Choose Language
Old Testament Books
New Testament Books
view with a second Bible
1 Ӣсус мӯвлахи āӈкваталыс ос олн атнэ хусапн олн пиннэ сёлыӈ хōтпат кāсалас.2 Кит мāнь олнкер*а пиннэ хумтāл нуса э̄ква ōс кāсаластэ.3 ”Сōль лāвēгум, – Тав лāвыс, – ты хумтāл нуса э̄ква мōтанытныл сяр сāв пиныс.4 Пуссын тантинāнылныл арыгтам олнаныл Тōрумн мӯйлупса пинсыт. Ты нуса э̄ква ōлтулэ пуссын та пиныстэ”.
5 Тōва ханисьтахтын хумиянэ потыртасыт: ”Ты ялпыӈ кол сяр хорамыӈ āхтасыл унттым ōлы. Тōрумн тотым сав мӯйлупса тот ōлы”. Ӣсус тай лāвыс:6 ”Тамле хōталыт ēмтэ̄гыт, ань вāсиньтам колытныл āхвтас тармыл āхвтасэ ат хульты. Тāн пуссын хот-сакватавет тах”.7 ”Ханисьтан хумиюв”, – Тāн китыглахтасыт, – ”ты нак хунь ēмты? Ты нак ēмтнэ э̄лы-пāлыт мāнырсыр пōс хулиглы?”8 Тав ювле-лāвыс: ”Ӯрхатым ōлэ̄н, нāн ул вос лāплувēсын. Ам намумт лāвхатым сāв утыт ёхтэ̄гыт ос лāвēгыт тах: ‘Ам – Кристос’, манос: ‘Пора та ёхтыс’. Топ ань тāн юи-пāланылт ул минэ̄н.9 Хōнтлын ос мир āлхатнэ нак хӯнтамланэ̄н порат ул рохтуптахтэ̄н. Ты вāрмалитн ōвлэ̄т э̄ри ēмтуӈкве. Ты юи-ōвыл хōтал āти”.
10 Тувыл Ӣсус тāнанылн лāвыс: ”Мир мир ля̄льт лю̄ли тах, хōн хōн ля̄льт хōнтлы тах.11 Мā янгыгсь торгалтаӈкв патаве, сāвсыр пилысьмат ос ханнэ агмыт хулиглэгыт, тōва мāтт ос тэ̄п ярум ēмты. Пилысьмаӈ накыт ēмтэгыт ос тōрумт яныг пōсыт хулиглэ̄гыт.
12 Ты нак э̄лы-палыт нāн пувāвēн ос ня̄влалаӈкве патавēн: Ам намум мāгсылум нāн синагогатт сутытаӈкве патавēн, турман колытн вуськасавēн, хōныт ос пуӈктотнэ утыт э̄лы-пāлн ам намум мāгыс тотавēн.13 Тōнт тах Ам ōвылтытум нāн лāвуӈкве вēрмēгын.14 Таимāгыс сāртын ул номсахтэ̄н, нāнтинāнын ӯргалан мāгыс сыманы̄н ул вос ся̄ргēгыт.15 Ам нāнан мутрал ёт лāтӈытыл мыганум. Нāнан лāвыл нэ̄гылтан утытныл нэ̄мхōтпа нāн нупылн иӈ ювле ат вēрмēгыт лāвуӈкве, лāтӈанын ат вēрмияныл ёлымтаӈкве.
16 Топ ань нāн ся̄няны̄н-āсяны̄н, ягпыганы̄н ос рӯтаны̄н, юртаны̄н пуӈктотнэ утыт кāтанылн мивēн тах. Тōва утаны̄н тах алавет.17 Нāн пуссын мирн Ам намум мāгыс лāвыл нэ̄глуӈкве патавēн.18 Топ ань āт лōмт нāн пуӈканы̄нныл ат рагаты.19 Тāкысь вēритым нāн вēстхатэ̄гын.
20 Иерусалим хōнтыл мувылтыматэ кāсаламын порат, вāелы̄н, тав мосертын тах ты рāгматы.21 Тōнт тах Юдеят ōлнэ мāхум нёрытн вос оēгыт, Иерусалимт ōлнэ мāхум ӯсныл сысы вос минэ̄гыт ос пāвылт ōлнэ мāхум ӯсн ул вос минэ̄гыт.22 Ты хōталыт нур винэ вāрмалит ēмтэ̄гыт, хунь ань Тōрум нэ̄пакыт хансым утыт пуссын тōвлуптавет.23 Āгмыл ōлнэ нэ̄тын ос ня̄врам сяквтын нэ̄тын та порат яныг саватпи ēмты, тōнт тах ты мā янытыл яныг я̄рм ēмты. Ос Тōрум яныг кантэ ты мāхум тармыл вāглы тах.24 Сырайн тах сāгравет ос пувавет ос пуссын мāхум сāвсыр мāн тотавет: Иерусалим Тōрум ат вāнэ мāхмытн тах порславе тāнти холнаныл мус.
25 Хōтал, э̄тпос ос совыт тармыл пōсыт хулиглэ̄гыт. Ся̄рсь хумпыт янгыгсь амхатэ̄гыт, суиӈысь поварēгыт. Мā тармыл мāхум тай пилысьман ёхтавет, сыманыл минэ̄гыт.26 Тōрумт ё̄раныл торгалтахтэ̄гыт. Мā тармыл ёхтын пилысьма ӯриманыл, мāхум вāгтāл патэ̄гыт.27 Тōнт тах тāн тул тармыл йинэ Э̄лумхōлас Пы̄г яныг ё̄ре ос посе ёт кāсалыяныл.28 Ты нак ēмтнэ̄тэ порат ул пилэ̄н, тāкыг ōлэ̄н ос пуӈканын нōӈхаль āлмēн, мосертын нāн лыпась патэгы̄н тах”.
29 Ос ань Тав ханисьтап порыртас: ”Инжир йӣвыт нупыл, мōт йӣвыт нупыл āӈкваталэ̄н:30 тāн луптаныл нэ̄глананэ̄ныл порат нāн нāнки вāглын тув молях та ёхты.31 Ань аквтох хунь Ам лāвум наканум ēмтнэ̄ныл кāсалыяны̄н, нāн нāнти вāглы̄н, Тōрум йильпи нот ёхтын наке ляпат ōлы.32 Аньйис ōлнэ мир холнэ̄ныл э̄лы-пāлыт ты накыт пуссын ēмтэ̄гыт, – сōль Ам нāнан лāвēгум.33 Мā ос тōрум сōймēг, Ам лāтӈанум нэ̄мхуньт ат сōймēгыт”.
34 ”Ӯрхатым ōлэ̄н, арген ул минэ̄н, айнэн паттат, кāсыӈ хōтал сорит вāрнэ паттат номтаны̄н ул тыпылтэ̄н, лэ̄сын патнэ хольт та хōталн илттыг ул вос ёхтавēн,35 ань мā я̄нытыл ōлнэ мир пуссын тах ты хōталн ёхтавет.36 Акваг ӯрхатым ōлэ̄н ос пōйиксēн. Ёхтын накытн вēритан мāгыс, нāн нāнти ё̄ранын сирыл ōлэ̄н, Э̄лумхōлас Пы̄г э̄лы-пāлыт лю̄люӈкве вос вēрмысы̄н”.
37 Кāсыӈ хōтал Ӣсус ялпыӈ колт мāхум ханисьтас, э̄типāлаг ос Вōййӣв ур нампа урн э̄т хӯлнэ мāгыс тув миныглāлыс.38 Āлпыл постыглан порат мāхум Таве хӯнтлуӈкве ялпыӈ колн атхатыглāлсыт.
*а 2 21:2 акв тамле олнкер – ты сяр мāнь олнкер
Глава 21
