Choose Language
Old Testament Books
New Testament Books
view with a second Bible
1 Хӯнтлын мир нупыл потыртам потранэ оигпам юи-пāлт Ӣсус Капернаум нампа ӯсын минас.2 Тот ань акв хōнт сāтыл пуӈктотнэ хум э̄руптан мēтхуме сорум āгумн вуим ōлыс.3 Ӣсус урыл хӯнтамламе юи-пāлт, ты хōнт сāтыл пуӈктотнэ хум Юдея яныг хōтпат Ӣсус палт кēтсанэ. Тāнанылн Ӣсус вōвуӈкве э̄рыс, ань āгмыӈ ут пусмалтан мāгыс.4 Яныг хōтпат Ӣсус палт ёхтысыт ос Таве сымыӈысь вōвуӈкве патсаныл: ”Ты хōтпа нё̄тмилыл вāруӈкве хōйхаты.5 Тав мāн мирув э̄руптыянэ, тав мāн мāгсылув синагога ӯнттыс”.
6 Ӣсус тāн ётаныл минас. Хунь Ӣсус колн ля̄памас, хōнт сāтыл пуӈктотне хум юртанэ Тав ля̄льтэ кēтсанэ. Тāн Ӣсус нупыл лāвсыт: ”Кӯсяй, ул номсахтэн, Наӈ колумн сялтнэ тынын ам ат хōйхатэ̄гум.7 Ам наӈы̄н ат хōйхатнэм мāгыс āмти ōс Наӈ палттылын ат ёхтысум. Топ акв лāтыӈ ля̄галэ̄н, тōнт тах ам мēтхумим пусми.8 Ам пуӈктотнэ хōтпатын вāӈнхумы̄г ōлэ̄гум, сāлтатыт мāгыс ос ам пуӈктотнэ хумы̄г ōлэ̄гум. Акв утын лāвēгум: ‘Минэ̄н’, ос мины, мōтанын лāвēгум: ‘Йӣен’, ос тав та ёхты. Мēтхумим палт лāвēгум: ‘Тох вāрен’, – ос тав тох та вāри”.9 Ты лāтӈыт хӯлме юи-пāлт, Ӣсус сака осятахтыс ос, Тав юи-пāлэ̄т йӣнэ мāхум нупыл ё̄ӈхыгпим, лāвыс: ”Нāнан лāвēгум: тамле агтыл Ам тыгылнэ̄г Израильт ат вāсиньталсум”.10 Хōнт сāтыл пуӈктотнэ хум кēтыглам юртанэ юв-ёхтуманыл порат ань āгмыӈ мēтхум пусмим кāсаласаныл.
11 Та юи-пāлт Ӣсус Наин ӯсын минас. Тав ётэ ханисьтан хумиянэ ос мōт сāв мāхум яласасыт.12 Ӯс кāрта āви сӯнтын ёхтуманылт, ӯс коны-пāлын ōйкатэ порсум э̄ква сорум патум акв пы̄ге пāг-квāлттувес. Сāв мир та ӯсныл атхатасыт.13 Кӯсяй ань ся̄нь-э̄ква кāсаламēт сыме ся̄ргуӈкве патыс. ”Ул лю̄ньсен”, – Тав э̄ква нупыл лāвыс.14 Тувыл Тав āтимы̄г ēмтум ут палт йӣс ос нāсилка карсматастэ, таве āлмтан хōтпат ёл-лю̄льсыт, ос Ӣсус лāвыс: ”Пы̄гкве, наӈын лāвилум: нōх-лю̄лен!”15 Холам ут нох-ӯнтыс ос потыртаӈкве ōвылтахтас. Ӣсус таве ся̄нēн мистэ.
16 Мāхум рохтым ос тōргим, Тōрум э̄сгысаныл, тāн лāвыгласыт: ”Мāн палтув Тōрум лāтыӈ тотнэ хум ёхтыс. Тōрум такви мирēн нё̄туӈкве ёхтыс!”17 Ӣсус урыл тамле потыр Юдея мā ос тав мувлахитэ̄т ōлнэ мā янытыл тāрамлас.
18 Иоан ханисьтан хумиянэ кāсаламаныл писит ōвылтыт тавēн потыртасыт.19 Иоан ханисьтан хумиянэ̄ныл кит хум Ӣсус палт кēтсаге китыглахтуӈкве: ”Наӈ-а Ёхтынэ-хум? Ман ос мāнавн мōтан ӯруӈкве э̄ри?”20 Тāн Ӣсус палт ювле-ёхтысыт ос лāвсыт: ”Иоан витн тӯлнэ хум мāнав Наӈ палтын китыглаӈкве кēтытыстэ: ‘Наӈ-а, Ёхтынэ-Хум? Ман ос мāнавн мōтан ӯруӈкве э̄ри’”?
21 Та ōрумт Ӣсус сāв мāхум сāв āгумныл, вēрмтāл мосытныл пусмалтасанэ, лю̄ль лылыт кон-ня̄влысанэ, сампыльтāл сāв хōтпан сампос мис.22 Ӣсус ань тāнанылн ювле-лāвыс: ”Минэ̄н, Иоанын лāвēн, нāн мāныр касалāлсы̄н ос хӯлыглāлсы̄н:
сампыльтāл утыт сампосн ёхтавет,
нōхнэ утыт ё̄мыгтэ̄гыт,
проказал āгмыӈ утыт сыстамтавет,
пальтāл утыт хӯлэ̄гыт,
холам утыт нōх-ялтэ̄гыт,
нуса утытн ёмас ля̄ххал тотэ̄гыт.
23 Ос ань Ам ётум кāсасян хōтпа сōтыӈыг ōлы!”
24 Иоанныл кēтыглам хōтпат минам юи-пāлт Ӣсус мāхумн Иоан урыл потыртаӈкве патыс: ”Мāныр сунсуӈкве ōлтāл мāн нāн ялсы̄н? Вōтын нёвитан пум сунсуӈкве?25 Мāныр сунсуӈкве нāн тув ялсы̄н? Тыныӈ маснутыл масхатам хōтпа сунсуӈкве? Тыныӈ маснутыл масхатым сёлыӈ мāхум хōн ōлнэ колыт ōлэ̄гыт.26 Мāныр сунсыглāлуӈкве нāн я̄лсы̄н? Тōрум лāтыӈ тотнэ хум сунсыглаӈкве? Нāнан лāвēгум, тавēныл яныгнувēг ōлнэ ут.27 Тыи ōлы таи, хотъют урыл хансыма:
‘Наӈ э̄лы-пāлынт ам Ангел кēтылум.
Тав Наӈ мāглысын лё̄ӈх пунсытэ’.
28 Нāнан лāвēгум: нэ̄т ōньсим хōтпатныл витн тӯлнэ Иоан коны-пāл тавēныл яныгнув нэ̄мхотпа āтим. Топ ань Тōрум йильпи нотт сяр мāниг ōлнэ ут, тавēныл яныгнуве.
29 Пуссын мир, пōт атнэ хōтпат ōс, Таве хӯлманылт, Тōрум вēськатыг ōлнэтэ мāгыс янытласаныл, Иоан витн тӯлнэ сирыл пуссын витн тӯлхатсыт.30 Фарисейт ос Сāккон ханисьтан хумит Тōрум тахнэ сирыл ат ōлсыт ос витн тӯлхатуӈкве хот-воратасыт”.
31 Тōнт ань Кӯсяй лāвыс: ”Аньйис ōлнэ мир хōӈха ёт ровēгыт мōртуӈкве, хōӈха хурипаг тāн ōлэ̄гыт?32 Кон ӯнлын ня̄врамыт хольт тāн халанылт рōхтахтэ̄гыт: ‘Мāн нāн мāгсылы̄н свирелил ёнгысув, нāн ат йӣквсы̄н, мāн нāн мāгсылы̄н лю̄сь-э̄рыг э̄ргысӯв, нāн ат лю̄сьсы̄н’.33 Иоан витн тӯлнэ хум ёхтыс, тав ня̄нь ат тэ̄г, вина ат айи, нāн тай лāвыглāлсы̄н: ‘Тав кулил вуим ōлы’.34 Э̄лумхолас-Пыг ёхтыс, тав тэ̄г-айи, нāн тай лāвегы̄н: ‘Ня̄лыӈ ут, айнэ ут, пōт атнэ ос карекыӈ утыт юртыг ōлнэ ут’.35 Тōрум сāв номтанэ Тавēн агтнэ хōтпатын агтым ōньсявет”.
36 Акв фарисей такви палттылэ Ӣсус тэпъялаӈкве вōвыстэ. Ӣсус фарисей колэ̄н юв-сялтыс ос пасан вāтан ӯнтыс.37 Та ӯсыт акв карекыӈ нэ̄ ōлыс. Ӣсус фарисей колыт тэ̄пъяланэ̄тэ ōвылтыт хулмēт ань ты нэ̄ аквтатара тув ёхтыс. Тав алабастерныл*а вāрим атыӈ вōй сулья тотыс.38 Тав Ӣсус лāглаге пōхан, Тав юи-пāлэ̄н, ōлыс. Та нэ̄ лю̄ньсис, самвитанэ Ӣсус лāглаге тармыл сосхатасыт. Такви самвитанэ Ӣсус лāглагēныл āтанэ̄тыл сэ̄гсаласагэ, Тав лāглаге, атыӈ вōил сартым, анигласаге.
39 Тыи кāсаламēт, Ӣсус вōвум фарисей номылматас: ”Тав Тōрум лāтыӈ тотнэ хумыг ке ōлыс, тав вāнувтэ, хōӈха ос манхурип нэ̄ Тав палттылэ карсматыглахты, ты нэ̄ карек ōньси”.40 Фарисей нупыл ёӈхыгпим, Ӣсус лāвыс: ”Симон, Ам наӈын акв лāтыӈ лāвуӈкве тāӈхēгум”. ”Лāвен, Ханисьтан Хум,” ань фарисей ювле-лāвыс.
41 Ӣсус лāвыс: ”Сāймилаг мāйлан акв хōтпа кит āрумтаӈ хōтпа ōньсис, акватэ атсат динарий*б, мōтанэ – атпан динарий āрумтаӈы̄г ōлсы̄г.42 Āрумтан ювле миннэ утыг нэ̄матыр сас ат ōсьсы̄г, сāймилаг майлан хōтпан āрумтан утыг тāратавесы̄г. Лāвен, хотъютэ̄н янгысьнув таве э̄руптаӈкве паты?”43 Симон ювле-лāвыс: ”Ам номсэгум, хотъютэ – сāвнуве āрумтаӈ”. Ӣсус лавыс: ”Наӈ сōлиг лāвēгын”.44 Нэ̄ нупыл ёӈхыгпым, Симон нупыл лāвыс: ”Ты нэ̄ наӈ кāсалы̄лын? Ам наӈ колын ёхтысум, наӈ ам лāглагум ловтуӈкве Āнумн вит ат мисын. Тав самвитанэ̄тыл ам лāглагум сосантасагэ, ос пуӈкатанэ̄тыл лāглагум сэ̄гсаласаге.45 Наӈ Āнум ат анигласлын. Тав Ам ёхтумум пāсыл, лāглагум аниглаӈкве иӈ ат та пōйтсāлыс.46 Наӈ Ам пуӈкум вōйл ат сартыслын, тав тай Ам лāглагум атыӈ вōил сартсаге.47 Таимāгыс Ам наӈын лāвēгум: тав сāв кареканэ тāратавēсыт, таимāгыс тав Āнум сака янгыгсь э̄рупты. Кареканэ мосьсяг тāратым хōтпа – мосься э̄рупты”.48 Тувыл Ӣсус нэ̄ нупыл лāвыс: ”Наӈ кареканын тāратавēсыт”.
49 Тав ётэ ōлум утыт тāнти халанылт лāвыглāлсыт: ”Тав аман хōӈха, карекыт тāратаӈкве ос вēрми?”50 Тав ань нэ̄ нупыл лāвыс: ”Наӈ агтылы̄н вēстувēсын, ротты̄г минэн”.
*а 37 7:37 алабастер – я̄ӈк сули, русь лāтӈыл алебастр
*б 41 7:41 динарий – олн наме «аквхōтал сыс ювле минэ олн»
Глава 7
