Choose Language
Old Testament Books
New Testament Books
view with a second Bible
1 Тōнт Тав, хāпын тāлым, ся̄рысь та пāлн унсыс ос Такви ӯсэн ёхтыс.2 Тав палтэ нёвумтаттāл хōтпа хуйнэ сованэ ёт тотвес. Ӣсус тāн агтнэ вāрмаляныл кāсаламет, нёвумтаттāл хōтпан лāвыс: ”Ул пилэ̄н, ня̄врамум! Наӈ кареканын тāратавēсыт”.3 Това Сāккон ханисьтан хумит тāнкинāнылт номсысыт: ”Тав Тōрумныл мовиньты”.4 Ӣсус ос, хунь тāн номтаныл торгамтасанэ, лāвыс: ”Манрыг нāн сыманынт лю̄ль номт ōньсегы̄н?5 Мāныр кӯпнитнув лāвуӈкве: ‘Наӈ кареканын тāратавēсыт’, ман ос лāвуӈкве: ‘Нōх-лю̄лен ос ё̄мыгтэн?’6 Нāн вос вāглы̄н, Э̄лумхōлас Пы̄г мā тармыл карекыт тāратан ё̄р ōньси”, – тōнт нёвумтаттāл хум нупыл лāвыс: ”Нōх-лю̄лен, хуйнэ сованын вуēн, наӈти колын юв-минэн”.7 Ос тав нōх-лю̄лис, такви хуйнэ сованэ висанэ, колэн юв та минас.8 Мāхум, тыги кāсалым, ōсятахтылалсыт, тамле ё̄рыл э̄лумхōласн миме мāгыс, Тōрум янытласыт.
9 Тувыл миным, Ӣсус пōт атнэ Матвей нампа хум кāсалас. Тав пōт атнэ кол пōхат ӯнлахōлыс. Ӣсус тавēн ля̄галас: ”Ам юи-пāлумт йӣен”. Тав нōх-лю̄лис, Ӣсус юи-пāлт та минас.10 Хунь Ӣсус Матвей колт мӯйлыс, пōт атнэ сāв мāхум ос карекыӈ мир Тав палтэ ёхтысыт, Тав ётэ ос ханисьтахтын хумиянэ ёт тāн тэ̄пъяласыт.11 Фарисейт таи кāсаламанылт Тав ханисьтахтын хумиянэ нупыл лāвсыт: ”Манрыг нāн Ханисьтан хумын пōт атнэ ос карекыӈ мāхум ёт тэ̄г ос айи?”12 Ӣсус хунь ты лāтӈыт хӯлсанэ, тāнанылн лāвыс: ”Āгвмтāл хōтпан лēккар хунь э̄ри, āгвмыӈ хōтпан лēккар э̄ри.13 Минэ̄н, ханисьтэлы̄н, хумус таи торгамтаӈкве: ёмас сымпа хōтпāг ōлэ̄н, Āнумн йир мӯйлупса ат э̄ри. Ам вēськат хōтпат хунь вōвēгум, ам карекыӈ хōтпат вōвуӈкве ёхтысум. Тāн Тōрум нупыл вос ё̄ӈхēгыт”.
14 Тōнт Тав палтэ Иоан ханисьтын хумиянэ ёхтысыт ос лāвсыт: ”Манрыг мāн ос фарисейт сāв поститахтэ̄в, ос Наӈ ханисьтахтын хумиянын ат поститахтэ̄гыт?”15 Ӣсус ювле-лāвыс: ”Ман мӯймāхум пури вāрнэ порат руталиг ōлэ̄гыт, хунь тāн ётаныл вāпс хум ōлы? Ос тамле пора ēмты, хунь вāпс хот-виве – тōнт усьта поститахтуӈкве патэ̄гыт.16 Нэ̄мхотъют асыӈ пēс маснут йильпи тōрыл ат лолсалытэ, йильпи ю̄нтым лолта пēс тōр хот-маныгтытэ тах, асэ усьпылнэ̄г лю̄лиг ēмты.17 Йильпи вина пēс сов хӯрыг кӣвырн хунь сōсаве. Та винан пēс хӯрыг пāлыг-маныгтаве, вина тах ёл-сōсхаты ос сов порсыг мины. Йильпи вина йильпи сов хӯргын сōсуӈкве э̄ри, тōнт таитэ ос тыитэ порсыг ат минэ̄г”.
18 Хунь Тав тыи потыртас, Тав палтэ синагога акв пуӈкхум ляпан-ровыс, ос Тав лāглаге тытн рагатас ос лāвыс: ”Ам āгим усьты сорумн патыс, тув ёхтэн, ос Наӈти кāтын тав тармылэ пинэ̄лын, тав тах лылыӈыг паты”.19 Ос нōх-лю̄лим, Ӣсус такви ханисьтан хумиянэ ёт тав юи-пāлэ̄т минасыт.20 Ос акв э̄ква, тав китхуйплов тāл кēлпе сōсхатнэ āгвм ōньсис, сысэ̄ныл ляпамтахтас ос Тав маснут ōвылэ̄н карсмахтас.21 Тав таквинāтэн нōмсыс: ”Тав маснутэн туп карсмахтэ̄гум ке, тōнт пусмēгум”.22 Ос Ӣсус хунь ювле-āӈкватас, таве кāсаламēнт, лāвыс: ”Ул пилэ̄н, āгикве! Наӈ наӈти агтылы̄н пусмалтавēсын”. Та пасыл нэ̄ та пусмыс.23 Хунь Ӣсус пуӈкхум колн ёхтыс, тот лю̄сь-э̄рыг ёнгын музыкантыт ос суясьлан мāхум пуссын кāсаласанэ,24 тāнанылн лягалас: ”Кон минэ̄н! Āги сорумн ат патыс, тав нас ёл-ойилматвес!” Мāхум Тавēтыл мовиньтасыт.25 Хунь мир кон-кēтвес, Тав колнакын сялтыс, āгирись кāт вистэ, ос āгирись нōх-лю̄лис.26 Ты вāрмаль урыл потыр та мā янытыл та минас.
27 Хунь Ӣсус тувыл минас, Тав юй-пāлэ̄т кит сампыльтāл хōтпаг ё̄мсы̄г ос рохсы̄г: ”Мēнмēн сāлитэлы̄н, Ӣсус, Давид Пы̄г!”28 Хунь Тав колын ёхтыс, сампыльтāл хумыг Тав ляпатэн йисы̄г. Ӣсус тэ̄натэ̄нн лāвыс: ”Нэ̄н агтэгы̄н, Ам тыги тах вēрмилум вāруӈкве?” Тэ̄н Тавēн лāвēг: ”Агтэ̄в, Кӯсяй!”29 Тōнт Тав тэ̄н саманэ̄н карсматасанэ ос лāвыс: ”Хумус агтэгы̄н, тасир нэ̄нанн ос вос паты”.30 Саманэ̄н пāлыг та пӯсхатсы̄г. Ӣсусн тāк лāввесы̄г: ”Сунсэ̄н тах, ты урыл нэ̄мхотъют ул вос вāг”.31 Ос тэ̄н кон-квāлмент, мā янытыл ты урыл потыртасы̄г.
32 Тагигы̄г кон-квāлмен порат, Тав палтэ кулин пувим сӯп-нēлмтал хум тотвес.33 Хунь куль ня̄влувес, сӯп-нēлмтал хум потыртаӈкве патыс. Ос мир ōсятахтыглым потыртасыт: ”Нэ̄мхуньт тамле нак Израильт ат ōлыглалыс”.34 Фарисейт ос потыртасыт: ”Тав кулит канась ё̄рыл кулит кон-ня̄влыянэ”.
35 Ӣсус пуссын ӯсыт ос пāвлыт хосыт та яласас, синагогатт мир ханисьтым, тōрум йильпи нот урыл Ёмас Ля̄ххал лāтӈыт тāнанылн тотым, сāвсыр āгвм, ё̄ртал э̄лумхōлас пусмалтым та яласас.36 Хунь Ӣсус мир анят кāсалас, Тавēн тāн сāлиг ōлсыт: ӯй-хул ӯрнэ хумитн оссувлым пāлят хольт тāн ё̄ртал ōлсыт.37 Тōнт ханисьтан хумиянэ нупыл лāвыс: ”Сāгрын колас пум сāв, ос якытлан хōтпа мосься.38 Ос колас пум сāгрын Кӯсяй пōйкелы̄н, ос пум сāгрын мāхум сāвнув Такви колас пумканэ̄н вос кēты тах”.
Глава 9
