Choose Language
Old Testament Books
New Testament Books
view with a second Bible
1 Аквнакыт Ӣсус акв мāт пойиксяс. Āстуме юи-палыт акв ханисьтахтын хумитэ лāвыс: ”Ханисьтан хумиюв, мāнав пōйиксяӈкве ханисьтэ̄лын – Иоан такви ханисьтахтын хумиянэ ханисьтаме хольт”.2 Ань Ӣсус лāвыс: ”Пōйиксянэ̄нт, лāвēн:
‘Āсюв!
Наӈ намын кāсыӈ утн ялпыӈыг вос ōлы.
Наӈ йильпи нотын вос ёхты.
3 Мāнавн кāсыӈ хōтал э̄рнэ ня̄нь маен.
4 Мāн кареканув тāратэ̄н,
мāнавн саватан утыт кареканыл мāн аквтох тāратыянув.
Āрталан вāрмальн мāнав ул пинэ̄лн,
ос лю̄ль лылыныл хот ӯргалэ̄лын’”.
5 Ӣсус тāнанылн лāвыс: ”Э̄рмыглы ке, нāн халынт хотъютын э̄т котильт юртэ палт матыр вōвуӈкве мины: ‘Юрткве, āнумн хурум ня̄нь майлэн,6 акв юртум лё̄ӈхныл ёхтыс, таве тыттын тэ̄нут ат ōньсēгум’.7 Мōтанэ кол кӣврēныл ювле тах лāви: ‘Āнум ул нагēлы̄н, кол āвим лап-ōлы, ам нявраманум ёт хуēгум, ам ат вēрмēгум нōх-квāлуӈкве ос наӈын матарыл миӈкве’.8 Ам нāнан лāвēгум: юртыӈысь ōлнэ̄тэ̄н мāгыс ня̄нь миӈкве нōх ат квāлы. Топ ань тāкысьнувег вōвуӈкве ке патэ̄гын, тōнт мансавит вōвēгын, тāсавитыл мивен тах.
9 Таимāгыс ты лāвиянум: вōвен, ос Тōрумн мивēн, кинсэ̄н ос хōнтэгы̄н, āви рāтэлы̄н, ос тах юв тāртавēн.10 Ань хōӈха ке матыр вōви, тав миве тах. Ос хотъют матыр кинсы ке, та хōнтытэ. Ос хотъют āви ке рāты, āви та пӯсхаты.11 Нāн халынт тамле āсь ман ōлы? Хунь пы̄ге тавēныл ня̄нь вōви, таве āхвтасыл мы̄гтэ. Хунь пы̄ге тавēныл хӯл вōви, таве ялпыӈ ӯйл мы̄гтэ.12 Ос ань пы̄ге мӯӈи ке вōви, тав мат таве пурхатнэ хомлахыл хунь мы̄гтэ?13 Нāн сāв кант ōньсēгын кос. Топ ань нāн нāнти вāглы̄н, хумус ты ня̄враманы̄н ёмас мӯйлупсат тотуӈкве. Ос ань Тōрум Āсиныл вōвнэ хōтпат Тав Ялпыӈ Лылыл мыганэ”.
14 Аквнакыт Ӣсус потыртаӈкве ат вēрмын хōтпаныл куль кон-ня̄влыс. Куль кон-минамēт ань хōтпа потыртаӈкве патыс. Мāхум хот-осьсятахтасыт.15 Тōват лāвыглāлсыт: ”Ӣсус веельзевулныл, кулит канасьныл ё̄р вис, таимāгыс Тав хōтпатныл кулит кон-ня̄влыянэ”.16 Мōтаныт ос Ӣсус ё̄ре āрталаӈкве тахсыт. Тāн Ӣсус тōрум пōс хулигтаӈкве вōвсаныл.
17 Ты мāхум номтаныл Ӣсус вāсанэ. Ос тāнанылн лāвыс: ”Халанылт вōритотнэ хōн-мā мāкыг воньсялыг тотаве. Аквтох халанылт воритотнэ колтāгыл воньсялыг мины.18 Ань сатана такви ётэ воритотуӈкве ке паты, аквтох тав хōн-мāтэ тах вēритаӈкве паты? Нāн лāвегы̄н, кулит ам вēльзевулн мāим ё̄рыл ня̄влыянум.19 Ам кулит вēльзевул ё̄рыл ке ня̄влыянум, хунь ке ос манхурип ё̄рыл нāн ня̄враманы̄н кулит ня̄влыяныл? Тāн нāнан сутитыяныл тах.20 Ам Тōрумн маим ё̄рыл кулит кон-ня̄влыянум ке, тōнт сӯсхаты, Тōрум йильпи нот нāнан маим ōлы!21 Хунь ё̄р хōтпа ос та коны-пāлт ёмасякв тэ̄рнлахтым такви колэ сиремус ӯргалытэ, тōнт тав ōлтуланэ пӯстагыл хультэ̄гыт.22 Тавēныл ё̄рнув ут вуськасахты ке тав нупылэ, таве ёлымтаме юи-пāлт ё̄рнув ут тэ̄рнлахтын утанэ хот-армалтыянэ – тав ōлтуланэ, э̄рнэтэ сирыл, та лāкква-уртыянэ тах.23 Хōтпа Ам ётум ке ат ōлы, тав āнумныл сысы ōлы. Ам ётум ат ке āты, тав лāкква-ня̄влы.
24 Э̄лумхōласныл куль кон-квāлнэтэ юи-пāлт тав сытам мāт ӯсьлахтын урак кинсым яланты, ос ат хōнтытэ. Ань тōнт лāви: ‘Оссувлам колумн ам ювле-минэ̄гум’.25 Юв ёхтынэ̄тэ порат, колэ хосгим ос сё̄питым кāсалытэ.26 Тōнт ань мины, таквинāтэ̄ныл кантыӈнуве сāт куль юв тӯлыянэ. Ань кулит тав кӣврēн сялтэ̄гыт, тот та ōлмыгтэ̄гыт. Ань э̄лумхōлас юи-ōвыл хōталыт ōвыл хōталытныл лю̄льнувēг та ēмтэ̄гыт”.
27 Ӣсус тох лāвмēт мир халыт ōлум нэ̄ Тавēн рōӈхувлас: ”Наӈын ōньсюм ос сяквтум ся̄нь сōтыӈыг та ōлнэ̄тэ!”28 Топ ань Ӣсус лāвыс: ”Тōрум лāтыӈ хӯлнэ ос хӯнтлынэ хōтпат сōтыӈыг ōлэ̄гыт”.
29 Ань мāхум акваг атхатнэ̄ныл мāгыс, Ӣсус потыртаӈкве патыс: ”Ань ōлнэ утыт лю̄ль мāхум. Тāн пōс хулиглан вōвēгыт, Иона пōсэ коны-пāл тāнанылн пōс хулиглан ат ēмты.30 Иона Ниневи мāхум мāгыс пōсыг ōлыс, Э̄лумхōлас Пы̄г ты рут мāхумн пōсыг ōлы тах.31 Сутытан хōталыт мōртым мā хōн-нэ̄ тах нōх-лю̄ли, ань йис ōлнэ мир сутитыянэ тах. Тав ань хосāныл Соломон*а мутрат ханисьтан мāгыс ёхтыглас. Ам Соломонныл яныгнуве.32 Ниневи мāхум сутытан хōталт аньйис ōлнэ мир сутытаӈкве ёхтэ̄гыт. Тāн Иона ханисьтап хӯлсыт ос Тōрум нупыл ё̄хсыт. Ам тай Ионаныл яныгнуве.
33 Нāйл пēламтым исвеся нэ̄мхōтпа кӣврыл пантым сытам мāн ат тусьтытэ. Най нōхнув тӯсьтаве, ань юв-сялтнэ хōтпатн посыӈ вос ōлыс.34 Наӈ самагын алпин посыг ōлэ̄г. Самагын пустāгыл ōлнэтэ̄н порат, алпин пуссын посыӈы̄г ōлы. Самагын ке тōпалыг, тōнт алпин кӣвырт ос турман.35 Сунсым ōлэн, кӣврынт ōлнэ посн турманыг ул вос ēмты.36 Наӈ алпин ке посыл тāгиньтым ōлы ос тав аквман турман лōмт ат ке ōньси, тōнт та янытэ̄т посыӈ ōлы, наӈ наиӈ лāмпа хольт нас вольгуӈкве патэ̄гын”.
37 Потыртаме āстум юи-пāлт акв фарисей такви палтэ Ӣсус тэ̄ӈкве вōвыстэ. Ӣсус юв-сялтыс ос пасан ватан ӯнтыс.38 Тэ̄нэ э̄лы-пāлыт кāтаге ат ловтме мāгыс ань фарисей хот-осьсятахтыс.
39 Кӯсяй тавēн лāвыс: ”Нāн фарисейт āны ос сāн коны-паланыл ловтыяны̄н, нāн кӣвранын кантыл ос тӯлмантан вāрмалил тāгиньтым ōлэ̄гыт.40 Номттāл утыт. Хōӈха коны-палыл ōлнэ вāрмалит вāрсанэ, кӣврыт ōлнэ вāрмалит ос тав вāрсанэ?41 Тāглыӈ āныяны̄н-сāнаны̄н нуса хōтпатн маēн, тōнт тах нāнти сыстамтахтэ̄гы̄н.
42 Нāнан саватпи ōлы тах, фарисейт, нāн Тōрумн мята, рута пум ос мōт тэ̄нэ пумыт ловит лōмтаныл тӯп мыгы̄н. Тōрум вēськат вāрмалянэ ос э̄рупсатэ нāн ёрувлāлыглыяны̄н. Тыи э̄ри вāруӈкве ос мōт вāрмалит ат оссувлаӈкве.
43 Фарисейт, нāнан саватпи. Нāн синагогат пуӈк мēстат ос ӯскан мāт янытлан лāтӈыт э̄руптыяны̄н.44 Нāнан саватпи, нāн намтāл сопамыт хурипат, мāхум тāнаныл вāтāл нумыл та ё̄мыгтыяныл”.
45 Сāккон ханисьтан акв хум Ӣсусн ювле-лāвыс: ”Ханисьтан хум, тох лāвиман, Наӈ ос мāнав саватыя̄нын”.46 Ань Ӣсус лāвыс: ”Нāнан ос саватпи, Сāккон ханисьтан хумит. Нāн мāхум сысн тāрвитыӈ хӯнтыт пиныяны̄н, нāнти тай тӯлёвлын ат нёвумтаптылы̄н ань ты хӯнтыт тотнэ мāгыс нё̄туӈкве.
47 Нāнан саватпи. Тōрум лāтыӈ тотнэ хумитын нāн хуриӈ сопамыт ӯнттэгы̄н, ты хōтпат нāн āсяны̄н алвēсыт.48 Ань нāн āсяны̄н вāрум накыт э̄сгиянын ос мāхмытн суссылтыяны̄н. Тāн Тōрум лāтыӈ тотнэ хумит аласаныл, нāн тāнанылн сопамыт ӯнттэгы̄н.49 Таимāгыс ань Тōрум сāв номтэ лāвылты: ‘Ам тāнанылн Тōрум лāтыӈ тотнэ хумит ос апостолыт кēтэ̄гум: тōват тāн тах алыяныл, мōтаныт ос ня̄влуӈкве патыяныл’.50 Таимāгыс нāн, ань ōлнэ утыт, мā ӯнтум пāсыл ōлнэ Тōрум лāтыӈ тотнэ хумит аламын мāгыс ойтхатуӈкве паттавēн:51 Авель сорменыл, Захария сорме мус. Захария йир пиннэ норма ос ялпыӈ кол халыт алым ōлыс. Сōль, Ам нāнан лāвēгум: нāн, ань ōлнэ утыт тыи пуссын мāгыс ōйтхатуӈкве паттавēн.
52 Нāнан, Сāккон ханисьтан хумит, саватпи. Нāн Тōрум ōвылтыт вāнэ номтыт туман нēлме тӯлмантаслы̄н. Нāн нāнки сялтуӈкве ат тахмаясы̄н ос мōтанытн торас вāрсын!”
53 Ӣсус минмыгтамēт, Сāккон ханисьтан кант мāим хумит ос фарисейт сāвсыр утыт урыл китыглаӈкве патсаныл, таве саватасаныл.54 Тав лāвум лāтӈанэ̄тыл тāн Таве нурын паттуӈкве ēмталасаныл.
*а 31 11:31 Соломон хōн – тыи Израиль хōн ōйка Давид тав пы̄ге ты. Āсе юи-пāлт 961 тāлныл 922 тāл мус йильпи эра э̄лы-пāлт хōныг ōлыс.
Глава 11
