Choose Language
Old Testament Books
New Testament Books
view with a second Bible
1 Сāв сōтыра мир атхатасыт. Мāхум халанылт акван-марылтахтасыт. Ӣсус ōвлэ̄т ханисьтан хумиянэ̄н потыртаӈкве патыс: ”Фарисейт ня̄ньсуманылныл*а пилым ōлэ̄н. Ам тāн китвильптуп хурияныл урыл лāвēгум.2 Хот-тӯйтым ут ат хульты – пуссын осн нэ̄глы. Сытамыл вāрим ут ат хульты – пуссын вāӈкве патаве.3 Турманыт лāвим лāтыӈ посыӈ хōталыт хӯлаве. Сытам колсāмыт пāль асн восгим лāтыӈ кол аланыл рōӈхувлаве тах.
4 Нāнан, юртанумн, лāвēгум: Алпи алнэ утытныл ул пилэ̄н, тан та коныпāл воссы̄г нэ̄матыр ат вēрмēгыт вāруӈкве.5 Ам нāнан лāвēгум, хōӈханыл э̄ри пилуӈкве: Тōрумныл пилэ̄н. Тав э̄лумхōлас алме юи-палыт турман мāн вуськасан ё̄р ōньситэ. Сōль лāвēгум, хōӈханыл нāнан э̄ри пилуӈкве.6 Кит олн тыныл ат сяӈси ман ат тыналавет? Тыгылнэ̄г тāн Тōрумн ат ёрувлавет!7 Тыгылнэ̄г иӈ нāн пуӈкāтанын ловиньтым ōлэ̄гыт. Ул пилэ̄н, нāн тынаны̄н сāв сяӈсит тынанылныл тыныӈнувет.
8 Ам нāнан лāвēгум: хōтпа мир э̄лы-палыт Āнум ке кāсаси, Э̄лумхōлас Пы̄г таве Тōрум Ангелыт э̄лы-пāлыт ос кāсаси тах.9 Āнумныл мир э̄лы-пāлыт хот-воратан хōтпаныл Ам ōс хот-воратэ̄гум Тōрум Ангелыт э̄лы-пāлыт.10 Э̄лумхōлас Пы̄г урыл лю̄льсыӈ лāвнэ хōтпа Тōрумн кантэ тāратаве. Ялпыӈ Лылы лю̄камтан ут Тōрумн кантэ ат тāратаве.
11 Хунь синагоган тотавēн, пуӈктотнэ ос кӯсяй хōтпатн лāвнэ лāтӈанын урыл ул номсэ̄н.12 Та порат мāныр э̄ри лāвуӈкве Ялпыӈ Лылын тах ханисьтавēн”.
13 Мāхум халныл аквмат ут Ӣсусн лāвыс: ”Ханисьтан хум, ягпыгумн лāвēн ся̄нягмēн-ася̄гмēнныл хультум ōлтулытыл ам ётум вос уртхаты”.14 Ань Ӣсус ювле-лāвыс: ”Лāвēн, Ам хōӈхан нэ̄нан сутытаӈкве ос нэ̄н ōлтуланы̄н уртуӈкве тӯсьтувēсум?”15 Ань мāхумн Ӣсус лāвыс: ”Ӯрхатым ōлэ̄н, сāвсыр сякырныл ӯргалахтэ̄н, ань э̄лумхōлас ōлупсатэ такви сёланэ ё̄рыл хунь ōлы”.
16 Ос Ӣсус тāнанылн ханисьтап потыртас: ”Акв сёлыӈ хум тэ̄пканэ ёмас тэ̄пыл яныгмавес.17 Тав такви рот номсыс: ‘Мāныр āнумн вāруӈкве, яныгман тэ̄панум нэ̄мхōт ōньсюӈкве?’18 Ос ань тох ты номылматас: ‘Ам сар тох вāрēгум: āмпаранум хот-лōсытыянум, яныгнув утыт унттэ̄гум, ос тэ̄лум колассаманум, ōлтуланум пуссын тув-пиныянум.19 Ос ань амтинāнумн лāвēгум: Сāв ōлтул э̄лаль ōлнэ мāгыс наӈ сё̄питасын. Ӯсьлахтэн, айен-таен, кāс вāрен’.20 Топ ань Тōрум тавēн лāвыс: ‘Оссам ут! Ты э̄т наӈ лылын вōваве тах. Наӈ тāстыглам утанын хōӈхан хультэ̄гыт?’
21 Тох кāсыӈ хōтпа ёт ōлыглāлы, хōӈха таквинāтэ̄н сёлыӈ хōтал сōпаслы. Тав Тōрум э̄лы-пāлыт сёлыӈыг хунь ōлы”.
22 Ханисьтан хумиянэ̄н Ӣсус лāвыс: ”Таимāгыс Ам нāнан лāвēгум: нāнти ōлупсан мāгыс пилым ул номсэ̄н – мāныр тэ̄ӈкве патэ̄гы̄н, āлпин мāгыс – манарыл масхатэ̄гы̄н.23 Тэ̄нутныл ōлупсан э̄рнэнуве, маснутныл алпин э̄рнэнуве.24 Хулахыт нупыл āӈкватāлэ̄н: тāн тэ̄п ат тэ̄лтэ̄гыт, тэ̄лтнутаныл ат я̄ктлыяныл. Тāн ōсит ат ōньсēгыт, āмпарыт ат ōньсēгыт. Топ Тōрумн тāн тыттавет. Нāн товлыӈ ӯитныл сāв сёс тыныӈнувет!25 Сāвсыр сори вāрим нэ̄мхотъютн такви нотэ сяр ат сāвмалтытэ.26 Сяр мосьсяг ōлнэ вāрмаль ат ке вēрмегы̄н вāруӈкве, мōт тэ̄лат урыл мāныр наскасыг номсахтуӈкве?
27 Тэ̄пкан луптат хумус яныгмēгыт, āӈкватāлэ̄н. Тāн ат рӯпитэ̄гыт, ат тāхтэ̄гыт, понэ̄гыт. Лāвēгум нāнан: ты лӯптат хольт Соломон таквинатэ янытлыматэ порат тох масхатым ат ōлыс.28 Тōрумн тэ̄пкан лӯптат тох ке маставет, тāн ты хōтал лылыӈыт – холытан найн вуськасавет, нāн, мосься агтнэ утыт, усьпыл ёмаснувēг маставēн!
29 Мāныр нāнан тэӈкве-аюӈкве э̄ри – ул кисхатэ̄н, ул пилэ̄н.30 Ты мā Тōрум ат вāнэ мāхум ты ōвылтыт аквписыг номсахтэ̄гыт. Āсин вāгтэ, нāнан тыи пуссын э̄ри.31 Таимāгыс топ Тōрум йильпи нот кинсэ̄н. Ос тах тыи пуссын нāнан миве тах.
32 Ул пилэн, мāнь аня. Топ Āсин нāнан йильпи нотыл миӈкве таӈхитэ.
33 Мāныр ōньсēгын – тыналэ̄н, олнаны̄н нуса хōтпатн маēн. Нāнтинанын хот ат хасьлын олнкас ёвтэ̄н, тыныӈ пормас тōрумт акван атэ̄н: тот хāхытн ат тэ̄вет, тӯлмах хōтпан ат новāвет.34 Хōт нāн тыныӈ утаны̄н ōлэ̄гыт, тот тах нāн сымы̄н ōлуӈкве та паты.
35 Акваг ӯрхатым ōлэ̄н: э̄нтаптахтым масхатэ̄н, найӣн пēламтым ōньселы̄н.36 Пӯриныл йинэ кӯсяяныл ӯрнэ хӯсит хольт ōлэ̄н. Ёхтынэ̄тэ порат āви рāтнэ̄тэ юи-пāлт ань хӯсянэ̄н āви аквтаторыг пāлыг-пӯнсаве тах.37 Та хӯсит сōтыӈыт, тāн кӯсяяныл кāсалытэ – хӯсянэ̄н ӯраве. Мāк нāнан лāвēгум: та кӯсяй э̄нтаптахтым масхаты ос хӯсянэ пасан вāтан ӯнттыянэ, ос такви мēтхум паттыӣг ōлы тах.38 Таве ӯриманыл э̄ткотлиг ēмты, манос усьпыл хосанувēг ӯрхатэ̄гыт! Кӯсяяныл ёхтын торыг тāн ост ке ōлэ̄гыт, тōнт сōтыӈы̄г ōлэ̄гыт.39 Номим ōньселы̄н, кол кӯсяй тӯлмах ёхтынэ̄тэ пора вāстэ ке, тōнт тав та тӯлмах колэ̄н ат тāртнувтэ.40 Ань нāн ос сё̄питахтым ōлэ̄н, нāн ат ӯрхатнэ сё̄ст тах Э̄лумхōлас Пы̄г ёхты”.
41 Пēтыр китыглахтас: ”Кӯсяй, ты ханисьтапын тӯп мāн мāгсылув манос мōт мāхум мāгыс ōс потыртаслын?”
42 Ань Кӯсяй лāвыс: ”Хоты мēтхум мōт мēтхумытныл сōлиӈнувег, номтыӈнувег ōлнэ̄тэ мāгыс кӯсяянылн тэ̄нут уртнэ хōтпаг тӯсьтувēсыт?43 Та мēтхум сōтыӈ, кӯсяе ёхтын торыг, тав рӯпитым ке ōлы.44 Вēськатыг лāвēгум: тав такви ōсилэ̄т мēтхумитэ кӯсяйлахтуӈкве лāвитэ.
45 Мēтхум таквинāтэ̄н ке лāви: ‘Кӯсяюм молях ат ёхты’, мōт мēтхумит ос мēтнэ̄т рāтуӈкве патыянэ, тэ̄нут тэ̄ӈкве, вит ос вӣна аюӈкве тӯлтхаты46 ты мēтхум кӯсяēн тав ат ӯрхатнэ̄тэ хōталыт ос ат вāнэтэ сё̄с ёхтыматэ юи-пāлт алаве ос мōт агттāл утыт палт кēтаве.
47 Мēтхум кӯсяе лāвум лāтӈыт ос тав тахнэ̄тэ̄ сирыл ат ке вāри, тāкысь тах рāтаве.48 Та мēтхум, хōӈха кӯсяе лāвум лāтыӈ ос тахнэ̄тэ̄ сирыл ат вāс, мосьсянуве рāтаве. Хōӈхан сāв маим ōлы, тавēныл сāв китыглаве тах, ос хōӈхан сāв агтылтыма, тавēныл сāвнуве кинсаве тах.
49 Ам мā тармыл най тотуӈкве ёхтысум. Ам сака таӈхēгум, ань нāй вос пēламланув!50 Āнумн пēрна тӯлыл э̄ри тӯлхатуӈкве. Ам сака янгысь савалэ̄гум ты нак ēмтнэ̄тэ ӯримам!51 Нāн номсэгы̄н, ам ты мāн урак тотуӈкве ёхты̄сум? Āти. Ам мир халыӈыг ōлнэ̄ныл мāгыс ёхтысум.52 Ты пāсыл ат хōтпаӈ колтāгылт пуссын халыӈы̄г ēмтэ̄тыт: хӯрум китганыл ля̄льт, китыг хурманыл ля̄льт лю̄лēгыт.53 Āсь пы̄ге ёт халыӈы̄г ēмтэ̄г: пы̄ге āсе ля̄льт, āсе пы̄ге ля̄льт лю̄лēг тах. Ся̄не āгите ёт хāлыӈы̄г ēмтэ̄г: Āгитэ ся̄не ля̄льт, ся̄не āгитэ ля̄льт люлēг. Ос мане ōныпе ля̄льт, ōныпе мане ля̄льт люлēг тах”.
54 Тувыл ань Ӣсус мāхумн лāвыс: ”Хōтал ӯнтнэ ēрыт тулыт кāсаламын порат нāн лāвегы̄н: ‘Раквы̄г ēмты’. Тувыл та раквалтахты.55 Мōртым мāныл вōтмыгтан порат нāн лāвēгы̄н: ‘Рēгыӈы̄г ēмты’. Тох та ōлыглāлы.56 Кит вильтуп утыт! Нāн мā-вит пēнтхатнэ нак ханьсюӈкве вēрмегы̄н, ты ōлнэ āрт манрыг ат вēрмилын торгамтаӈкве?
57 Мāныр сōлӣг ōлы нāн манры̄г ат вēрмēлын пēрияӈкве?58 Лāвнэ нэ̄глын ут ёт сутн миннэн порат тав ётэ ёмасмахтуӈкве вēрмхатэн. Наӈын сутытан хōтпа палт ул вос тотыстэ. Сутытан хōтпа наӈын кāрвыльтан хōтпан мы̄гтэ, тав наӈын кāснаколн ӯнттытэ.59 Наӈын ты лāвēгум: юи-ōвыл олнкерын ойтнэн мус наӈ тувыл кон ат квāлэгын тах”.
*а 1 12:1 ня̄ньсум – ты русь лāтӈыл закваска
Глава 12
