Choose Language
Old Testament Books
New Testament Books
view with a second Bible
1 Пōт атнэ ос карекыӈ сāв хōтпа Ӣсус хӯнтлуӈкве Тав палттылэ ёхталāлсыт.2 Фарисейт ос Сāккон ханисьтан хумит хот-кантмувēсыт: ”Ты хōтпа карекыӈ утыт ляпан вы̄ганэ ос тāн ётаныл тэ̄г!”
3 Ань Ӣсус тāнанылн тамле ханисьтап потыртас:
4 ”Хōӈхан нāн халынт яныгсат пāлянэ̄ныл акв хот-тыпум пāлятэ юи-пāлт ат мины онтырсāт онтолōв пāлянэ мир ōлтāл мāт оссувлым ос таве хōнтнэтэ мус ат та кинсытэ?5 Ос хунь таве хōнтытэ, тах ся̄гтым таве вāӈнагēн ӯнттытэ ос юв та тотытэ.6 Колпох мāхманэ ос юртанэ палт мины ос лāви: ‘Ам ётум ся̄гтэ̄н: ам тыпылтāлум пāлям хōнтыслум’.7 Ам нāнан лāвēгум: аквтох иӈ тōрумт янгыгсьнув ся̄гтуӈкве патэ̄гыт Тōрум нупыл ё̄ӈхын карекыӈ хōтпа мāгыс, ман онтырсāт онтолов вēськат Тōрум нупыл ат ё̄ӈхум хōтпаныл.
8 Хōтты нэ̄ лов ся̄лыг олнныл акватэ тыпылтытэ ке, тав нāе пēламтым колэ атхунь ат хосгитэ ос олнкēре хонтнэ̄тэ мус атхунь ат кинсытэ?9 Олнкēре хōнтме юи-палыт тав юртнэнэ ос колпох мāхманэ вōвиянэ ос лāви: ‘Ам ётум ся̄гтэ̄н, ам тыпылтāлум олнкēрум хōнтыслум’.10 Ам нāнан лāвēгум: тōрумт Тōрум Ангеланэ аквтох ся̄гтэ̄гыт Тōрум нупыл ё̄ӈхын акв карекыӈ хōтпан”.
11 Ань Ӣсус э̄лаль ōс лāвыс: ”Аквмат хōтпа кит пы̄г ōньсис.12 Мāньнув утэ āсēн лāвыс: ‘Āся̄! Ōлтуланын āнумн хōйхатнэ сāвитэ āнумн маēлын’. Ань āсēн ōлтуланэ тэ̄натэ̄н киттыг уртсанэ.13 Матахмат хōтал хультум юи-пāлт мāнь пы̄ге ōлтуланэ акван-атсанэ ос э̄лы мāн минас. Тот мори ōлыматэ такви ōлтуланэ холтсанэ карек вāрим.14 Ань ōлтуланэ пуссын хунь холтсанэ, та мāт тэ̄п яныг я̄рм ēмтыс ос тав нуса тотуӈкве патыс.15 Ань минас, та мāт ōлнэ акв хōтпа палт ōлмыгтас, таи таве тэ̄пкананэ̄н кēтыстэ пӯрсит ӯруӈкве.16 Тав ань пӯрсит тэ̄нэ тэ̄пыл сōрге ся̄гтым тāгиньтаптынувтэ, топ нэ̄мхотъютн ат майвес.
17 Ос номылматмēт, лāвыс: ‘Āсюм тасавит мēтхумиянэ тэ̄пыл пōйтым ōлэ̄гыт, ам тай тэ̄тал ты порсэ̄гум.18 Āсюм палт минэ̄гум ос тāвēн лāвēгум: Āся̄! Ам Тōрум ос наӈ э̄лы-пāлынт карек вāрсум.19 Наӈ пыгы̄г ōлуӈкве воссыг ат хōйхатэ̄гум; āнум мēтхуманын палт юрсēлын’.20 Ос тав āсе палт та минмыгтас.
Иӈ э̄лын йинэ̄тэ̄т тав āсēн кāсалавес ос сāлитавес; āсе ляльт хāйталтас, пы̄ге сынумтастэ ос анигластэ.21 Пы̄ге лāвыс: ‘Āся̄! Ам Тōрум ос наӈ э̄лы-пāлынт карек вāрсум. Наӈ пыгы̄г ōлуӈкве воссыг ат хōйхатэ̄гум’.22 Туп āсе мēтхумиянэ̄н лāвыс: ‘Молях сяр ёмас маснутыл тотэлы̄н ос мастэлы̄н. Кāтэ̄ тулял мастэлы̄н, лāглагē лāгылмаснутыл мастэгы̄н.23 Сяр вōиӈ мāньмис тыг вāнтэлы̄н ос алэлы̄н; тэ̄ӈкве ос мӯйлуӈкве патэ̄в.24 Ань ам ты пы̄гум сорумн патыглас ань ос нōх-ялтыс, хōт-āти осялāлыс, ань хōнтхатас’. Ос мӯйлуӈкве та ōвылтахтасыт.
25 Яныг пы̄ге тай тэ̄пканыт ōлыс. Колэ ляпан ёхтумēт э̄ргын ос ся̄гталыпиӈ суй хӯнтамлас.26 Акв мēтхум ля̄пан вōвыстэ ос китыгластэ: ‘Мāныр тыт вāраве?’27 Мēтхум тавēн лāвыс: ‘Āпсин юв-ёхтыс ос тав пустāгыл ёхтуме мāгыс āсин вōиӈ мāньмис алас’.28 Каӈке хот-кантмаявес ос юв-сялтуӈкве ат таӈхыс. Āсе кон-квāлыс ос таве юв-вōвыстэ.29 Тав āсēн ювле-лāвыс: ‘Ам сāв тāл наӈ мāгсылын рӯпитэ̄гум, наӈын аквписыг хӯнтласум; юртанум ёт мӯйлын мāгыс наӈ āнумн пāля пы̄грись ат та майласын.30 Пы̄гын, мори ōлнэ нэ̄т ёт ōлтуланэ̄ холтмэ̄т, юв-ёхтыс, наӈ тав мāгсылэ вōиӈ мāньмис аласын’.31 Āсе тавēн лāвыс: ‘Пы̄гкве! Наӈ аквписыг ам ётум ōлсын; ам ōлтуланум – пуссын наӈ ōлтуланын.32 Ты ягпы̄гын сорумн патыглас ос нōх-ялтыс, хōт-āти осялāлыс ос хōнтхатас; таимāгыс э̄рыс ся̄гтуӈкве ос мӯйлуӈкве’”.
Глава 15
