Choose Language
Old Testament Books
New Testament Books
view with a second Bible
1 Аквмат хōтал Ӣсус Геннисарет нампа тӯр вāтат лю̄ляхōлис. Мāхум тав мувлахитэ̄т марылтахтым Тōрум лāтыӈ хӯнтлысыт.2 Ӣсус тӯр вāтат кит хāпыг кāсалас. Хӯлупъян хōтпат, хāпанылныл квāлым, хӯлпаныл ловтсыт.3 Ӣсус акв хāпн тāлыс, та Симон хāпе ōлыс, ос нāлвнув товуӈкве лāвыстэ. Тувыл хāпыт ӯнлым мир ханисьтаӈкве патсанэ.
4 Потыртаӈкве āстумēт, Ӣсус Симонын лāвыс: ”Милнув мāн товен ос хӯлпын таратэ̄лын”.5 Симон ювле-лāвыс: ”Ханисьтан хум, мāн э̄тпāлыт хӯлупъясӯв, нэ̄матыр ат аласув, наӈ лāвегы̄н ке, ōс хӯлупъēгум”.6 Хӯлупъяманыл тасāвит хӯл аласыт, хӯлпаныл хасьлуӈкве патыс.7 Мōт хāпныл тāнанылн нё̄тмил вāруӈкве кāт хосгим юртаныл вōвсаныл. Тāн ёхтысыт, аквъёрыл кит хāпыг хӯлыл тāгиньтаптасаныл, хāпыг витыл āмараӈкве патвесы̄г.8 Тыи кāсаламēт Симон Пēтыр Ӣсус э̄лы-палын сāнсаге тāрмыл патыс ос лāвыс: ”Ам карекыӈ хōтпа, āнум оссувлэ̄лын!”9 Тасавит хӯл аламаныл мāгыс тав ос пуссын тав ётэ пилысьман ёхтувēсыт.10 Яков, Иоан, Зеведей пы̄ганэ – Симон юртанэ ос ōсятахтыгласыт. Ӣсус Симонын лāвыс: ”Ул пӣлэн! Ты пāсыл хӯл пēнтсыл э̄лумхоласыт пувуӈкве патэ̄гын”.11 Тāн хāпыг пāг-хāртсаганыл, пуссын хӯльтуптасаныл ос Ӣсус юи-пāлт мынмыгтасыт.
12 Акв ӯсыт Ӣсус палт проказал пуссын āгмыӈ хōтпа ёхтыс. Хōтпа Ӣсус кāсаламēт Тав э̄лы-пāлэ̄н ёл-патым Таве пōйкуӈкве патыстэ: ”Кӯсяй, таӈхēгын ке, āнум сыстамтаӈкве вēрмилын!13 Ӣсус кāтэ тав палттылэ тактыстэ, карсматыстэ ос лāвыс: ”Таӈхēгум, сыстамыг ēмтэн”. Алпитэ̄ныл проказа āгме аквтысёс соймыс.14 Ӣсус тавēн лāвыс: ”Нēмхоттъютн ты ōвылтыт ул потыртэн. Минэн, пӯп-ōйкан сусылтахтэн, Моисей сāккон сирыл йир вāрен хот-сыстамтахтумын мāгыс. Мирн вос вāве ты нак.15 Ӣсус урыл потрыт мā янытыл тāрамласыт. Таве хӯнтлуӈкве ос āгманылныл пусмалтахтуӈкве мāхум яныг анял Ӣсус палт йисинтасыт.16 Ань Ӣсус мир ōлтāл мāн миныглāлыс ос пōйикся̄лыс.
17 Аквсёс Ӣсус мир ханисьтамēт, фарисейт*а ос Сāккон ханисьтан хумит*б тот ӯнлысыт ос Таве хӯнтлысаныл. Тāн Галилеят ос Юдеят ōлнэ пāвлытныл ос Иерусалимныл атхатасыт. Кӯсяй ё̄ре āгмыӈ хōтпат пусмалтан мāгыс хулиглāлыс.
18 Матахмат хōтпа нāсилка тармыл хуйнэ нёвумтаттāл ут Тав палттылэ тотсаныл ос Тав э̄лы-пāлэ̄н пиннэ мāгыс таве юв-тулуӈкве кусыглахтысыт.19 Кол кӣвырт сāв мир ōлнэ паттат, тāн юв-сялтуӈкве ат вēрмысыт, тāн колалан нōх-хāхсыт, колала лōсытасаныл ос нāсилкаӈ тāгыл нёвсаттāл утаныл Ӣсус э̄лы-пāлын колкан котильн тув ӯнттысаныл.20 Тāн агтыланыл кāсаламēт, Ӣсус лāвыс: ”Наӈ кареканын тāратавēсыт”.
21 Фарисейт ос Сāккон ханисьтан хумит номтаныл саким ля̄галасыт: ”Ты аман хōӈха, Тōрумыл нēрхаты. Тōрум коны-пāл хōӈха вēрми карекыт тāратаӈкве?”22 Ань Ӣсус тāн номтаныл вāсанэ ос тāнаныл китыгласанэ: ”Нāн манры̄г тох номсэгы̄н?23 Мāныр кӯпнитнуве, лāвуӈкве: ‘Наӈ кареканын тāратавēсыт’, манос ‘Нōх-лю̄лен, яласэн’?24 Ань вāӈкве патылы̄н, Э̄лумхōлас Пы̄г*в мā тармыл ё̄р ōньси карекыт тāратаӈкве”. Тувыл Ӣсус нёвумтаттāл хōтпан лāвыс: ”Нōх-лю̄лен, хуйнэсованын ёт вуēн ос юв-минэн!”
25 Тāн э̄лы-пāланылт тав аквтысёс нōх-лю̄лис, хуйнэсованэ висанэ ос Тōрум э̄сгим юв та минас.26 Пуссын янгысь рохтысыт ос Тōрум э̄сгысаныл. Сыманыл миным лāвыгласыт: ”Мāныр ōлыглаттāл накыт*г тыхōтал мāн вāсинтасув”.
27 Та ӯсныл кон-квāлме юи-пāлт Ӣсус Лēви нампа пōт атнэ хум кāсаластэ. Лēви пōт атнэ кол пōхат ӯнлахōлыс. Ӣсус лāвыс: ”Ам юи-пāлумт йиен”.28 Лēви нōх-лю̄люмтас ос осьнутанэ пуссын оссувласанэ, Ӣсус юи-пāлэ̄т минмыгтас.29 Тувыл тав Ӣсус мāгыс мӯйлын яныг пасан вāрыс. Мӯйлын пасан вāтан пōт атнэ хōтпат ос сāв мōт хōтпат атхатасыт ос тāн Ӣсус ос Леви ёт мӯйлысыт.30 Фарисейт ос Сāккон ханисьтан хумит Ӣсус ханисьтан хумиянэ номтаныл ат патым китыгласаныл: ”Нāн пōт атнэ ос карекыӈ хōтпат аквъёт манры̄г тэ̄гын ос аегы̄н?”31 Ӣсус ювле-лāвыс: ”Āгмыӈ хōтпатын пусмалтан лēккар э̄ри, пусы̄г ōлнэ хōтпан ат э̄ри.32 Ам вēскат хōтпат вōвуӈкве хунь ёхтысум, ам карекыӈ хōтпат вōвуӈкве ёхты̄сум. Тāн Тōрум нупыл вос ё̄ӈхēгыт”.
33 Ӣсус китыглавес: ”Иоан ос фарисейт ханисьтахтын хумит вāтихал поститахтэ̄гыт*д ос пōйиксēгыт, ос Наӈ ханисьтан хумиянын тэ̄гыт ос аегыт?”34 Тав ювле-лāвыс: ”Нāн хумле номсэгы̄н, нэ̄ тотнэ хум юртанэ, тав ōлыматэ, пӯри пасан ватат поститахтуӈкве лāвуӈкве вēрмияны̄н-а?35 Та хōталыт тах ёхтэ̄гыт, хунь нэ̄ тотнэ хум хот-виве, тōнт усь та поститахтуӈкве патэ̄гыт”.
36 Ос Тав тāнанылн ханисьтап потыртас: йильпи маснутныл манумтым лōмт пēс маснутн нэ̄мхотъютн ат лолтаве. Тох ке вāруӈкве, тах йильпи маснут пулиг-маныгтаве, ань ты лолта пēс маснутын ос ат хōйхаты.37 Ос йильпи вина пēс сов хӯрыг кӣвырн нэ̄мхотъютн ат сōсаве: йильпи вина та кӣвыр пāлыг-маныгтытэ ос вина ёл-сōсхаты, кӣврыт витыг минэ̄гыт.38 Йильпи вина йильпи хӯрыгн сōсуӈкве э̄ри.39 Пēс вина аиглам хōтпа йильпи вина аюӈкве ат тахмаи, тав лāви тах: ”Пēс вина ёмаснуве”.
*а 17 5:17 фарисей – Моисей сāккон сирыл ōлнэ ос сāккон э̄лаль тотнэ хум
*б 17 5:17 Сāккон ханисьтан хум – ты русь лāтӈыл учитель Закона, книжник
*в 24 5:24 Э̄лумхōлас Пы̄г – Иисус
*г 26 5:26 ōлыглаттāл нак – ты русь лāтӈыл чудо
*д 33 5:33 пост – тэ̄тал ōлнэ пора
Глава 5
