Choose Language
Old Testament Books
New Testament Books
view with a second Bible
1 Та хōталытт Август-хōн та мā янытыл ōлнэ мир хасылтаӈкве лāвсанэ.2 Квириния кӯсяиг ōлме порат Сирия мāт мир хасылтан ты ōвыл вāрмаль ōлыс.3 Пуссын мир тāнки ӯсанылн хасылтахтуӈкве минасыт.
4 Ӯсюп Давид рӯтныл ōлыс. Тав ос Галилея мāныл Назарет нампа ӯсныл Юдеян Вифлеем нампа Давид ӯсэ̄н минас.5 Ӯсюп маньнэ̄тэ ёт, пēриям нэ̄тэ Мария ёт хасхатуӈкве минас, нэ̄тэ āгмыл ōлыс.6 Вифлеемт ōлмēнт Мария ōсьхатнэ поратэ ёхтыс.7 Ос ōвыл Ня̄враме, Пы̄ге, та самын патыс, ос мāнигтастэ, ос тэ̄натэ̄н мир хӯлнэ колт хуйнэ мā āтим ōлнэтэ мāгыс, ня̄враме ӯй-хул тэ̄нэ хуран пиныстэ.
8 Та мāт хара кант ӯй-хул аня ӯрнэ хумит ōлсыт. Тāн э̄ти ӯй-хул аняныл ӯрсыт.9 Илттыг тāн палтаныл Тōрум Ангеле нэ̄глыс ос тāн Тōрум посн постаявēсыт; ӯй-хул ӯрнэ хōтпат*а хот-рохтысыт10 ос ань Ангел лāвыс: ”Ул пилэ̄н! Ам нāнанн пуссын мирн ēмтнэ яныг ся̄гтальпиӈ ля̄ххал тотсум.11 Давид-хōн ӯсэт нāн мāгсылын вēстын хум самын патыс. Тав Кристос*б, Кӯсяй.12 Ос тытты нанāн пōс: ӯй-хул тэ̄нэ хурат хуим ос тōрыл мāнигтым Ня̄врам нāн хōнтылы̄н тах”.13 Ос илттыг Ангел ёт тōрум*в сāв хōнт Ангелыт ёхтыгпасыт. Тāн Тōрум э̄сгысаныл ос ся̄гтым рōхсыт:
14 ”Тōрумн нумын янытлап!
Мā тармыл мир роттыг ōлэ̄н,
тāнаныл Тōрумн э̄руптавет”.
15 Ангелыт тāнанылныл тōрумн минаманыл юи-пāлт ӯй-хул ӯрнэ хумит халанылт потыртасыт: ”Вифлеемн минэ̄в ос сунсэ̄в, тот мāныр ēмтыс, Кӯсяй мāнав мāныр ōвылтыт хӯлтыстэ”.16 Ос молямтахтым ёхтысыт, Мария ос Ӯсюп хōнтсаныл, ӯй-хул тэ̄нэ хурат хӯйнэ Ня̄врам хōнтсаныл.17 Хунь кāсаласаныл, ты Ня̄врамакве урыл тāнанылн мāныр ля̄ххал лāвыглавес, та ōвылтыт потыртасыт.18 Ӯй-хул ӯрнэ хумит потыртāлум ля̄ххалытн ань пуссын хӯнтлум утыт та пӯмсялахтасыт.19 Ань Мария ты лāтӈыт пуссын номим ōсьсанэ, сымēт ōсьсанэ.
20 Ӯй-хул ӯрнэ хумит ювле минасыт. Ля̄ххал хӯлыгламаныл вāсиньтаманыл мāгыс Тōрум янытласаныл ос э̄сгысаныл. Ангел лāвум сирыл пуссын тох иӈ ōлыс.
21 Нёлолов хōтал оигпам юи-пāлт хум Ня̄врам утэ яктын нак пора ёхтыс. Тав Ӣсус намыл пинвес. Тав Ангелын тох намаявес, хунь Ся̄не кӣвырт иӈ āтим ōлыс.22 Моисей сāккон сирыл сыстамтахтын хōтаталыт юи-пāлт Тав Иерусалимын*г тотвес Тōрум э̄лы-пāлын тӯсьтуӈкве.23 Кӯсяй сāкконыт хансым сирыл кāсыӈ ōвыл хум-ня̄врам Кӯсяйн намаим вос ōлыс.24 Аквта сāккон сирыл йир вāрнэ мāгыс кит вōр голубь ман ос голубь ня̄врамыг э̄рыс ёт тотуӈкве.25 Тōнт Иерусалимыт Симеон нампа хōтпа ōлыс. Тав вēськатыг ōлыс, Тōрум янытластэ. Израиль мāгыс торамтахтын пōйксян нак ӯрыс; Тав нуми-пāлэ̄т Ялпыӈ Лылы ōлыс.26 Тавēн Ялпыӈ Лылын сāртын лāвим ōлыс, Кристос Кӯсяй кāсаланэ̄тэ мус сорме ат вāсинтытэ.27 Лылытэ̄н хӯлтыматэ хосыт Симеон ялпыӈ колн ёхтыс. Ся̄нягēн-āсягēн Ӣсус-ня̄врам ялпыӈ колн тӯлвес, Сāккон сирыл вāруӈкве.28 Симеон Ня̄врам ляпан вистэ, Тōрум э̄сгым лāвыс:
29 ”Ань Наӈти хӯсин ротты̄г холуӈкве тāратылын, Кӯсяй, Наӈти лāвмын сирыл.
30 Ань ам самагум Наӈ Вēстылын вāстэ̄н.
31 Пуссын мир э̄лы-пāлыт ты вēстыл Наӈ сё̄питаслын.
32 Наӈ мōт пӯпыг тōрумн агтнэ мāхум Тōрум посыл
ос Израиль мир янытлапыл миӈкве патэ̄гын”.
33 Āсяге-Ся̄няге Ӣсус ōвылтыт лāвим лāтӈытыл осятахтыгласы̄г.34 Ос Симеон тāн мāгсыланыл Тōрумныл э̄рупса вōвыс. Мариян, Ӣсус Ся̄нēн лāвыс: ”Тав паттатэ̄т Израиль мāт сāв мир порславет ос сāв мир нōх-патэ̄гыт. Тав Тōрумныл йинэ пōсыг ēмты. Топ тōва мир Тав торгыле ōлэ̄гыт.35 Наӈ лылын, Мария, сырайл тара минаве – сāв сымыт номтаныл пӯсхатэ̄гыт”.
36 Тот Тōрум лāтыӈ тотнэ хōтпа ōлыс. Ты Фануил Асир рӯтныл ōлнэ хум тав āгитэ, Анна. Хум вāрме юи-пāлт хумитэ ёт тав сāт тāл ōлыс. Тав сака матум ōлыс.37 Тувыл онтырсāт нупыл нила тāлэ мус тав хумтāл ōлыс. Ялпыӈ кол тав нэ̄мхуньт ат оссувлāлыстэ. Тав э̄тэ-хōтал пойиксяс ос поститахтыс*д, Тōрумн тох лусытас.38 Та порат, Тав палтэ ёхтум, Кӯсяй э̄сгыстэ, Иерусалим лыпась паттын нак кāсыӈ ӯрхатнэ хōтпан Ня̄врам ōвылтыт потыртас.
39 Кӯсяй сāккон хосыт вāрнэ вāрмалянэ̄н пуссын āсытламанэ̄н юи-пāлт Ӯсюп ос Мария Галилея мāн, тэ̄нки Назарет ӯсэ̄н ювле-минасы̄г.40 Ань Ӣсус яныгмас, акваг ё̄рыг-вāгыг, сāв номтыӈыг ēмтыс. Тōрум э̄рупсатэ Тав ётэ ōлыс.
41 Кāсыӈ тāл Яныг ялпыӈ хōтал кāстыл Ӣсус ся̄няге-āсяге Иерусалимн ялантāлсы̄г.42 Ӣсус китхуйплов тāлэ тōвлум юи-пāлт, кāсыӈ тāлыт ōлнэ хольт, тāн ялпыӈ хōтал янытлаӈкве ёхтысыт.43 Ялпыӈ хōталт āстум юи-пāлт тāн юв-минмыгтасыт. Ань Ӣсус тай Иерусалимыт хультыс, топ ся̄няге-āсяге ты ōвылтыт ат вāстэ̄н.44 Ӯсюп ос Мария хōтал палыт йисыг, номсысыг Пы̄гēн мāхум ёт юв. Хунь рӯтанэ̄н ос руманэ̄н халыт кинсуӈкве патыстэ̄н,45 тāн халанылт ат хōнтыстэ̄н. Тōнт тэ̄н Иерусалимын ювле-ёхсы̄г, таве тот хōнтуӈкве номсыстэ̄н.
46 Хӯрум хōтал хультум юи-пāлт Пы̄гēн ялпыӈ колт хōнтыстэ̄н. Ӣсус Сāккон ханисьтан хумит халт ӯнлыс, тāнаныл хӯнтлысанэ ос китыгласанэ.47 Пуссын хӯнтлысыт ос Тав ювле лāвим номтыӈ лāтӈанэ̄ныл, потранэ̄тыл осятахтыгласыт.48 Ӣсус кāсаламēнт ся̄няге-āсяге хот-осятахтасыг ос ся̄не Таве китыгластэ: ”Пы̄гкве! Наӈ мēн ётмēн мāныр вāрсын? Мēн āсин ёт наӈын кинсым сымтāл āла патсумēн”.49 Тōнт Ӣсус тэ̄натэ̄н лāвыс: ”Манры̄г нэ̄н Āнум кинсыслы̄н? Нэ̄н ман ат вāглын-а, Āнумн Āсюм колыт э̄ри ōлуӈкве?”50 Тэ̄н Ӣсус лāвум лāтӈыт ат торгамтасанэ̄н.
51 Ӣсус тэ̄н ётэ̄н минас ос Назаретн ювле-ёхтыс ос лāтыӈ хӯнтлым ōлыс. Тав ся̄не та лāтӈыт пуссын сымēт ōсьсанэ.52 Ӣсус яныгмас ос сāв номтыӈыг ēмтыс, Тав мирн ос Тōрумн э̄руптавес.
*а 9 2:9 уй-хул ӯрнэ хōтпа – ты русь лāтӈыл пастух
*б 11 2:11 Кристос – еврей лāтӈыл ты Мессиас. Мессиас – ты вōйл сартнэ хōтпа. Пēс порат Израиль мāт хунь хотъют та хоны̄г виве, ты э̄лы-пāлт тав вōйл сартвес. Ӣсус Тōрумын вōйл сартвес, таимāгыс Тав Мессиас – Кристос. Ань Кристос – ты Мессиас, Израиль мāхумн ӯрвес.
*в 13 2:13 тōрум – ты русь лāтӈыл небо
*г 22 2:22 Иерусалим нампа ӯс – сяр э̄рнэ ӯс Палестина нампа мāт
*д 37 2:37 поститахтуӈкве – ты русь лāтӈыл поститься
Глава 2
