Choose Language
Old Testament Books
New Testament Books
view with a second Bible
1 Ос Ӣсус кон-квāлыс, ялпыӈ колныл ё̄мнэтэт, Тав пōхатэ̄н ханисьтахтын хумиянэ ёхтысыт, Тавēн ялпыӈ кол каныт ōлнэ колыт хӯлтыглаӈкве.2 Ӣсус тāнанылн лāвыс: ”Тыи пуссын кāсалылын? Мāк нāнанн ты лāвēгум: тыт тах āхвтас тармыл āхвтас ат хульты; пуссын тах хот-сакватаве”.
3 Хунь Тав Вōййӣв урыт ӯнлахолыс, Тав палтэ сытамыг ханисьтахтын хумиянэ ёхтысыт ос китыглахтасыт: ”Мāнавн лāвен, хунь ты вāрмаль ēмты тах? Наӈ ёхтын порант ос ты мир холнэ поратэт манахурип пōс паты?”4 Ӣсус тāнанылн ювле-лāвыс: ”Ӯргалахтым ōлэ̄н, нэ̄мхотъютн ул вос лāплавен.5 Сāв хōтпа Ам намумтыл ёхтэ̄гыт ос лāвēгыт тах: ‘Ам Кристос’, ос сāв мир тах лāплэ̄гыт.6 Ос нāн хōнтлын вāрмаль урыл ос хōнтыт урыл ля̄ххал хӯлэгы̄н тах. Сунсэ̄н, хот ул рохтуптахтэ̄н; та вāрмалит сōль ēмтэ̄гыт. Ты юи-ōвыл хōтал āти.7 Алам акв мир мōт мир ля̄льт, акв хōн мōт хōн ля̄льт хōнтлаӈкве патэ̄гыт. Сāвсыр мāт мāхум тэ̄тал саватпин патэ̄гыт ос мā тōргуӈкве паты.8 Тыи пуссын āгвмыӈ-мосыӈ пора ōвылтахты.9 Тōнт нāн саватаӈкве ос алысьлаӈкве патавен; нāн Ам намум мāгыс пуссын мирытн лāвыл нэ̄глуӈкве патавен.10 Тōнт сāв мир Āнумн агтнэ вāрмалянылныл хот-воратэ̄гыт тах; тāнти халанылт ляпа мāхманыл тыналаӈкве патэ̄гыт, тāнти халанылт лāваныл нэ̄глуӈкве патыяныл тах.11 Ос сāв лāплахтын Тōрум лāтыӈ тотнэ хумит ēмтэ̄гыт тах, ос сāв хōтпа лāплавет тах.12 Ос лю̄ль вāрмалит сāвыг ēмтнэтэ мāгыс, сāв хōтпат сым э̄рупсаныл ос мосьсягнувēг ēмты тах.13 Хотъют сяр юи-ōвыл мус вēриты, таи вēстхаты тах.14 Ос ты ёмас Ля̄ххал Тōрум йильпи нот урыл пуссын мирытн хӯлнэ мāгыс мā янытыл потыртаве тах, тōнт усь та пуссын мир холы тах”.
15 ”Ос хунь тах нāн, Тōрум лāтыӈ тотнэ Данил лāтыӈ сирыл, пилысьман ос иксям нак ялпыӈ мāт кāсалылы̄н, – ловиньтан хōтпа вос торгамты̄тэ тах, –16 тōнт Юдея мāт ōлнэ мāхумн урыӈ мāн оюӈкве э̄ри;17 ос хотъют кол алат ōлы, пормасанэ мāгыс ёл ул вос вāглы;18 ос хотъют тэ̄пкант ōлы, маснутанэ мāгыс юв ул вос сялты.19 Ня̄врамыл тāрвитыӈ ōлнэ э̄кватын ос ня̄врам сяквыл тыттын э̄кватын та хōталытт яныг саватпи ēмты!20 Пōйксēн, ойнэ хōталын тэ̄лы порат ул вос ōлыс ос сабат-хōталн ул вос ликмыс.21 Та порат тах яныг саватпи ēмты, тамле нак мā ӯнттум пасныл ань ты мус ат ōлыглāлыс ос нэ̄мхуньт ат ēмты тах.22 Ос та хōталыт атпыл ке мосьсямтавесыт, тōнт нэ̄матыр лылыӈ ут ат хультнув; ос пēриям хōтпат мāгыс та хōталыт мосьсямтāнувēт.23 Тōнт тах, хотъют нāнанн ке лāви: ‘Сунсэ̄н, тыт ты Кристос’, манос ‘Кристос тот’, – ул агтэ̄н;24 Ос нōх-воратэ̄гыт тах кристосыг тахнэ урккыӈ утыт ос Тōрум лāтыӈ тотнэ урккыӈ хумит, ос лāплан мāгыс тāн яныг пōсыт ос ōлыглаттал вāрмалит хӯлтуӈкве патэ̄гыт, ос вēрмēгыт ке Тōрумын пēриим хōтпат ос лāплыяныл.25 Танай, Ам сāртын нāнанн та лāвсум.26 Ос нāнанн лāвēгыт ке: ‘Тот ты, Тав мир ōлтāл мāт’, – тув ул минэ̄н; ‘Тыт ты, Тав ты колнакыт ты тӯйтыглахты’, – ул агтэ̄н.27 Хумус сяхыл сāлыл хōтал нэ̄глын палныл сӯлтмаи ос хōтал ӯнтнэ пал мус нāӈки, тох Э̄лумхōлас Пы̄г ёхтын вāрмале ты паты тах.28 Хōла хуйнэ мāн хулахыт атхатэ̄гыт тах”.
29 ”Илттыг ос тах, та тыстылыӈ хōталыт юи-пāлт, хōтал лап-харыглы, э̄тпос ос такви посэ ат мы̄гтэ, тōрум совыт тōрмыл ёл-патэ̄гыт, тōрум ё̄ранэ тōргалтахтэ̄гыт.30 Тōнт тах Э̄лумхōлас Пы̄г пōсэ тōрумт нэ̄глы; ос тōнт тах ты мā янытыл ōлнэ сāвсыр мāхум пуссын янгысь лю̄ньсēгыт, Э̄лумхōлас Пы̄г тасир кāсалыяныл: тōрум тулыт тармыл сāв ё̄ре ёт ос Тōрум посэ ёт Тав тах та нэ̄глы.31 Суиӈ турпа суил Тав Такви Ангеланэ тах кēтыянэ. Тāн Тав пēриям утанэ нила мā ēр пāлныл атыяныл, тōрум акв ēрыл ос мōт ēре мус акван-атыяныл”.
32 ”Смоковница-йӣвныл ханисьтахтэ̄н: хунь тав тованэ кāминьты̄г ēмтэ̄гыт ос лӯптаныл нэ̄глэ̄гыт, тōнт ваелы̄н, мосēртын тах тувыг ты ēмты.33 Тасир ты тах, хунь ты вāрмалит кāсалэ̄гын, ваелы̄н: юи-ōвыл хōталыт ляпат, сяр āви пōхан ёхтым ты ōлэ̄гыт.34 Мāк нāнанн ты лāвēгум: ты вāрмалит ēмтнэ э̄лы-пāлт ты э̄лумхōлас рӯт ат холы.35 Тōрум ос мā холэ̄г, ос Ам лāтӈанум ат холэ̄гыт”.
36 ”Та хōтал урыл ос та сё̄с урыл нэ̄мхотъют ат вāг, тōрум Ангелыт ос ат вāганыл, та урыл туп Ам Āсюм тактēтэ вāгтэ.37 Хумус Ной ōлум порат ōлыглас, тасир ос Э̄лумхōлас Пы̄г ёхтынэ̄тэ порат та ēмты.38 Хумус та хōталыт ōлыс, мā янытэ̄т витн амаранэ̄тэ э̄лы-пāлт, мāхум тэ̄сыт, айсыт, нэ̄ тотыгласыт ос хум вāрыгласыт, Ной яныг кāраплин тāлнэ̄тэ хōтал мус.39 Ат номсасыт та мус, хунь мā янытэ̄т витн амаравес ос пуссын хот-порславēсыт, – тох Э̄лумхōлас Пы̄г ёхтын вāрмале ос ты паты.40 Тōнт кит хōтпа тэ̄пкант ōлэ̄г тах: акватэ виве, ос мōтанэ хӯльтуптаве;41 Кит э̄кваг колас сам ратнэ утыл колас сам ратэ̄г: акватэ виве, ос мōтанэ хӯльтуптаве тах.42 Ӯрхатым ōлэ̄н! Нāн ат вāглын, хоты сё̄сыт нāн Кӯсяйн ёхтын поратэ тах ēмты.43 Ос таи нāн вāглын, кол кӯсяй вāнувтэ ке, хунь тӯлмах ёхты, тōнт тав ёл ат хуйнув ос такви кол пōхе хилуӈкве ат тāратанувтэ.44 Таимāгыс нāн ос сё̄питахтым ōлэ̄н: хунь ат ӯрхатэ̄гын, тōнт тах Э̄лумхōлас Пы̄г ёхты”.
45 ”Хōӈха та сōлиӈ ос номтыӈ мēтхум, хотъют кӯсяен мōт мēтхумиянэ нуми-пāлт тӯсьтуве ос э̄рнэ порат тав тāнанылн тэ̄нут урты̄тэ тах?46 Сōтыӈ тамле мēтхум, хотъют кӯсяе ёхтын порат тох рӯпитым ōлы.47 Мāк нāнанн ты лāвēгум: пуссын такви ōлтулэ тармыл таве та тӯсьтытэ.48 Ос та мēтхум кантыӈ ке, такви сымет лāви тах: ‘Кӯсяюм молях ат ёхты’,49 Ос такви мēтхумиянэ ос мēтнэ̄танэ рāтуӈкве патыянэ, аюм хōтпат ёт тэ̄ӈкв ос аюӈкве паты, –50 тōнт та мēтхум кӯсяе та хōталыт ёхты, хоты хōталыт тав ат ӯрхаты, та сё̄ст ёхты, хоты тав ат вāстэ.51 Ос тōнт кӯсяен тав та сака ратаве ос алаве тах, ос китвильтуп хōтпат палт кēтаве. Тот лю̄нсь ос пуӈк сихыртап суйты тах”.
Глава 24
