Choose Language
Old Testament Books
New Testament Books
view with a second Bible
1 Та юи-пāлт Ӣсус мирн Тōрум ӯнлын йильпи нот урыл ёмас ля̄ххал тотым пāвлыт ос ӯсыт тāра яласас. Тав ётэ китхуйплов апостол ōлсыт2 ос кулитныл ос āгмытныл ялтуптам матахмат нэ̄ хōтпа тāн ётаныл ōлсыт. Тāн халанылт Магдала Мария ōлыс – тав кӣврēныл Ӣсус сāт куль кон-ня̄влыссанэ,3 Иоанна – Ирод колыт кӯсяйлахтын Хуза нампа хум тав нэ̄тэ, Сусанна ос сāв мōт нэ̄ хōтпат. Тāн Ӣсусн ос ханисьтахтын хумитн тāнти ōсьнэ олнанылныл нё̄тсыт.
4 Сāвсыр ӯсныл сāв мир Ӣсус палт йисыт, Тав тāнанылн тамле ханисьтап потыртас:5 ”Колас сам ӯнттын хум*а колас сам ӯнттуӈкве квāлыс. Хунь тав колас самыт пāхвтысанэ, тōваныл лё̄ӈх вāтан рагатасыт, тāн тармыл ялыглавēсыт, ос ӯйрисытн атапавēсыт.6 Тōва колас самыт āхвтасыӈ мāн рагатасыт, топ ань нōх-нэ̄глапаманыл юи-пāлт виттāл ōлнэ̄ныл мāгыс тув-тōссыт.7 Тōват ос пēлялахтын пумыт халын рагатасыт, пēлялахтын пумыт яныгмананыл юи-пāлт усь нэ̄глапам ня̄ньпумквет тув-тōслысаныл.8 Тōват ос пōртыӈ мāн патсыт, ос яныгмасыт, яныгсат сё̄с сāвнув колас сам тэ̄лыс”. Ань тыи лāвме юи-пāлт Тав тāкысь лāвыс: ”Паль ōсьнэ кāсыӈ хōтпа вос хӯлытэ”.
9 Ханисьтахтын хумиянэ Ӣсус китыгласаныл, ты потыр мāныр хӯлтыглы.10 Ань Тав лāвыс: ”Нāнан Тōрум йильпи нот сытамыт вāӈкве маим ōлэ̄гыт, ос мōтанытн – ханисьтан потрыт: тāн тāнти саманылт сунсэ̄гыт – ат кāсалэ̄гыт, тāнти палянылт хӯнтлэ̄гыт – ат торгамтэ̄гыт.
11 Ты ханисьтап хӯлтыглы: колас самыт – ты Тōрум лāтӈе.12 Лё̄х вāтан рагатам колас самыт таи хӯлтыглэ̄гыт: тōва хōтпат Лāтыӈ хӯлыяныл, топ ань я̄вол ёхты ос тāн сыманылныл та лāтыӈ хот-выгтэ. Тāн хӯлум лāтӈы̄тн агтуӈкве ат вēрмēгыт ос вēстыл ōньсюӈкве ат вēрмēгыт.13 Āхвтас тармыл патум утыт таи хӯлтыглэ̄гыт: тōва хōтпат Тōрум лāтыӈ хӯнтлыяныл ос ся̄гтым хӯлыяныл, топ тāн тāр ат ōньсēгыт, таимāгыс тāн мосьсяквēн агтылын ёхталавет, топ ань савалан вāрмаль ёхтын порат тāн агтыланыл тыпылтыяныл ос Тōрумныл сысы ё̄ӈхēгыт.14 Пēлялахтын пум халын патум колас самыт – тай та хōтпат, хотъютыт ань лāтыӈ хӯлыяныл, топ тāн ōлнэ̄ныл сирыл аквтох э̄лаль ōлэ̄гыт, тох сёлыӈыг, кāсыӈыг ōлыманыл пуссын воньсялыг та минэ̄гыт, тāн ат понсэ̄гыт.15 Пōртыӈ мāн патум колас самыт хӯлтыглэ̄гыт: ёмас, сыстам сымыл Тōрум лāтыӈ хӯнтлынэ̄ныл юи-пāлт таве ӯргалым ōньсияныл. Тāн вēритым ōлыманыл мāгыс колас сāманыл понсэ̄гыт.
16 Пēламтым исвесься нэ̄мхотъют кӣврыл ат пантытэ, пēрина ёлы-пāлын ат тӯйтыте, юв-ся̄лтнэ хōтпатн пос минэ мāгыс тав норман ӯнттытэ.17 Сытамыӈ утыт пуссын осн нэ̄глэ̄гыт. Тӯйтыглым утыт пуссын осн нэ̄глэ̄гыт, тāра-патэ̄гыт.18 Ань таимāгыс сиремус хӯнтлэ̄н. Хōӈха ōньси, таин миве тах. Хōӈха ат ōньси, тавēныл ōньсюӈкве ловиньтан утэ хот-виве”.
19 Ань Ӣсус палт ся̄не ягпыганэ ёт ёхтыс. Мāхумн мӯвылтыматэ паттат, тāн Тав ля̄патэ̄н йиӈкве ат вēрмысыт.20 Мāхум Тавēн лāвсыт: ”Ся̄нин ягпыганын ёт кон-лю̄лēгыт, Наӈ ётын хōнтхатуӈкве таӈхēгыт”.21 Ань Ӣсус ювле-лāвыс: ”Ам ся̄нюм ос Ам ягпыганум – тāн Тōрум лāтыӈ хӯнтлын хōтпат, та лāтыӈ сирил ōлнэ хōтпат”.
22 Аквмат хōталыт Ӣсус ханисьтан хумиянэ ёт хāпын тāлсыт. Ӣсус тāнанылн лāвыс: ”Тӯр та пāлн унсэ̄в”. Ань тāн та мынмыгтасыт.23 Миннэ̄ныл сыс Ӣсус ёл-оилматвес, ань яныг вōтас ēмтыс, хāпаныл āмараӈкве патвес, тāн пилысьман патвēсыт.24 Тав палттылэ ёхтуманылт ханисьтан хумиянэ Таве нōх-сāйкатасаныл ос лāвсыт: ”Ханисьтан хумиюв, мāн ты порсэ̄в!” Сāйкаламēт Тав вōт ёл-пōйилттастэ ос ся̄рысь хумпыт нупыл кантыӈысь ля̄галас. Вōтэ патыс, тавантыг ēмтыс.25 Ӣсус тāнанылн лāвыс: ”Хōт ōлы нāн агтылын?” Рохтым ос осятахтым тāнти халанылт китыглахтасыт: ”Тав аман хōӈха? Тав витн ос вōтн лāвуӈкве вēрми. Тэ̄н тавēн хӯнтлэг?”
26 Тāн Галилеяныл та пāлыт ōлнэ Гераса нампа мāн уссыт.27 Хāпныл пāг-квāлме торыг Тав палтэ ӯсныл ёхтум хōтпа ляпан йис. Ты хōтпа кулитн пувим ōлыс. Тав хосат тāгыл маснуттāл ōлыс, тав колэ̄т ат ōлыс, – тав савыӈкан кēрасыт ōлыс.28 Ӣсус кāсаламēт тав рōӈхувлас, Тав лāглаге э̄лы-палын мāн ёл-вуськасахтыс ос тāкысь ля̄галас: ”Мāныр Наӈын āнумныл э̄ри, Ӣсус, Тōрум Пы̄г? Наӈын пōйкилум, āнум ул саватэ̄лын!”29 Ань Ӣсус куль ты хōтпа кӣвырныл кон-минуӈкве лāвыстэ. Ты хōтпа кулин аквписыг пувиньтāлвес. Тав кāтанэ-лāгланэ тēр-квāлгыл нэ̄гсалāлвесыт, ӯрим ōньсиглāлвес, топ ань тав кāсыӈ порат тēр-квалгыт хот-маныгтāлсанэ. Кӣврēт ōлнэ куль таве сытам мāн минуӈкве хуйтыглāлыстэ.30 Ань Ӣсус таве китыгластэ: ”Наӈ намын мāныр?” Тав ювле-лāвыс: ”Легион”*б. Ань та хōтпа сāв кулитн пӯвим ōлыс.31 Кулит Ӣсус пōйкысаныл: ”Мāнав паттатāл мāн ул кēтэ̄н”.
32 Та ляпат, нёрыт, пӯрысь яныг аня ӯргалавес. Кулит Ӣсус пōйкысаныл – пӯрсит кӣвырн сялтуӈкве вос тāртыянэ. Ань Тав тāнаныл тāртсанэ ся̄лтуӈкве.33 Кулит хōтпа кӣвырныл кон-квāлсыт ос пӯрсит кӣвырн сялтсыт, ань пӯрсит акв анял карыс сып ватаныл тӯрн вуськасахтасыт ос витн та сялтсыт.
34 Тыи кāсаламанылт пӯрысь ӯрнэ хумит рохтым э̄л-оясыт ос ты ōлум нак ōвылтыт ляпат ōлнэ павлыӈ ос ӯсыӈ мирн потыртасыт.35 Мāхум сунсуӈкве ёхтысыт, ань мāныр нак ēмтыс. Тāн Ӣсус палт ёхтысыт, Ӣсус лāглаге тытыт ӯнлын хōтпа кāсаласаныл. Тав кӣврēныл кулит кон-минасыт. Тав маснутыӈ ōлыс, номтыӈ-сāйтыӈ ōлыс. Мāхум тыи кāсаламанылт хот-рохтысыт.36 Ты нак вāсиньтам мāхум кулин пувим хōтпа пусмалтыматэ ōвылтыт мōтанытн потыртасыт.37 Гераса мāт ōлнэ янгыгсь рохтум мир пуссын Ӣсус сысы минуӈкве пōйкысаныл. Тōнт Ӣсус хāпын тāлыс ос ювле та минас.38 Кулянэ ня̄влым хōтпа Ӣсус ёт минуӈкве вōвхатас, топ ань Ӣсус таве сысы кēтыстэ. Тав лāвыс:39 ”Юв минэн ос мāхманын лāвен, Тōрумн мāныр яныг ёмасыл вāрвēсын!” Ань та хōтпа минас ос ӯс янытыл потыртас, мāныр яныг ёмасыл тав Ӣсусн вāрвес.
40 Галилеян ёхтумēт Ӣсус сāв мāхумн янытлавес. Пуссын Таве ӯрсаныл.41 Ань Ӣсус палт Яир нампа синагога пуӈкхум ёхтыс. Тав Ӣсус лāглаге тытн патыс ос Тав такви колэ̄н минуӈкве пōйкыстэ.42 Тав китхуйплов тāл яныт акв āги тӯп ōньсис, āгитэ сорумн патым хуйнэ мāт хуяс. Яир палт миннэ̄тэ сыс, лё̄ӈхыт, Ӣсус сāв мāхумн акван-марылтāнтвес.43 Тāн халанылт акв āгмыӈ нэ̄ ōлыс. Тав китхуйплов тāл кēлпе сōсхатнэ āгм ōньсис. Тав нэ̄мхотъютын пусмалтаӈкве ат вēрмувес. Лēккарытн мāныр ōньсис пуссын тēпыл мисанэ.44 Ӣсус палт сысэ̄ныл ляпамтахтас ос Тав маснут ōвылэ̄н пувумтахтас. Ань аквтыторыг кēлпе сōсхатуӈкве пойтыс.45 Ӣсус китыглахтас: ”Хōӈха ам палттум пувумтахтыглас?” Топ нэ̄мхотъют ат лāвхатыс. Пēтыр ос тав ётэ ōлум хōтпат лāвсыт: ”Ханисьтан хумиюв, мир Наӈын мувылтасаныл ос акван-марылтасаныл”. Ань Ӣсус лāвыс:46 ”Хоттымат хōтпа ам палттылум пувумтахтыглас. Ам хӯнтамласлум, хумус кӣврумныл ё̄рум кональ мины”.47 Тōнт нэ̄ торгамтастэ, тав сытамыг ат хультыс. Янытэ̄т тōргим, тав Ӣсус ляпан йис ос Тав лāглаге э̄лы-палын патыс. Тав мāхумн вос хӯлаве – тāкысь лāвыс – Тав палттылэ манрыг пувумтахтыглас ос хумус тав аквта тāра пусмалтахтас.48 Ань Ӣсус тавēн лāвыс: ”Āгитем, наӈ наӈти агтылы̄н пусмалтавēсын, ротты̄г минэн!”
49 Ань Тав тох лāвнэ̄тэ торыг синагога пуӈкхум колэ̄ныл хōтпа ёхтыс, ос лāвыс: ”Наӈ āгин сорумн патыс, Ханисьтан хум воссыг ул саватэ̄лын”.50 Ӣсус ань тыи хулмēт, ювле-лāвыс: ”Ул пилэн, топ агтэн, ос āгин тах пусми”.51 Кол ляпан ёхтумēт нэ̄мхотъют Тав ётэ юв-сялтуӈкве ат тāратас. Топ ань Пēтыр, Яков, Иоан ос āгирись ся̄няге-āсяге юв тартсанэ.52 Тāн сорумн патум āгирись мāгыс пуссын лю̄сьсыт ос сāваласыт. Ӣсус лāвыс: ”Ул лю̄ньсēн, тав сорумн ат патыс, тав нас ёл-оилматвес”.53 Тāн ань мувиньтаӈкве патсыт. Тāн вāсаныл – āгирись сорумн патыс.54 Ӣсус āгирись кāт вистэ ос ля̄галас: ”Ня̄врамакве, нōх-люлен!”55 Ань āгирис ōс нōх-ялтыс, тав аквтыторыг хуйнэ мāтэ̄ныл нōх-лю̄люмтас. Ос таве тэ̄нутыл миӈкве лāвсанэ.56 Āгирись ся̄няге-āсяге сяма осятахтыглāлсыг, Ӣсус тыи ēмталам нак ōвылтыт тэнатэ̄н нэмхотъютн потыртаӈкве ат тāртсаге.
*а 5 8:5 Колас сам ӯнттын хōтпа – ты русь лāтӈыл сеятель
*б 30 8:30 легион – 6000 хōнт хум
Глава 8
