Choose Language
Old Testament Books
New Testament Books
view with a second Bible
1 Та юи-пāлт Ӣсус нёлсāт нупыл кит ханисьтахтын хум ōс пēрияс ос тāнаныл кит хōтпал кāсыӈ ӯсын Тав э̄лы-пāлэ̄т кēтсанэ.2 Ӣсус тāнанылн тох лāвыс: ”Яктланут сāв – яктлан хōтпа мосься. Таимāгыс яктланут Кӯсяй пōйкēн, сāвнув якытлан хōтпа кēты Такви тэ̄пканэ̄н.
3 Минэ̄н, Ам нāнан, палят хольт аквтопмат хāйтнутыт палт, кēтыянум.4 Ё̄т нэ̄матыр ул вуēн: олн, хӯрыг, лāгыл маснут. Лё̄ӈхыт нэ̄мхотъют ёт ёл ул лю̄льсэ̄н, нэмхотъют ёт ул потыртэн.5 Хоты колын пыл ат сялтэгы̄н, ōвлэ̄т лāвēн: ‘Ты колт урак вос ōлы’.6 Ос тот уракн хōйхатнэ хōтпа ōлы ке, тах нāн уракын тав ётэ хульты. Ос āти ке, тах ты нāн палтын ювле ёхты.7 Та колыт хультэ̄н, манарыл мивēн, таи тāēн-айēн, рӯпитан хōтпа рӯпата тынэ̄н хōйхаты. Колыт халт ул яласэ̄н.
8 Ӯсын ке ёхтэгы̄н ос ляпан ке вивēн, тōнт манарыл мивēн, таи тāēн.9 Āгмыӈ хōтпат пусмалтэ̄н ос тох лāвēн: ‘Тōрум йильпи нот нāн палтылын ляпат’.10 Ос ӯсын ёхтынэ̄н порат ляпан ат ке вивēн, ӯс хулытн минэ̄н ос лāвēн:11 ‘Мāн лāгланувн ханам нāн ӯсын сэ̄й нāнан ювле паргалтыянув. Топ ань ваелы̄н, Тōрум йильпи нот ляпат ōлы’.12 Ос нāнан лāвēгум: Сутытан хōтал ты ӯсын Содом ӯсныл тах лю̄льнувēг ēмты.
13 Мāныр саватпи наӈын, Хоразин ӯс! Маныр саватпи наӈын, Вефсаида ӯс! Нэ̄н Тōрум вāрум ё̄р вāрмалит вāсиньтасаны̄н. Тир ос Сидон ӯсыгт ōлнэ мāхум вāсаныл ке тамле ё̄р вāрмалит, хосат тāгыл хӯлюм халт ӯнлыманыл карек вāруӈкве ат кāсасясыт.14 Ань Тирн ос Сидонн сут хōталыт нāнанныл кӯпнитнув паты.15 Наӈ ос, Капернаум ӯс, тōрумн хунь нōх-āлмавен? – Āти, наӈ тах ёлы-тōрумн лывен.16 Нāнан хӯнтлын хōтпат, Āнум хӯнтлыяныл. Нāнан воськасан хōтпат, Āнум воськасыяныл. Āнум воськасан хōтпат, Āнум Кēтум ут воськасыяныл”.
17 Ӣсус кēтум нёлсат нупыл кит хōтпа ювле ся̄гтым ёхтысыт ос лāвсыт: ”Ханисьтан хумиюв! Наӈ намын хосыт кулит мāнав хӯнтлым иӈ ōлэ̄гыт”.18 Ӣсус тāнанылн лāвыс: ”Ам сатана тōрумныл, сяхыл ня̄л хольт, ёл-рагатаме вāслум.19 Ам нāнан ё̄рыл мисанум ялпыӈ ӯит ос пурхатнэ хомлахыт ос сāвсыр врāг ё̄ранэ лāгланынт ялыглаӈкве. Нэ̄матыр нāнан лю̄ль ат вāри.20 Лылытн хӯнтлынэ̄н мāгыс ул ся̄гтэ̄н, наманы̄н тōрумыт хансыманыл мāгыс ся̄гтэ̄н”.
21 Та порат Ӣсус, Ялпыӈ Лылыл тāгиньтым ся̄гтыс, ос лāвыс: ”Янытлылум Наӈын, Āсюм*а, тōрум ос мā Кӯсяй! Наӈ мутраӈ ос номтыӈ хōтпāтныл хōт-тӯйтум накын ня̄врам хурип хōтпатын хӯлтыслын. Сōль, Āськве, Наӈын тох э̄рыс.
22 Тыи вāрмалит Āнумн пуссын Āсюмныл маим ōлсыт. Āсе коны-пāл, Пы̄ге хōӈха, нэ̄мхотъютн ат вāве. Āсь ос нэ̄мхотъютын Пы̄ге коны-пāл ат вāве. Ос та хōтпан вāве, хотъютын тах Пы̄г Āсе хӯлтуӈкве тахмаги”.
23 Ӣсус ханисьтахтын хумиянэ нупыл сунсым тāнанылн лāвыс: ”Сōтыӈыг та самыг ōлэ̄г, манарыг тыи тах сунсэ̄г!24 Ос нāнанн лāвēгум: Тōрум лāтыӈ тотнэ сāв хōтпат, хōныт нāн хулыглам-сунсыглам наканын сунсуӈкве-хулуӈкве тахсаныл. Ат та васиньтасаныл, ат та хӯлыгласаныл”.
25 Сāккон ханисьтан акв хōтпа нōх-лю̄лис ос Ӣсус āрталым Таве китыгластэ: ”Ханисьтан хум! Акваг э̄лаль ōлнэм мāгыс, мāныр āнумн э̄ри вāруӈкве?”26 Ӣсус ювле-лāвыс: ”Сāкконыт мāныр хансым ōлы? Наӈ тот мāныр ловиньтэ̄гын?”27 Таитэ ювле-лāвыс: ”Кӯсяйн э̄руптэ̄лын, наӈти Тōрмын, сымын янытэ̄т, лылын янытэ̄т, номтын янытэ̄т ōнсьēлын, ё̄рыл янытлэ̄лын, ос наӈтинāнын э̄руптанэн хольт ля̄па хōтпан тох э̄руптэ̄лын”.28 Ӣсус тавēн лāвыс: ”Наӈ сōлиг лāвсын. Аквтох вāрен, тōнт тах Тōрум нот палыт ōлуӈкве патэ̄гын”.
29 Сāккон сирыл ōлнэ̄тэ мāгыс, ос таквинатэ ёмасы̄г паттынэ̄тэ мāгыс тав Ӣсус китыгластэ: ”Ос ам ляпа хōтпам хōӈха?”
30 Ювле Ӣсус тавēн лāвыс: ”Акв хōтпа Иерусалимныл Иерихонн миныматэ сылкатн пуввес. Сылкат таве ратсаныл, нюлмил вāрсаныл, маснутанэ армалтасаныл ос лылытэ ойигпан хурил лё̄ӈхыт оссувласаныл ос та минасыт.31 Та лё̄х хосыт акв пӯп-ōйка ё̄мантас. Рāтым хōтпа кāсаламēт тав э̄лаль минас.32 Левит ōйка ос тыг ёхталас. Рāтым хōтпа касаламēт, тав ōс сысы минас.
33 Ань Самарияныл ōлнэ хоттымат хум, лё̄х хосыт миныматэ, рāтым хōтпа кāсаламēт, ёл-лю̄лис, тав сыме ся̄ргуӈкве патыс ты хōтпа мāгыс.34 Ляпан ёхтумēт тав рāтым хōтпа нюлмиянэ пēрсаласанэ, вōил ос винал ловтсанэ. Осёлэ сысн тāлттым мир хӯлнэ колн тув-тотыстэ ос тот ты хōтпа ӯргалым ōньсистэ.35 Холытан тав кол кӯсяйн кит динарий мис ос лāвыс: ‘Ты хōтпа ӯргалэ̄лын. Ты олныт коны-пāл сāвнув ке ойтхатэ̄гын, ёхтынем порат ам тах ос мы̄глум’.36 Наӈ сиринт хōӈха ты хӯрумныл сылкат катн патум утын ляпа хōтпаг ōлы?”
37 Сāккон ханисьтан хум лāвыс: ”Таве сāлитан хōтпа”. Ань Ӣсус тāвен лāвыс: ”Мӣнэн, наӈ ōс аквтох вāрен!”
38 Ӣсус ханисьтахтын хумиянэ ёт э̄лаль миныманыл аквсёс ань акв пāвылн ёхтысыт. Мāрппа нампа э̄ква Тав такви палттэ вōвыстэ.39 Тав Мария нампа ягāги ōньсис. Ӣсус лāглаге тытн ӯнтыс ос Тав потранэ хӯнтлыс.40 Ань Мāрппа тай кол сорит вāрыс. Тав Ӣсус палт йис ос лāвыс: ”Кӯсяй! Кол кӣвыр сорит ягāгим пуссын амттēмумын вāруӈкве хӯльтуптасанэ. – Наӈ сиринт тыи ёмас? Лāвēлын, вос āнумн нё̄ты”.41 Ань Кӯсяй ювле-лāвыс: ”Мāрппа, Мāрппа, наӈ сāвсыр тэ̄лат ōвылтыт номсахтэ̄гын ос вāриянын.42 Акв вāрмаль тӯп сяр э̄рнэг ōлы. Мария ёмаснув ут пēриястэ – тыи тах нэ̄мхотъютн ат армалтаве”.
*а 21 10:21 Тōрум Āсь – ты Тōрум
Глава 10
