Choose Language
Old Testament Books
New Testament Books
view with a second Bible
1 Фарисейт хӯлсаныл, хумус Тав Иоанныл сāвнув мир ханисьты ос витыл пēрнал пины, –2 Ӣсус такви витыл пēрнал мир ат пиныгласанэ, Тав ханисьтахтын хумиянэ мир витыл пēрнал пинсаныл, –3 Та урыл хӯлмēт Тав Юдея мāныл ōс Галилеян минас.4 Тавēн Самāрия*а нампа мā тāра минуӈкве э̄рыс.5 Тав ань Самарият ōлнэ Сихар нампа ӯсын ёхтыс, Яков нампа хум Ӯщуп пы̄гēн мим мā лōмтэ та пōхат ōлыс.6 Тот Яков нампа хум вит āмартан вōӈхатэ ōлыс. Ӣсус ё̄миматэ вāгтал патыс, вит āмартан вōӈха пōхан ё̄л-ӯнтыс. Хōтахкем сё̄с*б ōлыс.7 Самарияныл вит āмартан мāгыс э̄ква ёхтыс. Ӣсус тавēн лāви: ”Āнумн вит мāен”.8 Та халт Тав ханисьтахтын хумиянэ ӯсын тэ̄нут ёвтуӈкве минасыт.9 Самария э̄ква Тав нупылэ лāви: ”Наӈ еврей манрыг āнумныл, Самāрияныл ōлнэ э̄кваныл айнэ вит вōвēгын?” Юдея ос Самария мāхум*в аквъёт ат вāйхатэ̄гыт.10 Ӣсус ювле-лāвыс: ”Наӈ Тōрум мӯйлупсатэ мāкыг вāслын ке, вāслын ке, Хотъют наӈынныл вит вōви, тōнт Тавēныл наӈти вōвнувын, ос Тав наӈын лылыӈ витыл минувтэ”.11 Э̄ква Тав нупылэ лāви: ”Кӯсяй! Наӈ вит āмартан ут атпыл ōньсēгын, ань вит āмартан вōӈха тай сака мил; хотыл наӈ лылыӈ вит вы̄гын?12 Наӈ ман мāн Иаков нампа яныг āсювныл усьпылнэ̄г яныг, тав мāнавн вит āмартан ты вōӈха мистэ, ос такви ты̄гыл аиглāлыс, ня̄враманэ ос ӯйхуланэ ōс тыгыл аиглāлсыт?”13 Ӣсус тавēн ювле-лāвыс: ”Ты̄гыл вит āйнэ кāсыӈ хōтпа ос тах вит āюӈкве тахмаи,14 Ам минэ витум айнэ хōтпа ōлнэтэ нот палыт вит ярмилын туре ат ёхтаве; ос Ам минэ витум тав кӣврēт вит сōймыг ēмты, акваг э̄лаль ōлнэ ōлупсан ōвтнэ мāгыс”.15 Э̄ква Тавēн лāви: ”Кӯсяй! Тамле вит āнумн мāен, ам воссы̄г вит я̄рмилын турум ул вос паты, ос тыг воссы̄г вит āмартаӈкве ул вос ёхталэ̄гум”.16 Ӣсус тавēн лāви: ”Мӣнэн, хумин тыг вовēлн, наӈти ōс ёхтэн”.17 Э̄ква ювле-лāвыс: ”Ам хум ат ōньсēгум”. Ӣсус тавēн лāви: ”Наӈ хум ат ōньснэн урыл сōль мāк та лāвсын,18 наӈ алам ат хум вāрыгласын, ос ань хотъют ёт ōлэ̄гын, таи ōс хумин āти; ты урыл мāк та лāвсын”.19 Э̄ква Тавēн лāви: ”Кӯсяй! Кāсалылум, Наӈ сōль Тōрум лāтыӈ тотнэ хумыг та ōлэ̄гын.20 Мāн āсянув ты урын пуӈк пиныглāлсыт, нāн ос лāвегы̄н, пуӈк пиннэ ур э̄рттэм Иерусалимт ōлы”.21 Ӣсус тавēн лāви: ”Āнумн агтэн, тамле пора ёхты тах, нāн ты урыт ат патэгы̄н, Иерусалимт ат патэгы̄н Āсюм пуӈк пинуӈкве.22 Нāн ат вāглы̄н хōӈхан пуӈк пинэгы̄н, мāн вāглув, хōӈхан пуӈк пинэ̄в, алам Юдеяныл вēстыл*г ёхты тах.23 Ос тамле пора ёхты тах ос алам та ёхтыс. Тōнт Āсюм лылыл ос мāк агтнэ сирыл пуӈк пинуӈкве пуссын патэ̄гыт, таве янытлан тамле мир Āсюм такви мāгсылэ ты кӣнсы.24 Тōрум тай Лылы, Тавēн пōиксян мирн лылыл ос мāк агтнэ сирыл пойксяӈкве э̄ри”.25 Э̄ква Тав нупылэ лāви: ”Ам вāглум, Мессия ёхты, тав Кристосыг ōлы. Хунь Тав ёхты, мāнавн пуссын хӯлтытэ”.26 Ӣсус тавēн лāвыс: ”Ты̄и Ам ты, ань наӈ ётын потыртан Хōтпа”.27 Ты торыг Тав ханисьтахтын хумиянэ ёхтысыт, ос ōсятахтыглалсыт, хумус Тав нэ̄ ёт потырты; ос нэ̄мхотъютн ат пыл китыглавес: ”Мāныр тавēныл Наӈын э̄ри?” Ман ос: ”Мāныр урыл тав ётэ потрамēгын?”28 Тōнт э̄ква вит пӯтэ ёл-ӯнттыстэ, ос ӯсын минас, мирын лāви:29 ”Минэ̄н, Э̄лумхōлас сунсэлы̄н; Тав āнумн пуссын мāк лāвсанэ, мāныр ам вāры̄глāлсум: э̄рыӈ Тав сōль Кристосыг ōлы?”30 Тāн ӯс коны-пāлын ос Тав палтэ минасыт.31 Та кӯмт ханисьтахтын хумиянэ̄н лāввес: ”Равви! Тэ̄пъялэн”.32 Ос Тав тāнанылн лāвыс: ”Нāн ат вāглы̄н, манхурип тāйм Ам ōньсēгум”.33 Та урыл ханисьтахтын хумиянэ тāнти халанылт потрамасыт: ”Хотъютын аман тэ̄нутл тотвес?”34 Ӣсус тāнанылн лāви: ”Āнум Кēтум Āсюм лāтӈе-номтэ э̄лаль-тотуӈкве ос Тав вāрмале тōвлуптаӈкве – Āнумн тэ̄нутыг ōлы.35 Нāн лāвыглалсы̄н: ‘Нӣла э̄тпос парнэ юи-пāлыт тах ня̄ньпум пумкан сāгрын пора ты ёхты?’ Ос Ам лāвēгум: саманы̄н пāлыг-пунсэ̄н ос ня̄ньпум пумканыт нупыл āӈкватэ̄н, хумус тāн войканы̄г ēмтсыт ос колас саманыл тэ̄нэ мāгыс понсумыт.36 Колас сам атнэ хōтпа*д мӯйлупса вы̄г ос акваг э̄лаль-ōлнэ мāгыс ня̄ньпум аты, ня̄ньпум тэ̄лтнэ хум ос ня̄ньпум атнэ хум аквъёт ся̄гтуӈкве патэ̄г,37 ты урыл мāк ты лāваве: аква тэ̄лты ос мōтанэ аты.38 Ам нāнан та ут якытлаӈкве кēтсанум, мāныр ёт нāн ат рӯпитāлсын: мōтаныт рӯпитасыт, нāн тāн рӯпитанылн ся̄лтсы̄н”.39 Самария сāв мāхум та ӯсныл ōлнэ э̄ква лāвум лāтыӈ хосыт Тавēн агтсыт. Э̄ква лāвыс: ”Ам мāныр вāрыглāлсум Тав пуссын потыртāсанэ”.40 Таимāгыс ань Самария мāхум Тав палтэ ёхтуманылт, Таве тāн ётаныл ōлуӈкве вōвсаныл; ос Тав тāн ётаныл кит хōтал ōлыс.41 Ōс сāв мир Тав лāтӈēн агтуӈкве патсыт.42 Ос та э̄кван тāн лāвсыт: ”Ань тай наӈ лāтӈанын хосыт хунь агтэ̄в: мāн мāнки хӯлыслув ос вāглув, Тав сōль та мир ōлупса вēстын хум, Кристосыг ōлы”.
43 Кит хōтал юи-пāлт Тав тувыл Галилея нампа мāн та минас,44 Ӣсус такви лāвыглāлыс: ”Тōрум лāтыӈ тотнэ хōтпа такви мāтэ̄т ат янытлаве”.45 Галилея мāн ёхтумēт, Галилея мирн Тав ля̄пан вуйвес, тāн ань тāнки кāсалāлсаныл мāныр Тав Иерусалимыт ялпыӈ хōтал порат вāрыглас, – тāн тōнт ōс та ялпыӈ хōтал порат тот ōлсыт.46 Ань Ӣсус Галилея мāн Кана нампа ōс та ӯсын ёхтыс, тот Тав вит винаг вāрыглāлыстэ. Капернаум нампа ӯсыт хōн вāӈын хум ōлыс, тав пы̄ге āгмыӈ ōлыс.47 Та хум Ӣсус Юдея мāныл Галилеян ёхтуме хӯлыстэ, Тав палтэ ёхтыс ос пы̄ге пусмалтан мāгыс Таве вōвыстэ, пы̄ге лылытэ оигпи.48 Ӣсус тавēн лāвыс: ”Нāн ат агтэгы̄н, ōлыглаттāл вāрмалит ос пōсыт ат ке кāсалэгы̄н”.49 Хōн вāӈын хум Тавēн лāви: ”Кӯсяй! Пы̄гум хотталь сялтнэ э̄лы-пāлт ёхтэн”.50 Ӣсус тавēн лāвыс: ”Юв-мӣнэн, наӈ пы̄гын пустāгыл ōлы”. Тав Ӣсус лāвум лāтӈын агтыс ос юв та минас.51 Лё̄ӈх хосыт мӣныматэ мēтхумиянэ ёт хонтхатас, ос тāн лāвсыт: ”Наӈ пы̄гын пусмыс”.52 Тав тāнаныл кӣтыгласанэ: ”Хоты сё̄сыт пыгēн кӯпнитнувēг ēмтыс?” Тавēн лāвсыт: ”Молхōтал сāтыт сё̄сыт алпихар рēге патыс”.53 Тувыл āсь номылматастэ, та сё̄с порат Ӣсус тавēн ты лāвыс: ”Наӈ пы̄гын пусмыс”, ос такви колтāглэ ос та лāтӈытн агтсыт.54 Ӣсус Юдея мāныл Галилеян ёхтуме юи-пāлыт ты китыт вāрум ōлыглаттāлэ ōлыс.
*а 4 4:4 Самāрия – Палестина мā котильт Самарият самария нампа мāхум ōлсыт. Самария ос Юдея мāхум халт акваг вори тотнэ вāрмаль ōлыс.
*б 6 4:6 хōтахкем сё̄с – хōталъя̄т пора: китхуйпловкем сё̄с
*в 9 4:9 Юдея мāхум – ты русь лāтӈыл евреи
*г 22 4:22 вēстыл – ты русь лāтӈыл спасение
*д 36 4:36 Колас сам атнэ хōтпа – ты русь лāтӈыл жнец
Глава 4
