Choose Language
Old Testament Books
New Testament Books
view with a second Bible
1 Ты юи-пāлт еврейт ялпыӈ хōтал ōлыс, ос Ӣсус Иерусалим ӯсын ёхтыс.2 Иерусалимт Пāля нампа кāрта āви похат пувлын мā ōлыс, еврей мāхум лāтыӈ сирыл тав Вивестаг лāваве. Ты пӯвлын мā ат алаӈ лё̄ӈх ōньсяс.3 Тот сака сāв āгмыӈ, сампыльтāл, нōхнэ, хот-урум мāхум ōлсыт. Тāн вит невумтанэ̄тэ ӯрсаныл.4 Товēртн Тōрум Ангел пувлын мāн вāгыглāлыс, вит хумплалтас, ос хумпыӈ витын сāртын āлыман хōтпа хот-пусмыглалыс, манхурип-пыл лю̄ль āгмыл ат ōлыглāлыс.5 Тыт ōлыс акв хум, тав налыман нупыл нёлолов тāл āгмыл савалас.6 Ӣсус таве тыт хуйнэ̄тэ кāсаластэ ос хосаттāгыл āгмыӈы̄г ōлнэ̄тэ тāра-патумēт тавēн лāвыс: ”Наӈ пусмуӈкве таӈхēгын?”7 Āгмыӈ хум Тав нупылэ ювле-лāвыс: ”Атхунь кос Кӯсяй; вит хумпыл минуӈкве патыгланэ порат ам витн вāгылтан хōтпа ат ōньсēгум; ам тув-ёхтантāнтнэм порат āнумныл сāртыннув тув мōтан āлыми”.8 Ӣсус тавēн лāви: ”Нōх-лю̄лен, хуйнэ порамасын вуēн, ё̄масьлэн”.9 Ос ань хōтпа тāра та пусмыгпас ос хуйнэ сованэ висанэ, та минас. Тамле нак сабат-хōталт*а ōлыс.10 Таимāгыс еврейт пусмум хумын лāвсыт: ”Ты хōтал сабат, хуйнэ сованын ат рōви ёт-виӈкве”.11 Тав тāн нупланыл ювле-лāвыс: ”Āнум пусмалтам хōтпа лāвыс: ‘Хуйнэ сованын вуēн ос ё̄мен’”.12 Тав китыглавес: ”Хотъют Та э̄лмхōлас, хотъют тох лāвыс: ‘Хуйнэ сованын вуēн ос ё̄мен’?”13 Пусмум хōтпа ат иӈ вāстэ, Тав Хотъют, Ӣсус тот ōлум мир халн паттапахтас.14 Ётылнув Ӣсус таве ялпыӈ колт*б кāсаластэ ос тавēн лāвыс: ”Наӈ ань ты пусмысын; тыгыл усьпылнэ̄г лю̄ль накын ат патнэн мāгыс воссыг карек ул вāрен”.
15 Ты хум минас, ос еврейтн потыртас, таве пусмалтам хум Ӣсус тав ты.16 Ōс тамле нак сабат-хōталт вāрме мāгыс еврейт Ӣсус похан-ня̄влуӈкве патсаныл, Таве алнэ мāгыс кӣсмаясаныл.17 Ос Ӣсус тāн-нупыланыл лāвыс: ”Ам Āсюм аньмус тамле нак вāри, Ам ос вāрēгум”.18 Тувыл Таве алнэ мāгыс усьпылнэ̄г кинсуӈкве та патсаныл, Тав сабат-хōталт Тōрум наканэ вāрме коныпал Тōрум Такви Āсиг лāвылтастэ, Таквинāтэ Тōрум янытыг ловиньтастэ.
19 Та урыл Ӣсус лāвыс: ”Мāк та, мāк та нāнанн лāвēгум: Пы̄г нэ̄матыр Таквинатэ̄ныл ат вēрми вāруӈкве, такви вāрмале вāрим Āсе ат ке кāсалытэ: мāныр Āсе вāри, Пы̄ге ос таи вāри.20 Алам Āсь Пы̄ге э̄руптытэ, ос мāныр Такви хāсы, пуссын Тавēн хӯлтыглы̄янэ; ос ты̄гыл сāвнув вāрмаль хӯлты тах, нāн тах ōсятахтыглэ̄гын.21 Хумус Āсь сорумн патум утыт нōх-ялтуптыянэ ос лылыӈыг вāриянэ, Пы̄г ōс тох ты тах хоты хōтпа нōх-ялтуптаӈкве тахмаитэ.22 Āсь нэ̄мхотъют ат сутыты, сут вāрмаль Пы̄гēн мӣстэ,23 хумус Āсе янытласыт, тасир вос ань Пы̄ге янытлыяныл. Хотъют Пы̄ге ат ке янытлы, таи Таве кēтум Āсе ос ат янытлы.24 Мāк, сяр мāк лāтыӈ нāнанн ты лāвēгум: хотъют Ам лāтӈумн хӯнтамлы ос Āнум Кēтум хумн агты, акваг э̄лаль ōлнэ ōлупсан паты, ос сутын ат ёхты, акваг тах э̄лаль сорумпаттāл ōлупсан паты.25 Мāк, сяр мāк та нāнанн лāвēгум: тамле нāк ты ēмты, тамле нāк ēмтыс, хунь сорумпатум утыт Тōрум Пы̄г лāтӈыт хӯлыяныл, та лāтыӈ хӯлым тах нōх ты ялтэ̄гыт.26 Алам хумус ōлупса Āсь такви кӣврет ōньситэ, тох иӈ Пы̄гēн ос э̄лаль ōлнэ нот мистэ.27 Ос сут вāрмаль тотнэ уртылыл Таве мистэ, Тав алам Э̄лмхōлас Пы̄г.28 Тамле вāрмалин ул ōсятахтыглэ̄н, алам тамле нāк ты ёхты, хунь тах пуссын сопаманылт*в хуйнэ сорумн патум утыт Тōрум Пы̄г лāтыӈ хӯлыяныл;29 ёмас вāрмаль вāрум утыт нōх-ялтэ̄гыт, ос лю̄ль вāрмаль вāрум утыт сутытан мāгыс нōх-ялтэ̄гыт.
30 Ам Амкинамныл нэ̄матр вāруӈкве ат вēрмēгум. Хумус хӯлэ̄гум, та сирыл та сутытэ̄гум, Ам сутум вēськат; Ам алам Амки сирумт хунь вāрēгум, Ам Āнум кēтум Āсюм сирыл вāрēгум.31 Ам Амки номтыл ке матыр потыртэ̄гум, тамле потыр вēськаты̄г э̄лаль ат мины тах.32 Ам урумт лāтыӈ тотнэ ут ōлы, Тав мōтан, Ам вāглум Тав Ам урумт тотнэ лāтӈе вēськатыг мины тах.33 Нāн Иоан палт кēтыглалыслы̄н, тав сяр мāк ты потыртас.34 Ам э̄лмхōласныл лāтыӈ ат кос урēгум, Ам ты сирыл нāнан ӯргалан мāгыс ты лāвēгум.35 Тав постын утыг, нāиӈы̄г ос посыӈы̄г ōлыс; тав посэ̄н нāн ся̄гтыглāлсын.36 Ам ос Иоаныл сāвнув потыр ōньсēгум: Āсюм маим вāрмалянум, Амки вāрнэ вāрмалянум тāнки Ам урумт мāк потрыг ōлэ̄гыт, Ам Āсюмн таимāгыс ты̄г ты кēтвēсум.37 Ос Āнум кēтум Āсюм Такви ты Ам урумт лāвыс. Ос нāн Тав турсуе нэ̄мхуньт атпыл хӯлыглалыслын, Тав вӣльтэ нэ̄мхуньт атпыл вāсинтаслы̄н;38 Тав лāтӈе нāн сы̄маныт таимāгыс ат суйты, Тав нāн палтылын кēтум Хōтпан ат агтнэ̄н мāгыс.39 Ялпыӈ нэ̄пакыт ханисьтыяны̄н та нэ̄пакыт хосыт нāн номсэгы̄н акваг э̄лаль ōлнэ ōлупса хōнтуӈкве, тот алам Ам урумт хансым ōлы.40 Э̄лаль ōлнэ ōлупса ōсьнэ мāгыс, ос нāн Āнум сымын виӈкв ат таӈхилы̄н.41 Āнум янытлан лāтыӈ э̄лмхōласныл ат ӯрегум,42 нāнан тай вāганум: нāн сыманы̄н кӣвырт Тōрумн агтнэ нак ат ōньсегы̄н.43 Ам Āсюм лāтыӈ сирыл ты̄г ёхтысум, нāн ос Āнум ляпан ат вы̄глы̄н; ос хотты мōтан ке такви наме мāгыс ты̄г ёхты, нāн таве ля̄пан тах та вы̄глы̄н.44 Хумус нāн агтуӈкве патэгы̄н, хунь нāнти хāлынт нāнтинаны̄н янытлыяны̄н, ос мāн акв Тōрмув янытлан вāрмаль ат кинсэгы̄н?45 Нāн ул номсэ̄н, Ам нāнан Āсюм э̄лы-пāлт лю̄камтаӈкве ат патыянум: Моисей тав нāнан лю̄камтан хум, нāн тав лāтӈēн агтэгы̄н.46 Нāн Моисейн сōль ке агтыгласы̄н, тōнт Āнумн ос агтнувы̄н, тав алам Ам урумтыл ты хансыглāлыс.47 Тав хансум нэ̄пакēн ат ке агтэгы̄н, тōнт ос хумус Ам лāтӈанумн агтэгы̄н?”
*а 9 5:9 сабат-хōтал – еврей ӯсьлахтын хōтал
*б 14 5:14 ялпыӈ кол – ты русь лāтӈыл храм
*в 28 5:28 сопам – ты русь лāтӈыл могила
Глава 5
