Choose Language
Old Testament Books
New Testament Books
view with a second Bible
1 Хунь Ӣсус мир кāсалас, тōнт Тав урын хāӈхыс; хунь ёл-ӯнтыс, Тав палтэ ханисьтахтын хумиянэ ёхтысыт.2 Ос Тав тāнаныл ханисьтаӈкве патыс ос потыртас:3 ”Тāит сōтыӈыт, хотъютыт Тōрум э̄лы-пāлт тāнти нуса ōлупсаныл мāк вāганыл, Тōрум йильпи нот тāнанылн маим ōлы.4 Кāстāл хōтпат сōтыӈыт, тāн сыманыл ся̄гтым торамтавет тах.5 Нёмса хōтпат сōтыӈыт, тāнанылн тах мā э̄лаль паты.6 Вēськат вāрмаль киснэ ос сымāныл э̄тгалан хōтпат, тāн пōйтнэ̄г та тэ̄гыт тах.7 Мōт мир сāлитан хōтпат – тāн ты сōтыӈыт, Тōрумн тāн сāлитавет.8 Сыстам сымпа мир – тāн ты сōтыӈыт, тāн тах Тōрум кāсалэ̄гыт.9 Сōтыӈыт тāит, хотъютыт мир халт роттыг ōлнэ вāрмаль э̄лаль тотэ̄гыт, тāн Тōрум ня̄врамыты̄г лāвим ōлэ̄гыт.10 Вēськат вāрмаль мāгыс ня̄влын мир – тāн ты сōтыӈыт, тōрум йильпи нот тāн палтаныл ты ōлы тах.11 Нāн сōтыӈыт, хунь тах нāн ля̄выльттаӈкве ос хот-ня̄влуӈкве патавен ос Ам мāгсылум лю̄ль урккыӈ лāтӈыл лāвуӈкве нāн патавен.12 Ся̄гтēн ос кāс вāрēн, ань нāн мāгсылын тōрумт яныг мӯйлупса ēмты: тох Тōрум лāтыӈ тотнэ хумит нāн э̄лы-пāлынт ōс хот-ня̄влувлалвēсыт”.
13 ”Нāн мā солвал. Солвал ё̄рэ ке хот-холы, тōнт ос хумус таве солвалыӈыг вāрилы̄н? Тав нэ̄матры̄г атпыл хōйхаты. Тав мир лāгыл ёлы-пāлн хот-вуськасаве.14 Нāн мир мāгыс посыг ōлэ̄гы̄н. Ур алат ӯнлын ӯс хот-тӯйтхатаӈкве ат вēрми.15 Хунь исвеся пēламтаве, тав āны ёлы-пāлн ат тӯсьтаве, исвеся āны тармыл тӯсьтаве ос кол кӣвырт пуссын мир мāгыс тав посты.16 Ос тасир мир э̄лы-пāлт нāн посы̄н вос посты, тāн нāн ёмас вāрмалянын вос кāсалыяныл ос нāн тōрумт ōлнэ Āсин вос э̄сгыяныл тах”.
17 ”Нāн ул номсэ̄н, Ам Сāккон ман ос Тōрум лāтыӈ тотнэ хумит лāтӈаныл мōт сирыл вāруӈкве ёхтысум; Ам тāнаныл мōтсир вāрнэ мāгыс хунь ёхтысум, тāнаныл вāрнэ мāгыс Ам ёхтысум.18 Мāк нāнанн ты лāвēгум: мā ос тōрум ōлнэтэ̄н мус сяр акв мāнь пуква, манос сюртмил Сāккон нэ̄пакныл хот ат виве. Пуссын ēмтуӈкве э̄ри.19 Хотъют аквман сяр мāнь сāккон лāтыӈ оссувлытэ ке ос мир тох ханисьты ке, таи тах Тōрум йильпи нотыт сяр мāниг намтаве. Ос хотъют Сāккон сирыл вāри ос ханисьты, таи тах Тōрум йильпи нотт янгы̄г та лāвавэ.20 Ам нāнан ты лāвēгум, нāн вāрмалянын Сāккон ханисьтан хумитныл ос фарисейтныл вēськатыг ат ке патэ̄гыт, тōнт нāн Тōрум йильпи нотын ат сялтэ̄гын”.
21 ”Нан хӯлыгласын, хумус нāн āсянын ханисьтавес: ‘Ул алэ̄н’, ос ‘хотъют алы, таи сутытаӈкве э̄ри’.22 Ос Ам нāнанн ты лāвēгум, хотъют юрте ля̄льт кантлы, таи сутытаӈкве э̄ри. Хотъют такви юрте ля̄льт лāви: ‘оссам’, таи синедрион*а сутыл сутытаӈкве э̄ри, ос хотъют лāви: ‘китхал патум ут’, таи турман мā нāйн тэ̄ӈкве э̄ри.23 Наӈ наӈти мӯйлупсан йирхатнэ мāн ке тотылын ос тот та номылматэ̄гын, наӈ юртын наӈ ётын кантмалтахтым ōлы,24 наӈти тотнэ мӯйлупсан йирхатнэ мā э̄лы-пāлт хультуптэ̄лын, тувыл ос минэн, сāртын юртын ёт ёмасмахтэн, тōнт усь ёхтэн ос наӈти йирын тотэ̄лн.25 Наӈ ётын халыӈыг ōлнэ хōтпан ёт моляхнув ёмасмахтэн лё̄ӈх хосыт сутн миннэ̄н торыг, тав наӈын сутытан хум палт ул вос тотытэ тах, ос сутытан хум наӈын кāрвыльтан хумын ул вос мистэ, наӈ кāснаколн ул вос ӯнттувēсын.26 Мāк наӈын ты лāвēгум: юи-ōвыл кодрант*б ойтнэн мус кон тах ат квалэ̄гын”.
27 ”Нāн хулыглалыслы̄н, хумус нāн āсянын ханисьтавес: ‘Нэ̄г-хумы̄г халн ул сялтэ̄н’.28 Ос Ам нāнанн лāвēгум: хотъют нэ̄ нупыл таӈхим сунсы, тав нэ̄г-хумы̄г халн сымет та сялтыс.29 Ёмаспāл самын наӈын карек вāруӈкве хуйтытэ ке, хот-манумтэ̄лын, наӈкинāныл таве пōхан воськасэ̄лын; наӈ мāгсылын тыи ёмаснуве, матыр наӈти алпи лōмтын вос хот-порсы, пуссын алпи-харын ул вос турман мāн мины.30 Ос нāӈ ёмаспāл кāтын карек вāруӈкве хуйтавен ке, таве хот-саграпēлын ос наӈтинāныл хот-воськасэ̄лын. Наӈ мāгсылын ёмаснув матыр наӈти алпи лōмтын вос хот-порсы, пуссын алпи-харын ул вос турман мāн паты тах”.
31 ”Лāвим ос ōлы: ‘Хотъют такви нэ̄тэ ёт китты̄г ке мины, нэ̄тэн китты̄г миннэ нэ̄пак хум вос хансы тах’.32 Ос Ам нāнанн лāвēгум: хотъют нэ̄тэ мори мōт хум ёт хайтнэ вāрмаль ат ке ōньси, ос та хум нэ̄тэ ёт киттыг мины, тав нэ̄тэ тах лю̄ль сирыл э̄руптахтын вāрмалин мāгыртытэ. Ос хотъют ōйкатэ ёт киттыг минам нэ̄ э̄кваг ке тоты, та хум ос лю̄ль сирыл э̄руптахтын вāрмалин та паты”.
33 ”Ос нāн хӯлыгласлын, хумус нāн āсянын лāввес: ‘Тāк лāтыӈ Тōрум намыл лāвēгын ке, таи вāрелын’ ос ‘наӈ тāк лāтӈын Кӯсяй э̄лы-пāлт ювле ул воратэн’.34 Ос Ам нāнанн лāвēгум: тāк лāтыӈ нэ̄мхуньт ул лāвēн: нуми тōрум ёт лāтыӈ ул маēн, нуми тōрум – таи Тōрум Хōн-пасан.35 Мā ёт тāк лāтыӈ ул маēн, мā – Тав лāглаге лю̄льнэ мāге. Иерусалимныл тāк лāтыӈ ōс ул лāвēн, тав яныг Хōн ӯс ты.36 Наӈти пуӈкыныл тāк лāтыӈ ул лāвēн, сяр акв атын войканыг ман ос сэ̄млыг вāруӈкве ат вēрмилын.37 Ос лāвегы̄н тах: ‘Сōль, сōль’, ман ‘āти, āти’, ос ты коны-пāл лāтыӈ, таи кульныл ōлнэ лāтыӈ”.
38 ”Нāн хӯлыгласлын, лāвим ōлы май: ‘Сам мāгыс сам, пуӈк мāгыс пуӈк’.39 Ам нāнанн лāвēгум: кантныл пōхан ул воратэ̄н. Хотъютын ёмаспал пāйтын ю̄ныгтавен, тагин мōтпал пāйтын тӯсьтэ̄лын.40 Ос хотъют наӈ ётын сутытахтуӈкве тахмаи, наӈ супын хот виӈкве тахмаи, наӈ тавēн нуми маснутын ōс маēлн.41 Ос хотъют наӈын акв вēрста такви ётэ ё̄муӈкве лāви, наӈ тав ётэ кит вēрста ё̄мен.42 Наӈынныл матыр вōвнэ хōтпа маēлын, наӈыныл матыр сāймилаг виӈкве хōтпа тахмаи, сысы ул ё̄ӈхен.
43 Нāн хӯлыгласлын, хумус лāвим ōлы: ‘Ляпа хōтпан э̄руптэ̄лын ос нуртотнэ хōтпа лāвыл нэ̄глэ̄лын!’.44 Ос Ам нāнанн лāвēгум: нāнти нуртотнэ хōтпанн э̄руптэлы̄н, нāн юи-пāлынт койгалан мāхум мāгыс пōйксēн.45 Тасир ты тах нāнти Тōрум Āсин ня̄врамыты̄г патэгы̄н, алам Тав ты хōтал лāвитэ ёмас ос кантыӈ хōтпат нуми-пāлт ё̄ӈхуӈкве, ракв вит вēськат ос вēськаты̄г ōлтāл хōтпатн кēтытэ.46 Хотъютыт нāнанн э̄руптэ̄гыт, таит нāн ос э̄руптаӈке патэгы̄н, тōнт ос мāныр мāгыс нāнанн мӯйлупсал мӯйлуптаӈкве тах? Пōт атнэ мāхум ман ос тысир ат вāрēгыт?47 Ос ман туп нāнти руманын ёт пасяӈ вӣльтыл ке сунсхатэгы̄н, тысир нāн ман матыр таквисыр вāрмаль вāрегы̄н-а? Тōрум ат вāнэ мāхум ман ōс аквтох ат вāрēгыт?48 Таимāгыс нāн ос ёмасыг ōлэ̄н, хумус нāн Тōрум Āсин ёмасыг ōлы”.
*а 22 5:22 синедрион – сяр яныг еврей сут вāрнэ кол
*б 26 5:26 кодрант – мāнь олнкер
Глава 5
