Choose Language
Old Testament Books
New Testament Books
view with a second Bible
1 Ӣсус, Ялпыӈ Лылыл тāгиньтым, Иордан я̄ вāтаныл ювле ёхтыс, Лылын мир ōлтāл мāн тотвес,2 ос я̄волн*а āрталым Тав тот налыман хōтал ōлыс. Тōнт Ӣсус нэ̄матыр ат тэ̄с, та хōталыт оигпам юи-пāлт Тав сыме сака э̄тгалавес.3 Ос ань я̄вол Тавēн лāвыс: ”Наӈ сōль ке Тōрум Пы̄г, ты āхвтас ня̄ниг ēмтуӈкве лāвēлын”.4 Ӣсус ювле-лāвыс: ”Хансым ōлы: ‘Э̄лумхōлас акв ня̄нил тӯп хунь ōлы’”.
5 Ос Таве лю̄лиӈ нё̄рн хахтумēт, я̄вол Тавēн акв кӯмт пуссын тōрум хōн-мāт суссылтасанэ6 ос Тавēн лāвыс: ”Ам ты хōн-мāт ё̄р, сю̄нит янытанылт Наӈы̄н мӯйлуптыянум, тāн āнумн маим ōлэ̄гыт, ос ам тāнаныл хōӈхан тахмаēгум, таин та мӯйлуптыянум.7 Анум ке пуӈкын хӯтылтэ̄гын, тāн пуссын Наӈын мыганум”.8 Ӣсус ань ювле-лāвыс: ”Тōрум нэ̄пакыт*б хансыма: ‘Тōрум Кӯсяйн пуӈк пинуӈкве э̄ри, ос тӯп Тавēн лусытаӈкве э̄ри’”.9 Тōнт ань я̄вол Ӣсус Иерусалимн тотыстэ ос ялпыӈ кол сяр лю̄лиӈ накēн тӯсьтыстэ ос Тавēн лāвыс: ”Наӈ сōль ке Тōрум Пы̄г, тыгыл ёл-порыгмен,10 ань хансым ōлы: ‘Тōрум Такви Ангеланэ̄н Наӈын ӯргалаӈкве лāвиянэ’.11 Тувыл ос лāвыма: ‘Наӈ лāглагын āхвтасын ул вос хōиглэ̄г, тāн Наӈын кāтыл пувим тотыяныл’”.12 Ӣсус ювле-лāвыс: ”Лāвыма: ‘Кӯсяйн, наӈ Тōрмын ул āрталэ̄лн’”.13 Тōнт ань я̄вол Ӣсус саватаӈкве пōйтыс ос хотты пора мус сысы та минас.
14 Ӣсус, Ялпыӈ Лылы ё̄рыл тāгиньтым, Галилеян ювле ёхтыс ос та мā янытыл Тав урēтыл ля̄ххал та тāрамлас.15 Ос Тав синагогатт*в мир ханисьтас, ос пуссын Таве э̄сгысаныл.16 Ос тав яныгман ӯсэ̄н, Назаретн ёхтыс. Ханьсювламе сирыл сабат-хōталыт Тав синагоган юв сялтыс ос нōх-лю̄лис Тōрум нэ̄пак ловиньтаӈкве.17 Исая, Тōрум лāтыӈ тотнэ хум нэ̄паке Тавēн майвес, ос ань нэ̄пак пӯсмēт та лōмт хōнтыстэ, хōт ань хансым ōлыс:
18 ”Кӯсяй Лылытэ Ам тāрмылумт ōлы.
Нуса хōтпат ёмас ля̄ххалыл лāвуӈкве Тōрум Āнум пēриястэ.
Тав пленын вуим утыт лыпась патнэ наканыл хӯлтуӈкве Āнум кēтыстэ,
сампыльтāл хōтпат сампосыл миӈкве, саватым хōтпат лыпась тāратаӈкве,
19 Кӯсяйныл вēстылэ ёхтум поратэ потыртаӈкве.
20 Тувыл Тав нэ̄пак лап-пантыстэ ос лусытан хōтпан ювле мистэ. Тав ёл-ӯнтыс, синагогат ōлум мāхум саманылтыл пуссын тав нупылэ суссыт.21 Ос Тав тāнанылн потыртаӈкве патыс: ”Тыхōтал нāн э̄лы-пāлынт хӯлыглам хансым утыт та тōвлысыт.22 Ос пуссын Таве янытласаныл ос Тав сӯпēныл йинэ э̄рупса лāтӈытыл ōсьсятахтыгласыт ос лāвыгласыт: ”Тый Ӯсюп аман тав пы̄ге?”23 Ос Тав лāвыс: ”Ханисьтан вāти лāтӈыт хӯлтнэ сирил нāн э̄рыӈ тах Āнумн лāвегы̄н: ‘Леккар, наӈ наӈтинāнын пусмалтэ̄лын’. Нāн таӈхегы̄н лāвуӈкве: ‘Капернаумт мāныр ēмталāлыс, мāн хӯлыгласлув. Наӈти самын патум ӯсынт аквта нак, тыт ōс вāрēлын’”.24 Ос Тав лāвыс: ”Сōль самын патум ӯсэ̄т Тōрум лāтыӈ тотнэ хум ат пирмайтаве.25 Сōль лāвēгум: ”Илия ōлум порат Израильт хумтāл хультум сāв э̄ква ōлыс, хунь ань хӯрум тāл ос акв тув ат раквыглас; хунь тэ̄нут яныг ярм мā янытыл ōлыс.26 Ос топ тāн нэ̄мхотъютаныл палт Илия ат та кēтыглавес, топ хумтāл ōлнэ акв э̄ква палт. Тав Сидонт ōлнэ Сарептаныл ōлыс.27 Тōрум лāтыӈ тотнэ хум Елисей ōлум порат Израиль мāт проказа*г āгмыл сāв мāхум саваласыт, топ ань нэ̄мхотъютаныл Нееман-сирияныл ōлнэ хум коны-пāл ат пусмалтахтыс.
28 Синагогат ōлум хōтпат, ты лāтӈыт хӯлманыл юи-пāлт, пуссын янгысь кантмаявēсыт.29 Нōх-лю̄льсыт ос таве ӯсныл хот-ня̄влысаныл. Ӯсаныл ӯнлын ур тармыл Таве тотсаныл ос карыс урныл ёл-вуськасаӈкве таӈхысаныл.30 Топ ань Ӣсус атхатум мāхум тара-минас ос Такви лё̄ӈхēтыл та минмыгтас.
31 Ӣсус Галилеят ōлнэ Капернаум нампа ӯсын минас. Сабат-хōталыт*д Ӣсус мир ханисьтасанэ.32 Пуссын мир Тав яныг ё̄р ōсьнэ лāтӈанэ̄ныл осятахтуӈкве ат пōйтыгласыт.
33 Синагогат иксям кулил*е вуим хōтпа ōлыс, ос тав тāкысь рōӈхалтахтыс:34 ”А-на-на! Наӈ мāныр мāнавныл таӈхēгын, Назаретныл ōлнэ Ӣсус? Мāнав холтуӈкве ёхтысын? Ам вāглум Наӈ хōӈха – Ялпыӈ Тōрумныл ōлэ̄гын!”35 Топ Ӣсус кулин тāкысь ля̄галас: ”Астал ōлэн, ты хōтпаныл кон-квāлэн!” Тōнт ань куль ты хōтпа мāхум халаныл ёл-вуськасастэ ос тāвеныл кон та квāлыс, хōтпа ат сакватастэ.36 Пуссын тыи вāм хōтпат, вāсинтам накыл осятахтыгласыт ос тāнти халанылт потыртасыт, тох ты лāвыглāлсыт: ”Тыи аманарыг ōлы? Тав ё̄рēтыл ос вāгетыл иксям кулит тармыл кӯсяйлахты, тāн кональ-минэ̄гыт”.37 Ос ань Тав ōвылтытэ ля̄ххал мā янытыл акваг мӯвлахи та тāрамлāлыс.
38 Ӣсус синагоганыл кон-квāлыс ос Симон нампа хум палт минас. Симон онып-э̄кватэ сака āгмыӈ ōлыс, алпитэ янгыгсь исыглыма, ос Ӣсус āгмыӈ э̄ква пӯсмалтаӈкве вōввес.39 Тав э̄ква палт хӯтыс ос тāкысь ля̄галас, нāиӈ-исум āгум-рēг э̄ква āлпитэ̄ныл кональ-квāлыс, ос ань тав нōх-лю̄люмтас ос тāнанылн нё̄тмил вāруӈкве патыс.
40 Хōтал ӯнтнэ ōрумт сāвсыр āгмыл савалан мāхманыл пуссын Ӣсус палт тотсаныл ман ос вāнттысаныл, ос ань Тав кāтаге тāнанылн пиным пуссын та пусмалтасанэ.41 Сāв āгмыӈ хōтпатныл кулит рōӈхим кон-квāлсыт, тāн ля̄галалсыт: ”Наӈ – Тōрум Пы̄г”. Топ ань Тав тāнаныл потыртаӈкве ат тāратасанэ, ань тāн вāсаныл – Тав Кристос.
42 Āлпыл Ӣсус ӯсныл минмыгтас ос ōлтāл мāн минас. Тав мирн кинсуӈкве патвес. Таве хōнтманылт тāн палттыланыл хультуӈкве пōйкысаныл.43 Топ ань Ӣсус ювле-лāвыс: ”Тōрум йильпи нот ōвылтыт ёмас ля̄ххал мōт ӯсытыт Āнумн ōс э̄ри потыртаӈкве, Ам таимāгыс ты кēтвēсум”.44 Ос Галилея синагогатт мир ханисьтас.
*а 2 4:2 я̄вол – ты русь лāтӈыл дьявол
*б 8 4:8 Тōрум нэ̄пак – ты русь лāтӈыл Писание
*в 15 4:15 синагога – еврей пойксян кол
*г 27 4:27 проказа – хāхтхатнэ лю̄ль āгм
*д 31 4:31 сабат-хōтал – еврей ӯсьлахтын хōтал
*е 33 4:33 куль – ты русь лāтӈыл бес
Глава 4
