Choose Language
Old Testament Books
New Testament Books
view with a second Bible
1 Ӣсус, тāн мāгсыланыл э̄лаль ханисьтапыл потыртым, лāвыс:2 ”Тōрум йильпи нот аквтупыл хōн, хōӈха такви пы̄ге мāгыс пӯри вāрыс.3 Ос лусытан хумиянэ кēтсанэ мӯйлын мāхум пӯри вāрнэ мāн вōвуӈкве. Ос таит ёхтуӈкве ат тахсыт.4 Тувыл мōт лусытан мāхум кēтыс, лāвим: ‘Вōвнэ мāхумн лāвен: Ам тэ̄нэ пасанум вāрсум, хāрмисанум ос ёмсякв тыттум мāньмисанум алсанум, ос пуссын āстысыт. Пы̄гум пури пасанн ёхтэ̄н’.5 Ос тāн ты лāтӈыт ат хӯнтамлāлсыт, хотъют тэ̄пканэн минас, хотъют тыналахтын мāтэн минас.6 Мōтаныт тав лусытан хумиянэ пувумтасаныл, сакватасаныл ос тāнаныл алсаныл.7 Ты урыл хӯлмет, хōн ōйка сяр хот-кантмувес. Такви хōнт хумиянэ кēтым, лусытан хумиянэ алам утыт порсласанэ ос тāн ӯсаныл нāйн тыттыстэ.8 Тōнт тав такви лусытан мāхманэ̄н лāвыс: ‘Маньнэ̄ пури пасан āстыс, ос вōвыглам мāхум тыт ӯнлуӈкве ат хōйхатэ̄гыт.9 Ань лё̄ӈх лāккваг патнэ мāнн минэ̄н ос хотъют хōнтэгы̄н, пуссын маньнэ̄ пӯри пасанн вōвēн’.10 Лусытан мāхум, лё̄ӈхытн миным, хотъют хōнтсыт, пуссын мир, кантыӈ ман ёмас хōтпа акван-атсаныл. Ос пӯри пасан мирыл та тāгинтас.11 Хōн, атхатам мир āӈкваталуӈкве ёхтым, тот акв э̄лумхōлас кāсалас, тав пӯри вāрнэ маснутыл масхатым ат ōлыс.12 Ос тавēн лāвыс: ‘Рума! Наӈ хумус пӯри вāрнэ маснуттāл тыг сялтсын?’ Таи ос ат потыртас.13 Тōнт хōн лусытан хумиянэ̄н лāвыс: ‘Кāтанэ ос лāгланэ нэ̄гсалэ̄н, таве вуēлын ос кон турман мāн воськасэ̄лын. Тот лю̄нсь ос пуӈк лясгил суйты тах’.14 Вōвим мāхум сāв кос, туп пēриим мāхум мосься”.
15 Тōнт фарисейт минасыт ос сё̄псялтахтасыт, хумус Таве лāтӈе сирыл пувумтаӈкве.16 Тāн Тав палтэ тāнти ханисьтахтын хумияныл иродиан мāхум ёт кēтыяныл, лāвим: ”Ханисьтан хум! Мāн вāглув, Наӈ вēськат, ос мāк Тōрум лё̄ӈх сирыл ты ханисьтэ̄гын. Наӈ ат ӯргалахтэ̄гын, мāныр хōтпат наӈ ōвылтытн номсэ̄гыт, Наӈын тāн пуссын аквхурипат.17 Тасир ос мāнавн лāвен: хумус Наӈ номсэ̄гын? Рим хōнын пōт ойтуӈкве рōви ман ос āти?”18 Ӣсус тāн нēрхатнэ писяныл кāсаластэ ос лāвыс: ”Манры̄г Āнум нēрхатэгы̄н, китвильтупыт?19 Āнумн суссылтэ̄н та олнкер, манарыл пōт ойтаве”. Тāн Тав палтэ динарий тотсыт.20 Ӣсус тāнанылн лāвыс: ”Тыт хотъют хури ос нам ōлы?”21 Тавēн лāвсыт: ”Рим хōн”. Тōнт Ӣсус тāнанылн лāвыс: ”Ос хōнын хōн утанэ маēн, ос Тōрумн Тōрум утанэ маēн”.22 Тыи хӯнтамлым, тāн ōсятахтыглāлсыт, ос Таве хӯлим та минасыт.
23 Та хōтал Ӣсус палт садукей мāхум ёхтысыт. Тāн лāвēгыт, э̄рттам сорум патум утытн нōх-ялтнэ вāрмаль āтим, ос Таве китыглалсаныл:24 ”Ханисьтан хум! Моисей лāвыс: ‘Хотты хум ке сорум паты, ня̄врам ат ōньсим, тōнт āпситэ таквинāтэ̄н тав нэ̄тэ вос вы̄гтэ. Тасир āпситэ кол э̄лаль рӯтмалтаве’.25 Акв сēмьят сāт пы̄г ōлсыт. Ōвыл каӈк нэ̄ тотыс. Тувыл сорумн патыс. Ня̄врам ат ōньсяс, такви нэ̄тэ āпситэ̄н хӯлистэ.26 Тасир китыт āпситэ мус, ос хӯрмит āпситэ мус, ос сяр ань сāтыт āпситэ мус тох та ōлыс.27 Юи-ōвылт нэ̄ ōс сорумн та патыс.28 Ань, нōх-ялтнэ̄тэт тах сāт ягпыгыт халт, хотъют нэ̄г тав паты? Алам тāн пуссын тавēн хумы̄г ōлсыт”.29 Ӣсус тāнанылн ювле-лāвыс: ”Нāн хот-тыпылтахтум утыт, хансым Нэ̄пакыт ос Тōрум ё̄р ат вāганы̄н.30 Алам нōх-ялтнэ юи-пāлт нэ̄ ат тотаве, хум ат вāраве. Тāн Ангелыт хольт тōрумт ōлуӈкве патэ̄гыт.31 Ос нāн ман ат ловиньтāлыслын-а, Тōрум нāнанн нōх-ялтнэ урыл мāныр потырты:32 ‘Ам Авраам тав Тōруме, Исаак тав Тōруме ос Яков тав Тōруме’? Тōрум сорумн патум мāхум Тōрмыг хунь ōлы, Тав лылыӈ мāхум Тōрмыг ōлы”.33 Ос мир ты лāтӈыт хӯнтлым, Тав ханисьтапанэ̄н ōсятахтыглалсыт.
34 Ань фарисейт хӯлманылт, хумус Ӣсус садукейт тув пойтуптасанэ, акван атхатасыт.35 Ос акваныл, Сāккон ханисьтан хум, Тавēтыл нēрхатым, Таве китыгластэ:36 ”Ханисьтан хум! Моисей сāкконыт хоты сāккон сяр янгы̄г ōлы?”37 Ӣсус тавēн лāвыс: ”‘Наӈ Кӯсяйн, Тōрмын сяр сымыӈысь э̄руптэ̄лн, пуссын наӈти лылын ос номтаны̄н пиным э̄руптэлы̄н’.38 Тыи ōвыл ос сяр яныг Тōрум сāккон ты.39 Китыт Тōрум сāкконэ ос тамле: ‘Ляпа хōтпан наӈкинāнын э̄руптанэ̄н хольт э̄руптэ̄лын’.40 Ты кит Тōрум сāкконыг сирыл пуссын Сāккон ос Тōрум лāтыӈ тотнэ хумит ханисьтан лāтӈаныл ōлэ̄гыт”.
41 Хунь фарисейт акван атхатасыт, Ӣсус тāнаныл китыгласанэ:42 ”Мāныр нāн Кристос урыл номсэ̄гын? Тав хотъют Пы̄г?” Тавēн лāвēгыт: ”Давид пы̄ге”.43 Тāн нупланыл Тав лāвыс: ”Ос манрыг Давид Тōрум Лылыл вуим Таве Кӯсяйг лāвитэ, хунь потырты:44 ‘Кӯсяй ам Кӯсяюмн лāвыс: Та мус хунь Наӈ лāвыл нэ̄гылтан утанын Наӈ лāглагын ёлы-пāлн пиныянум, Наӈ Ам ёмаспāл кāтум торыг ӯнтэн’.45 Ос танай, Давид Кристос Кӯсяйг ке лāвитэ, хумус Кристос тавēн пы̄гы̄г ōлуӈкве вēрми?”46 Нэ̄мхотъют воссыг Тавēн акв лāтыӈ ювле-лāвуӈкве ат вēрмыс. Ос та хōтал пасныл воссыг нэ̄мхотъют Таве китыглаӈкве ат кӯстыс.
Глава 22
