Choose Language
Old Testament Books
New Testament Books
view with a second Bible
1 Сумтāл ня̄нь тэ̄нэ ялпыӈ хōтал, мōт наме Яныг ялпыӈ хōтал*а ляпат ōлыс.2 Сяр яныг пӯпыт ос Сāккон ханисьтан хумит Ӣсус алнэ нак киссыт, тāн ань мирныл пилсыт таимāгыс.
3 Искариотыг намталым Иуда нампа хум, Ӣсус тав китхуйплов ханисьтан акв хумитэ кӣвырн сатана сялтыс.4 Иуда сяр яныг пӯпыт ос ялпыӈ кол ӯрнэ пуӈкхумит палт минас – Ӣсус тāн кāтанылн хумус миӈкве потыртахтуӈкве.5 Тāн хот-ся̄гтсыт ос Иуда олныл миӈкве лāвхатсыт.6 Иуда кāсасяс ос хōйхатнэ кӯм кинсуӈкве патыс, мāхум вāтāл Ӣсус тāн кāтанылн миӈкве.
7 Сумтāл ня̄нь тэ̄нэ хōтал ёхтыс. Та хōтал Яныг ялпыӈ хōтал мāгыс паля пы̄грись йирыг э̄рыс тотуӈкве.8 Ӣсус Пēтыр ос Иоан кēтсаге ос лāвыс: ”Минэ̄н ос мāн мāгсылув Яныг ялпыӈ хōтал тэ̄нэ пасан сё̄питэ̄н”.9 Тэ̄н Ӣсус китыгластэ̄н: ”Хōт мēн пасан сё̄питымēн – Наӈ лāвēн?”10 Ань Тав тэ̄натэ̄н лāвыс: ”Ӯсын ёхтынэ̄н порат вит сӯлипӯт āлумтан хōтпа нāн ля̄льт хōнтэ̄гы̄н. Тав юи-пāлэ̄т тав сялнэ̄тэ колын минэ̄н.11 Ос кол кӯсяйн лāвēн: ‘Ханисьтан хум наӈын китыглытэ: Ам ханисьтан хумиянум ёт Яныг ялпыӈ хōтал тэ̄нэ тэ̄п хоты колнакыт тэ̄ӈкве патэ̄гум?’12 Ань та хōтпа нāн мāгсылын сāртын сё̄питым нумын ōлнэ яныг колнак сусылты̄тэ. Тот иӈ сё̄питэ̄н Яныг ялпыӈ хōтал тэ̄нэ пасан”.13 Пēтыр ос Иоан минасыг, ӯсын ёхтумēнт пуссын тох āртмыс, хумыс Ӣсусн лаввēсы̄г. Тэ̄н Яныг ялпыӈ хōтал тэ̄нэ пасан сё̄питасы̄г.
14 Ёхтум сё̄сыт Ӣсус апостоланэ ёт пасан вāтан ӯнтсыт,15 Ӣсус тāнанылн лāвыс: ”Савалан вāрмалюм э̄лы-пāлт Яныг ялпыӈ хōтал тэ̄нэ ты тэ̄п Ам нāн ётын уртуӈкве такем кос таӈхыслум!16 Нāнан лāвēгум: Ты тэ̄п воссыг ат та тэ̄синтылум мāк Яныг ялпыӈ хōтал тэ̄п ēмтнэ мус Тōрум йильпи нотт!”17 Тōрумн пумасипа лāвим Тав āны вистэ ос лāвыс: ”Āны вуелы̄н, халы̄нт уртэ̄н.18 Нāнан лāвēгум: Тōрум йильпи нот ёхтынэ̄тэ мус ам ань виноградныл вāрим айнут ат та аиглэ̄гум”.
19 Тувыл ня̄нь вистэ, Тōрумн пӯмасипа лāвим, лōмтыг сакватастэ ос тāнананыл мисанэ, ос лāвыс: ”Ты нāн мāгсылы̄н минэ Ам алпим. Ам номылматыглāлнэм мāгыс ня̄нь таелы̄н”.20 Тэ̄маныл юи-пāлт Ӣсус ос āны вистэ ос лāвыс: ”Ты āны – нāн мāгсылын сōснэ кēлпум ос йильпи потыртахтын нак.21 Топ сунсэ̄н, нāн халынтныл акван тах Āнум тыналытэ тах. Тав кāтэ Ам кāтум ёт ань пāсан тармыл пиным ōлы.22 Э̄лумхōлас Пы̄г Тōрумн лāвим Такви накетыл мины. Топ ань Таве тыналан утын яныг саватпи!”23 Тōнт ань ханисьтахтын хумиянэ халанылт китыглахтуӈкве патсыт: ”Хотъютаныл тох вēрми вāруӈкве?”
24 Ханисьтахтын хумиянэ халанылт ворасьлаӈкве патсыт, хотъютаныл яныгнувēг ловиньтаве.
25 Топ ань Ӣсус тāнанылн лāвыс: ”Хōныт тāнти мираныл тармыл кӯсяйлахтэ̄гыт, кӯсяйлахтын утыт тāнтинананыл ‘ёмас вāрнэ утыг’ намаяӈкве лāвияныл.26 Нāн халынт тох ул вос ōлы: сяр яныг ōлнэ утын сяр мāниг вос ēмты. Пуӈктотнэ утын мēтхум хурипаг вос ēмты.27 Хотъют яныгнувēг ōлы? Пасан ватат ӯнлын ут, манос мēтхумы̄г ōлнут? Нāн номсегы̄н, пасан вāтат унлын ут – тав, топ ань āм нāн халынт мēтхум хурипаг ōлэ̄гум.
28 Ам савалан вāрмалюм порат нāн Ам ётум ōлсын.29 Āсюм Āнумн маим хōн ё̄р таимāгыс Ам нāнан мы̄глум:30 Ам йильпи нотумт нāн пасан вāтат тэ̄ӈкв ос аюӈкв вос вēрмылы̄н. Израильт китхуйплов рут мир тармыл кӯсяйлахтуӈкве ос хōн-пасантт ӯнлуӈкве нāн патэ̄гын”.
31 ”Симон, Симон, сатана нāнан āрталаӈкве вōвхатас: колас самыт мāн я̄нас ӯнттын хольт, нāн аквта сирыл вос я̄нас паттувēсын.32 Ам наӈ мāгсылын пōйиксегум, наӈ агтылын ул вос холас. Ам палтылум ёхтынэн юи-пāлт ягпыганын агтыланыл тāкмалтэ̄н”.
33 Пēтыр Тавēн лāвыс: ”Кӯсяй! Ам наӈ ётын турман колн, сормын минуӈкве тāсыг ōлэ̄гум”.34 Топ ань Тав лāвыс: ”Ам наӈын, Пēтыр, лāвēгум, тыхōтал сиськурек рōӈхувланэ̄тэ э̄лы-палы̄т наӈ тах хурум сёс Āнум вāнэн хот-воратэ̄гын”.35 Ӣсус тāнанылн лāвыс: ”Ам нāнан олнтāл, хōлы хурыгтāл, лāгыл маснутāл кетыгламумт, нāн матыр нуса тотыглалсы̄н-а?” Тāн лāвсыт: ”Āти, ат тотыглāлсув”.36 ”Ань тай”, – Тав тāнанылн лāвыс, – ”хотъют олн ōньси ос хōлы хӯрыг ōньси, ёт вос выганэ. Хотъютын олн ат ōньси, маснутанэ вос тыналы ос сырай вос ёвты.37 Ань нāнан лāвēгум: Ам ōвылтытум Тōрум нэ̄пакт хансыма: ‘Тав лю̄ль вāрнэ утыт халн ловиньтавес’ – таи тах та ēмты. Сōль, Ам ōвылтытум мāныр хансым ōлы, таи ēмты”.38 ”Кӯсяй”, – тāн ля̄галасыт, – ”āӈкватāлэ̄н, тыт кит сырай ōлы”. Ань Тав тāнанылн лāвыс: ”Товылхаты тах”.
39 Ӣсус ӯсныл квāлмēт ханьсювламе сирыл ханисьтахтын хумиянэ ёт Вōййӣв урн минас.40 Тув ёхтуманылт, тāнанылн лāвыс: ”Пойиксēн, савалан вāрмалин ул майхатэ̄н”.41 Такви э̄лнув, āхвтас лаим палытн минас, сāнсаге тармыл лю̄лис ос пōиксим лāвыс:42 ”Āся̄, наӈ таӈхēгын ке, ты саватпиӈ āны Āнумныл э̄л-лаквтэ̄лын. Наӈ кāсасянын сирыл вос ēмты, Ам тахнэм сирыл ул вос ēмты”.43 Ань Тав палттылэ тōрумныл Таве ёрыл миӈкве Ангел хулиглас.44 Янгыгсь савалым Ӣсус усьпыл тāкысьнув пōйиксяс. Кēлп самыт хольт Тав рēгвитанэ мāн патыгласыт.45 Пōйиксяме юи-пāлт Тав нōх-лю̄лис ос ханисьтахтын хумиянэ палт йис. Тав кāсаластэ, тāн саватпи тотыманыл, ёл-оилматымат.46 ”Манрыг нāн хуегы̄н, – Тав тāнанылн лāвыс. – Квāлэн ос пойиксēн, савалан вāрмалин ул майхатэ̄н”.
47 Ӣсус потыртаме порат мāхум аня нэ̄глапасыт. Тāн э̄лы-пāланылт китхуйплов хумныл акваныл, Иуда нампа хум, тав ōлыс. Тав Ӣсус палт, Таве аниглаӈкве, ляпан йис.48 Ӣсус тавēн лāвыс: ”Иуда, наӈ, аниглахтым, Э̄лумхōлас Пы̄г тыналы̄лын?”49 Ӣсус ёт ōлум ханисьтахтын хумиянэ тыи кāсаламанылт лāвсыт: ”Кӯсяюв, сыраянув, э̄рыӈ, осн выганӯв?”50 Ань акваныл сяр яныг пӯп мēтхум сāграпастэ ос ёмас пал пале хот-манумтастэ.51 Топ Ӣсус лāвыс: ”Товлы, ёл-пōйтэ̄н!” Ос ань Тав мēтхум паль палт карсматыглахтыс, пале та пусмалтастэ.52 Тōнт ань Таве пувуӈкве ēмтум сяр яныг пӯпытн, яныг хōтпатн ос ялпыӈ кол ӯрнэ пуӈкхумитн Ӣсус лāвыс: ”Нāн Āнум пувуӈкве манрыг сырайиӈ ос йивсупиӈ тāгыл ёхтысы̄н, Ам мат сылка хунь?53 Ам нāн ётын кāсыӈ хōтал ялпыӈ колт ōлыгласум, тōнт Āнум виӈкве манрыг ат кусыглахтысы̄н? Ань нāн сё̄сын ёхтыс – турман тав ё̄ре та ёхтыс”.
54 Тāн Ӣсус алсиӈ кāтыл висаныл ос та тотсаныл. Тав сяр яныг пӯп колн тотвес. Пēтыр юв-хультым тāн юи-паланылт ё̄мантас.55 Яныг пӯп-ōйка кол кāрта котильт āрась пēламтасыт, пуссын акван-ӯнтсыт, ань Пēтыр ōс тāн халанылн ӯнтыс.56 Акв мēтнэ, най посыл таве кāсаламēт, тав нупыле ёмсякв сунсыглахтым ля̄галас: ”Тыи ос Тав ётэ ōлыс”.57 Топ ань тав хот-воратым лāвыс: ”Нэ̄, ам Таве ат вāглум!”58 Мось ётылнув хоттымат хум таве кāсаламет, лāвыс: ”Наӈ ōс тāн акв хумиянылныл ōлэ̄гын”. Ань Пēтыр лāвыс: ”Āти, ам тāн ётаныл ат ōлсум”.
59 Сё̄стем хультум юи-пāлт ос хоттымат хōтпа усьпыл тāкысьнув лāвыс: ”Ты хōтпа сяр мāк Тав ёте ōлыс, тав Галилеяныл ōлнут”.60 Топ ань Пēтыр ōс лāвыс: ”Тэ̄хам, ам ат вāглум, мāныр урыл наӈ лāвēгын!” Ань аквта ōрумт, хунь тав иӈ потыртас, сиськурек та рōӈхалтахтас.61 Кӯсяй ювле-ё̄ӈхыс ос Пēтыр нупыл āӈкватас. Ань Пēтыр Кӯсяй лāтӈанэ номылматасанэ: ”Тыхōтал, сиськурек рōӈхувлан э̄лы-пāлыт, наӈ тах хӯрум сёс Āнумныл хот-воратэ̄гын”.62 Тōнт ань Пēтыр кон-квāлыс ос саватпиӣг лю̄ньсялтахтас.
63 Ӣсус пувум мāхум сāвсыр āмп лāтӈыл лявыльтым Ӣсус рāтсаныл.64 Тāн Тав самаге лап-нэ̄гсаласаныл, Тав тāнаныл ул вос ханьсиянэ ос Таве китыгласаныл: ”Наӈ Тōрум лāтыӈ тотнэ хум ке, ханьсēлын, хōӈхан ю̄ныгтавēсын”.65 Ос сāв мōт хōйхаттал лю̄ль лāтӈыт тав нупылэ лāвсыт.
66 Хōтал нэ̄глын порат яныг хōтпат, сяр яныг пӯпыт, Сāккон ханисьтан хумит пуссын атхатасыт, ос Таве синедрионын*б тотсаныл,67 ос лāвсыт: ”Наӈ Кристосыг ке ōлэ̄гын, мāнавн ты урыл лāвен”. ”Ам нāнан лāвēгум ке, нāн Āнумн ат агтэ̄гы̄н”, – Ӣсус ювле лāвыс, –68 ”ос нāнан ке китыглыя̄нум, нāн Āнумн ювле ат лāвегы̄н.69 Аньты пāсыл Э̄лумхōлас Пы̄г яныг Тōрум ӯнлын мāт ёмаспалэ̄т ӯнлуӈкве паты”.70 Пуссын китыглахтасыт: ”Я, наӈ Тōрум Пы̄гē?” Тав ювле-лāвыс: ”Нāн нāнти тох лāвегы̄н”.71 Тōнт ань тāн лāвсыт: ”Мāнырсыр вāсинтан ос мāнырсыр лāтыӈ иӈ э̄ри? Мāн тай ань мāнти та Тав лāвум лāтӈанэ хӯлыгласанув”.
*а 1 22:1 яныг ялпыӈ хōтал – ты русь лāтӈыл пасха
*б 66 22:66 синедрион – яныг совет, тот мā кӯсяйы̄г ōлыс
Глава 22
