Choose Language
Old Testament Books
New Testament Books
view with a second Bible
1 Ӣсус китхуйплов ханисьтахтын хумиянэ Такви палтэ вōвсанэ, тāнанылн кулит тармыл ōлнэ ё̄рыл мисанэ, кулит хот-ня̄влын мāгыс, пуссын āгвм ос тāрвит пусмалтан мāгыс.2 Китхуйплов апостолыг*а лāвим хумит наманыл тамле ты: ōвыл Симон, Пēтырыг лāваве, ос тав ягпыге Андрей, Яков, Зеведей пы̄ге ос тав ягпыге Иоан,3 Филипп ос Варфоломей, Фома ос пōт атнэ Матвей, Алфей пы̄ге Яков, ос Фаддей,4 Симон Кананит ос Иуда Искариот, ётыл тав Ӣсус лылы тыналастэ.5 Ты китхуйплов утыт Ӣсус ты кēтсанэ, тамле лāтӈыл лāвсанэ: ”Тōрум ат вāнэ мāхум палт миннэ лё̄ӈхыт хосыт ул ё̄мен, Самарият ōлнэ ӯсын ул сялтэ̄н;6 сāртын Израиль мāхум хот-тыпум палянаныл палт минэ̄н.7 Минэ̄н ос лāвэ̄н: ‘Тōрум йильпи нот ляпат ōлы!’8 Āгвмыӈ мир пусмалтэ̄н, сорумн патум утыт нōх-ялтуптэ̄н, проказал āгвмыӈ мāхум сыстамтэ̄н, кулит ня̄влэ̄н. Олнтāл майвесын, олнтāл маелы̄н.9 Нāнти э̄нтапанын нэ̄матыр сōрни, ся̄лыг олн ос аргин олн ул пинэ̄н.10 Хӯнт-хӯрыг, кит маснут, лāгыл маснут ос ё̄мнэ сув ёт ул вуен. Рӯпитан хōтпа рӯпататэ мāгыс тэ̄нутэ вос вы̄гтэ.11 Хоты ӯсын ман пāвлын нāн ат ёхтэгы̄н, тāра-паттэлы̄н – хотъют нāнан ляпан виӈкве таӈхи, тот тав палтэ нāн миннэн мус ōлэ̄н.12 Колн сялтнэн порат, тот ōлнэ хōтпатн юртыӈысь ōлнэ вāрмаль урыл лāвēн,13 ос колэ ке нāн лāтӈанынн хōйхаты, та колн нāн юртыӈысь ōлнэ вāрмалин вос сялты, ос колэ ат ке хōйхаты, юртыӈысь ōлнэ вāрмалин нāнти палтын ювле вос ё̄ӈхи.14 Ос хотъют нāнан ляпан ат вы̄ганэ ос нāн лāтӈанын ат хӯнтлы, тōнт та колныл ман та ӯсныл квāлнэн порат порс лōмтыт лāгланылныл хот-хосгувлэ̄н.15 Мāк нāнанн лāвēгум: та ӯсныл кӯпнитнуве Содом ос Гоморра нампа ӯсытт сутытан хōтал паты”.
16 ”Ам ань нāнан аквтупыл пāлят хāйтнутыт халн кēтыянум: ос нāн ялпыӈ ӯй хольт номтыӈыг ōлэ̄н, ос сыманын вос сыстамыт, голубь ӯй хурипаг ōлэ̄н.17 Э̄лумхōласытныл хурахлэ̄н: тāн нāнан сутытан мāн миӈкв патыяныл ос тāнти синагоганылт нāнан рāтуӈкве патыяныл.18 Ос нāн кӯсяит ос хōныт палт Ам мāгсылум тотавēн. Та ēмты тах, тāн палтаныл ос Тōрум ат вāнэ мāхумн Ам урумт потыртаӈкве вос тотавēн.19 Хунь нāн сутытаӈкве тотавēн, ул номсэ̄н, мāныр та торыг лāвуӈкве; та сё̄ст мāныр потыртаӈкве э̄ри, тах нāнанн мивēн.20 Тōнт нāн нāнки ат потыртэгы̄н, тай Āсин Лылы нāнант потырты тах.21 Ягпыг ягпыге тāнки халанылт сōрум мāгыс тыналыяныл тах, ос āсь – ня̄врамане; ня̄врамыт ся̄нь-āсь ля̄льт квāлēгыт ос тāнаныл сяма алыяныл тах;22 нāн пуссын мирын Ам Намум мāгыс лавыл нэ̄главēн. Ос хотъют юи-ōвыл мус вēриты, таи вēстхаты тах.23 Хунь акв ӯсныл нāн ня̄влавēн, мōт ӯсн хайтэ̄н. Мāк нāнанн лāвēгум: Израиль мā ӯсыт пуссын яласаӈкве ат āлымеганы̄н, хунь Э̄лумхōлас Пы̄г та ёхты тах.24 Ханисьтахтын хум Ханисьтан хуменыл янгыг ат ōлы, лусытан хум такви кӯсяеныл янгыг ос ат ōлы:25 тōвлы таи, хунь ханисьтахтын хум ханисьтан хумитэ хольт паты, ос лусытан хум кӯсяе хольт паты. Кол кӯсяй хум вēльзевулыг*б ке лāввес, ос колт ōлнэ мōт хōтпат усьпылнэ̄г тох лāвавēт?”
26 ”Таимāгыс хōтпатныл ул пилэ̄н. Нэ̄матыр тӯйтнэ вāрмалиг ат ōлы, тав мирын пӯсхаты тах, нэ̄матыр сытам вāрмалиг ат ōлы, тав мирын вāӈкве патаве тах.27 Мāныр Ам нāнанн турманыт потыртэ̄гум, нāн посыӈ хōталыт потыртэ̄н; маныр пāль асн восгим хӯлэгы̄н, э̄лаль кол аланыл рōӈхувлэ̄н.
28 Тамле хōтпатныл ул пилэ̄н, хотъютыт э̄лумхōлас алпитэ алыяныл ос лылытэ алуӈкве ат вēрмēгыт; Тавēныл пилэ̄н, хотъют э̄лумхōлас алпитэ ос лылытэ турман мāт хōлтуӈкве вēрми.29 Кит сяӈсирисыг мāнь олнкер тыныл ман ат тыналавēг? Ос нāн Āсин кāсасяпе тал нэ̄мхотъютэ мāн ёл ат паты.30 Нāн пуӈканынт иӈ пуӈкāтанын пуссын ловиньтым ōлэ̄гыт;31 Ос ул пилэ̄н! Нāн тынаны̄н сāвсыр сяӈсит тынанылныл тыныӈнувет.
32 Ос кāсыӈ хōтпа, хотъют мир э̄лы-пāлт Āнум кāсаси, Ам таве Амки Тōрум Āсюм э̄лы-пāлт ос кāсасēгум тах;33 Ос хотъют Āнумныл мир э̄лы-пāлт хот-вораты, таиныл Амки Тōрум Āсюм э̄лы-пāлт Ам ос тах хот-воратэ̄гум.34 Ул номсэ̄н, э̄рттэм Ам мир палт ротты̄г ōлнэ вāрмаль тотуӈкве ты мāн ёхтысум; рот вāрмаль тотнэ мāгыс хунь ёхтысум; сырай тотым ёхтысум.35 Пы̄г такви āсе ёт, āги такви ся̄не ёт, мань такви оныпе ёт киттыг тотнэ мāгыс Ам ты ёхтысум.36 Э̄лумхōлас лāвыл нэ̄гылттан утанэ – таи тав колэт ōлнэ мāхманэ та”.
37 ”Хотъют āсе ман ос ся̄не Āнумныл тāкысьнуве э̄руптытэ, таи Āнумн ат хōйхаты; хотъют пы̄ге ман ос āгитэ Āнумныл тāкысьнуве э̄руптытэ, таи Āнумн ат хōйхаты;38 Хотъют такви пēрнатэ ат вы̄гтэ ос Ам юи-пāлумт юв, таи Āнумн ат хōйхаты.39 Такви ōлупсатэ ӯргалан хōтпа ōлупсатэ тыпылтытэ тах, ос хотъют Ам мāгсылум такви ōлупсатэ тыпылтытэ, таи таве тах ос хōнтытэ”.
40 ”Хотъют нāнан ляпан-вы̄г, таи Āнум ляпан-вы̄г тах; ос хотъют Āнум ляпан-вы̄г, таи Āнум Кетум Āсь ляпан-вы̄г;41 Хотъют Тōрум лāтыӈ тотнэ хум тав наме мāгыс ляпан-вы̄гтэ, Тōрум лāтыӈ тотнэ хум мӯйлупсал миве тах; ос хотъют вēськат хōтпа тав наме мāгыс ляпан-вы̄гтэ, вēськат хōтпа мӯйлупсал миве тах.42 Ос хотъют Ам намум мāгыс пōлям вит āныл ханисьтахтын хумитныл ōлнэ акв ротсымпа хōтпа айты ке, мāк нāнанн лāвēгум, такви мӯйлупсатэ ат тыпылтытэ”.
*а 2 10:2 апостол – Тōрумн лусытан, Ӣсусын вōвим э̄лумхōлас
*б 25 10:25 вēльзевул – я̄вол, лю̄ль лылыт кӯсяй
Глава 10
