Choose Language
Old Testament Books
New Testament Books
view with a second Bible
1 Хунь Тав урныл ёл-вāглыс, Тав юи-пāлэт сāв мир минмыгтасыт.2 Тав палтэ проказал*а āгвмыӈ хум ляпан йис ос, Тавēн сāнспуӈкаге тармыл ӯнтым, лāвыс: ”Кӯсяй! Таӈхēгын ке, āнум та сыстамтаӈкве вēрмилын”.3 Ӣсус кāтэ тактапастэ, тав палтэ карсмахтас ос лāвыс: ”Таӈхēгум, сыстамыг ēмтэн”. Хум тāра та проказа āгвменыл пусмыс.4 Ӣсус тавēн лāвыс: ”Сунсэн тах, нэ̄мхотъютын ты ōвылтыт ул потыртэн. Ань пӯп-ōйка палт минэн, йир вāрэн, хумус Моисей лāвыс вāруӈкве, мāхум вос вāганыл, наӈ пусмалтавēсын”.
5 Хунь Ӣсус Капернаумн сялтыс, Тав палтэ хōнтхумит пуӈкхум ёхтыс ос Тавēн пōйкыстэ:6 ”Кӯсяй! Колумт ам лусытан хумим хуи, тав параличил āгвмыӈ патыс, сака тāрвитыӈысь савалы”.7 Ӣсус тавēн лāвыс: ”Ам ёхтэ̄гум тах ос таве пусмалтылум”.8 Хōнтхумит пуӈкхум ювле-лāвыс: ”Кӯсяй! Ам Наӈын амки колум кӣвырн вōвуӈкве ат хōйхатэ̄гум. Топ лāтыӈ лягалэн, лусытан утум тах та пусми.9 Ос ам пуӈктотнэ хōтпатын вāӈнхумы̄г ōлэ̄гум, ос сāлтатыт мāгыс ам пуӈктотнэ хумы̄г ōлэ̄гум. Акван лāвēгум: ‘Минэ̄н’, ос та мины, ос мōтанын: ‘Йӣен’, ос та ёхты; āнумн лусытан хумим палт: ‘Таи вāрелын’, ос та вāри”.10 Ӣсус тыи хӯлме юи-пāлт ōсятахтыглалыс ос Тав юи-пāлэт ё̄мнэ мāхумн лāвыс: ”Мāк нāнанн ты лāвēгум: Израильт Ам ос тамле агтнэ вāрмаль ат хōнтыглалсум.11 Ам нāнанн ты лāвēгум: сāв хōтпа хōтал нэ̄глын ос хōтал ӯнтнэ палныл тах ёхтэ̄гыт ос Авраам, Исаак ос Яков ёт тах пури пасан вāтан Тōрум йильпи нотыт та ӯнтэ̄гыт.12 Ос мāхум, хотъютыт мāгыс Тōрум йильпи нот сё̄питавес, турман мāн кон-ня̄влавет тах: тот лю̄ньсь ос пуӈк сихралтан суй та суйты”.13 Ӣсус хōнтхумит пуӈкхум нупыл лāвыс: ”Минэн, ос хумус наӈ агтсын, тасир вос ēмты”. Лусытан хуме та сё̄с та пусмыс.
14 Ӣсус Пēтыр колн ёхтумēт, тав āгвмыӈ оныпе кāсалас, тав алпитэ сяр исум ōлыс.15 Ос таве кāтэт карсмаптастэ, алпи исуме хотталь та парс; нэ̄ нох-лю̄лис ос Ӣсусын лусытас.16 Хунь э̄типалаг ēмтыс, Тав палтэ кулил вуим сāв мāхум тотвесыт, Тав лāтыӈ ё̄рыл тāн кӣвранылныл куляныл кон-ня̄влысанэ ос пуссын āгвмыӈ мāхум хот-пусмалтасанэ.17 Тōрум лāтыӈ тотнэ Исая хум лāвме сирыл тох та ēмтыс: ”Тав мāн тарвитанув вис ос āгвманув тотсанэ”.
18 Хунь Ӣсус сāв мир мувлахитэ̄т кāсалас, ханисьтахтын хумиянэ̄н лāвыс тӯр та пāлн товуӈкве.19 Тōнт акв Сāккон ханисьтан хум Тав пōхатэн рōвыс ос Тавēн лāвыс: ”Ханисьтан хум! Ам Наӈ юи-пāлынт минэ̄гум, хоталь Наӈ атпыл ке минэ̄гын”.20 Ос Ӣсус тавēн лāвыс: ”Охсарыт танки ӯй-хул вōӈха ōньсēгыт, ос тōрум товлыӈ ӯйт пити ōньсēгыт; туп Ам, Э̄лумхōлас Пы̄г, пуӈк пиннэ мā ат ōньсēгум”.21 Мōт хум, Тав ханисьтан акв хумитэ, Тавēн лāвыс: ”Кӯсяй! Ōвлэ̄т āнум тāртэ̄лын ялуӈкве, āсюм ёл-сё̄питаӈкве”.22 Ӣсус тавēн лāвыс: ”Ам юи-пāлумт йӣен, сорум патум утыт вос тāнти сорум патум утанылн ёл-сё̄питавет”.
23 Хунь Ӣсус хāпн тāлыс, Тав юи-пāлэт ханисьтахтын хумиянэ тāлсыт.24 Ос ань аквта торыг ся̄рысь яныг хумпыӈыг ēмтыс, хāп сяр хумпытн лап-тотаве; Тав ос хуяс.25 Тōнт ханисьтан хумиянэ Тав похатэн ёхтысыт, Таве нōх-сāйкатасаныл ос лāвсыт: ”Кӯсяй! Лылыянув нэ̄гылттэн*б, ты порсэ̄в тах”.26 Ос Ӣсус тāнанылн лāвыс: ”Манрыг нāн тох пилэгы̄н, мосься агтнэ хумит?” Тувыл нох-лю̄лим вōт ос ся̄рысь ат тāратас, ос сяр таванты̄г та ēмтыс.27 Тав ханисьтан хумиянэ ōсятахтыглалым потыртасыт: ”Хотъют Тыи, Тавēн вōтыт ос ся̄рысь хӯнтлэ̄гыт?”
28 Хунь Ӣсус ся̄рысь та пāл вāтан Гераса нампа мāн ёхтыс, Тав кулитн пувим кит утыг ёт хōнтхатас, тэ̄н āхвтас курсипытыт ōлнэ сопамытныл кон-квāлсы̄г, сака кантыӈыг, нэ̄мхотьют та лё̄ӈх хосыт яласаӈкве ат вēрмыс.29 Ос тагигыг та рōӈхалтахтасы̄г: ”Мāныр Наӈын мēнамēныл э̄ри, Тōрум Пы̄г? Наӈ сутытан хōтал э̄лы-пāлт тыг ты ёхтысын, мēнамēн саватан мāгыс”.30 Э̄лын пӯрысь яныг аня пум тāим ё̄мыгтасыт.31 Ос кулит Таве пōйкысаныл: ”Мāнав кон ке ня̄влыянын, пӯрысь аня кӣвырн ня̄влэнн”.32 Ос Тав тāнанылн лāвыс: ”Минэ̄н”. Тāн кон-квāлсыт, пӯрысь анян та минасыт. Пӯрысь аня янытэ̄т карыс сыпныл ся̄рысьн та воськасахтысыт ос витн та сялтсыт.33 Пӯрысь ӯргалым хумит ӯсын хāйтсыт, пуссын урыл потыртасыт, хумус кулитн пувим утыг ёт ēмтыс, та урыл ос потыртасыт.34 Ань ӯс тāгыл мир пуссын Ӣсус ёт хōнтхатнэ мāгыс кон-атхатсыт, Таве кāсаламанылт, пōйкысаныл, вос тāн мāнылныл пōхан мины.
*а 2 8:2 проказа – хāхтхатнэ лю̄ль āгвм
*б 25 8:25 лылытэ нэ̄гылттаӈкве – ты русь лāтӈыл спасти
Глава 8
