Choose Language
Old Testament Books
New Testament Books
view with a second Bible
1 Тōнт Ӣсус мирын ос Такви ханисьтахтын хумиянэ̄н тох потыртас:2 ”Моисей ӯнлын мāт Сāккон ханисьтан хумит ос фарисейт ты ӯнлэ̄гыт.3 Таимāгыс пуссын, хумус тāн нāнанн лāвēгыт, тох вāрēн. Тāн ханисьтан вāрмаляныл хӯнтлэ̄н. Ос тāн вāрмаляныл сирыл ул вāрен, тāн нас потыртэ̄гыт, ос тасир ат вāрēгыт.4 Тāн тāрвитыӈ ос рōвтал хӯнтыт акван нэ̄гыглāлыяныл, тувыл таи мāхум вāӈын тармыл пиныяныл, тāнти ос тулё̄выл ат ю̄ныгталэ̄гыт.5 Пуссын тāн мāныр вāрēгыт, мирын вос кāсалавет. Тāнти вӣльтъятн ос кāтсорн нэ̄гнэ тōрлōмтаныл сāкконыл ōлнэ лāтӈыт ёт янгыг вос ōлэ̄гыт ос маснут русыяныл хосагнув вос хосыгхатэ̄гыт.6 Тāн пӯри пасан пōхат ос синагогат яныг улас тармыл ӯнлуӈкве э̄руптэ̄гыт.7 Тāн э̄руптэ̄гыт, хунь тāн мāхум атхатнэ мāт янытлавēт, ос мирын вос лāвавет: ‘равви’*а!8 Ос нāн нāнтинāнн раввииг лāвуӈкве ул тāртэ̄н, нāн акв Ханисьтан хум – Кристос туп ōньсегы̄н, ос нāн нāнти халынт – пуссын ягпыгыт ты.9 Ос нэ̄мхотъют ты мā тармыл нāнти Āсиг ул лāвēлын, нāн акв Āсь туп ōньсегы̄н, Тав тōрумт ōлы.10 Ос ханисьтан кӯсяйиг нāнтинāн лāвуӈкве ул тāртэ̄н, акв Ханисьтан кӯсяй ōньсегы̄н – тыи Кристос.11 Хотъютын сяр яныг, таи вос нāн мāгсылын лусытан хумы̄г ōлы.12 Алам тах, хотъют таквинāтэ янытлы, таи ёлымтаве, ос таквинāтэ ёлымтан хōтпа, таи тах янытлаве”.
13 ”Сāккон ханисьтан мāхум ос фарисейт, нāнан тыстыл! Нāн китвильтуп мāхум: нāн Тōрум йильпи нотн сялтнэ āви э̄лумхōлас мāгыс лап-пантылы̄н. Нāн нāнти тув ат сялтэгы̄н, ос тув сялтуӈкве тахнэ хōтпат ат тāратэгы̄н.14 Сāккон ханисьтан мāхум ос фарисейт, нāнан тыстыл! Нāн китвильтуп мāхум: хумияныл āтимыг ēмтум нэ̄т колт хот-хартыяны̄н ос китвильтпаг намыл хоса пōйксегы̄н: таимāгыс усьпылнэ̄г сāв лю̄камтан лāтыӈ выгы̄н тах.15 Сāккон ханисьтан мāхум, фарисейт, китвильтуп мāхум: тыстыл нāнанн паты тах, ся̄рысь ос тōсам мāтт пуссын мувылтыяны̄н нāнти нуплын акв хōтпа хартнэ мāгыс; хунь та хōтпа нāнти нуплын хартылын, тōнт таве турман мā хōтпаг вāрилы̄н тах, ос нантинāнныл кит сёс лю̄льнувēг тах.16 Мир э̄лаль тотнэ сампыльтāл кӯсяит, нāнан тыстыл! Нāн лāвегы̄н: ‘Хотъют ялпыӈ колыл тāк лāтыӈ ке мы̄г, тай нэ̄матыр рēтэ āтим; ос хотъют ялпыӈ кол сōрнитэтыл тāк лāтыӈ мы̄г ке, та лāтӈе э̄ри вāруӈкве’.17 Номттāлыт ос сампыльтāлыт! Мāныр яныгнуве: сōрни ман ос сōрни ялпыӈыг вāрнэ ялпыӈ кол?18 Ос май: ‘Хотъют йир пиннэ нормал тāк лāтыӈ ке мы̄г, тай нэ̄матыр рēтэ āтим; ос хотъют тот хуйнэ мӯйлупсал ке тāк лāтыӈ мы̄г, таи э̄ри тах вāруӈкве’.19 Номттāлыт ос сампыльтāлыт! Мāныр яныгнуве: мӯйлупса, ман ос мӯйлупса ялпыӈыг вāрнэ, йир пиннэ норма?20 Хотъют йир пиннэ нормал тāк лāтыӈ ке мы̄г, таитыл ос пуссын, мāныр тув пиным ōлы, таитыл тāк лāтыӈ та мы̄г;21 Ос хотъют ялпыӈ колыл ке тāк лāтыӈ мы̄г, таитыл ос тот Ōлнэ утыл ос тāк лāтыӈ та мы̄г;22 Ос тōрмыл тāк лāтыӈ минэ хōтпа Тōрум ӯнлын хōн уласыл ос та тармыл Ӯнлын утыл тāк лāтыӈ та мы̄г.23 Сāккон ханисьтан мāхум, фарисейт, китвильтуп мāхум, тыстыл нāнан! Нāн янмалтам мятаныл, укропныл ос тминныл*б ловит лōмтаныл Тōрумн мыгы̄н, ос сāкконт сяр яныг ханисьтан вāрмалит: вēськат вāрмаль, сāлитан вāрмаль, Тōрумн агтнэ вāрмаль хот-вуськасаны̄н. Тыи э̄ри вāруӈкве, та вāрмаль урыл хот ат ёрувлым.24 Сампыльттāл кӯсяит, нāн лёмвой хот-атылын, ос верблюд тай тох таяпилын!25 Сāккон ханисьтан мāхум, фарисейт, китвильтуп мāхум: тыстыл нāнан, нāн āны ос пāнтāны коны-пāланыл хот-сыстамтыяны̄н, ос кӣвырт тэ̄н тӯлмантым утыл ос уркыл тāгиньтым ōлэ̄г.26 Сампыльтāл фарисей! Сāртын āнын ос пāнтāнын кивре хот-сыстамтэ̄лын, та хосыт коны-пāланэ̄н ос сыстамы̄г вос ēмтэ̄г тах.27 Сāккон ханисьтан мāхум, фарисейт, китвильтуп мāхум: тыстыл нāнан, нāн аквтуп я̄ӈк ōльпыл сартым савыӈкант ōлнэ курсипыт хурипаг ōлэгы̄н, тāн коны-пāланыл – нё̄тнэт, ос кӣвранылт сорум патум хōтпат лувнарт ос сāвсыр лю̄ль утыт та хуēгыт.28 Нāн ос коныл тох та сусхатэгы̄н, авктупыл вēськат мāхум, ос кӣвранынт тай китвильтупыт ос сāккон тāл ōлнэ мāхмыт нāн ты.29 Сāккон ханисьтан мāхум, фарисейт, китвильтуп мāхум: тыстыл нāнан, нāн Тōрум лāтыӈ тотнэ хумит мāгыс курсипыт ӯнттэгы̄н ос вēськат хумит памятниканыл нё̄тнэг хорамтыяны̄н.30 Ос лāвегы̄н: ‘Мāн āсянув ōлум поранылт ōлсув ке, тōнт мāн Тōрум лāтыӈ тотнэ хумит кēлп сōснэ хумыг тāн ётаныл ат ōлнувув’.31 Тасир танай нāн нāнти нāнти урынт мāк лāвегы̄н, нāн таит ня̄врамыт, хотъютыт Тōрум лāтыӈ тотнэ хумит ты алсыт.32 Ос тай āсталтēн, мāныр нāн āсянын ōвылтасыт!33 Ялпыӈӯйныл тэ̄лум утыт! Нāнан турман мāн сутытан вāрмальныл хумус хот-оюӈкве рōви?34 Таимāгыс ты Ам нāн палтын Тōрум лāтыӈ тотнэ хумит, номтыӈ хумит ос Сāккон ханисьтан хумит кēтэ̄гум. Нāн тах тōват сяма алыяны̄н ос пēрнан керсолил ратыяны̄н, ос тōват тах нāн синагогатт рāтуӈкве патыянын ос акв ӯсныл мōт ӯсын ня̄влуӈкве патыянын.35 Нāн палтын вēськат мир мāн сосхатам кēлпе пуссын ювле вос сосхаты, вēськат Авель ōвыл сосхатам кēлпеныл ос Варахиин ōйка Захария пы̄ге сосхатам кēлпе мус, май таве нāн ялпыӈ колыг ос йир-мӯйлупса пиннэ нормаг халт сяма алыслын.36 Мāк нāнанн ты лāвēгум, ты пуссын тах ань йис ōлнэ мир палт ты ёхты”.
37 ”Иерусалим, Иерусалим, Тōрум лāтыӈ тотнэ хумит алнэ ӯс, ос Тōрумн кēтым хōтпат āхвтасыл пāхвтын ӯс! Манах сё̄с кос Ам наӈ ня̄враманы̄н акван-атуӈкве тахсанум, хумус нэ̄ сиськурек такви ня̄враманэ товлаге кӣвырн атыянэ, ос нāн тох ат тахмаясы̄н!38 Сунсэ̄н сар: нāн колын тāтлыг хот-хӯляве тах.39 Ам нāнанн ань ты лāвēгум: Āнум воссыг та мус ат кāсалылы̄н, хунь тах ат лāвегы̄н: ‘Кӯсяй наме мāгыс Йинэ хум э̄сгаве’!”
*а 7 23:7 Равви – ты еврей лāтӈыл ханисьтан хум
*б 23 23:23 мята, укроп ос тмин – атыӈ тэ̄нэ пумыт
Глава 23
