Choose Language
Old Testament Books
New Testament Books
view with a second Bible
1 Сāт ōвыл хōталыт āлпыл сāртын сё̄питам атыӈ вояныл тотым нэ̄т сопам палт ёхтысыт.2 Тāн кāсаласаныл: курсип āви āхвтасэ похан-лаквтыма.3 Кӣвырн сялтманылт Ӣсус, Кӯсяй Алпитэ ат хōнтсаныл.4 Сыманыл миным лю̄лиманыл илттыг тāн э̄лы-пāланылт нас султгын маснутыӈ кит хум хулыгласы̄г.5 Сяма рохтум нэ̄т пуӈканыл ёл-хӯтылтасаныл, хумит тāн нупыланыл лāвсыт: ”Сорумн патум утыт халт лылыӈ хōтпа манры̄г кинсылы̄н?6 Тав тыт āтим. Тав нōх-ялтыс! Номилын-а, Тав Галилеят ōлме порат нāнан лāвыглāлыс:7 ‘Тох ēмты тах: Э̄лумхōлас Пы̄г карекыӈ утыт катн миве, пēрнан рāтаве, хӯрмит хōталэ̄т нōх-ялты’”.8 Ань Тав лāтӈанэ та номылматасаныл.
9 Сопамныл ёхтуманылт тāн аквхуйплов ханисьтахтын хумитн ос мōт мāхумн тыи пуссын потыртасаныл.10 Тыи Мария Магдалина, Иоанна ос Яков ся̄нэ Мария тāн ōлсыт. Тāн мōт э̄кват ёт ты нак ōвылтыт апостолытн потырталыгласыт.11 Тāн ты нэ̄тн ат агтыгласыт, тāн потыртам ля̄ххаланыл нэ̄матрыг ат осьсаныл.12 Ань Пēтыр курсип палт хайтыс, ёла-хӯтмēт, тав тōр туп кāсаластэ. Ты ēмталам накытн хот-осятахтым, тав сысы та минас.
13 Аквта хōтал Ӣсус кит ханисьтам хумияге Эммаус нампа пāвылн минасы̄г. Иерусалимныл та пāвыл мус ловмахкем километра ōлыс.14 Тэ̄н халэ̄нт ань ты пуссын ōлыглам накыт ōвылтыт потрамасы̄г.15 Ты ōвылтыт потыртамēнт ос номсыгламēнт тэ̄н пāлттылэ̄н Ӣсус такви ёхтыс ос тэ̄н ётэ̄н ё̄мантас.16 Саманэ̄н аквтоп сампылтāлыг ōлым тэ̄н Таве ат ханьсистэ̄н.
17 Ӣсус тэ̄натэ̄н китыгласаге: ”Мāныр ōвылтыт нэ̄н потыртэ̄гын?” Тэ̄н тыстым ёл-лю̄льсы̄г.18 Клеопа нампа акватэ Ӣсусн лāвыс: ”Улпыл наӈ тӯп акв мōт мир хōтпа Иерусалимт, наӈ ман ат вāглын ты хультум хōталытт мāныр накыт ēмталасыт”.
19 Ӣсус тэ̄натэ̄н китыгласаге: ”Нэ̄н маныр ōвылтыт лāвēгын?” Тэ̄н ювле лāвсы̄г: ”Назаретныл ōлнэ Ӣсус ōвылтыт потыртымēн. Та Э̄лумхōлас Тōрум э̄лы-пāлт, мир э̄лы-пāлт ё̄р лāтӈыт ос вāрмалит ōсьсанэ. Тав Тōрум лāтыӈ тотнэ хумыг ōлыс.20 Топ ань мāн яныг пӯпанувн ос пуӈктотнэ хумиянув Таве сутытаӈкве ос алуӈкве мисаныл. Тав пēрна тармыл рāтвес.21 Мāн номсысув Тав Израиль нōх-паттытэ. Тувыл ань ты накыт ēмтсыт. Ос та пāсыл хурум хōтал хультыс,22 ты хōтал ань мāн тōва э̄кванувн хот-осьсятахтувēсӯв: тāн постыглан торыг, āлпыл курсип палт минасыт,23 ос Тав алпитэ тот ат хōнтсаныл. Тāн юв-ёхтысыт ос мāнавн лāвсыт, э̄рттам ань Ангелыт тот хулигласыт ос тāнанылн лāвсыт – Тав лылыӈ.24 Мāн халувныл тōванув курсип палт минасыт ос кāсаласаныл, пуссын нэ̄т лāвыглам сирыл ōлыс, топ ань Таве ат вāсиньтасаныл”.
25 ”Нэ̄н оссамыг”, – Ӣсус тэ̄натэ̄н лāвыс, – ”Тōрум лāтыӈ тотнэ хумит лāвыглалум пуссын лāтӈытн нэ̄нан мāныр тāрвит агтуӈкве!26 Хансым май ты ōлы, Кристосн ōвлэ̄т янгыг э̄рыс савалаӈкве, тувыл усь тōрум посн мины”.27 Моисей нэ̄пакныл э̄лаль Тōрум лāтыӈ тотнэ хумит пуссын Нэ̄паканыл хӯлтыглым тэ̄натэ̄н Тав ōвылтытэ мāныр тот хансым ōлы, пуссын хӯлтыгласанэ.
28 Тāн миннэ пāвланылн ляпамасыт, Тав рēт вāрыс, э̄рттам э̄лаль мины.29 Тэ̄н ань ё̄рыл Таве вōвыстэн: ”Мēн ётмēн хультэн, хōтал ты унты, э̄типāлāг ēмтыс”. Тав юв-сялтыс, тэ̄н ётэн хультыс.30 Тэ̄н ётэ̄н пасан вāтат ӯнлах ōлманылт, Тав ня̄нь вистэ ос Тōрумн пӯмасипа лāвыс, ня̄нь сāгылсастэ ос тэ̄натэ̄н мистэ.31 Тōнт ань тэ̄н саманэ̄н пӯсхатсы̄г ос Таве ханьсистэ̄н, топ ань Тав нāӈктāлыг та ēмтыс.32 Тэ̄н халэ̄нт лāвыгласы̄г: ”Мēн ман ат пӯмсялахтысмēн-а, Тав мēнамēн миннэ̄в порат Тōрум нэ̄пакыт хӯлтыгламе торыг?”
33 Молямтахтым тэ̄н квалапасы̄г ос аквтув Иерусалимн минасы̄г. Тот аквхуйплов ханисьтахтын хум мōт хōтпат ёт аквъёт ōлсыт.34 Тāн ёхтум уты̄гн лāвсыт: ”Кристос мāк нōх-ялтум! Тав Симонын нэ̄глыс”.35 Тōнт ань ты ханисьтахтын хумиӣг лё̄ӈхыт тэ̄н ётэ̄н ōлум урыл потыртасы̄г, Ӣсус нянь сāгылсамēт хасьмēн урыл потыртасы̄г.
36 Ань тох потыртыманылт Ӣсус тāн халанылт лю̄лис ос лāвыс: ”Нāнан урак”.37 Тāн тай яныг пилысьман ёхтувēсыт ос рохтым номсысыт тāн исхор кāсаласыт.38 Топ ань Тав тāнанылн лāвыс: ”Нāн манры̄г э̄ссамтэгы̄н? Нāн сыманынт манры̄г тамле ат агтнэ вāрьмалит нэ̄глэ̄гыт?39 Ам кāтагум, лāглагум нупыл āӈкватāлэ̄н: Ты Ам. Ам палтылум карсматыглахтэ̄н ос āӈкватāлэ̄н: Ам – Лылыӈ алпиӈ, исхор тай лув ат ōньси, нё̄выль ат ōньси”.40 Тох лāвме юи-пāлт Тав кāтаге-лāглаге тāнанылн сусылтасанэ.41 Ханисьтахтын хумиянэ сунсым ат агтсыт, тув мус та ся̄гтсыт ос осятахтысыт. Ӣсус тай лāвыс: ”Матырсыр тэ̄нут нāн тыт ōньсегы̄н-а?”42 Тāн Таве пайтым хӯл лōмтыл мисаныл.43 Ос Тав хӯл вистэ ос тāн ōлыманыл тэ̄стэ.44 Ос тāнанылн лāвыс: ”Нāн халынт ōлмум порат Ам нāнан ты лāвыглалсум: Моисей сāкконт, Тōрум лāтыӈ тотнэ хумит нэ̄паканылт ос Псалм нэ̄пакытт Ам ōвылтытум хансым кāсыӈ нак ēмты тах”.45 Тувыл Ӣсус ханисьтахтын хумиянэ̄н Тōрум нэ̄пакытт хансым накыт торгамтаӈкве нё̄тсанэ.46 ”Хансым ōлы”, – Тав лāвыс, – ”Кристос савалы тах, ос хурмит хōталэ̄т нōх-ялты тах.47-48 Нāн ты накыт вāсиньтам хумит. Мирн э̄ри хӯлтуӈкве: мā янытыл ōлнэ мир, ōвлэ̄т Иерусалимт, Тōрум ля̄льт вос ё̄ӈхēгыт, кареканыл тōнт тах тāратавет Кристос наме мāгыс.49 Ам нāнан Āсюм лāвхатам утыл кēтыянум, нумыл ё̄рыл ёхтынэ̄н мус нāн ты ӯсыт хультэ̄н”.
50 Ӣсус тāнаныл Иерусалимныл Вифания ус мус āла ты тотсанэ. Катаге нōх-тактым Тав тāн мāгсыланыл Тōрумныл э̄рупса вōвыс.51 Та порат тāнанылныл э̄лымаӈкве патыс ос тōрумн нōх та вуйвес.52 Тāн Тавēн пуӈк пиным ос яныг ся̄гтальпиӈ номтыл Иерусалимн ювле та минасыт.53 Тувыл ань Тōрум э̄сгым аквāг ялпыӈ колт та ōлсыт. Аминь.
Глава 24
