Choose Language
Old Testament Books
New Testament Books
view with a second Bible
1 Тōнт Ялпыӈ Лылын Ӣсус мир ōлтāл мāн тотвес, тот я̄волн*а āрталан мāгыс.2 Налыман хōтал ос налыман э̄т тэ̄п тāл ōлметэ юи-пāлт сыме сака э̄тгалавес.3 Тав палтэ я̄вол ань та ёхтыс ос лāвыс: ”Наӈ ань ке Тōрум Пы̄г, лāвен, ты āхвтасыт ня̄ниг вос ēмтэ̄гыт”.4 Тав ос ювле-лāвыс: ”Хансым ōлы: ‘Акв ня̄нил э̄лумхōлас туп хунь ōлы, тавēн Тōрум лāвнэ кāсыӈ лāтыӈ э̄ри’”.5 Тувыл я̄волн Тав ялпыӈ ӯсын тотаве, ялпыӈ кол алан тӯсьтаве,6 Ос Тавēн лāвыс: ”Наӈ Тōрум Пы̄г ке, мāн ёл-вуськасахтэн. Хансым май ōлы: ‘Такви Ангеланэ̄н Наӈ урынт лāви, кāтыл пувим Наӈын вос тотыяныл, Наӈ лāглагын āхвтасын ул вос хōиглэ̄г’”.7 Ӣсус тавēн лāвыс: ”Ос лāвима: ‘Кӯсяйн, наӈ Тōрмын ул āрталэ̄лн’”.8 Ос я̄волын яныг карыс урын тотаве, тавēн пуссын мā тарм ōлнэ хōн-мāт ос тāн янытлапаныл хӯлтыглы,9 ос Тавēн лāвыс: ”Тыи пуссын Наӈын мыганум, Āнумн ке сāнспуӈкыл ӯнлым пуӈк хӯтылтэ̄гын”.10 Тōнт Ӣсус тав нупылэ лāвыс: ”Сатана, пōхан минэн; Тōрум нэ̄пакыт*б хансым май ōлы: ‘Кӯсяйн, наӈ Тōрмын пуӈк хӯтылтаӈкве ос туп Тавēн лусытаӈкве э̄ри’”.11 Тōнт я̄вол пōхан та минас, – тувыл та, Ангелыт ляпамасыт ос Тавēн лусытасыт.
12 Хунь Ӣсус Иоан кāснаколн ӯнттыматэ урыл хӯлыстэ, Тав Галилея мāн та минас.13 Тав Назарет оссувлас ос ся̄рысь вāтат ōлнэ Капернаум нампа ӯсн, Завулон ос Неффалим рӯт нампа ēрт ты ōлмыгтас.14 Тох та ēмтыс, хумус Кӯсяй такви лāтыӈ тотнэ хум Исая сирыл лāвыс:15 ”Завулон мā ос Неффалим мā, ся̄рысь нупыл миннэ лё̄ӈх, Иордан я̄ та палт ōлнэ мā ос Галилея, Тōрум ат вāнэ мāхум мā –16 турман мāт ӯнлын мир яныг пос кāсалас, турман сорум мāт ӯнлын мир мāгыс пос нэ̄глыс”.17 Та пāсныл Ӣсус потыртаӈкве патыс: ”Тōрум нупыл ё̄ӈхēн, Тōрум йильпи нот ляпан ты ёхтыс”.
18 Галилея ся̄рысь вāта пōхат ё̄мнэтэ мус Тав кит каӈкыг-āпсииг кāсалас, Симон, тав Пēтры̄г лāввес, ос тав ягпыге Андрей. Тэ̄н хӯлпыл ся̄рысьт хул алысьласыг; тэ̄н хӯлупъян хōтпаг ōлсы̄г.19 Ӣсус тэ̄н нуплэн лāвыс: ”Ам юи-пāлумт йиēн, ос Ам нэ̄нанн э̄лумхōлас пувнэ хумы̄г вāриягум”.20 Тэ̄н тāра хӯлпēн хультуптастэ̄н, Тав юи-пāлэт та минмыгтасы̄г.21 Тувыл э̄лаль миныманыл Тав мōт кит āпсииг-каӈкыг кāсалас, Зеведей пы̄г Яков ос Иоан, тав ягпыге. Тэ̄н Зеведей āсен ёт хāп кӣвырт хӯлпен ю̄нтсым ӯнлысы̄г, ос тэ̄натэ̄н вōвсаге.22 Тэ̄н тāра хāпен ос āсēн та хультуптасы̄г, Тав юи-пāлэт та минмыгтасы̄г.
23 Ос тасир Ӣсус Галилея мā янытэ̄т яласас, синагогатт*в мир ханисьтас, Ёмас Ля̄ххал Тōрум йильпи нот урыл тотым, сāвсыр āгвм ос тāрвит мир халт та пусмалтас.24 Тав урет Сирия мā янытэ̄т лāтыӈ та минас. Ос Тав палтэ пуссын āгвмыӈ мир тотсаныл: сāвсыр āгвмытн ос кулитн пувим, лунатикыг ōлнэ мāхум ос нёвумтаттāл мāхум пуссын Тав та пусмалтасанэ.25 Тав юи-пāлэт сāв мир та нё̄рыглалсыт: Галилея ос Десятиградия мāныл, Иерусалимныл, Юдея мāныл ос Иордан я̄ та пāлныл.
*а 1 4:1 я̄вол – ты русь лāтӈыл дьявол
*б 10 4:10 Тōрум нэ̄пак – ты русь лāтӈыл Писание
*в 23 4:23 синагога – еврей пōйксян кол
Глава 4
