Choose Language
Old Testament Books
New Testament Books
view with a second Bible
1 Ōвлэ̄т Лāтыӈ ōлыс, ос Лāтыӈ Тōрум палт ōлыс, ос Лāтыӈ Тōрмы̄г ōлыс,2 Ōвлэ̄т Тав Тōрум палт ōлыс.3 Пуссын Тавēныл ōлуӈкве патыс, Тāв тāлэ нэ̄матыр ōлуӈкве ат ōвылтахтас, мāныр ōлуӈкве патыс.4 Тав палттылэ ōлупса ōлыс, ос ōлупса э̄лумхōласытн посы̄г ōлыс.5 Пос турмант посты, ос пос турманын лап ат тӯлаве.6 Э̄лумхōлас ōлыс, Тōрумыл кēтым хум; тав наме Иоан.7 Тав ля̄ххал тотуӈкве, пос урыл ля̄ххал тотуӈкве, ос Тав тāратэ мир пуссын агтнэ̄ныл мāгыс ты ёхтыс.8 Тав посыг ат кос ōлыс, пос урыл ля̄ххал тотнэ мāгыс кēтвес.9 Мāк Пос ōлыс, Тав самынпатнэ кāсыӈ хōтпа посыӈыг паттытэ.10 Тав мир халт ōлыс, ос мир Тав тāратэ ōлуӈкве патыс, топ мирын Тав ат торгамтавес.11 Такви мāхманэ палт кос ёхтыс, такви мāхманэ̄н Тав ос ат хӯлвес, ляпан ат вуйвес.12 Ос Таве хӯлум мāхум, Тāвēн агтнэ*а мāхум, Тав ё̄рыл, Тōрум ня̄врамы̄г ōлнэ ё̄рыл мисанэ.13 Тāн э̄лумхōлас тахнэ хосыт самын ат патсыт, хум тахнэ хосыт самын ат патсыт, тāн Тōрум лāвум хосыт самынпатсыт.14 Лāтыӈ э̄лумхōласыг ēмтыс, тав сымыӈ нё̄тмилэ̄тыл*б ос вēськат вāрмалēтыл*в тагиньтым мāн ётув ōлыс. Тав посэ Тōрум Āсēн ōньсим пы̄ге сымыӈ посэ васинтаслув.15 Иоан Тав урēтыл вēськат ля̄ххал тоты ос суиӈ турыл потырты: ”Тыи ōлы Таи, Хотъют урыл ам ты лāвыгласум: ам юи-пāлумт йим хōтпа ам э̄лы-пāлумт патыс ты та Хōтпа. Тав ам э̄лы-пāлумт ōлне мāгыс ам юи-пāлумт йис кос, топ ам э̄лы-пāлумт патыс”.16 Тав сёлыӈ сымыӈыг ōлнэтэ мāгыс мāнавн Тав сāв сымыӈ нё̄тмилтас.17 Сāккон Мойсей нампа хум тāра майвес, яныг сымыӈ нё̄тмил ос вēськат вāрмаль Ӣсус Христос тāра нэ̄глысыг, ēмтсы̄г.18 Тōрум Āсь нэ̄мхōтпан нэ̄мхӯньт ат вāсинтавес; Тōрум Пы̄г*г, Тав топ Āсе пōхат ӯнлын акв хум, Тав Тōрум урыл лāтыӈ хӯлтыс.
19 Ты Иоан тав вāсинтам утэ: таве китыглан мāгыс: ”Хотъют наӈ?” Иерусалимныл*д Юдеяныл кетым пӯп ос левит ōйкатын ювле-лāвыглас.20 Тав тасир лāвыс, ос латӈе ювле ат вистэ, тав ляльт лāвыс: ”Ам Кристос*е āти”.
21 Ос китыглавес: ”Наӈ э̄рыӈ Илия?” Тав лāвыс: ”Āти”. ”Тōрум лāтыӈ тотнэ хум*ж?” Тав лāвыглас: ”Āти”.22 Тāн китыглахтасыт: ”Ос наӈ хōӈха? Мāнавн кēтум мāхманувн э̄ри ювле-лāвуӈкве тах: наӈ наӈти урынт мāныр лāвēгын?”23 Тав лāвыс: ”Ам мир ōлтāл мāт ōлнэ турсуй: Исая нампа Тōрум лāтыӈ тотнэ хум лāвум сирыл, ‘Тōрум-Кӯсяй мāгыс нāн сохыт лёӈх сё̄питэ̄лын’”.
24 Ты кēтым мāхум фарисейт*з ōлсыт.25 Тāн таве китыгласаныл: ”Ос наӈ Кристосыг ке ат ōлэ̄гын, Илияг ат ōлэ̄гын, Тōрум лāтыӈ тотнэ хумыг ат ōлэ̄гын, манры̄г витыл пēрнал пинэ̄гын*и?”26 Иоан тāнанылн ювле-лāвыс: ”Ам витыл пернал пинэ̄гум, ос нāн халынт акв Хōтпа лю̄ли, нāн Таве ат вāглы̄н.27 Тав ты ам юи-пāлумт йинэ Хōтпа, ос Тав ам э̄лы-пāлумт ēмтыс. Āнумн ат тайи тав лāглмаснут сāнсквāлгаге хот-пēсталаӈкве”.28 Тыи ань Иоан витыл пēрнал пинум мāт Вифаният Иордан я̄ вāтат ōлыс.
29 Мōтыт хōтал Иоан тав ля̄льтэ ё̄мнэ Ӣсус кāсаластэ ос лāвыс:
”Тытты Тōрум Пāля, Тав мир карекыт таквинāтэ̄н выганэ.30 Тыи Тав, Тав ōвылтытэ ам лāвыглāлсум: ‘Ам юи-пāлумт āнумныл янгыг ēмтум хум юв, Тав āнумныл сāртын ōлыс’.31 Ам Таве ат вāслум, Тав Израиль мāт мирын вāнэ̄тэ мāгыс ам витыл пēрнал пинуӈкве ёхтысум”.
32 Ань Иоан ӯлтыластэ*к ос лāвыс: ”Ам голубь*л хольт нумыл тāратым Лылы вāсум, Лылы Тав тармылэ ōлыс.33 Ам Таве ат вāслум; ос витыл пēрна пиннэ мāгыс āнум Кēтум утум āнумн лāвыс: ‘Хотъют палт нумыл тāратым Лы̄лы кāсалылын, Таи тах Ялпыӈ Лылыл пēрнал пиннэ хумыг ōлы’.34 Ань ам вāсинтаслум ос лāвēгум: Тав мāк Тōрум Пы̄гы̄г ōлы”.
35 Мōтыт хōтал Иоан ос тав ханисьтахтын кит хумияге аквъёт люляхōлсыт.36 Ань йинэ Ӣсус кāсаластэ, лāвыс: ”Тав Тōрум Пāлятэ”.
37 Ханисьтахтын хумияге тавēныл тамле лāтыӈ хӯлмēнт, сас Ӣсус юи-пāлт ё̄ммыгтасыг.38 Ӣсус ювле-āӈкватамēт, тэ̄натэ̄н кāсаласаге, лāвыс: ”Нэ̄нанн мāныр э̄ри?” Тэ̄н Тавēн ювле-лāвсы̄г: ”Равви, – таи толмасьлаве: ‘ханисьтан хум’, – хот олэ̄гын?”39 Тав лāви: ”Йиēн ос тах кāсалылы̄н”. Тэ̄н минасы̄г, ос кāсаластэ̄н, хōт Тав ōлы; ос та хōтал палыт Тав палтэ ōлсы̄г. Ловманкем сё̄с*м ōлыс.40 Ты кит хумыгныл акватэ, Иоанныл Ӣсус урыл потыр хулыглам, ос Тав юи-пāлэ̄т минам Андрей нампа хумы̄г ōлыс, тав Симон Пēтыр ягпыгы̄г ōлыс.41 Тав сāртын такви Симон ягпыге хōнтыстэ ос тавēн лāвыс: ”Мēн Мессия хōнтысламēн”, – таи Кристосы̄г толмасьлаве.42 Тав ягпыге Кристос палт тотыстэ. Ӣсус тав нупылэ āӈкватас ос лāвыс: ”Наӈ Ион-ōйка пы̄г – Симон; наӈ намын ēмты Кифа, толмасьлаве: кēрас (Пēтыр)”.
43 Мōтыт хōтал Ӣсус Галилея мāн минуӈкве тахмаяс, Тав Филипп нампа хум хōнтыстэ ос лāвыс: ”Ам юи-пāлумт йӣен”.44 Филипп Вифсаида нампа ӯсныл ōлыс, та ӯсныл ань Андрей ос Пēтыр ōлсы̄г.45 Филипп Нафанаил нампа хум ля̄льт хōнтыстэ ос тавēн лāвыс: ”Мāн Таи хōнтаслув, тав урēтыл Моисей сāкконыт ос Тōрум лāтыӈ тотнэ хумит хансыгласыт. Тав наме Ӣсус, Назарет ӯсныл ōлнэ Ӯщуп пы̄ге”.46 Ос Нафанаил ювле-лāвыс: ”Назарет ӯсыт матыр ёмас нак вēрми ōлуӈкве?” Филипп тавēн лāвыс: ”Наӈти минэн ос сунсэ̄лын”.47 Ӣсус тав ля̄льтэ ё̄мнэ Нафанаил кāсаламэ̄т, лāвыс: ”Тав Израиль мā сяр мāк хумииг ōлы, тав урк ат ōньси”.48 Нафанаил Тав нупылэ лāвыс: ”Наӈ āнум хотыл вāглын?” Ӣсус тавēн ювле-лāвыс: ”Сāртын, наӈ Филиппын хунь иӈыт вōвыглавēсын, Ам наӈын смоковница*н нампа йӣв ёлы-пāлт вāсинтаслум”.49 Нафанаил Тавēн ювле-лāвыс: ”Равви! Наӈ Тōрум Пы̄г, Наӈ Израиль мир хоныг ōлэ̄гын”.50 Ӣсус тавēн ювле-лāвыс: ”Наӈ агтэгын Ам лāвмум мāгыс: ‘Ам наӈын смоковница йив ёлы-пāлт вāслум’; ань тах тыгылнэ̄г сāвнув кāсалэ̄гын”.51 Ос тавēн лāви: ”Мāк, сяр мāк нāнанн лāвēгум: тыпāсыл тах пāлыг-пӯнсым нуми тōрум*о ос Тōрум ангеланэ Э̄лумхōлас Пы̄г*п палт нōӈхаль ос ёлаль яласанэ̄ныл кāсалаӈкве патыяны̄н”.
*а 12 1:12 агтуӈкве – ты русь лāтӈыл верить, поверить
*б 14 1:14 сымыӈ нётмил – ты русь лāтӈыл благодать
*в 14 1:14 вēськат вāрмаль – ты русь лāтӈыл истина
*г 18 1:18 Тōрум Пы̄г – Ӣсус
*д 19 1:19 Иерусалим нампа ӯс – яныг ӯс Палестина нампа мāт
*е 20 1:20 Кристос – еврей лāтӈыл ты Мессиас. Мессиас – ты вōйл сартнэ хōтпа. Пēс порат Израиль мāт хунь хотъют та хоны̄г виве, ты э̄ли-пāлт тав вōйл сартвес. Ӣсус Тōрумын вōйл сартвес, таимāгыс Тав Мессиас – Кристос. Ань Кристос – ты Мессиас, Израиль мāхумн урвес.
*ж 21 1:21 Тōрум лāтыӈ тотнэ хум – ты русь лāтӈыл пророк
*з 24 1:24 фарисей – Моисей сāккон сирыл ōлнэ ос сāккон э̄лаль тотнэ хум
*и 25 1:25 витыл пēрнал пинуӈкве – ты русь лāтӈыл крестить
*к 32 1:32 ӯлтылāлуӈкве – ты русь лāтӈыл свидетельствовать
*л 32 1:32 голубь – товлыӈ ӯй
*м 39 1:39 Ловманкем сё̄с – Хōтал ос э̄т киттыг уртым ōлсыг: китхуйплов сё̄с – хōталыг, китхуйплов сё̄с – э̄тыг ōлсыг. Ловит сё̄с – таи хурум сё̄сныл нила сё̄с мус ōлыс.
*н 48 1:48 смоковница – ты инжир-йӣв, тав яныг атыӈ пил ōньси
*о 51 1:51 нуми тōрум – ты русь лāтӈыл небо
*п 51 1:51 Э̄лумхōлас Пы̄г – Иисус
Глава 1
