Choose Language
Old Testament Books
New Testament Books
view with a second Bible
1 Тōнт ань пуссын нōх-люлюмтасыт ос Ӣсус Пилат палт тотсаныл.2 Тот ань тāн Тав нупылэ нуралахтуӈкве патсыт, лāвсыт: ”Мāн вāслув, хумус ты хōтпа мāхум номтаныл сакатыянэ: тав хōнын пōт ойтуӈкве ат тāртыянэ ос таквинāтэ Кристосы̄г, Хōны̄г намаитэ”.3 Тōнт ань Пилат Таве китыгластэ: ”Наӈ-ā еврей Хōнаныл?”
Тав ювле-лāвыс: ”Наӈ тох лāвēгын”.4 Тōнт Пилат пӯпытн ос атхатам мāхумн лāвыс: ”Ам Ты Хōтпа нуралан мāгыс нэ̄матыр пись ат хōнтсум”.5 Топ ань мāхум тай тāкысь рōхсыт: ”Тав Такви ханисьтапанэ̄тыл мāхум кантмалтыя̄нэ, Юдея мā янытыл яласас. Галилеят ōвылтахтас ань ос тыг ты ёхтыс”.
6 Тыи хӯлмет, Пилат китыглахтас, Галилеяныл ты Хōтпа ōлы̄?7 Ӣсус Ирод кӯсяйлахтын мāныл ōлнэ̄тэ урыл Пилатн хӯлвес, Таве Ирод палт кēтыстэ. Та порат ань Ирод Иерусалимт ōлыс.
8 Ирод Ӣсус кāсаламēт сака ся̄гтыс. Тав хосат тāгыл Ӣсус хōнтыглаӈкве таӈхыстэ. Тав Ӣсус урыл сāв хӯлыглāлыс, ос Ӣсус вāрум матырсыр ōлыглаттāл нак кāсалаӈкве таӈхыстэ.9 Ирод сāвсыр утыт ōвылтыт Ӣсус китыгластэ, топ ань Тав нэ̄матыр ювле ат лāвыс.10 Ос тот ань сяр яныг пӯпыт, Сāккон ханисьтан хумит нуралахтын лāтӈыл рōӈхым лю̄льсыт.11 Ирод тай хōнтхумиянэ ёт Тавēтыл мувиньтасыт. Ос ань тыныӈ маснутыл мастым Таве аквтув Пилат палт ювле-кēтсаныл.12 Та хōтал э̄лы-пāлт халыӈы̄г ōлум Ирод ос Пилат ёмасмахтасы̄г.
13 Тōнт ань Пилат сяр яныг пӯпыт, пуӈктотнэ хумит ос мир акван-вōвсанэ14 ос тāнанылн лāвыс: ”Нāн ты хōтпа ам палтылум тотыслы̄н. Нāн таве мир хōн ля̄льт лю̄ль номтыл агтылтанэ̄тэ мāгыс нуралылы̄н. Ам ос нāн ōлыман тыи тāра-паттыслум ос таве нуралан мāгыс нэ̄матырсыр нак ат хōнтсум.15 Ирод ос нэ̄матыр нур ат хонтыс, таимāгыс таве ювле-кēтыстэ. Нāнти сунсэ̄н, Таве алнэ мāгыс тав нэ̄матыр нур ат вāрыс.16 Таимāгыс ам Таве хōмсял рāтуӈкв лāвилум ос тāратылум”.
18 Топ ань пуссын акв хольт рōӈхалтахтасыт: ”Ты хум алэ̄лын! Мāнавн Варāвва тāртэ̄лн!”19 Варāвва хōнт ӯст вāрыгламе, ос э̄лумхōлас алме мāгыс турман колн ӯнтыглāлвес.20 Ос ань Пилат тāнаныл йильпииг китыгласанэ. Тав Ӣсус тāратаӈкве таӈхыстэ.21 Топ ань мāхум э̄лаль рōхсыт: ”Таве пēрнан рāтэ̄лын! Пēрнан рāтэ̄лын!”22 Пилат хӯрмит сёс тāнаныл китыгласаныл: ”Мāныр лю̄ль ты хōтпа вāрыс? Таве алнэ нур ам нэ̄матыр ат хōнтсум. Таимāгыс хомсял рāтыматэ юи-пāлт ам таве тараты̄лум”.23 Топ ань тāн сӯпасаныл пāлыг-рагатым усьпыл тāкысь рōхсыт, Ӣсус пēрнан вос рāтаве. Тāн таяныт рохсуяныл ёлымтасыт.24 Ань Пилат тāн вōвнэ сиранылт та вāрыс.25 Тав хōнт вāрыгламе мāгыс ос э̄лумхōлас алме мāгыс турман колт ӯнлум Варāвва тāратастэ. Тāн вōвнэ̄ныл сирыл Ӣсус ос тāнанылн та мистэ.
26 Хōнтхумит Таве тотмыгтаманылт, тэ̄пканныл ӯсн йинэ Киринеяныл ōлнэ Симон нампа хум кāсаласаныл. Тāн Симон сысэ̄н пēрна хӯнтмысаныл ос Ӣсус юи-пāлт тотуӈкве лāвсаныл.27 Ӣсус юи-пāлт сака сāв мāхум минасыт, тāн халаныт соваӈ лю̄ньсил лю̄ньсим э̄кват ё̄мантасыт.28 Ювле-ё̄ӈхыгпамēт Ӣсус тāнанылн лāвыс: ”Иерусалим āгиянэ! Ам мāгсылум ул лю̄ньсетēн. Нāнтинāнын ос ня̄враманы̄н мāгыс лю̄ньсьтēн!29 Пора ёхты, тōнт мāхум тах лāвēгыт: ‘Ня̄врамтāл ос ōсьхаттал ōлнэ ос сяквыл ня̄врам нэ̄мхуньт ат тыттыглāлум нэ̄т сōтыӈы̄г ōлэ̄гыт!’30 Тōнт ань мāхум нё̄рытн лāвēгыт: ‘Мāн тармылув рāгматэ̄н!’ Урамытн лāвēгыт: ‘Мāнав лап-лэ̄пелы̄н’.31 Яныгман йӣвн мāхум тох ке вāрēгыт, тōсам йӣв ёте ос мāныр ēмты тах?”32 Ӣсус ёт алуӈкве лю̄ль вāрум кит хōтпāг тотвēсы̄г.33 Пуӈк лув нампа мāн ёхтуманылт Ӣсус тот пēрна тармыл рāтвес. Тав пōхатэ̄т лю̄ль вāрум уты̄г: акватэ ёмаспāлэ̄т, мōтанэ вōртыпāлэ̄т рāтвесы̄г.34 Ӣсус тай лāвыс: ”Āся̄, кареканыл тāратэ̄н, тāн ат вāганыл, мāныр вāрēгыт”. Тав маснутанэ уртнэ мāгыс тāн халанылт олнкер пāхвты̄сыт.
35 Мāхум лю̄ляхōлсыт ос суссыт. Тāн пуӈктотнэ хумияныл Тав нупылэ нēрхатсыт, лāвсыт: ”Тав мōт хōтпат вēстыглāлсанэ; Таквинāтэ вос весты̄тэ, сōль ке Тōрумн пēриям Кристосы̄г ōлы!”36 Хōнтхумит ос ляпан йисыт ос Ӣсусыл мувиньтасыт, Таве уксусыл сараласаныл.37 ”Наӈ еврей Хōныг ке ōлэ̄гын, Наӈтинāнын вēстэ̄лын!” – тāн лāвсыт.38 Ӣсус пуӈке нуми-пāлт хансым ōлыс: ”Еврей Хōн”.
39 Тав ётэ пēрнан рāтым лю̄ль утыгныл акватэ Тав нупылэ нēрхатас: ”Наӈ ати Кристос?” – тав лāвыглас, – ”Наӈтинāнын вēстэ̄лын, ос аквторыг мēнамēн вēстэ̄лын!”40 Ань мōтанэ таве ёл-пойилттастэ, лāвыс: ”Тōрумныл пилым ōлэ̄н! Наӈ ос пēрнан рāтвēсын!41 Мен наӈ ётын вēськаты̄г сутытавемēн лю̄ль сāв вāрыгласмēн. Ты э̄лумхōлас нэ̄матыр лю̄ль ат вāрыс”.42 Ōс лāвыс: ”Ӣсус, Наӈти йильпи нотн ёхтыглāлмēнт, āнум нōмылматэ̄лн”.43 Ӣсус ювле-лāвыс: ”Сōль наӈын лāвēгум: тыхōтал Ам ётум рāйт ōлуӈкв патэ̄гын”.
44 Хōталъят тем ōлме порат мā янытэ̄т турманлāлыс. Турманы̄г хӯрум сё̄с мус ōлыс.45 Хōтал лап-тӯлвес, ялпыӈ кол тōрсай китыг манумтавес.46 Ӣсус тāкысь рōӈхувлас: ”Āся̄, Наӈ кāтагы̄н Амти Лылым та мы̄глум”. Ос ань ты лāтӈанэ ёт лылытэ та ойгпас.
47 Ты нак кāсаламēт хōнт пуӈктотнэ хум Тōрум э̄сгим лāвыс: ”Сōль та, ты э̄лумхōлас вēськаты̄г ōлыс”.48 Атхатыглам утыт пуссын ты нак кāсаламаныл юи-пāлт, тыстым, мāгланыл рāтым, юв та ёхтсыт.49 Ӣсус вāм хōтпат, Галилеяныл Тав юи-пāлэ̄т йим нэ̄т, э̄лннув лю̄ляхōлсыт ос та суссыт.
50-51 Тот Ӯсюп нампа Юдея мā Аримапа ӯсныл ōлнэ хум ōлыс. Тав синедрион сымыӈ ос вēськат хōтпаг ōлыс, Тōрум йильпи нот ёхтынэ̄тэ ӯрим ōлыс. Синедрион хумыт Ӣсус алуӈкв сёпитахтаманыл порат, Ӯсюп тāн ётаныл номте ат патыс.52 Ты хōтпа Пилат палт минас ос Ӣсус алпитэ тавēн миӈкве вōвыстэ.53 Пēрнаныл ёл-виме юи-пāлт, тав Ӣсус Алпитэ тōр кӣвырн мāнигтастэ ос кēрасыт сāгрим курсипн сё̄питастэ. Та курсипн нэ̄мхотпа иӈ ат сё̄питалвес.54 Сāт атыт хōталэ ōлыс, сабат-хōтал ōвылтахтас.
55 Галилеяныл Ӣсус ёт ёхтум нэ̄т Ӯсюп юи-пāлт минасыт. Тāн Ӣсус алпитэ сопамн пиным хумус ōлыс вāсаныл.56 Юв-ёхтуманылт тāн атыӈ вōит, атыӈ сартнутыт сё̄питасыт. Тōрум сāкконыт хансым сирыл тāн сабат-хōталыт юн ӯсьлахтасыт.
Глава 23
