Choose Language
Old Testament Books
New Testament Books
view with a second Bible
1 Ань Ӣсус ханисьтан хумиянэ нупыл лāвыс: ”Акв сёлыӈ хум ōлтуланэ мāгыс пуӈктотнэ мēтхум ōньсис. Тав хӯлтвес, ань ōлтуланэ ты пуӈктотнэ мēтхумын мори холтавет.2 Ань кӯсяй ōлтуланэ пуӈктотнэ мēтхум вōвыстэ ос лāвыс: ‘Наӈ ōвылтытн ам мāныр сыр тамле ля̄ххалыт хӯлэ̄гум? Пуӈктотнэ вāрмалянын ōвылтыт ловиньтахтэн, ам ōлтуланум тармыл пуӈктотуӈкве наӈ воссыг ат вēрмēгын’.3 Ань пуӈктотнэ мēтхум такви рот лāвыс: ‘Кӯсяюм ам рӯпатам хот армалтаӈкве таӈхитэ. Āнумн а-мāныр вāруӈкве? Мā хилуӈкве ам ё̄р ат ōньсēгум, ня̄нь вōвуӈкве āнумн э̄сырма.4 Ам вāглум, мāныр āнумн э̄ри вāруӈкве, хунь ам пōхан-паттавем, ам мāхумн ляпан вос вивем’.5 Кусяēн āрумтаӈ хōтпат тав акв юи-пāлт пуссын вōвсанэ ос ōвыл утанылн лāвыс: ‘Наӈ кӯсяюмн манъяныт āрумта ōньсēгын?’6 ‘Вōй яныгсāт мēра сāвит’. Пуӈктотнэ мēтхум лāвыс: ‘Ловиньтахтын нэ̄пакын вуēлын ос ёл-ӯнтэн ос моляхнув хансэн – атпан мēра сāвит’.7 Тувыл мāтананылн лāвыс: ‘Наӈ ос маняъяныт āрумта ōньсēгын?’ Таитэ ювле-лāвыс: ‘Ня̄ньпум яныгсāт мēра’. Ань пуӈктотнэ мēтхум лāвыс: ‘Ловиньтахтын нэ̄пакын вуēлын ос хансэн – нёлсāт мēра сāвит’.
8 Ётылнув пуӈктотнэ урккыӈ мēтхум кусяēн э̄сгувес, тав осьмарыӈыг вāрме мāгыс. Ты мир утыт тāнти халанылт осьмарыӈыг капыртэ̄гыт. Пос хōтпатныл тāн номтыӈыт.9 Ос ам нāнанн лāвēгум: ты ōлнэ совыӈ мā тармыл олн холтэ̄н юртхумиянын мāгыс. Хунь сюнянынныл воньсялн патэгы̄н, тōнт юртхумияны̄нн тах Тōрум нотыӈ колн ляпан вивēн.10 Ань хотты хōтпан мосьсяӈ тэ̄лат агтуӈкве ке рōви, тавēн иӈ яныг вāрмалиӈ тэ̄лат рōви агтуӈкве. Мосьсяӈ тэ̄лат ке лāплахтэ̄гы̄н, тōнт иӈ яныг тэ̄лат ос уркēгы̄н тах.11 Совыӈ мā сюнянэ нāнан ат ке ровēгыт агтылтāӈкве, тōнт сōлиӈ сюнит нāнан ат агтылтавет тах.12 Мōт хōтпа ōлтуланэ нāнан агтылтаӈкве ат ке рōвēгыт, тōнт иӈ нāнти ōлтуланын нāнан ат мивет тах.13 Нэ̄мхотты акв мēтхум кит кӯсяигн аквторыг лусытаӈкве ат вēрми. Тав акв кӯсяе э̄руптытэ тах, мōтанэ ос лāвыл нэ̄глуӈкве патытэ. Манос акв кӯсяēн тав вēськатыг, мōтанэ̄н тōпалыг лусытаӈкве паты. Тōрумн ос сюнин аквторыг лусытаӈкве нāн ат вēрмегы̄н!”
14 Ōлн э̄руптан фарисейт Тав потре хӯнтлуманылт Тавēтыл мувиньтасыт.
15 Ӣсус тāнанылн лāвыс: ”Нāн мāхум э̄лы-пāлыт вēськат хōтпаг сӯсхатуӈкве воратэ̄гын. Топ ань Тōрум нāн сыманы̄н вāганэ. Э̄лумхōласын тыныӈы̄г ōлнэ ут Тōрумн сака лю̄ль.16 Иоан э̄лы-пāлыт Сāккон ос Тōрум лāтыӈ тотнэ хумит ōлсыт. Тав юи-пāлэ̄т Тōрум йильпи нот янытлаӈкве патвес. Кāсыӈ ут мāныр вēрмēгыт, тув воратэ̄гыт.17 Топ ань сāртын мā ос тōрум патырēг, Сāкконныл акв ломт холы ке.18 Кāсыӈ хум нэ̄тэ ёт киттыг мины ос мōт нэ̄ тоты ке, тав яныг карек вāри. Ос киттыг минам нэ̄ тотнэ хум ōс яныг карек вāри.
19 Акв сёлыӈ хум ōлыс. Тав сяр тыныӈ ос нё̄тнэ маснутыл масхатым ōлыс ос кāсыӈ хōтал такви сёлэ̄тыл-сюнēтыл пӯмсялахтыс.20 Тав пӯсас āвитэ пōхат алпитэ нюлмиӈ Лāсар нампа нуса хōтпа акваг хуяс.21 Тав таӈхыс пōйтнэг тэ̄ӈкве, сёлыӈ хум пасанныл ёл-рагатам пӯлытыл. Ос āмпыт ляпан ёхталасыт ос тав нюлмиянэ нёлантасāныл.
22 Хунь ань нуса хōтпа āтимы̄г ēмтыс, тав Ангелытн Аврāм ляпан тотвес. Сёлыӈ хум ань ōс сорумн патыс, тав ёла-сё̄питавес.23 Ёлы-тōрумт, хōт ань сёлыӈ хум саватавес, тāв нōӈхаль āӈкватас ос э̄лын Аврāм кāсаластэ. Тав Лāсар сыныгтым пувыстэ.24 Тав тōнт рōӈхувлас: ‘Аврāм āсюв, āнум сāлитэ̄лын, Ласāр тыг-кēтэ̄лын, тав тулёвыл оигпан-ōвлэ витыл тытылтым ам нēлмум вос пōльтытэ, ам ты нāй кӣвырт сāвалэ̄гум!’25 Топ ань Аврāм лāвыс: ‘Пы̄гкве, номылматэ̄н, наӈ ōлмынт пуссын ёмас ут туп вāсинтасын, Лāсар туп лю̄ль ут ōньсиглас. Тыт ань тав сыме пōйтылтытэ, наӈ ос савалэ̄гын.26 Тувыл ос мāн халувт паттатāл яныг хитяӈ ōлы. Нэ̄мхотъют нāн палтын унсуӈкве ат вēрми ос мāн палттылув унсуӈкве ос нэ̄мхотъют ат вēрми’.27 Ань сёлыӈ хум лāвыс: ‘Хуньте наӈын пōйкилум, āся̄, Лāсар ам āсюм колын кēтэ̄лын.28 Ам ат ягпыг ōньсēгум, тāнаныл вос хӯлтыянэ, тāн ōс тыг савалан мāгыс ул вос ликмēгыт’.29 Топ Аврāм лāвыс: ‘Тāн Моисей Сāкконэ ос Тōрум лāтыӈ тотнэ хумит нэ̄паканыл ōньсēгыт. Тāнаныл вос хӯнтлыяныл’.30 Ань сёлыӈ хум лāвыс: ‘Āти, Аврāм āськве, тāн палтаныл ёлы-тōрумныл хотты ут ёхты ке, тāн Тōрум нупыл ё̄ӈхēгыт тах’.31 Ань Аврāм лāвыс: ‘Тāн Моисей ос Тōрум лāтыӈ тотнэ хумит ат ке хӯнтлыяныл, сорумныл нōх-ялтум утытн тāн агтуӈкве хунь патэ̄гыт’”.
Глава 16
