Choose Language
Old Testament Books
New Testament Books
view with a second Bible
1 Сабат-хōталыт Ӣсус ня̄ньпумыл ӯнттым тэ̄пканыт тāра минас. Ханисьтан хумиянэ ня̄ньпум самыт маныгтасыт, та самыт катпаттанылт пасиртасаныл ос тэ̄саныл.2 Тōва фарисейт лāвыглāлсыт: ”Сабат-хōталыт ат рōвнэ вāрмалит нāн манры̄г вāрегы̄н?”3 Ӣсус ювле-лāвыс: ”Давид утанэ ёт, сыманыл э̄тгаламаныл порат, мāныр вāрыгласыт, нāн ман ат ловиньталыслы̄н-а?4 Тав Тōрум колын сялтыс, Тōрумн пиным ня̄нь вистэ, такви тэ̄с ос тав ётэ ōлум мāхманэн мис. Ты ня̄нь тӯп пӯпытын рōвыс тэ̄ӈкве”.5 Ос тувыл Ӣсус лāвыс: ”Э̄лумхōлас-Пы̄г ӯсьлахтын хōтал тармыл ōс Кӯсяӣг ōлы”.
6 Мōтыт сабат-хōталыт Ӣсус мир ханисьтан мāгыс ос синагоган минас. Тот ань ёмаспал кāтэ тув-тōсум хōтпа ōлыс.7 Сāккон ханисьтан хумит ос фарисейт Таве уральтым ōсьсаныл. Ань сабат-хōталыт ты хōтпа Тав пусмалтаӈкве вēрмитэ ман āти. Тāн Таве нуралан нак киссыт.8 Ӣсус тāн номтаныл вāсанэ ос кāтэ тōсум хōтпан лāвыс: ”Квāлэн ос тāн э̄лы-пāланылн лю̄лен”. Та хōтпа нōх-лю̄лис ос э̄лнув лаквасас.9 Тōнт Ӣсус лāвыс: ”Ам нāнан китыглыянум, сабат-хōталыт ёмас ман лю̄ль вāрмаль вāруӈкве рōви? Лылы ялтуптаӈкве ман ос алуӈкве?”10 Тāн нупыланыл сунсым Ӣсус ань хōтпан лāвыс: ”Кāтын тактэ̄лын”. Хōтпа кāтэ тактыстэ, мōт кāтэ хольт ёмаспал кāтэ аквтысёс пусмыс.11 Фарисейт янгыгсь кантмаявēсыт, тāнти халанылт потыртахтуӈкве патсыт, Ӣсусн мāныр вāруӈкве.
12 Аквта хōталытт Ӣсус ур тāрмыл пōйиксяӈкве минас ос э̄т палыт пōйксяс.13 Āлпылыг ēмтум порат Тав ханисьтан хумиянэ вōвсанэ, тāнанылныл китхуйплов хōтпа перияс. Тāнаныл апостолыг*а намтсанэ. Тāн наманыл:14 Ӣсусн Пēтырыг намаим Симон, тав ягпыге Андрей, Яков, Иоан, Филипп, Варфоломей,15 Матфей, Фома, Алфей пы̄ге Яков, Зилотыг намталан Симон,16 Яков пы̄ге Иуда, Искариот Иуда, ётыл Тав Ӣсус лылы тыналастэ.
17 Ӣсус тāн ётаныл урныл ёл-вāглыс ос састум мāн ёл-лю̄лис. Тот ань Тав ханисьтан хумиянэ ōс Юдея ос Иерусалим янытагэ̄т ōлнэ сāв мир, ос Тира ос Сидон ӯсыг ӯнлын мāныл сāв мāхум атхатыглалсыт. Тāн Ӣсус хӯнтлуӈкве ос тāнки āгманылныл пусмалтахтуӈкве ёхтысыт.18 Иксям кулитн саватан хōтпат ос тыг ёхталāлсыт. Тāн ос пусмалтāлыглавēсыт.19 Пуссын Ӣсус палт карсматыглахтуӈкве тахсыт, ань Тавēныл кāсыӈ хōтпан пусмалтан ё̄р йис.
20 Ханисьтан хумиянэ нупыл āӈкватāлым Ӣсус лāвыс:
”Нуса хōтпат нāн сōтыӈыт!
Тōрум йильпи нот нāнан маим ōлы.
21 Сыманы̄н э̄тгалам хōтпат нāн сōтыӈыт!
Нāн пōйтнэ̄г тэ̄гы̄н тах.
Ань лю̄сьнэ хōтпат нāн сōтыӈыт!
Нāн ся̄гтуӈкве ос мувиньтаӈкве патэгы̄н тах.
22 Хунь мāхумн лāвыл нēгылттавēн, хунь сысы ня̄влавēн ос саватавēн, хунь Э̄лумхолас Пы̄г мāгыс э̄ссамтавēн – нāн сōтыӈыт.23 Та ёхтын хōталыт ся̄гтēн, сака ся̄гтēн, ань нāн мāгсылын тōрумт яныг мӯйлупса ēмты! Тāн āсяныл Тōрум лāтыӈ тотнэ хумит ёт ōс аквтох вāрыгласыт.
24 Нāнан вōсилыг ēмты, сёлыӈ утыт!
Нāнти ся̄гтальпин пуссын вимын мāгыс.
25 Нāнан вōсилыг ēмты, пōйтнэ̄г тēм утыт!
Нāн тах сыманы̄н э̄тгалаӈкве патнэ мāгыс.
Нāнан вōсилыг ēмты, кāс вāрнэ утыт!
Нāн тах янгыгсь лю̄ньсюӈкве патэ̄гы̄н.
26 Нāнан вōсилы̄г ēмты, мир пуссын нāн урынт ёмас лāтыӈ потыртаӈкве патнэ̄ныл мāгыс. Тōрум лāтыӈ урык тотнэ хумит ёт тāн āсяныл ōс аквтох вāрыглāлсыт.
27 Нāнан, Āнум хӯнтлын хōтпатын, Ам лāвēгум: лāвыл нэ̄гылттан утаны̄н э̄руптэ̄н ос нāнан лāвыл нэ̄гылтан утытын ёмас вāрмаль вāрēн.28 Нāнан āмпыг вāрнэ утыт мāгыс Тōрумныл ёмас лāтыӈ вōвēн ос нāнан лю̄камтан утыт мāгыс пōйиксēн.29 Хотты хōтпан акв пāйты̄нт ю̄ныгтавен ке, мōт пāйты̄н ос ю̄ныгтаӈкве тактэлы̄н. Хотты хōтпан нуми маснутанын вивет ке, тōнт супын ос маēлын.30 Кāсыӈ хōтпан наӈынныл вōвнэ ут маен, ос наӈынныл матыр вим хōтпаныл та ут ювле ул вовēн.
31 Мōт хōтпат хумус нāн ётын ōлнэныл сирыл нāн таӈхēгын, аквтох нāнти тāн ётаныл ōлэ̄н.32 Нāнан э̄руптан хōтпанын э̄руптыяны̄н ке, таимāгыс нāнан маны̄рсыр янытлап э̄ри? Ань карекыӈ утыт тāнаныл э̄руптан хōтпат ōс э̄руптыяныл.33 Нāнан ёмас вāрнэ хōтпат мāгыс ёмас вāрмаль ке вāрегы̄н, таимāгыс нāнан мāнырсыр янытлап э̄ри? Карекыӈ утыт ōс аквтох вāрēгыт.34 Хōтпан сāймилыг мāйлам утаны̄н тавеныл ювле ке урияны̄н, таимāгыс нāнан мāнырсыр янытлап э̄ри? Карекыӈ утыт халанылт ōс сāймылыг матыр вӯйлāлэгыт, ювле та сāвит винэ̄ныл мāгыс.35 Нāнан лāвыл нэ̄гылттан утаны̄н э̄руптэ̄н, ёмас вāрмаль вāрēн, сāймилаг матыр маēн, āрумтаныл ювле минэ ӯртāл. Тōнт нāнан яныг мӯйлупса тах ēмты, Тōрум пы̄гыты̄г ēмтэгы̄н. Тав лю̄ль вāрнэ ос пумасип лāвтāл хōтпа нупыл ёмас ōлы.
36 Нāн Āсин хольт ёмас сымпа хōтпāг ōлэ̄н.
37 Ул сутитэ̄н, – нāнти тах ōс ат сутитавēн. Винавōтн патме ул лāвēн, нāнти тах ōс винавотн патмынт ат лāвавēн. Карекыт тāратэ̄н, ос нāн кареканы̄н аквтох тāратавет тах.38 Маēн, нāнти тах ос мивēн. Ёмас мōртасыл мивēн: тāкысь хосгим, кӣвры̄н тāгиньтым сāвитыл мивēн. Мōртымын сирил нāн аквтох тах та мортавēн”.
39 Ӣсус тāнанылн ōс акв ханисьтап*б лāвыс: ”Сампыльтāл хōтпа мōт сампыльтāл ут вāнттуӈкве вēрмитэ? Тэ̄н сас вōӈхан ат рагатэ̄г-а?40 Ханисьтахтын хум таве ханисьтан хōтпаныл яныгнувēг ат ōлыглы. Ёмасякв ханисьтахтынэ̄тэ мāгыс тав ханисьтан хōтпатэ хурипаг тах ēмты.
41 Наӈти самынт нор ōлнэ̄тэ ат кāсалэгын, ос наӈ ягпыгын самыт тов лōмт нупыл манрыг сунсэ̄гын?42 Ягпыгы̄н хумус наӈ тох лāвуӈкве вēрмēгын: ‘Ягпыгкве, наӈ самынныл тов лōмт кон-лэ̄ватаӈкве āнум таратэ̄лын’, наӈти самынт тай нор ат кāсалэ̄гын? Китвильтуп ут! Ōвлэ̄т наӈти самынныл нор кон-лэ̄ватэ̄лын, тōнт усь кāсалы̄лын, ягпыгын самēныл тов лōмт хумус кон-лэ̄ватаӈкве вēрмилын.
43 Ёмас йӣвт лю̄ль пил ат яныгми, лю̄ль йӣвт ос ёмас пил ат яныгми.44 Кāсыӈ йӣв яныгман пиланэ хосыт тāра-паттаве. Терновник нампа йӣвныл инжир*в пил ат атаве, ӣныг нирсяхылныл ос виноград хунь атыглāлаве.45 Ёмас хōтпа такви сымēт ōсьнэ ёмасэ мы̄г, кантыӈ хōтпа сымēт ōлнэ кантэ мы̄г. Э̄лумхōлас та урыл лāви, мāныр сыме кивырт ōньси.
46 Нāн Āнум мāнрыг тох вōвӣлын: ‘Кӯсяй! Кӯсяй!’ Нāнти тай Ам лāвнэм сирыл ат вāрегы̄н?47 Нāнан лāвēгум, Ам палтум йинэ, Ам лāтӈанум хӯнтлын, ос та лāтӈыт тōвлуптан кāсыӈ хōтпа хōӈха хурипа.48 Тав кол унттын хōтпа хурипа, хōӈха мā хилыстэ, тувыл кол тыт кēрас тармыл ӯнттыстэ. Яныг вит ōнтум порат колэ āмаравес, топ ат сакватавес, колэ кēрас тармыл ӯнттыматэ мāгыс.49 Āнум кос хӯнтлын ос лāтӈанум ат тōвлуптан хōтпа колэ кол тыттāл мā тармыл ӯнттын ут хурипа. Яныг вит ōнтум порат тав колэ янытэ̄т лоньхатас”.
*а 13 6:13 апостол – Тōрумн лусытаӈкве, Ӣсусын вōвим э̄лумхōлас
*б 39 6:39 ханисьтап – ты русь лāтӈыл притча
*в 44 6:44 инжир нампа йӣв – ты русь лāтӈыл смоковница
Глава 6
