Choose Language
Old Testament Books
New Testament Books
view with a second Bible
1 ”Сунсэ̄н танай, нāн нуплын мир суснэ мāгыс, ёмас вāрмалин мори ул хӯлтыглэлы̄н. Таимāгыс тōрум Āсин мӯйлупсал ат мивен тах.2 Хунь нуса хōтпатын олн мы̄гын, ты урыл турпат хосыт ул рōӈхен. Тох э̄сгил мāгыс синагогатт ос ӯсхӯлытт китвильтуп мāхум вāрēгыт. Мāк нāнанн ты лāвēгум: тāн тāнти мӯйлупсаныл ты выгыглāлыяныл.3 Ос хунь наӈ нуса хōтпан олн мыгын ке, ты урыл нэ̄мхотъют ул вос вāгтэ,4 тамле нё̄тмилын сытамыл маēлын. Сытамыг суснэ Āсин тах мӯйлупсал мāк та мӯйлуптавēн”.
5 ”Ос хунь пōйксēгын, китвильтуп хōтпат хольт ул вāрен. Тāн мирн вос суснэ̄ныл мāгыс, синагогат ос ӯсхӯлыт сāмыт пōйксян мāгыс ёл-лю̄лиглэ̄гыт. Ам сōль нāнанн лāвēгум, тāн тāнти мӯйлупсаныл ань вуиглāласāныл.6 Ос наӈ хунь пōйксēгын, наӈти колнакын сялтэн, āвин лап-пантэ̄лын ос наӈти Āсин нупыл пōйксен, Тав сытамыг ōлы. Наӈ Āсин сытамыг ōлнэ ут кāсалытэ, наӈын тах мӯйлуптытэ.7 Пōйксян порат Тōрум ат вāнэ мир хольт мори ул потыртэ̄н. Тāн номсэ̄гыт, тах сāв лāтыӈ ке лāвēгыт, тōнт э̄рттэм хӯлавет.8 Тāн хольтаныл ул ōлэ̄н. Нāн Āсин алам нāн пōйксян э̄лы-пāлынт вāгтэ, мāныр нāнан э̄ри”.
9 ”Ос тох пōйксēн: нуми тōрумт ōлнэ мāн Āсюв! Наӈ ялпыӈ намын вос янытлаве.10 Наӈ йильпи нотын вос ёхты; Наӈ тахнэн сирыл ōлнэ вāрмаль нуми тōрум хольт ты мāт ос вос паты.11 Тыхōтал мāнавн э̄рнэ ня̄нь маен.12 Мāн āрнут вāрмалянув тāратэ̄н, хумус мāнавныл āрнутаг вуиглам мир мāн тāратэ̄в.13 Ос āрталан вāрмалил мāнав ул пинэ̄лн, ос я̄волныл мāнав хот-ӯргалэ̄лын. Наӈ йильпи нотын, Наӈ ё̄рын ос Наӈ янытлан вāрмалин акваг э̄лаль та ōлы. Аминь.14 Нāн ос хōтпат кареканыл хот ке тāратыяны̄н, тōнт нāн кареканын ос Тōрум Āсин хот-тāратавет тах.15 Ос э̄лумхōласыт кареканыл нāн хот ат ке тāратыяны̄н, тōнт Āсин нāн карек вāрмалянын ос тах хот ат тāратыянэ”.
16 ”Ос тах хунь поститахтэгы̄н, китвильтуп утыт хольт марсюмыг ул ōлэ̄н; май мāхум тāн поститахтынэ̄ныл урыл вос номсэ̄гыт, вильтаныл кантыӈыг вāрим. Сōль нāнанн лāвēгум: тāн тāнти мӯйлупсаныл висаныл.17 Ос наӈ хунь поститахтэ̄гын, пуӈкын хот-сартлэ̄лын ос вильтын хот-ловтэ̄лын.18 Поститахтым наӈ тах мир э̄лы-пāлн хунь нэ̄глэгы̄н, наӈ наӈти сытамы̄г ōлнэ Āсин э̄лы-пāлн ёхтэгы̄н. Наӈ Āсин, сытамыг ōлнэ вāрмаль сунсым, наӈын тах мӯйлуптытэ”.
19 ”Ты ōлнэ мāт сака тыныӈ утыт ул атэ̄н, хōт хāхытн ос харӈайн тэ̄вет ос тулмантыт сялтэ̄гыт ос тулмантыяныл.20 Ос тōрумт тыныӈ утыт атэ̄н, хōт хāхытн ос харӈайн ат тэ̄вет ос тулмантыт ат сялтэ̄гыт ос ат тулмантыяныл.21 Таимāгыс хōт нāн сака тыныӈ утанын ōлэ̄гыт, тот ос нāн сымын ōлуӈкве паты”.
22 ”Самыг алпи постын мāгыс ōлэ̄г. Таимāгыс, наӈ самагын сыстамыг ке ōлэ̄г, тōнт наӈ алпин янытэ̄т посыӈы̄г ос та ōлы.23 Наӈ самагын лю̄лиг ке ēмтэг, тōнт наӈ алпин янытэ̄т сэ̄млыг та ēмты. Ань наӈ кӣврынт пос сэ̄млыг ке ēмты, ос турман тай манхурипа!
24 Нэ̄мхотъют кит кӯсяйн аквторыг лусытаӈкве ат вēрми: акватэ лāвыл нэ̄глуӈкве патытэ, ос мōтанэ э̄руптаӈкве. Э̄рыӈ акв кӯсяēн вēськатыг, мōтанэ̄н тōпалыг лусытаӈкве паты. Тōрумн ос сюнин аквторыг лусытаӈкве нāн ат вēрмегы̄н”.
25 ”Таимāгыс нāнанн ты лāвēгум: нāнти ōлупсан мāгыс пилым ул номсэ̄н, мāныр нāнан тэ̄ӈкве ос аюӈкве, алпин урыл ос ул номсэ̄н, мāныр маснутыл масхатуӈкве. Ōлупсан тэ̄нутыл яныгнув āти ос алпин – маснутыл?26 Товлыӈ ӯйт нупыл āӈкватэ̄н: тāн колас пум ат ӯнттэ̄гыт, колас ат сāгрēгыт, колас пум акван ат атэ̄гыт, ос нāн тōрум Āсин тāн тыттавет. Нāн ман тāнанылныл тыныӈнувет āти?27 Ос сāвсыр сори вāрим нэ̄мхотъютын такви нотэ сяр ат сāвмалтытэ.28 Ос маснут урыл манрыг номсэгы̄н? Сунсэ̄н, хумус тэ̄пкан лӯптат яныгмēгыт: тāн ат рупитэ̄гыт, ат тахтэ̄гыт, понэ̄гыт.29 Ам нāнанн лāвēгум: Соломон таквинатэ янытлыматэ порат тох лӯптат хольт нё̄тнэг ат масхатас.30 Тōрумн тэ̄пкан лӯптат тох ке маставет, тāн тыхōтал лылыӈыт – холытан нāйн воськасавет, нāн, мосься агтнэ утыт, усьпыл ёмаснувēг маставēн!31 Ос ул ӯргалахтэ̄н, ул лāвен: ‘Мāныр мāнавн тэ̄ӈкве?’ ман: ‘Мāныр аюӈкве?’ ман: ‘Мāнарыл масхатуӈкве?’32 Пуссын тамле ут Тōрум ат вāнэ мāхум кинсэ̄гыт, ос нāн тōрум Āсин вāгтэ, нāнанн тыи пуссын э̄ри.33 Сāртын Тōрум йильпи нот ос Тав вēськат ōлнэ вāрмалянэ кинсэ̄н, ос тах тыи пуссын ōс нāн палтын ёхты.34 Холытан ēмтнэ хōтал мāгыс пилым ул номсэ̄н, холытан хōтал таквинāтэ такви ӯргалытэ. Кāсыӈ хōтал такви ӯргалан вāрмале тōвылхаты тах”.
Глава 6
