Choose Language
Old Testament Books
New Testament Books
view with a second Bible
1 Хӯрмит хōтал Кāна Галилейский нампа мāт маньнэ пӯри вāрвес, Ӣсус Ся̄не ос тот ōлыс.2 Ӣсус ос Тав ханисьтахтын хумиянэ ос та пӯрин вōвим ōлсыт.3 Хунь винаныл пуссын айсаныл, Ӣсус Ся̄не Тавēн лāвыс: ”Тāн вина ат ōньсēгыт”.4 Ӣсус Тавēн лāви: ”Нэ̄ хōтпа, манрыг тох Āнумн лāвēгын? Ам сё̄с накум иӈыт ёхты”.5 Ся̄нē лусытан мāхумн лāвыс: ”Тав мāныр лāви, пуссын тох вāрелы̄н”.6 Тот āхвтасныл ёргим, вит сōсхатнэ мāгыс хōт кӣвыр ōлыс. Тāн еврейт писяныл сирыл витыл сыстамтахтын мāгыс ōлсыт, тув кит ман хӯрум норма сāвит вит лāпыс.7 Ӣсус тāнанылн лāвыс: ”Ты кӣврыт витыл тāглэкв пинэ̄н”.8 Тувыл лāвыс: ”Ос ань тувыл амартэ̄н, ос пӯри вāрнэ хум палт таи тотэлы̄н”. Та тотсаныл.9 Пӯри вāрнэ хум ань винаг ēмтапам вит аяламēт ат вāстэ, хотыл та вина ōлыс, та урыл вит āмартам луситан хумит тӯп вāсаныл. Тōнт пӯри кӯсяй нэ̄ тотнэ хум ляпан вōвыстэ10 ос тавēн лāви: ”Кāсыӈ хōтпа сāртын алам ёмас винатэ мы̄г, ос ань мāхум хунь куччавет, топалнув винатэ ётыл усь ӯнттытэ; наӈ ос ёмас винан ань тыг мус иӈ та ōньсюмлын”.11 Тох та Ӣсус Кāна Галилейский нампа ӯсыт ōлыглаттāл вāрмалянэ вāруӈкве ōвылтасанэ ос Таве янытлан лāтыӈ тувыл та ōвылтахтас; ос ханисьтахтын хумиянэ Тавēн агтуӈкве патсыт.12 Та юи-пāлт Тав Такви, Ся̄не, ягпыганэ ос ханисьтахтын хумиянэ Капернаум нампа ӯсын ёхтысыт. Тот матахмат хōтал ōлсыт.
13 Еврей мāхум Пасха нампа ялпыӈ хōталаныл ляпамас. Ӣсус Иерусалим ӯсын ёхтыс,14 кāсаластэ, насати ялпыӈ колт хāрмисыт, пāлят ос голубь нампа товлыӈ ӯйит тыналавēсыт. Тот олн пēнтнэ хумит ӯнлысыт.15 Тōнт Ӣсус квāлгыл хōмся вāрыс, ялпыӈ колныл мир пуссын пāляӈ, хāрмисыӈ тāгыл хōмсял кон-ня̄влысанэ; олн пēнтнэ хумит олнаныл мāнын лāкква-пāхвтысанэ, пасаныт хоми ё̄хтысанэ.16 Голубь ӯй тыналан мāхумн лāвыс: ”Тыит тыгыл хот-вуēн, ос Ам Асюм колэ тыналахтын колыг ул вāрелы̄н”.17 Ты торыг Тав ханисьтахтын хумиянэ Тōрум нэ̄пакт*а хансым ут урыл нōмылматсаныл: ”Наӈ колын мāгыс соваяхтынэм паттат Āнумн тāрвит”.18 Ты мāгыс евреи Таве китыгласаныл: ”Наӈ манырсыр ё̄р ōньсēгын, тамле ōлыглаттāл нак*б вāрнэ мāгыс?”19 Ӣсус ювле-лāвыс: ”Ты ялпыӈ кол хот-сакватэ̄лы̄н, ос Ам хӯрум хōтал сыс таве ōс ӯнттылум”.20 Еврейт Тавēн лāвсыт: ”Ты ялпыӈ кол атпан нупыл хōт тāл сыс ӯнттувес, ос Наӈ хӯрум хōтал сыс таве ӯнтты̄лын?”21 Тав ялпыӈ кол урыл хунь лāвыглас. Тав Такви алпитэ урыл лāвыглāлыс.22 Ё̄тыл Тав сорумēныл нōх-ялтме юи-пāлыт, ханисьтахтын хумиянэ та нак номылматсаныл, тōнт Тав ты урыл потыртāлыс, тāн Тōрум нэ̄пакн ос Ӣсус лāтыӈн агтсыт.23 Тав Иерусалим ӯсыт Пасха ялпыӈ хōталт ōлмэ порат, Тав вāрум ōлыглаттāл наканэ кāсаламанылт, сав мир Тав намēн агтуӈкве патсыт.24 Ос Ӣсус такви тāнанылн ат агтыс, Тав тāнаныл вāсанэ,25 тāнанылныл я̄рмил ат ōньсяс. Хōтпа манхурип номт киврэ̄т ōньси, Тав пуссын вāстэ.
*а 17 2:17 Тōрум нэ̄пак – ты русь лāтӈыл Писание
*б 18 2:18 ōлыглаттāл нак – ты русь лāтӈыл чудо
Глава 2
