Choose Language
Old Testament Books
New Testament Books
view with a second Bible
1 Ӣсус китхуйплов ханисьтахтын хум вōвыс. Пуссын кулит тармыл ё̄рыл ос властил мисанэ ос āгмыӈ утыт пусмалтан ё̄рыл мисанэ.2 Тāнаныл мир халын Тōрум йильпи нот урыл потыртаӈкве ос āгмыӈ хōтпат пусмалтаӈкве кēтсанэ.3 Тāнанылн лāвыс: ”Лё̄ӈхын ёт нэ̄матыр ул вуēн, – сувтāл, хӯрыгтāл, ня̄ньтāл, ōлнтāл минэ̄н ос кит маснут ул вуēн.4 Хотты колын ке сялтэгы̄н, тот миннэ̄н пора мус ōлэ̄н.5 Хотты ӯсыт мāхумытн ат ке мӯйлтавēн, тōнт, миннэ̄н э̄лы-пāлыт, сэ̄иӈ лāгланы̄н хот-паргалтэ̄н. Тōнт тāн вос торгамтыяныл, хумус вāрсыт”.
6 Пāвлыт янытыл ёмас лāтыӈ тотым, мāхум пусмалтым та минмыгтасыт.
7 Ирод, Галилея пуӈкхум, ты ля̄ххалыт пуссын хӯлмēт номтэ янгыгсь хот-сакыс. Тōват ань лāвыглāлсыт, э̄рттам Иоан витн тӯлнэ хум тав нōх-ялтыс.8 Мōтаныт лāвыглāлсыт эрттам Тōрум лāтыӈ тотнэ Илия тав хоттыл ёхтыс. Тōват лāвыглāлсыт эрттам Тōрум лāтыӈ тотнэ хумитныл акваныл нōх-ялтыс.9 Ирод лāвыс: ”Иоан пуӈкве сāгруӈкве ам амти лāвыгласум – тав холас. Ты Э̄лумхōлас аман хōӈха? Тав урēтыл ам тамле потрыт хӯлэ̄гум?” Ирод аквписыг Ӣсус кāсалāлуӈкве кинсыстэ.
10 Апостолыт ёхтуманылт тāн сиремус пуссын вāрум вāрмаляныл ōвылтыт Ӣсусн потыртасыт. Ӣсус тāн ётаныл ōлтāл мāн Вифсаида нампа ӯс ляпан минас.11 Топ ань сāв мāхум та урыл хӯнтамласаныл ос Тав юи-пāлэ̄т минмыгтасыт. Ӣсус тāнаныл ляпан висанэ ос Тōрум йильпи нот ōвылтыт тāнанылн потыртас ос āгмыӈ хōтпат пусмалтасанэ.
12 Хōтал ӯнтнэ порат китхуйплов ханисьтахтын хӯмиянэ Ӣсус палт ёхтысыт ос лāвсыт: ”Ты мāхум сысы кēтэ̄н, лāвēн, – тāн ляпат ōлнэ пāвлытн вос минэ̄гыт ос тот э̄т хӯлнэ мā ос тэ̄нут вос хōнтэгыт. Ты мā – сытам мā”.13 Ӣсус тāнанылн лāвыс: ”Нāн нāнти тāнаныл матыр тэ̄нутыл маēн!” Тāн ювле-лāвсыт: ”Мāн ат ня̄нь ос кит хӯл тӯп ōньсēв. Наӈ э̄рыӈ таӈхēгын, мāн ань вос минэ̄в ос ты мāхум мāгыс тэ̄нут вос ёвтэ̄в?”14 Тот ань сāвитэ̄т атахкем сотыра хум ōлыс. Топ ань Ӣсус ханисьтахтын хумиянэ̄н лāвыс: ”Ты мāхумын лāвēн – тāн атпан хōтпа анял вос ӯнтэ̄гыт”.15 Тāн тох та вāрсыт, тот ōлум мāхум пуссын ёл-унттувēсыт.16 Тувыл Ӣсус ат ня̄нь ос кит хӯл висанэ, ос тōрум нупыл нōӈхаль сунсым Тōрум Āсин пӯмасипа лāвыс. Тувыл ня̄нит лōмтыг сакватасанэ ос ханисьтахтын хумиянэ̄н мисанэ. Лāвсанэ – тэ̄нутыт мирн вос уртыяныл.17 Пуссын пōйтнэ̄г тэ̄сыт. Хультум арыг тэ̄нутыт акван-атсаныл ос китхуйплов хусап ты хультум тэ̄нутыл атхатас.
18 Аквнакыт Ӣсус таквкēтэ ōлнэ мāт пōйиксяс. Ханисьтахтын хумиянэ Тав ётэ ōлсыт. Тав тāнаныл китыгласанэ: ”Мāхум мāныр лāвēгыт, Āнум хōӈхаг тāн ōньсияныл?”19 Ань тāн ювле-лāвсыт: ”Тōват лāвēгыт – Наӈ Иоан витн тӯлнэ хумы̄г ōлэ̄гын, мōтаныт номсэ̄гыт – Илия, хурмитыт ос тох лāвēгыт – Наӈ ань нōх ялтум йис порат ōлум Тōрум лāтыӈ тотнэ хум”.20 Ӣсус ань тāнанылн лāвыс: ”Нāн ос хумле номсэ̄гы̄н, хōӈхаг Ам ōлэ̄гум?” Ань Пēтыр Тавēн ювле-лāвыс: ”Тōрум Кристос”.21 Тав тāнанылн тāкысь лāвыс – ты ōвылтыт нэ̄мхотъютын ул вос потыртэ̄гыт.22 Ӣсус лāвыс: ”Э̄лумхōлас Пы̄гн сāв тāрвит савалап тотуӈкве э̄ри. Яныг хōтпатн, сяр яныг пӯпытн ос Сāккон ханисьтан хумитн Тав ат пирмайтаве. Та юи-пāлт Тав алаве тах. Тувыл Тав хӯрмит хōталыт тах нōх-ялты!”
23 Ань Ӣсус тāнанылн лāвыс: ”Хотъют Ам юи-пāлумт йиӈкве таӈхи, таквинāтэ кāсыӈ хōтал вос ёрувлытэ ос такви пēрнатэ вос ёт выгтэ ос Ам юи-пāлумт вос юв.24 Хōӈха такви лылытэ ӯргалаӈкве таӈхи ке, тах таве хот-тыпылтытэ. Хотъют Ам мāгсылум лылытэ мыгтэ ке, тав лылытэ э̄лаль тах ōньситэ.25 Мāныр мāгсыл э̄лумхōласн пуссын мā-вит кāтыт ōньсюӈкве, тāквинāтэ ке саватаӈкве ос порсуӈкве?26 Хотъют Āнумныл ос Ам лāтӈанумныл э̄ссамты, тавēныл Э̄лумхōлас Пы̄г ōс э̄ссамты тах – хунь ань Такви посэ ёт, Āсе ос ялпыӈ Ангелыт посаныл ёт ёхты тах.27 Сяр мāк нāнан лāвēгум: тыт лю̄льнэ мāхум тōват сорумн патнэ̄ныл э̄лы-пāлт тах Тōрум йильпи нот кāсалыяныл”.
28 Тох лāвме юи-пāлт нёлоловкем хōтал хультыс. Ӣсус Пēтыр, Иоан ос Яков ёт висанэ ос тāн ётаныл ур тармыл пōйиксяӈкве минас.29 Пōйиксямēт Ӣсус вильтэ хот-пēнтхатас, маснутанэ сяр войканыг, тӯйт суртгын хурипāг ēмтсыт.30 Ань Тав ётэ кит хум потыртасы̄г. Ты ань Моисей ос Илия тэ̄н ōлсыг.31 Тэ̄н мувлахитэ̄нт ос тōрум пос ōлыс. Тэ̄н Ӣсус миннэ вāрмаль ōвылтыт потыртасы̄г, ты вāрмаль Иерусалимыт тавēн э̄ри вāруӈкве.
32 Пēтыр ос ханисьтахтын хумит тав ётэ пуссын тāкысь ёл-оилматвēсыт. Нōх-сāйкаламанылт тāн Ӣсус посе ос Тав ётэ лю̄льнэ кит хум кāсаласаныл.33 Та хумы̄г Тавēныл минмыгтанэ̄тэ̄н порат Пēтыр Ӣсусн лāвыс: ”Ханисьтан хумиюв, мāнавн тыт такем ёмас ōлуӈкве. Тыт хӯрум колпāл тӯсьтэ̄в: аква – Наӈ мāгсылын, аква – Моисейн, аква – Илиян”. Ань Пēтыр ат вāстэ, мāныр лāвыс.
34 Пēтыр тох лāвме торыг тул нэ̄глыс, тāн тулн лап-тӯлвēсыт. Тулн лап-тулыманылт ханисьтахтын хумит хот-рохсысыт.35 Тулныл турсуй сумыллас: ”Тыи – Ам пēриям Пы̄гум. Таве хӯнтлэ̄н”.36 Турсуй сōймум юи-пāлт Ӣсус таквтēтэ хультыс. Ӣсус ханисьтахтын хумиянэ астал ōлсыт. Мāныр тāн вāсиньтасыт, нэ̄мхотъютн та хōталытт ат потыртāлсыт.
37 Холытан нё̄рныл вāглуманыл порат мир яныг аня Ӣсус ля̄льт йисыт.38 Ань мāхум халныл аквмат ут рōӈхалтахтыс: ”Ханисьтан хум, Наӈын пōйкилум, йиен ос ам пы̄гум ля̄льт āӈкватāлэн. Тый ам ōсьнэ акв ня̄врамакем.39 Тав лю̄ль лылын пуваве, ос ня̄врамум илттыг рōӈхуӈкве ōвылтахты. Ос кāтанэ-лāгланэ акван-хартавет, сӯпе нēрыл пāйтахты. Пы̄грисюм кулин аквписыг саватаве, сытамыл ōлуӈкве нэ̄мхуньт ат хультуптытэ.40 Наӈ ханисьтахтын хумиянын ам вōвыглāлсанум кос, топ тāн ат вēрмысаныл таве кон-ня̄влуӈкве”.41 Ӣсус ювле-лāвыс: ”О, агттāл ос хот-сакум мāхум! Хота мус Āнумн нāн ётын ōлуӈкве ос нāнан вēритаӈкве? Пы̄гын тыг тотэ̄лын”.42 Пы̄грись йинэ̄тэ порат кулин мāн ёл-паттувес ос тōргалтаӈкве патвес. Ӣсус ань кульн пōхан-минуӈкве лāвыс, пы̄грись пусмалтастэ ос āсēн ювле-мистэ.43 Мāхум пуссын Тōрум яныг ё̄рēтыл осятахтасыт.
Мāхум Ӣсус тэ̄ланэ̄тыл осятахтынэныл порат, Тав ханисьтахтын хумиянэ̄н лāвыс:44 ”Ань нāнан лāвнэм ля̄ххал мӯсхалы̄г хӯнтлэлы̄н: Э̄лумхолас Пы̄г мусьэ̄ртын мир кāтын миве”.45 Ханисьтахтын хумиянэ ты лāтӈыт ат торгамтасаныл. Лāтӈыт номтаныл тāнанылныл хот-тӯйтым ōлыс – ань тāн ул вос торгамтанэ̄ныл мāгыс. Ӣсус китыглаӈкве ты ōвылтыт пилсыт.
46 Ханисьтахтын хумиянэ халанылт воритотуӈкве патсыт, ань хотъютаныл сяр яныг.47 Ӣсус ань тāн номтаныл вāим мāнь ня̄врамакве вистэ ос Такви пōхатэ̄н тӯсьтыстэ48 ос тāнанылн лāвыс: ”Хотъют Ам намум хосыт ты ня̄врам ляпан-выгтэ, таи Āнум ляпан-выг. Āнум ляпан-винэ хōтпа Āнум Кēтум ут ос ляпан-выгтэ. Нāн халы̄нт сяр мāнь ут – тав сяр яныг”.
49 Иоан ювле-лāвыс: ”Ханисьтан хумиюв, мāн Наӈ намынтыл кулит ня̄влын хōтпа вāсиньтаслув, мāн таве хот-пōйилттаслув, тав мāн ётув ат ōлнэ̄тэ мāгыс”.50 Ань Ӣсус тавēн лāвыс: ”Таве ул пōйилттэ̄лы̄н, кāсыӈ хōтпа нāн торгылы̄н ат ке ōлы, тав нāн ётын ōлы”.
51 Ӣсус мāк сёпитахтас Иерусалимн минуӈкве, хунь тōрумн нōх-виннэ поратэ ёхтыс.52 Ӣсус такви э̄лы-пāлэ̄т ля̄ххал тōтнэ хōтпат кēтсанэ. Тāн минасыт ос Самарият*а ōлнэ пāвылт Ӣсус ёхтын кастыл сёпитахтасыт.53 Ӣсус тот ляпан ат вуйвес, Тав ань Иерусалимн миннэ хōтпа хурип ōлыс.54 Тыи кāсаламēнт, тав ханисьтан хумияге – Яков ос Иоан лāвсы̄г: ”Ханисьтан хумиюв! Таӈхēгын ке, мāн Илия хольт нāй тōрумныл ёл-вāглуӈкве лāвилув ос тāнаныл порслаӈкве?”55 Топ ань Ӣсус тыи мāгыс тāнаныл мось ля̄выльтасанэ.56 Тувыл тāн мōт пāвылн та минасыт.
57 Лё̄х хосыт миныманылт хоттымат хōтпа Ӣсус нупыл лāвыс: ”Хоталь пыл Наӈ ат минасын, ам Наӈ юи-пāлынт минуӈкве патэ̄гум”.58 Ӣсус ювле-лавыс: ”Охсарыт вōӈхат ōньсēгыт, товлыӈ ӯйит питит ōньсēгыт, Э̄лумхōлас Пы̄гн нэ̄мхōт ӯсьлахтуӈкве”.
59 Мōтанын Ӣсус лāвыс: ”Ам юи-пāлумт йиен”. Таитэ ювле-лāвыс: ”Анум ōвлэ̄т āсюм савыӈ канн ёл-ӯнттуӈкве тāрāтэ̄лн”.60 Топ Ӣсус тавēн лāвыс: ”Холам утыт тāнти вос холам утаныл ёл-сё̄питыяныл. Наӈ тай йиен ос Тōрум йильпи нот тотэ̄лын”.
61 Мōтан ань ōс лāвыс: ”Кӯсяй, ам Наӈ юи-пāлынт минэ̄гум, топ ань юн ōлнэ мāхманум ёт ōсъёмасӯлум лāтыӈ лāвуӈкве анум тāратэ̄лын”.62 Ӣсус ювле-лāвыс: ”Тэ̄пкан сакватаӈкв ōвылтахтам хōтпа ювле сунсым ке ōлы – Тōрум йильпи нотн сялтуӈкве ат хōйхаты”.
*а 52 9:52 Самария – Палестина мā котильт Самарият самария нампа мāхум ōлсыт. Самария ос Юдея мāхум халт акваг вори тотнэ вāрмаль ōлыс.
Глава 9
