Choose Language
Old Testament Books
New Testament Books
view with a second Bible
1 Та порат Ӣсус палт тōва мāхум ёхтысыт. Тāн Галилеят ōлнэ мāхум ялпыӈ колт ялыманыл урыл потыртасыт. Пилат тāн кēлпаныл Тōрумн тотум йир ӯит кēлпаныл ёт тэ̄лыгтасанэ.2 Ӣсус ювле-лāвыс: ”Нāн номсэгы̄н, тāн мōтанытныл карекыӈнувēг ōлнэныл мāгыс алвēсыт?3 Āти, тāн Галилея мōт мāхумныл карекыӈнувēг ат ōлсыт! Нāн пуссын аквтох порсэгы̄н тах, Тōрум нупыл ё̄ӈхуӈкве ат ке патэгы̄н.4 Нāн номсытēнт Силоам карыс колын патым ос алым та нёлоловхуйплов хōтпа Иерусалимт ōлнэ мōт мāхумныл янгыгсь ōвылн патым ōлсыт?5 Ам нāнан лāвēгум: āти, тāн янгыгсь ōвылн патым ат ōлсыт. Нāн ос Тōрум нупыл ё̄ӈхуӈкве ат ке патэ̄гын, тōнт аквтох нāн пуссын порсэгы̄н!”
6 Ӣсус ань тамле ханисьтап потыртастэ: ”Акв хōтпа кāрта кӣврет инжир нампа ӣйв ōньсис. Ос ань тав пил маныгтаӈкве ёхтыс ос нэ̄матыр ат хōнтумēт,7 метхумēн лāвыс: ‘Сунсэн, ам хурмит тāл ты йӣвыт пил кинсуӈкве ты ёхталэ̄гум, топ нэ̄матыр ат хōнтыглэ̄гум. Ёл-сāгрēлын, тав туп мā ё̄ре вы̄г’.8 Ань мēтхумэ лāвыс: ‘Кӯсяй, акв тāл сыс ос хультупталэ̄лын. Ам таве мāл хилылум, сё̄рыл пинылум.9 Мōтыт тāл пилын тэ̄лаве ке – ёмас, ат ке тэ̄лаве – таве ёл-сāгрēлн’”.
10 Сабат-хōталыт Ӣсус синагогат*а мāхум ханисьтас.11 Тот акван вāӈкыртахтум ос сохтыл лю̄люӈкв ат вēрмын нэ̄ ōлыс. Тав нёлоловхуйплов тāл āгм лылын тох саватавес.12 Ӣсус нэ̄ кāсаламēт, таве ляпан вōвыстэ ос лāвыс: ”Нэ̄кве, наӈ āгманынныл лыпась та патсын”.13 Ӣсус кāтагэ тав палттылэ пинсаге, нэ̄ аквтаторыг сохтыл лю̄люмтас ос Тōрум э̄сгуӈкве патыстэ.
14 Сабат-хōталыт мāхум пусмалтанэ̄тэ мāгыс синагога пуӈкхум мāхумн кантыӈыгсь лāвыс: ”Сāтыт хōт хōтал, рӯпата мāгыс ōлы. Тōнт тах ёхталэ̄н пусмалтахтуӈкве, сабат-хōталыт ул йиēн!”15 Топ ань Кӯсяй тавēн ювле-лāвыс: ”Китвӣльтуп утыт. Нāн халынт кāсыӈ утын ōсэ манос осёлэ нэ̄гим матэ̄ныл сабат-хōталыт хот ат пēстытэ ос витыл айтуӈкве ман ат вāнттытэ?16 Ты нэ̄ Аврāм тав āгитэ. Тав нёлоловхуйплов тāл сыс сатанан нэ̄гсалым ōсьвес. Таве сабат-хōтал ат рōви лыпась паттуӈкве?”17 Тох лāвмēт Тав нупылэ лаваныл нэ̄глум утыт пуссын э̄сырман патвēсыт. Пуссын мāхум Ӣсус вāрнэ ōлыглаттāл тэ̄латн ся̄гтсыт.
18 Ань Ӣсус тай лāвыс: ”Тōрум йильпи нот манхурипа ос мāныр ёт Ам таве мōртуӈкве вēрмилум?19 Тав кортница*б йӣв колассам хурипа. Э̄лумхōласн тав такви кāрта кӣвырн тэ̄лтувес. Тав яныгми, йӣввыг ēмты. Ос ань товлыӈ ӯйит тав таганэ̄н пити вāрēгыт”.
20 Ӣсус ōс иӈ лāвыс: ”Маныр ёт Ам Тōрум йильпи нот мōртылум?21 Тав ня̄ньсум хурипа. Нэ̄ хōтпа таве яныг колас āнын*в рāвтытэ ня̄нь вāрнэ мāгыс. Ня̄ньсум нōх-пāялты”.
22 Ӯсыт ос пāвлыт тара Иерусалимн миныматэ Ӣсус мāхум ханисьтасанэ.23 Хоттымат хōтпан Ӣсус китыглавес: ”Кӯсяюв, топ тōва хōтпат вēстхатэ̄гыт*гтах?”
24 Ӣсус ювле-лāвыс: ”Ё̄раны̄н пуссын пинэ̄н осься āви тара Тōрум йильпи нотн сялтуӈкве. Ам нāнан лāвēгум: сāв хōтпа тув сялтуӈкве āрталахтэ̄гыт, топ ат вēрмегыт тах.
25 Кол кӯсяй āвитэ лап ке пантытэ, нāн кон лю̄лим āви ратылы̄н, топ ань тав āвитэ ат пӯнсытэ. Нāн лāвегы̄н: ‘Кӯсяй, āвин пӯнсэ̄лын!’ Тав тах ювле лāви: ‘Ам нāнан ат вāганум. Нāн хотыл ёхтысы̄н?’26 Тōнт нāн тах лавēгы̄н: ‘Мāн наӈ ётын тэ̄сӯв, айсӯв. Наӈ мāн ӯсхуланувт мāхум ханисьтасын’.27 Тав тах ювле лāви: ‘Ам ат вāглум, нāн хотыл ōлэгы̄н. Сысы минэ̄н, нāн, лю̄ль вāрмалит вāрнэ утыт’.
28 Тот лю̄нсь ос пуӈк сихралтан суй тах суйты. Нāн тах Аврāм, Исāк, Яков ос Тōрум лāтыӈ тотнэ хумит пуссын Тōрум йильпи нотт кāсалыяны̄н, топ ань нāнти тув ат тāртавēн.29 Мāхум холы ēрныл, хōтал ӯнтэ ēрыл, лӯи мāныл ос алымāныл ёхтуӈкве патэ̄гыт, Тōрум йильпи нотт пасан вāтат ӯнтнэ мā вы̄гыт.30 Юи-ōвылт ōлнэ хōтпа Тōрум йильпи нотт ōвлыт ōлнэ хōтпаг ēмты, хоты ут ань ōвылыг ōлы, юи-ōвылн тах паты”.
31 Та сё̄ст матахмат фарисей Ӣсус палт йисыт ос лāвсыт: ”Тыгыл сысы минэн. Наӈ Иродн алуӈкве таӈхавен”.
32 Тав ювле-лāвыс: ”Минэ̄н ос ты осьмарыӈ охсарн лāвēн: ‘Ам тыхōтал ос холытан кулит кон-ня̄влэ̄гум ос мāхум пусмалтэ̄гум, топ хӯрмит хōталыт усь вāрмаля̄нум āстлыя̄нум’.33 Тыхōтал, холытан ос хӯрмит хōталыт Āнумн э̄ри минуӈкве, Тōрум лāтыӈ тотнэ хумит пуссын Иерусалимт тах алавет.
34 Иерусалим, Иерусалим! Тōрум лāтыӈ тотнэ хумит алнэ ӯс, Тōрумн кēтым хōтпат āхвтасыл пāхвтыяны̄н! Мӯӈи тармыл ӯнлын нэ̄ сиськурек хольт Наӈ ня̄враманын манах сё̄с Амти ляпамн виӈкве тахсанум. Топ нāн тох ат тахсын.35 Сунсэн сар! нāн ялпыӈ колы̄н хот-хӯляве тах, ос, лāвēгум, нāнан, Āнум воссыг ат кāсалы̄лын та сё̄с ёхтынэ̄тэ мус ос хунь нāн лāвегы̄н тах: ‘Кӯсяй наме мāгыс Йинэ хум э̄сгаве’”.
*а 10 13:10 синагога – еврей пōйксян кол
*б 19 13:19 кортница – ты русь лāтӈыл горчица
*в 21 13:21 яныг колас āны – хӯрумхуйпловкем литра
*г 23 13:23 вēстхатуӈкве – ты русь лāтӈыл спастись
Глава 13
