Choose Language
Old Testament Books
New Testament Books
view with a second Bible
1 Хунь Ӣсус ханисьтапанэ Такви китхуйплов ханисьтахтын хумиянэ̄н потыртасанэ, тувыл э̄лаль ханисьтаӈкве ос лāтыӈ тотуӈкве мōт та мā ӯсытын та минас.2 Иоан, турман колт ӯнлым, Кристос вāрмалит урыл хӯлмет, кит такви ханисьтан хумияге кēтсаге3 Тавēн лāвуӈкве: ”Наӈ ман Таи ты, Хотъютын э̄ри ёхтуӈкве, ос мāнавн мōтан ӯруӈкве э̄ри тах?”4 Ӣсус тэ̄натэ̄нн ювле лāвыс: ”Минэ̄н, Иоанын лāвен, мāныр хӯлэгы̄н ос кāсалэгы̄н:5 Сампыльтāл мāхум сампосн ёхтавет тах, лāгыл нōхнэ мāхум ё̄мыгтаӈкве патэ̄гыт, проказал āгвмыӈ мāхум хот сыстамавет ос пальтāл мāхум хӯлуӈкве патэ̄гыт, сорум патум утыт нōх-ялтэ̄гыт ос нуса мирн Ёмас Ля̄ххал тотаве тах;6 Ос ань Ам ётум кāсасян хōтпа сōтыӈыг ōлы”.
7 Хунь тāн минасыт, Ӣсус мирын Иоан урыл потыртаӈкве патыс: ”Мāныр сунсыглаӈкве нāн мир ōлтāл мāн ялсы̄н? Вōтын нёвитан пум сунсуӈкве?8 Мāныр сунсыглаӈкве нāн ялсы̄н? Тыныӈ маснутыл масхатам э̄лумхōлас сунсуӈкве? Тыныӈ маснутыӈ мāхум хōныт колытт ōлэ̄гыт.9 Мāныр сунсыглаӈкве нāн ялсы̄н? Тōрум лāтыӈ тотнэ хум? Ам нāнан лāвēгум, тав Тōрум лāтыӈ тотнэ хумыл яныгнуве.10 Тыи ōлы таи, хотъют урыл хансыма: ‘Ам Амти Ангелум Наӈ э̄лы-пāлын кēтылум, тав Наӈ мāгсылын лё̄ӈх сё̄питы’.11 Мāк нāнанн лāвēгум: нэ̄тын ōньсим хōтпатныл витн тӯлнэ хумныл Иоаныл яныгнув нэ̄мхōтпа ат ōлыс. Топ ань Тōрум йильпи нотт сяр мāниг ōлнэ ут, тавēныл яныгнув.12 Витн тӯлнэ Иоан хум лāтыӈ тотум хōталанэныл ань ты хōтал мус, тōрум йильпи нот ля̄льт вори тотнэ вāрмаль ты ōлы, ос тōват таве ё̄рыл тāнки нупланыл манумтаӈкве āрталыяныл.13 Пуссын Тōрум лāтыӈ тотнэ хумит ос Сāккон Иоан ōлнэтэ пора мус Тōрум йильпи нот урыл потыртасыт.14 Тав алам, ваӈкв ке таӈхилы̄н, Ӣлия тав ты, хотъютын э̄рыс тыг ёхтуӈкве.15 Хотъют хӯнтлын паль ōньси, вос хӯлытэ!16 Хотъют хурипат ань ты ōлнэ мир? Ты мир ня̄врамыт хурипат, тāн кон ӯнлэ̄гыт ос юртанылн17 рōхтахтэ̄гыт: ‘Мāн нāн мāгсылын свирелил ёнгысув, ос нāн ат йӣквсы̄н. Мāн нāн мāгсылын тыстылыӈ э̄ргыт э̄ргысув, ос нāн ат лю̄сьсы̄н’.18 Иоан ёхтыс, тав ат тэ̄г, ат айи; ос тāн лāвēгыт: ‘Тав кулил вуим ōлы’.19 Э̄лумхолас Пы̄г ёхтыс, тэ̄г ос айи, ос лāвēгыт: ‘Тытты э̄лумхōлас, тав тэ̄ӈкве ос вина аюӈкве э̄рупты, тав пōт атнэ ос карекыӈ мāхумн румаг ōлы’. Ос номт вāрмалит Тōрум сāв номтанэ ты хӯлтыяныл”.
20 Тувыл Тав ōвылтахтас ӯсыт нупыл кантлуӈкве, хōт Тав сака сāв сāвсыр ōлыглаттāл вāрмалит вāрыглāлыс, ос тāн Тōрум нупыл ат ё̄ӈхысыт:21 ”Мāныр саватпи наӈын, Хоразин ӯс! Мāныр саватпи наӈын, Вефсаида! Нэ̄н Тōрум вāрум ё̄р вāрмалит вāсиньтасаны̄н. Тир ос Сидон ӯсыт ōлнэ мāхум тамле ё̄р вāрмалит вāсаныл ке, тāн хосат тāгыл рубище нампа маснутыл масхатым, хӯлюм халт ӯнлым, Тōрум нупыл ё̄хнувыт ке.22 Таимāгыс нāнанн ты лāвēгум: тах Тир ос Сидонын сут хōталыт нāнанныл кӯпнитнуве паты.23 Ос наӈ, Капернаум ӯс, номсэ̄гын наӈ тōрум палт нōх-āлмавен? Наӈ тах ёлы-мāн воськасавен. Наӈ кӣврынт ōлнэ ё̄р вāрмалит Содом ӯсыт ке ōлыглалсыт, та ӯс аньмус ӯнлынув.24 Ос таимāгыс ты лāвēгум, сутытан хōталыт Содом мāнн наӈынныл кӯпнитнуве тах паты”.
25 Аквнакт Ӣсус лāвыс: ”Наӈын янытлылум, Āсюм, тōрум ос мā Кӯсяй, Наӈ ты вāрмалит ня̄врам хурип хōтпатын хӯлтсанын, номтыӈ ос ханисьтам мирныл хот-тӯйтыслын.26 Тасир та, Āскве, Наӈ тох таӈхыс”.
27 ”Пуссын вāрмалит Āнумн Амти Āсюмныл майвесыт, ос нэ̄мхотьютын Āсе коны-пāл Пы̄г ат вāвэ; Āсь ос нэ̄мхотъютын Пы̄ге коны-пāл ат вāве, ос та хōтпан вāве, хотъютын тах Пы̄г Āсе хӯлтуӈкве тахмаи.28 Пуссын рӯпитан ос тāрвит тотнэ мāхум Ам палтум ёхтэ̄н, ос Ам нāнан тах ёл-ротмалтыянум.29 Ам ханисьтапанум вуēн ос Āнумныл ханисьтахтэ̄н, Ам канттāл ос ротсымпа, ос нāн лылыянын мāгыс урак нак хонтэгы̄н тах.30 Ам āлмтанутум кӯпнит, Ам тотнэ утум тāрвит ат ōньси”.
Глава 11
