниг ōлэ̄гум. Ам палтум ёхтын хōтпа тэ̄п я̄румн ат ёхтаве, Āнумн агтнэ хōтпа нэ̄мхуньт вит я̄румн ат ёхтаве.36 Ам нāнанн лāвыглāлсум кос: нāн Āнум вāслын кос, топ Āнумн ат агтэгы̄н.37 Пуссын мāныр Āсюм Āнумн мы̄г Ам палтум ёхты, ос Ам палтум ёхтын хōтпа Ам хот ат ня̄влы̄лум,38 Ам Амки вāрмалянум вāрнэ мāгыс нуми тōрумныл хунь вāглысум, Āнум кēтум Āсюм вāрмале тотнэ мāгыс Ам ты̄г вāглысум.39 Ос Āнум ты̄г кēтум Āсюм лāтӈе тамле ты: Тав Āнум мим утанэ̄ныл нэ̄мхотъют наскассыг порсыг ул-вос мины, ос юи-ōвыл ōлнэ хōталāнылт пуссын нōх вос ялтуптыянум.40 Āнум кēтум Āсюмн хӯлтавем: Тав Пы̄ге кāсалан кāсыӈ хōтпа ос Тавēн агтнэ хōтпа акваг э̄лаль вос ōлыс; ос тōнт тах юи-ōвыл хōталэ̄т Ам таве нōх-ялтуптылум”.41 ”Ам нуми тōрумныл ёхтум ня̄ниг ты ōлэ̄гум,” ань ты лāтӈанэ̄ мāгыс еврейт сёпсялтахтуӈкве патсыт.42 Ос тāн ля̄галасыт: ”Ты ман Ӯщуп ōйка пы̄г Ӣсус Тав-а, мāн Тав āсе ос ся̄не вāгагув?”43 Ӣсус ювле-лāвыс: ”Нāн нāнти халынт ул сёпсялтахтэ̄н.44 Āнум кēтум Āсюмн ке ат хӯлтавēн тах, нэ̄мхотъютын Ам палттум ат вēрми ёхтуӈкве; Ам таве юи-ōвыл хōталанылт тах нōх-ялтуптыянум.45 Тōрум лāтыӈ э̄лаль тотнэ хумит палт хансым ōлы: ‘Тōрумн пуссын ханисьтавет тах’. Āсюмныл лāтыӈ хӯлыглам ос ханисьтахтам кāсыӈ хōтпа Ам палтум ёхты.46 Тōрумныл ёхтум хōтпа коны-пāл Тōрум Āсь нэ̄мхотъютн ат вāсиньтāлвес, туп Тав Āсе вāсиньтастэ.47 Мāк, сяр мāк нāнанн ты лāвēгум: Āнумн агтнэ хōтпа сорум тал э̄лаль ōлуӈкве паты тах,48 Ам ōлупса ня̄ниг ты ōлэ̄гум.49 Нāн āсянын нуми тōрумныл патум манна мир ōлтāл мāт тэ̄синтасыт ос сорумн патсыт;50 Тōрумныл ёл-вāглын ня̄нь тāмле, таве тэ̄нэ хōтпа сорумпаттāл ōлы тах.51 Ам лылыӈ ня̄нь, нуми тōрмыл ёл-вāглысум, тамле ня̄нь тэ̄нэ хōтпа акваг э̄лаль ōлуӈкве паты; ты Ам мӣнэ ня̄нюм, тав Ам Нё̄влюм-кēлпум, Ам таве мир э̄лаль ōлнэ нотаныл мāгыс мы̄глум;”52 тōнт еврейт тāнки халаны̄лт ворасьлахтуӈкве патсыт, тымус лāвēгыт: ”Хумус Тав такви Нё̄вле-кēлпе мāнавн тэ̄нуты̄г мы̄гтэ?”53 Ӣсус ос тāнанылн лāвыс: ”Мāк, сяр мāк нāнанн ты лāвēгум: Э̄лмхōлас Пы̄г Нё̄вле ат ке тэ̄гын, Кēлпе ат ке āйилын, ōлуӈкве тах ат патэ̄гы̄н.54 Ам Нё̄влюм тэ̄нэ ос Ам Кēлпум айнэ хōтпа акваг э̄лаль ōлнэ хōтал ōньси, ос Ам таве юи-ōвыл хōталэ̄т тах нōх та ялтупты̄лум.55 Алам Ам Нё̄влюм сōль ты тэ̄нутыг ōлы, ос Ам Кēлпум сōль ты айнутыг ōлы.56 Ам Нё̄влюм тэ̄нэ ос Ам Кēлпум айнэ хōтпа Ам кӣврумт ōлы, Ам ос тав кӣврет ōлэ̄гум.57 Хумус Ам лылыӈ Āсюмн кēтвēсум, Ам Āсюм хосыт ты ōлэ̄гум, Āнум тэ̄нэ хōтпа Ам хосытум паты ōлуӈкве.58 Тыи нуми тōрумныл вāглум ня̄нӣг ты ōлы. Тасирыл хунь ēмты: хумус нāн āсяны̄н нуми тōрумныл патум колас ня̄нь самыт тэ̄синьтасыт ос сорумн патсыт, ты ня̄нь тэ̄нэ хōтпа тах акваг э̄лаль ōлуӈкве паты”.59 Капернаум ӯсыт мир ханисьтым Тав тох синагогат потыртас.
60 Тав сāв ханисьтахтын хумиянэ ты лāтӈыт хӯлыгламанылт, лāвыгласыт: ”Тамле мат хӯлыглаттāл лāтӈыт! Аман хōӈха тамле лāтӈыт хӯнтлаӈкве вēрми?”61 Ӣсус ханисьтахтын хумиянэ тāнки халанылт сёпсялтахтын торгамтастэ, ос тāнанылн лāвыс: ”Ты лāтӈытн нāн хотмус ман саватавēн-а?62 Э̄лмхōлас Пы̄г хотыл ёхтум мāтэ̄ныл нōӈхаль аквтув миннэ̄тэ хунь кāсалылы̄н, тōнт нāн мāтыр лавēгы̄н?63 Э̄лмхōлас нёвле-сāме нэ̄матыр пāрс ат ōньси, э̄лмхōлас лылытэ̄н ōлупсал миве. Ам нāнанн лāвум лāтӈанум – лылыӣг ос ōлупсаг ōлэ̄гыт.64 Ос нāн халынт ат агтнэ хōтпат ōлэ̄гыт”. Алам Ӣсус сāртын тāгым вāстэ, хотъют ат агты ос хотъютын Тав тыналаве тах.65 Ос лāвыс: ”Таимāгыс Ам нāнан ты лāвыглāлсум, Āсюм агтнэ номтыл ат ке мӣвет, нэ̄мхотъютаныл Ам палтум ёхтуӈкве тах ат вēрми”.66 Та юи-пāлы Тав ханисьтахтын сāв хумиянэ пōхан-минасыт ос воссыг Тав ётэ ат яласасыт.67 Тōнт Ӣсус китхуйпулов хумиянэ китыгласанэ: ”Нāн э̄рыӈ ос Āнумныл пōхан-минувы̄н?”68 Симон Пēтыр ювле-лāвыс: ”Кӯсяй! Хотъют палт мāн воссыг минэ̄в? Наӈ палтын э̄лаль-ōлнэ ōлупса лāтӈыт ты ōлэ̄гыт:69 ос мāн мāк агтэ̄в ос торгамтаслув – Наӈ ты Кристос, Тōрум Пы̄г”.70 Ӣсус тāнаны̄лн лāвыс: ”Ам нāнанныл китхуйплов хōтпа ман ат пēриясāнум? Ос акв – хōтпан я̄волы̄г*в ōлы”.71 Тыи Симон Искариот ōйка Иуда нампа пы̄ге урыл Тав тох ты лāвыс, тав китхуйплов хумитныл кос ōлыс, ос тав ты Ӣсус хӯлтуӈкве сё̄питахтас.
*а 19 6:19 стадий – ты 192 метра хосыт мā ломт
*б 31 6:31 манна – ты тамле тэнут, сыртэп хурип
*в 70 6:70 я̄вол – ты русь лāтӈыл дьявол
Глава 6
